Echonan (Loke e Apòstelnan A Hasi)

10 Awor, na Sesarea tabatin un hòmber ku yama Kornelio. E tabata un ofisial di ehérsito* di e asina yamá trupa italiano.* 2 E tabata un hòmber deboto na Dios, i e huntu ku tur su hendenan di kas tabata adorá Dios. E tabata gusta yuda hende pober,* i semper e tabata hasi súplika na Dios. 3 Un dia, banda di 3 or di atardi,* el a mira kla kla den un vishon kon un angel di Dios ta bini serka dje i bis’é: “Kornelio!” 4 Kornelio a keda wak e angel morto spantá, i el a puntra e angel: “Sí mi Señor?” E angel a kontest’é: “Dios a skucha bo orashonnan, i el a keda kòrda riba nan i riba loke bo ta hasi pa yuda hende pober. 5 P’esei, manda algun hòmber Yope pa nan bai buska un tal Simon ku nan ta yama Pedro. 6 E hòmber ei ta keda na kas di un kurtidó di kueru ku tambe yama Simon; e kas ta keda kantu di laman.” 7 Despues ku e angel a bai, Kornelio a manda yama dos di su sirbidónan i un sòldá deboto na Dios. El a skohe nan for di e hendenan ku semper tabata huntu kuné. 8 El a konta nan tur kos, i el a manda nan Yope.

9 E siguiente dia, ora e hòmbernan ei tabata riba kaminda, serka di yega Yope, Pedro a bai riba dak* di kas pa hasi orashon. Tabata banda di 12 or di mèrdia.* 10 Pero Pedro a haña hopi hamber, i e kier a kome algu. Miéntras e kuminda tabata ser prepará, el a haña un vishon. 11 Pedro a mira shelu habri, i algu manera un laken grandi di lenen a baha bini abou riba tera. E laken tabata wantá na su kuater puntanan. 12 Riba e laken tabatin tur sorto di bestia ku ta biba riba tera, sí, bestia di kuater pata i bestia manera kolebra i lagadishi.* Tabatin tambe para ku ta bula. 13 Anto Pedro a tende un stèm bis’é: “Lanta ariba Pedro, mata un di nan, i kome!” 14 Pero Pedro a kontestá: “Nò Señor, mi no por hasi esei! Nunka mi no a kome nada kontaminá ni impuru.” 15 Pa di dos biaha, Pedro a tende e stèm. El a bisa Pedro: “Stòp di yama kontaminá loke Dios a hasi limpi.” 16 Anto el a tende e stèm pa di tres biaha, i mesora e laken a ser halá ariba den shelu.

17 Pedro a keda poko konfundí, i e tabata puntra su mes kiko e vishon ku el a haña por tabata nifiká. Mientrastantu, e hòmbernan ku Kornelio a manda a kana puntra unda e kas di Simon ta, i awor nan a yega na porta. 18 Nan a yama na porta i puntra si Simon ku nan ta yama Pedro tabata keda einan. 19 Miéntras ku Pedro tabata pensa ainda riba e vishon, spiritu santu a bis’é: “Ata tres hòmber ta buska bo. 20 Pues, baha abou, i bai ku nan. No duda, pasobra ta ami a manda nan.” 21 Pues, Pedro a baha abou, i el a bai serka e hòmbernan. El a bisa nan: “Ta ami ta e persona ku boso ta buska. Ku kiko mi por yuda boso?” 22 Nan a kontest’é: “Un ofisial di ehérsito ku yama Kornelio a haña instrukshon di Dios pa medio di un angel* pa manda buska bo pa bo bini su kas p’e por skucha loke bo tin di bisa. E ta un hòmber hustu, ku tin rèspèt profundo pa* Dios. I henter e nashon hudiu ta papia bon di dje.” 23 E ora ei, Pedro a invitá nan paden, i el a laga nan pasa anochi serka dje.

Su manisé, el a lanta, i el a bai ku nan. Algun di e rumannan di Yope tambe a bai kuné. 24 E siguiente dia, el a yega Sesarea. Naturalmente, Kornelio tabata spera nan, i el a invitá su famianan i e amigunan ku e tabata será kuné pa nan tambe por tabata presente. 25 Ora Pedro a yega, Kornelio a bai serka dje. El a hinka rudia i rindi homenage na Pedro.* 26 Pero Pedro a bisa Kornelio: “Lanta para; mi ta hende meskos ku bo.” 27 I miéntras ku nan dos tabata kòmbersá, Pedro a drenta e kas, i el a hañ’é ku un grupo grandi di hende einan. 28 Pedro a bisa nan: “Boso mes sa ku un hudiu no tin mag di anda ku hende di otro rasa ni bishitá nan. Sinembargo, Dios a mustra mi ku mi no mester konsiderá niun hende kontaminá ni impuru. 29 P’esei, ora boso a manda buska mi, mi no tabatin nada kontra pa bini. Pero, mi ke puntra boso: Pakiko boso a manda buska mi?”

30 E ora ei, Kornelio a kontest’é: “Kuater dia pasá, na e mesun ora akí, esta, 3 or di atardi,* mi tabata hasi orashon den mi kas. Diripiente, tabatin un hòmber bistí ku paña briante pará mi dilanti. 31 El a bisa mi: ‘Kornelio, Dios a skucha bo orashon, i el a kòrda riba loke bo ta hasi pa yuda hende pober. 32 P’esei, manda algun hòmber Yope pa bai buska un tal Simon ku nan ta yama Pedro. E hòmber ei ta keda na kas di un kurtidó di kueru ku tambe yama Simon; e ta biba kantu di laman.’ 33 P’esei, mi a manda buska bo mesora, i bo tabata asina bon di bini akinan. I awor, nos tur ta huntu akinan den presensia di Dios, kla pa skucha tur loke Yehova* a manda bo bisa.”

34 E ora ei, Pedro a kuminsá papia. El a bisa: “Awor mi ta komprondé di bèrdat ku Dios no ta hasi distinshon di persona. 35 Mas bien, e ta aseptá hende di tur nashon ku tin rèspèt profundo p’e i ku ta hasi loke ta korekto. 36 Dios a manda un mensahe pa e pueblo di Israel: bon notisia di pas* ku a bira posibel pa medio di Hesukristu, kende ta Señor di tur hende. 37 Boso mes sa ku despues ku Huan a prediká tokante Hesus su boutismo, tur hende tabata papia tokante esei, kuminsando na Galilea i despues na henter Hudea. 38 Nan tabata papia tokante Hesus, kende tabata di Názarèt. Pa medio di spiritu santu, Dios a skoh’é komo Kristu, i Dios a dun’é poder. I Hesus a pasa den henter e pais hasiendo bon obra i librando* tur e hendenan ku Diabel tabata pone sufri. E por a hasi tur esei pasobra Dios tabata kuné. 39 I nos ta testigu di tur loke el a hasi tantu den e pais di e hudiunan komo na Herúsalèm. Pero nan a kolog’é na staka* i mat’é. 40 Dios a lanta Hesus for di morto riba e di tres dia, i Dios a laga hende mir’é. 41 Pero no ta henter e pueblo a mir’é, sino solamente nos ku a kome i bebe huntu kuné despues ku el a lanta for di morto. Nos ta e testigunan ku Dios a nombra di antemano pa mirá Hesus i papia tokante dje. 42 Ademas, Hesus a manda nos prediká na e pueblo i duna testimonio kabal tokante dje, esta, ku e ta e persona ku Dios a nombra pa ta hues di hende bibu i di hende morto. 43 Tur e profetanan a papia tokante Hesus. Nan a bisa ku pa medio di e nòmber di Hesus, Dios lo pordoná tur hende ku pone fe den Hesus.”

44 Miéntras ku Pedro tabata papiando ainda tokante e asuntunan ei, spiritu santu a baha riba tur e hendenan ku tabata tende e palabranan di Dios. 45 I e kreyentenan hudiu* ku a bini huntu ku Pedro a keda asombrá, pasobra Dios a drama su spiritu santu—su regalo—riba hende di e nashonnan tambe. 46 Sí, e kreyentenan hudiu tabata tende nan papia otro idioma* i alabá Dios. E ora ei, Pedro a bisa: 47 “E hendenan akí a risibí spiritu santu meskos ku nos. P’esei, ken por bisa ku nan no por batisá den awa?” 48 I el a duna òrdu pa batisá nan den nòmber di Hesukristu. Anto nan a pidié pa keda algun dia serka nan.