Huesnan

3 Yehova a permití algun nashon keda Kánan pa wak si e israelitanan ku no a bringa den niun di e gueranan kontra Kánan lo a keda obediente na dje. 2 (El a hasi esei pa asina e generashonnan di e israelitanan ku nunka a bringa den guera por a eksperensiá guera.) 3 Esakinan ta e hendenan ku a keda den e pais: sinku gobernante di e filisteonan, tur e kananeonan, e sidonionan i e heveonan ku tabata biba den e serunan ku tabata yama Líbanòn, esta, di seru Baal-Hèrmòn te na Lebo-Hámat.* 4 A permití e nashonnan ei keda den e pais pa wak si e israelitanan lo a obedesé e mandamentunan ku Yehova a duna nan antepasadonan pa medio di Moises. 5 Pues, e israelitanan a biba entre e kananeonan, e heteonan, e amoreonan, e perezitanan, e heveonan i e yebuseonan. 6 E israelitanan a kasa ku yu muhé di e pueblonan akí, i nan a laga nan yu muhénan kasa ku yu hòmber di e pueblonan akí. I e israelitanan a kuminsá sirbi e diosnan di e pueblonan ei.

7 Pues, e israelitanan tabata hasi malu den bista di Yehova. Nan a lubidá Yehova nan Dios, i nan tabata sirbi e diosnan Baal i e palunan sagrado.* 8  Yehova a rabia asina tantu ku e israelitanan ku el a entregá nan* den man di Kusan-Risataim, rei di Mesopotamia.* Anto e israelitanan a sirbi Kusan-Risataim ocho aña largu. 9 Ora e israelitanan a sklama na Yehova pa yudansa, Yehova a duna nan un libertadó; e persona ei tabata Otniel, yu hòmber di Kénaz. Kénaz tabata ruman hòmber mas chikitu di Kálèb. 10 I spiritu di Yehova a baha riba Otniel, i Otniel a bira hues di Israel. Awor, ora Otniel a bai guera, Yehova a entregá Kusan-Risataim, rei di Mesopotamia,* den su man di manera ku el a vense Kusan-Risataim. 11 Despues di esei, e pais tabatin 40 aña di pas i trankilidat. Despues, Otniel, yu hòmber di Kénaz, a muri.

12 Anto e israelitanan a bolbe kuminsá hasi loke tabata malu den bista di Yehova. P’esei, Yehova a entregá Israel den man di Églòn, rei di Móab. Sí, nan tabata hasi loke tabata malu den bista di Yehova. 13 I Églòn a sera un aliansa ku e amonitanan i e amalekitanan, i el a ataká Israel. Asina nan a konkistá e stat di palma.* 14 E israelitanan a sirbi Églòn, rei di Móab, 18 aña largu. 15 Despues, e israelitanan a sklama na Yehova pa yudansa. P’esei, pa salba nan, Yehova a nombra Ehud, yu hòmber di Gera. Ehud tabata un bènyaminita kende tabata slengu.* Ku tempu, e israelitanan a duna Ehud un tipo di belasting pa hiba pa Églòn, rei di Móab, kende a eksigí esaki di nan. 16 Anto Ehud a traha un spada di mas o ménos 38 centimeter* largu ku tabata kòrta tur dos banda, i el a faha esaki na su bèl di pia drechi, bou di su paña. 17 Despues, el a hiba e belasting pa Églòn, rei di Móab. Églòn tabata un hòmber masha gordo mes.

18 Ora Ehud a kaba di entregá e belasting, e i e hendenan ku a hiba* e belasting pa Églòn a bai. 19 Pero ora nan a yega na e imágennan* na Guilgal, Ehud a bira bai bèk serka Églòn. El a bisa Églòn: “Mi tin un mensahe sekreto pa Rei.” P’esei, e rei a bisa: “Boso sali laga nos un ratu.”* Anto tur e sirbidónan di e rei a sali. 20  Anto ora e rei tabata sintá su so den su kamber fresku riba dak, Ehud a bai serka dje i bis’é: “Mi tin un mensahe di Dios pa Rei.” Anto, e rei a lanta for di su trono.* 21 Na e momento ei, ku su man robes, Ehud a saka su spada ku e tabatin mará na su bèl drechi, i el a hinka e rei den su barika. 22 Tantu e spada komo kabu di e spada a bai aden, i vèt a tapa e spada pasobra Ehud no a saka e spada for di Églòn su barika. Anto sushi a kuminsá sali afó. 23 E ora ei, Ehud a sali bai pafó,* sera e portanan su tras i lòk nan. 24 Despues ku Ehud a bai, e sirbidónan di Églòn a bini bèk, i nan a ripará ku e portanan di e kamber riba dak tabata na lòk. Nan a bisa: “Podisé Rei ta hasiendo su nesesidat* den e kamber interior.” 25 Nan a warda basta ratu sin ku e rei a habri e portanan di e kamber riba dak, i nan a keda strañá. P’esei, nan a kohe e yabi, i nan a habri e portanan. I ata, nan señor tabata bentá abou,* morto.

26 Miéntras ku e sirbidónan tabata warda pafó, Ehud a hui pasa banda di e imágennan,* i el a yega Seíra sano i salvo. 27 Ora el a yega e serunan na Efraím, el a supla kachu, i e israelitanan a baha for di seru huntu kuné; e tabata na kabes. 28 El a bisa nan: “Sigui mi, pasobra Yehova a entregá boso enemigunan, e moabitanan, den boso man.” Pues, nan a siguié, i nan a blòkia e lugánan kaminda hende por a krusa Yordan pa asina stroba e moabitanan di krusa i hui. 29 Na e okashon ei, nan a mata mas o ménos 10.000 moabita, hòmber fuerte i balente; ni un di nan no a skapa. 30 Pues, e dia ei, Móab a kai den man di Israel. I e region tabatin 80 aña di pas i trankilidat.

31 Despues di Ehud, Sámgar, yu hòmber di Anat, a salba Israel matando 600 hòmber filisteo ku un bara ku punta skèrpi di metal.*