Bo Kier Conocé un Cobra?

Dje coresponsal di Spierta! na India

BO REALMENTE kier? Casi tur hende adulto lo contestá cu no. Pero no un mucha. Miedu di colebra, incluyendo e cobra, no ta un instinto natural di mucha ni asta di animalnan. Informacion cu no ta confiabel, cuenta exagerá, leyenda, i malcomprendimentu por crea miedu di colebranan.

Naturalmente, ora nos ta invitá bo pa conocé un cobra, nos kier men for di un distancia sigur! Cobranan ta masha venenoso, i nos no kier pa bo hala cerca i saca bo man pa carici’é. Probablemente e cobra no ta para ketu tampoco p’e conocé nos; ora e ta sinti nos presencia, lo e hala djei lihé pa sconde den un lugá sigur. Pues, laga nos keda satisfecho di conocé e cobra djis siñando algun echo fasinante tocante e bestia interesante aki.

Cobra ta reptil dje subórden Serpentes i e famia Elapidae, un nomber duná na colebra venenoso cu djentenan cu gleuf. Tin rond di 12 sorto di cobra plamá for di Australia atrabes di tera tropical di Asia i Africa te na Arabia i tera mas friu. Te asina leu e cobra mas spantoso cu tur e otro cobranan ta e cobra rey, of hamadryad [Ophiophagus hannah]. Cu un largura di 3 te 5 meter, esaki ta e colebra venenoso di mas grandi di mundu. Preferando e mondi tropical denso of moeras, unda cu tin hopi yobida, e por ser hañá den zuid di China, Filipínas, Indonesia, Malasia, Myamar, i den partinan di India. Su rabu pretu, banchi di color riba su curpa berde-geel, locual ta bira berde scur cu edad, i grupo di mancha chikitu riba su bonechi ta dun’é un aparencia basta bunita.

Otro sortonan di cobra ta un of dos meter largu. Natural di India, i bibando na tur parti ei, tin un cobra cu ta parce di bisti bril, pa e marcanan straño riba su bonechi cu ta parce un bril. E por ta pretu, maron scur, of geel-blancu cu un còl hanchu i scur cu mancha chikitu blancu i banchi geel tur e largura di su curpa. E cobra cu monóculo (un banda di bril), ta biba den Sri Lanka i tambe na oost i nortoost di India, tin un color mas cla cu un bonechi mas chikitu i mas rondó i tin un solo círculo blancu, locual ta dun’é su nomber. Den nortwest di India i den Pakistan, ta biba un cobra pretu pretu. Africa tin entre otro cobranan, ringhal, of yamá tambe cobra scupidor, i cobra egipcio. E cobra egipcio, un colebra scur cu bonechi smal, ta posiblemente e áspid cu por a causa e morto di Cleopatra.

Colebra ta rasa solamente cu nan mes sorto, atrayendo otro cu nan holor di muskus único. Cobra ta mustra mas interes den nan famia cu otro colebra, i hopi bes e machu i e hembra ta keda huntu. E cobra rey hembra ta unu dje poco colebranan cu hende conocé cu ta traha neshi. E ta montoná foyo te na rond di 30 centimeter haltu i ta pone 20 te 50 webu den dje. Anto e ta lora su curpa rond dje monton i ta keda ei, sin cuminda, pa casi dos luna di bruimentu, i hopi bes e machu ta keda cerca tambe. Otro cobranan, sin traha neshi, ta keda cerca nan webunan pa protehá nan.

Colebra chikitu ta usa un djente riba nan nanishi pa corta casca dje webu pa nan sali. Despues e djente ta cai. Ora nan sali nan ta completamente independiente cu klier di veneno i djente desaroyá completamente. Nan ta saca nan lenga frecuentemente, pa purba e ambiente, i comunicá informacion kímico cu klier di hole na shelu di boca. Esei ta conectá cu e sintí di hole; e combinacion di sabor i hole ta yuda e colebra sigui tras di su víctima, haña un partner, of scapa for di enemigunan.

Colebra hóben ta crece lihé i den poco tempu ta perde su cueru exterior, locual ta bira muchu pertá. E fenómeno raro aki ta ser ripití cu regularidad, ya cu e cobra ta sigui crece durante henter su bida, locual por ta mas cu 20 aña. Rond di unu of dos siman promé cu e cambio di cueru, e colebra ta bira floho, su cueru ta bira dof, i su wowo ta bira blancu-blou. Anto, di ripiente, su wowo ta blink, i cu fregamentu di su cabes riba piedra, e colebra ta parti e cueru bieu rond di su boca. Awor e literalmente ta sali for di su cueru segun cu e ta bira banda robes, for dje cueru transparente riba su wowo te n’e punta di su rabu. Awor un colebra bibu, briyante, i cu aparencia nobo ta cla pa sigui su actividad normal.

Temperatura di aire ta afectá cobra hopi. Segun cu e tempu ta fria, nan ta floha i asta ta drumi, i ta lanta solamente ora e temperatura ta subi. Demasiado calor por mata nan. Fuera dje cobra rey, locual ta come colebra, nan ta come djaca, raton, dori, lagadishi, para, i otro animalnan chikitu. Despues di coge un víctima, un inyeccion di veneno ta inmobilis’é. E cobra ta gulié henter, pasobra nan no tin djente pa kouw. E cueru cu ta rek i e cachete cu ta flexibel ta haci posibel pa cobra guli bestia dos of tres bes mas grandi cu nan mes cabes. Durante cu e ta guli e víctima cu boca yená, e cobra ta hala rosea dor di manda tubu di rosea mas dilanti cu e animal den su boca, net manera landador ta usa snorkel. Awor rij di djente doblá patras ta hala e cuminda patras den e curpa dje colebra. E colebra ta bai na un lugá ketu p’e stoma traha riba e cuminda poco poco, i tal bes e no ta come mas pa vários dia. Cobra por biba pa hopi luna sin come, probechando di vet wardá den su curpa.

Colebra ta cauteloso. (Mira Mateo 10:16.) E defensa dje cobra ta den sea escape, kisas sconde bou di un piedra of den un buracu di djaca cu e ta usa como cas, of den keda ketu i asina evitá di ser mirá. Den confrontacion, lo e hisa su cabes na haltu i habri su bonechi, i supla pa spanta e enemigu. Mordementu ta e último recurso.

Mordí di Colebra

Hopi bes hende no ta informá di mordí di colebra den campo di Africa i Asia, pero mundialmente ta parce cu colebra venenoso ta morde rond di un miyon hende tur aña. India tin e récord di mortonan—rond di 10.000 pa aña—kisas e mayoria dor dje cobra cu bril. Rond di 10 porciento di hende cu cobra ta morde ta muri.

Cobra ta mas lento cu otro colebra; mongoeste lihé, un enemigu principal di dje, por move mas lihé cuné. Ora mongoeste ta bula den direccion dje colebra, anto ta evitá su mordí cada bes, e ta laga e colebra bruhá i vacilante. Anto e mongoeste ta morde e garganta dje cobra tras di su bonechi i ta kibr’é. Hopi colebra ta morde bulando for di un posicion lorá, i ta difícil pa hende conocé nan alcanse, pero cobra ta hisa su curpa i ta dal stret abou. Bo por calculá e distancia cu e por alcansá, i scapa for di su movementu relativamente lento.

Algun cobra, manera e ringhal, e cobra cu garganta pretu di Zuid Africa, i cobra di nortoost di India, ta defendé nan mes cu scupimentu. Hisando su cabes i apuntando nan djente den direccion dje víctima i usando presion di aire, e cobra por manda dos choro di veneno pa mas cu dos meter. E veneno no ta haci nada riba e cueru, pero si e ta drenta bo wowo, e por ciegá bo temporalmente i, si bo no ta lab’é lihé, e por ciegá bo permanentemente. Ta straño, pero ta parce cu e colebra por dirigí e veneno na bo wowonan.

Supongámos cu un cobra ta mordé bo, kico bo mester haci? E veneno bou di presion ta sali for di sacu di veneno den cachete dje colebra dor di dos colmiyo corticu den forma di tubu i inmovibel na parti dilanti di cachete dje colebra. E dos colmiyonan ta bora e cueru i ta inyectá e veneno mescos cu angua di dokter. E único remedi sigur pa mordí di colebra ta antiveneno prepará for di veneno di cuater colebra venenoso. Cerca e principio di siglo 20, India tabata e promé pais pa usa antiveneno extensivamente. E puiru di antiveneno ta eficas pa cincu aña sin sin hincá den friu; e ta ser inyectá den su forma líkido.

Síntoma di mordí di cobra ta dolor i hinchamentu unda el a morde, bista nublá, biramentu di cabes, parálisis di garganta, i dificultad di respirá. Morto ta yega den rond di dos ora si hende ta haña hopi veneno i no ta haña ningun tratamentu.

Entretenedor cu Colebra

Entretenimentu cu colebra ta un forma masha bieu di diberticion. Principalmente, esei ta un custumber di Oriente, pero algun circo di Occidente tiné den nan programa. Pa motibu di su bonechi raro i disposicion nervioso, e cobra cu bril ta e colebra mas popular cu nan ta usa, pero otro colebra cu aparencia impresionante, manera e colebra real i e boa di santu corá, ta ser usá tambe. Segun cu entretenedor, un artista capas, ta toca fluit, e cobra ta subi for di su macutu i ta habri su bonechi na su posicion defensivo normal. Movementu dje entretenedor cu colebra ta causa un reaccion den e colebra miéntras cu e ta sigui wak e entretenedor, semper cla pa atacá. Entretenedor ta kita colmiyo di mayoria di cobra cu nan ta usa, pero algun ta core e rísico di usa colebra venenoso.

Den India di antigwedad, entretenedor biahero di colebra tambe tabata un contador di idea i leyenda religioso, locual hende a gusta. Awe ta mas probechoso pa nan haci nan actuacion dilanti hotel di turista cu ta gusta saca potret. Algun entretenedor cu colebra ta bishita casnan i ta bisa e doñonan cu probablemente tin colebra den nan hofi grandi. Pa un cierto suma di placa, e entretenedor ta ofrecé pa coge nan. E ta bai den hofi, i despues di un tempu, durante locual bo por tende tocamentu di fluit, e ta sali cu un sacu yen di colebra. Naturalmente, ta sabí p’e doño di cas tene cuenta of por lo ménos controlá pa mira si el a trece e sacu di colebra cuné!

Parke di Colebra Ta Educativo

Parke di colebra ta crea interes den reptil. Nan ta respaldá investigacion, ta duna siñansa tocante con pa prevení i cura mordí di colebra, i ta traha pa protehá colebra for di haraganismo i ignorancia di hende. Nan ta mata cobra pa nan cueru bunita, pa usa pa traha faha, cartera, sapatu, i otro artículo di luho. Den un aña nan a mata mas cu dies miyon colebra den India p’e industria di cueru. Nan ta mata e colebranan anto ta soya nan un bes. Tiña vegetable ta ser usá den India pa duna e cueru color, i nan ta dalé un pólish cu glas i avéces ta supl’é cu lac p’e briya i resistí awa.

No ta posibel pa calculá e balor di cobra. E ta protehá tonelada di grano for di djaca i otro bestia. Hende ta usa su veneno pa traha antiveneno, anestesia, i otro medicinanan. E hospital The Tata Memorial Cancer Institute na Bombay ta studia e efecto di veneno di cobra riba cel di cancer.

Bo a gosa bo encuentro cu cobra? Cobra ta bunita, útil, cauteloso, i bon armá pa defendé su mes. Un mihó conocimentu di cobra por yuda nos apreciá tal bestia di mondi hopi despreciá.

[Kuadro na página 19]

Adoracion di Cobra i Supersticion

ADORACION di cobra a existí for di tempu di antigua. Pintura di cobra a ser hañá riba seyo na Mohenjo-Daro, un civilisacion di mas bieu cu arkeólogo a yega di descubrí. Desde e tercer milenio P.E.C. te n’e dia djawe, miyones di hende na India a considerá cobra cu reverencia supersticioso. Interesantemente, bo por reconocé hopi cuenta tocante cobra como leyenda exagerá fundá riba berdadero suceso histórico.

Un “cuenta” tocante e creacion ta conta di un tempu ora no tabatin lus den e universo. Usando awa cósmico scur, e dios briyante Vishnu a ser creá promé, anto shelu, tera, i fiernu. Usando e material sobrá, un cobra gigantesco yamá Shesha a wordu creá. Segun e leyenda, Shesha tabatin entre 5 te 1000 cabes, i imágennan ta pinta Vishnu sosegando riba Shesha lorá, protehá p’e bonechinan habrí dje cantidad di cabesnan di Shesha. Hende ta kere cu hapmentu di Shesha ta causa temblor, i candela di su boca of su veneno ta destruí e mundu n’e fin di un época.

Leyenda hindú ta pinta un rasa di cobra yamá Naga, cu ta biba den fiernu, yamá Nagalok of Patala. Segun leyenda, e dios-macacu Hanuman ta declará cu den e “Epoca Perfecto,” tur hende tabata santu, tabatin un solo religion, i no tabata existí demoño of Naga. Segun e leyenda, e colebranan a bira e wardadornan dje rikesa dje tera i tabatin masha conocimentu i podernan mágico. E diosnan a usa Shesha, avéces yamá Vasuki tambe, pa trubla un laman di lechi pa producí amrit, un nectar cu por duna inmortalidad. Fiernu, unda Naga a reina, ta ser pintá como un lugá masha deseabel; guereronan cu ta muri den bataya ta ser primintí placer inimaginabel ei.

Sin embargo, tur cobra di leyenda no ta ser considerá benigno. Un “cuenta” ta conta di un encuentro entre Krishna, un incarnacion di Vishnu, i Kaliya, un cobra-demoño grandi i malicioso. Imágen ta mustra Krishna victorioso cu su pia riba cabes dje colebra grandi.

Manasa, of Durgamma, reina di Naga, ta ser adorá dor di hende muher pa protehá nan yunan contra di mordí di colebra. Riba fiesta di Nagapanchami, adoradornan di colebra ta basha lechi i asta sanger riba imágen di cobra i den cueba di colebra. Cu e speransa di haña yu homber, hende muher ta adorá i ta ofrecé den tempel imágen di cobra trahá di piedra of plata.

Cobra den Película

Cobra di leyenda ta un tema masha popular den película trahá na India—mas cu 40 película tocante cobra a ser trahá desde 1928. Generalmente e cobra ta ser pintá como un wardador di gentilesa, un yudante di adoradornan di cobra, i un destructor di hende malbado. E leyenda dje cobra di Icchadar ta popular, locual nan ta bisa tin e poder di tuma forma humano. Nan ta bisa cu cobra tin un solo compañé fiel. Si e compañé ta ser matá, e cobra por mira imágen dje matador den wowo dje colebra morto, i ta bai tras di dje pa busca vengansa. Esaki ta bira e tema bibu di hopi película. Dominando e relato ta bailamentu di colebra; cu música manera esun di e entretenedor di colebra, bailadornan ta imitá e movementu dje colebra, asta lastrando riba tera.

Un película documentario yamá Shakti, tabata trahá na un fiesta den Rajasthan, India, unda tur augustus cientos di miles di adorador di colebra ta reuní den desierto. Bou di un solo cayente i den temperatura pasando 50° Celsio, adorador di colebra ta suta nan curpa cu bara di heru i ta lastra riba nan barica pa mas cu 2 kilometer riba santu cayente te n’e tempel di dios-colebra, Gogha. Nan ta bisa cu Gogha, un rey histórico di siglo 10 E.C., a salba su pueblo for di invasor musulman, hibando e enemigu na un lugá yen di colebra, unda mordí di colebra a destruí e ehército.

[Kuadro na página 20]

Salbá dor dje Cobra

Dos famia den e pueblo di Sastur na India tin motibu pa ta gradicidu na un cobra. Nan a ser spiertá rond di 3:50 a.m. dia 30 di september 1993, dor dje zonido di sis fuerte di un cobra segun cu el a lastra pasa pafó di nan cas. Nan a core tras di dje den mondi pa mat’é. E temblor horendo den centro di India a pasa 4:00 a.m. aplastá nan pueblo matando casi tur hende. E dos famianan a sobrebibí—danki n’e sistema spiertador trempan dje cobra!

[Plachi na página 16, 17]

Bista di patras i di dilanti di cobra di Asia

Plachi chikitu: Cobra pretu ta habri su bonechi tumando solo riba baranca cayente

[Rekonosementu]

Plachinan na página 16 te 20: A. N. Jagannatha Rao, Trustee, Madras Snake Park Trust

[Plachinan na página 18]

Bista di dilanti i di patras di cobra pretu