Sirbi Jehova Cu Goso di Curason

“Tur e maldicionnan aki siguramente lo bini riba bo . . . debí n’e echo cu bo no a sirbi Jehova bo Dios cu alegria i cu goso di curason.”​—⁠DEUTERONOMIO 28:​45-47.

1. Ki evidencia tin cu esnan cu ta sirbi Jehova ta gososo, unda cu nan ta sirbi’é?

JEHOVA su sirbidornan ta gososo, sea cu nan ta haciendo su boluntad den cielu of riba tera. “Streanan [angelical] di mainta” a sclama gososamente ora e tera a ser fundá, i indudablemente cu goso e miriadanan di angel celestial ‘ta cumpli cu e palabra di Dios.’ (Job 38:​4-7; Salmo 103:20) Jehova su Yu unigénito tabata un “obrero maestro” gososo den cielu i a haña deleite den hacimentu dje boluntad divino como e homber Jesucristo riba tera. Ademas, “p’e goso cu a ser poní su dilanti el a wanta un staca di tormento, despreciando bergwensa, i a sinta na man drechi dje trono di Dios.”​—⁠Proverbio 8:​30, 31; Hebreo 10:​5-10; 12:⁠2.

2. Kico a determiná si e israelitanan lo a experenciá sea bendicion of maldicion?

² E israelitanan a experenciá goso ora nan a agradá Dios. Pero kico si nan a desobedec’é? Nan a ser spiertá: “[Maldicionnan] tin cu sigui riba bo i riba bo desendencia como un señal i un indicacion profético pa tempu indefiní, debí n’e echo cu bo no a sirbi Jehova bo Dios cu alegria i cu goso di curason p’e abundancia di tur cos. I lo bo tin cu sirbi bo enemigunan cu Jehova lo manda contra bo cu hamber i sed i desnudes i e falta di tur cos; i e siguramente lo pone un yugo di heru riba bo garganta te ora el a eliminá bo.” (Deuteronomio 28:​45-48) Bendicion i maldicion a haci cla ken tabata Jehova su sirbidor i ken no. Tal maldicionnan tambe a duna prueba cu hende no por burla dje principionan i propósitonan di Dios, tampoco nan por despreciá nan. Debí cu e israelitanan a nenga di haci caso di Jehova su spiertamentunan di desolacion i exilio, Jerusalem a bira “un maldicion dilanti tur e nacionnan dje tera.” (Jeremías 26:⁠6) P’esei laga nos obedecé Dios i disfrutá di su fabor. Goso ta un dje hopi bendicionnan divino cu hende piadoso ta experenciá.

Con pa Sirbi Cu “Goso di Curason”

3. Kico ta e curason figurativo?

³ E israelitanan mester a sirbi Jehova “cu alegria i goso di curason.” Dios su sirbidornan di tempu moderno mester haci mescos. Alegrá ta nificá “ser contentu; ser yená cu goso.” Aunke e curason físico ta ser mencioná den e Scritura, e no ta pensa of razoná literalmente. (Exodo 28:30) Su funcion principal ta pa pomp e sanger cu ta alimentá e celnan di curpa. Sin embargo, den e gran mayoria di caso, Bijbel ta referí n’e curason figurativo, cua ta mas cu e asiento di afecto, motivacion i intelecto. Ta ser bisá cu e ta representá “e parti central en general, e parti paden, i asina ta representá e hende interior manera e ta manifestá su mes den tur su vários actividadnan, den su deseonan, su afecto, emocionnan, pasionnan, propósitonan, su pensamentunan, percepcionnan, imaginacionnan, su sabiduria, conocimentu, abilidad, su creencianan i su razonamentunan, su memoria i su conciencia.” (Journal of the Society of Biblical Literature and Exegesis, 1882, página 67) Nos curason figurativo ta enbolbé nos sintimentu i emocionnan, incluyendo goso.​—⁠Juan 16:⁠22.

4. Kico por yuda nos sirbi Jehova Dios cu goso di curason?

⁴ Kico por yuda nos sirbi Jehova cu goso di curason? Un punto di bista positivo i apreciativo di nos bendicionnan i privilegionan duná dor di Dios ta probechoso. Por ehempel, nos por refleccioná gososamente riba nos privilegio di rindi “sirbishi sagrado” n’e Dios berdadero. (Lucas 1:74) Relacioná cu esei tin e privilegio di carga Jehova su nomber como su Testigonan. (Isaías 43:​10-12) Na esaki nos por agregá e goso di sa cu siguiendo e Palabra di Dios nos ta agradand’e. I ki un goso tin den reflehá lus spiritual i asina yuda hopi hende sali for di scuridad!​—⁠Mateo 5:​14-16; compará cu 1 Pedro 2:⁠9.

5. Kico ta e fuente di goso piadoso?

⁵ Sin embargo, sirbiendo Jehova cu goso di curason no ta djis un asuntu di pensamentu positivo. Ta beneficioso pa tin un punto di bista positivo. Pero goso piadoso no ta algu cu nos ta producí dor di desaroyo di caracter. E ta un fruta di Jehova su spiritu. (Galatio 5:​22, 23) Si nos no tin tal goso, kisas nos tin cu haci algun ahuste afin di evitá di pensa of actua den un of otro manera no-bíblico cu por haci Dios su spiritu tristu. (Efesio 4:30) Sin embargo, como hende dedicá na Jehova, laga nos no tene miedu cu un falta di goso di curason na algun ocasion ta evidencia di desaprobacion divino. Nos ta imperfecto i sometí na picá, tristesa, i asta depresion tin biaha, pero Jehova ta comprendé nos. (Salmo 103:​10-14) P’esei laga nos resa pidi pa su spiritu santu, cordando cu su fruta di goso ta unu cu Dios ta duna. Nos Tata celestial amoroso lo contestá tal oracionnan i lo haci posibel pa nos sirbi’é cu goso di curason.​—⁠Lucas 11:⁠13.

Ora Nos Ta Falta Goso

6. Si nos ta falta goso den nos sirbishi na Dios, kico nos mester haci?

⁶ Si nos ta falta goso den nos sirbishi, cu tempu nos por mengua nos celo den sirbi Jehova of asta resultá infiel na dje. P’esei, lo ta sabí pa humildemente i cu oracion considerá nos motivacionnan i haci ahustenan necesario. Pa haña goso cu Dios ta duna, nos mester sirbi Jehova motivá pa amor i cu henter nos curason, alma i mente. (Mateo 22:37) Nos no mester sirbi cu un actitud competitivo, pasobra Pablo a skirbi: “Si nos ta biba pa spiritu, laga nos sigui cana ordenadamente tambe pa spiritu. Laga nos no bira egotista, instigando competencia un cu otro, envidiando otro.” (Galatio 5:​25, 26) Nos lo no tin berdadero goso si nos ta sirbiendo pasobra nos kier sobresalí riba otronan of ta buscando elogio.

7. Con nos por rebibá nos goso di curason?

⁷ Tin goso den cumpli cu nos dedicacion na Jehova. Tempu nos tabata recien dedicá na Dios, nos celosamente a cuminsá riba e caminda di bida cristian. Nos a studia e Scritura i a participá regularmente den e reunionnan. (Hebreo 10:​24, 25) Participacion den e ministerio a duna nos goso. Pero, kico si nos goso a mengua? Studio di Bijbel, asistencia na reunion, participacion den e ministerio​—⁠en realidad, enbolbimentu completo den tur aspecto di cristianismo​—⁠mester duna nos bida stabilidad spiritual i rebibá tantu e amor cu nos tabatin na principio como nos goso di curason di ántes. (Revelacion 2:⁠4) E ora ei nos lo no ta manera algun cu no tin masha goso i cu hopi biaha ta den necesidad di yudansa spiritual. Ancianonan ta contentu pa yuda, pero nos individualmente mester cumpli cu nos dedicacion na Dios. Ningun otro hende por haci esaki pa nos. P’esei laga nos haci’é nos meta pa sigui e rutina cristian normal afin di cumpli cu nos dedicacion na Jehova i haña e berdadero goso.

8. Pakico un concenshi limpi ta importante si nos kier ta gososo?

⁸ Si nos kier tin e goso cu ta un fruta di Dios su spiritu, nos mester tin un concenshi limpi. Tanten cu Rey David di Israel a purba sconde su picá, e tabata infelis. Realmente, e humedad di su bida a parce di evaporá, i kisas e por a bira físicamente malu. Ki un alivio el a haña ora el a repentí i confesá! (Salmo 32:​1-5) Nos no por ta gososo si nos ta scondiendo un picá serio. Esei por wel haci nos hiba un bida molestiá. Siguramente, esei no ta e manera pa experenciá goso. Pero confesion i repentimentu ta trece alivio i e restoracion di un spiritu gososo.​—⁠Proverbio 28:⁠13.

Sperando Cu Goso

9, 10. (a) Ki promesa Abraham a ricibí, pero con su fe i goso talbes a ser poné na prueba? (b) Con nos por beneficiá dje ehempelnan di Abraham, Isaac i Jacob?

⁹ Ta un cos pa haña goso ora nos na principio a siña tocante e propósito divino pero ta henteramente un otro cos pa keda gososo segun cu añanan ta pasando. Esaki por ser ilustrá den e caso di fiel Abraham. Despues cu el a intentá na sacrificá su yu Isaac segun e mandamentu di Dios, un angel a transmití e mensahe aki: “ ‘Pa mi mes di berdad mi ta hura,’ ta e expresion di Jehova, ‘cu pa motibu dje echo cu bo a haci e cos aki i cu bo no a retené bo yu, bo único, siguramente lo mi bendicioná bo i siguramente lo mi multiplicá bo desendencia manera e streanan di cielu i manera e pipitanan di santu cu ta na oriya di laman; i bo desendencia lo tuma posesion dje porta di su enemigunan. I mediante bo desendencia tur e nacionnan dje tera siguramente lo bendicioná nan mes debí n’e echo cu bo a scucha mi bos.’ ” (Génesis 22:​15-18) Indudablemente, Abraham a abundá cu goso n’e promesa aki.

¹⁰ Abraham talbes a spera cu Isaac lo tabata e “desendencia” mediante ken e bendicionnan primintí lo a bini. Pero e pasamentu di añanan sin cu nada maraviyoso a cumpli mediante Isaac, talbes a pone e fe i goso di Abraham i su famia na prueba. Dios su confirmacion dje promesa na Isaac i mas despues na su yu Jacob a sigurá nan cu e binimentu dje Desendencia ainda tabata pa futuro, i esaki a yuda nan mantené nan fe i goso. Sin embargo, Abraham, Isaac i Jacob a muri sin mira e cumplimentu di Dios su promesanan na nan, pero nan no tabata sirbidornan di Jehova sin goso. (Hebreo 11:13) Nos tambe por sigui sirbi Jehova cu fe i goso miéntras nos ta spera e cumplimentu di su promesanan.

Goso Apesar di Persecucion

11. Pakico nos por ta gososo apesar di persecucion?

¹¹ Como sirbidornan di Jehova, nos por sirbi Jehova cu goso di curason, maske nos ta sufri di persecucion. Jesus a pronunciá felis esnan cu ta ser persiguí pa su causa, i apostel Pedro a bisa: “Sigui alegrá ya cu boso ta participante den e sufrimentunan di Cristo, pa boso por alegrá i abundá cu goso tambe durante e revelacion di su gloria. Si boso ta ser reprochá p’e nomber di Cristo, boso ta felis, pasobra e spiritu di gloria, asta e spiritu di Dios, ta descansando riba boso.” (1 Pedro 4:​13, 14; Mateo 5:​11, 12) Si bo ta wantando persecucion i sufrimentu p’e causa di husticia, bo tin Jehova su spiritu i aprobacion, i esei siguramente ta promové goso.

12. (a) Pakico nos por enfrentá pruebanan di fe cu goso? (b) Ki les básico nos por siña for dje caso di un cierto levita den exilio?

¹² Nos por enfrentá pruebanan di fe cu goso pasobra Dios ta nos Refugio. Esaki ta ser hací bisto den Salmo 42 i 43. Pa un of otro motibu, un cierto levita tabata den exilio. El a sinti asina tantu falta di adoracion n’e santuario di Dios cu el a sinti su mes manera un biná hembra yen di sed, cu ta anhelá pa awa den un region secu i infértil. E “tabatin sed,” of a anhelá, pa Jehova i p’e privilegio di adorá Dios na Su santuario. (Salmo 42:​1, 2) E experencia dje exiliado aki mester conmové nos pa mustra gratitud p’e asociacion cu nos ta disfrutá di dje cu Jehova su pueblo. Si un situacion manera encarcelacion debí na persecucion temporalmente ta prevení nos di ta huntu cu nos rumannan, laga nos refleccioná riba gosonan di pasado cu nos tabatin huntu den sirbishi sagrado i resa pa awante miéntras nos “ta spera pa Dios” restorá nos na actividad regular huntu cu su adoradornan.​—⁠Salmo 42:​4, 5, 11; 43:​3-5.

“Sirbi Jehova Cu Alegria”

13. Con Salmo 100:​1, 2 ta mustra cu goso mester ta un rasgo prominente di nos sirbishi na Dios?

¹³ Goso mester ta un rasgo prominente di nos sirbishi na Dios. Esaki a ser mustrá den un melodia di gradicimentu den cua e salmista a canta: “Grita den triunfo na Jehova, boso tur dje tera. Sirbi Jehova cu alegria. Drenta dilanti dje cu un sclamacion gososo.” (Salmo 100:​1, 2) Jehova ta “e Dios felis” i kier pa su sirbidornan haña goso den cumpli cu nan obligacionnan asociá cu nan dedicacion na dje. (1 Timoteo 1:11) Hende di tur nacion mester hubilá den Jehova, i nos expresionnan di alabansa mester ta fuerte, mescos cu e ‘gritu di triunfo’ di un ehército victorioso. Ya cu sirbishi na Dios ta refrescante, e mester ta compañá cu alegria. P’esei, e salmista a urgi hende pa drenta den Dios su presencia “cu un sclamacion gososo.”

14, 15. Con Salmo 100:​3-5 ta aplicá na Jehova su pueblo gososo awe?

¹⁴ E salmista a agregá: “Sabi [reconocé, admití] cu Jehova ta Dios. E ta esun cu a traha nos, i no nos mes. Nos ta su pueblo i e carnénan di su sabana.” (Salmo 100:⁠3) Siendo cu Jehova ta nos Creador, e ta nos doño mescos cu un wardador ta doño di su carnénan. Dios ta percurá asina bon pa nos cu nos ta alab’é cu gratitud. (Salmo 23) En cuanto Jehova, e salmista a canta tambe: “Drenta den su portanan cu gradicimentu, den su pationan cu alabansa. Duna gradicimentu na dje, bendicioná su nomber. Pasobra Jehova ta bon; su bondad amoroso ta pa tempu indefiní, i su fieldad di generacion pa generacion.”​—⁠Salmo 100:​4, 5.

¹⁵ Awe, hende gososo di tur nacion ta drentando e pationan dje santuario di Jehova pa ofrecé gradicimentu i alabansa. Gososamente nos ta bendicioná e nomber di Dios dor di semper papia bon di Jehova, i su cualidadnan magnífico ta conmové nos pa alab’é. E ta henteramente bon, i nos semper por dependé riba su bondad amoroso of consideracion compasivo pa cu su sirbidornan, pasobra nan ta sigui pa tempu indefiní. Di “generacion pa generacion,” Jehova ta fiel den mustra amor pa cu esnan cu ta haciendo su boluntad. (Romano 8:​38, 39) Siguramente, anto, nos tin bon motibu pa “sirbi Jehova cu alegria.”

Alegrá den Bo Speransa

16. Den ki speransa i prospectonan cristiannan por alegrá?

¹⁶ Pablo a skirbi: “Alegrá den e speransa.” (Romano 12:12) Siguidornan ungí di Jesucristo ta alegrá den e glorioso speransa di bida celestial inmortal cu Dios a haci disponibel pa nan mediante su Yu. (Romano 8:​16, 17; Filipense 3:​20, 21) Cristiannan cu e speransa di bida eterno den Paradijs riba tera tambe tin base pa alegrá. (Lucas 23:43) Tur Jehova su fiel sirbidornan tin motibu pa alegrá den e speransa di Reino, pasobra sea nan lo ta parti dje gobiernu celestial ei of nan lo biba den su dominio terenal. Ki un bendicion gososo!​—⁠Mateo 6:​9, 10; Romano 8: 18-21.

17, 18. (a) Kico a ser profetisá na Isaías 25:​6-8? (b) Con e profecia aki di Isaías ta ser cumplí awor, i kico di su cumplimentu den futuro?

¹⁷ Isaías tambe a profetisá di un futuro gososo pa humanidad obediente. El a skirbi: “Jehova di ehércitonan siguramente lo prepará pa tur pueblo, den e ceru aki, un bankete di plato cu hopi zeta, un bankete di biña mantení riba sedimentu cachi-cachi, di plato cu hopi zeta, yená cu tuti di wesu, di biña mantení riba sedimentu, filtrá. I den e ceru aki e siguramente lo traga e cara dje enboltura cu ta lora rond di tur pueblo, i e obra di vlegtu cu ta di vlegtu den otro riba tur e nacionnan. E realmente lo traga morto pa semper, i e Señor Soberano Jehova siguramente lo limpia e lágrimanan for di tur cara. I e reproche di su pueblo lo e kita di tur e tera, pasobra Jehova mes a papi’é.”​—⁠Isaías 25:​6-8.

¹⁸ E bankete spiritual cu nos ta participá aden awe como Jehova su adoradornan ta un bankete gososo en berdad. Realmente, nos goso ta abundá segun cu nos ta sirbi Dios celosamente den anticipacion dje bankete di bon cosnan literal cu el a primintí p’e mundu nobo. (2 Pedro 3:13) Riba e base dje sacrificio di Jesus, Jehova lo kita “e obra di vlegtu” cu ta cubri humanidad debí n’e picá di Adam. Lo ta ki un goso pa mira picá i morto ser kitá! Ki un deleite pa duna bon biní na sernan kerí cu a resucitá, pa nota cu lágrimanan a desparcé, i pa biba riba un tera paradísico, caminda Jehova su pueblo lo no ser reprochá sino lo a duna Dios un contesta p’e gran mofador, Satanas e Diabel!​—⁠Proverbio 27:⁠11.

19. Con nos mester reaccioná n’e prospectonan cu Jehova a pone dilanti nos como su Testigonan?

¹⁹ Sabiendo kico Jehova lo haci pa su sirbidornan no ta yená bo cu goso i gratitud? En berdad, tal prospectonan magnífico ta contribuí na nos goso! Ademas, nos speransa bendicioná ta pone nos acudí na nos Dios felis, amoroso i generoso cu sintimentunan manera esakinan: “Mira! Esaki ta nos Dios. Nos a spera den dje, i lo e salba nos. Esaki ta Jehova. Nos a spera den dje. Laga nos ser gososo i alegrá den e salbacion mediante dje.” (Isaías 25:⁠9) Cu nos speransa sublime firmemente fihá den mente, laga nos dirigí vigorosamente tur esfuerso pa sirbi Jehova cu goso di curason.

Con Lo Bo Contestá?

◻ Con nos por sirbi Jehova cu “goso di curason”?

◻ Kico nos por haci si nos ta falta goso den nos sirbishi na Dios?

◻ Pakico Jehova su pueblo por tin goso apesar di persecucion?

◻ Ki motibunan nos tin pa alegrá den nos speransa?

[Plachi na página 17]

Participando den tur rasgo di bida cristian lo aumentá nos goso