Di Con Crímen Organisá Ta Prosperá?

AL CAPONE, e notorio gèngster dje Era di Prohibicion na Merca (1920-33), a pretendé cu e tabata djis un negoshante cu tabata percurando loke ley ta demandá, esta e ley di percurá loke e consumidor ta pidi p’e. Un abogado p’e asociacion di yakuza mas grandi na Hapon a bisa: “Bo no por nenga cu tin un demanda fuerte pa [sex, droga i wega di placa].” E demanda ei ta fomentá crímen organisá. Aunke ningun hende kier ta un víctima di crímen, algun por acudí na organisacionnan criminal i haci uso di nan servicionan.

Tuma, por ehempel, extorsion a cambio di proteccion cu mafiosonan ta usa den hopi pais como un fuente di ingreso. Aunke tin biaha nan ta mik riba doñonan onrado di pacus, generalmente nan ta haci esnan cu ta manehá negoshinan dudoso bira nan víctima. Un doño di casino na Shinjuku, Tokio, cu ta manehá su negoshi bou dje capa di un game room, a bisa: “Nan a hinca un empleado cu cuchú i a bai cu 2 miyon [yen (NAƒ. 35.000)]. Pero nos no por a yama polis.” Di con no? “Siendo cu nos ta enbolbí den un actividad ilegal (wega di placa), nos no kier tin nada di haci cu polis. Ora un cliente cuminsá haci bochincha den nos lugá, nos ta yama e yakuza.” E operador di casino aki ta paga e yakuza 4.000 dollar tur luna, un montante chikitu compará cu e ganashi di 300.000 dollar cu ta basha drenta via su operacion ilegal durante e tempu ei. Di unda e cen ei ta bin? For dje sacu di esnan cu ta gusta hunga wega di placa ilegal.

Mescos ta cierto di negoshinan respetabel cu kier evitá problema. Un autoridad di New York a calculá cu un contratista di verf cu ta gana 15 miyon dollar pa aña a scapa 3,8 miyon dollar dor di paga soborno na gèngsternan. Esaki a permití e contratista usa trahadornan cu salario abou i evitá confrontacion cu e sindicato controlá dor di mafia. Na Hapon, durante un periodo di prosperidad económico, financiadornan a invertí cantidadnan grandi di nan placa den propiedad di tereno i edificio i a basha cas i negoshinan bieu abou pa traha lugá pa edificionan extravagante. Ora residentenan no tabata kier a muda of bende nan tereno, inversionistanan tabata yama jiageya, mayor parti companianan cu relacionnan cu yakuza, pa saca nan afó.

Ora e yakuza a mira con fácil tabata pa fia i gana placa durante añanan ’80, nan a lanta companianan i a hinca nan mes den inversion di propiedad di tereno i edificio i speculacion di accionnan. Banconan i institucionnan financiero a invertí hopi cen den e companianan aki, obviamente pensando riba nan mes ganashi. Pero ora cu finalmente e prosperidad económico a experenciá un caida, e banconan a ripará cu tabata masha difícil pa recuperá nan placa. Papiando dje recesion na Hapon cu no kier pasa forbij, un ex-funcionario di polis a bisa den Newsweek: “E berdadero motibu pakico e problemanan di fiansanan atrasá no por ser resolvé lihé ta cu un porcion basta grandi di nan ta conectá cu crímen organisá.”

En berdad, crímen organisá ta saca rais i ta bona caminda hende ta ansioso pa satisfacé nan deseonan intenso, cueste loke cueste. Golosidad pa placer, sex i placa ta crea un tera fértil pa benta ilegal di droga, prostitucion, wega di placa i fiamentu di placa na interesnan exorbitante. Enbolbimentu den actividadnan asina generalmente ta nificá alimentá i gorda e mafia. Ta ki cierto cu crímen organisá ta duna esnan cu ta dicididu na satisfacé nan propio necesidadnan carnal loke nan ta pidi p’e!

Un Sistema Ficticio di Famia

Ademas dje demanda pa actividadnan ilegal, tin un otro necesidad awe riba cua crímen organisá ta bona. E fayecido lider di un dje asociacionnan mas grandi di yakuza na Hapon a insistí cu e tabata tumando e bandidunan i tabata percurá pa nan i asina tabata prevení nan di bai den mal caminda. El a pretendé cu e tabata un tata pa miembronan di gèng. Mayoria asociacion criminal, sea cual sea e nacionalidad, ta traha nan organisacion riba tal tipo di relacionnan ficticio di famia.

Tuma, por ehempel, Chi Sun,a cu a bin di un famia pober na Hong Kong. Hopi bes su tata tabata batié violentamente pa co’i kens. Ora Chi Sun tabata hóben el a bira rebelde i a lo largu a uni cu e notorio Triadanan na edad di 12 aña. Den e organisacion criminal, el a haña un lugá caminda el a sinti cu e tabata “pertenecé.” Debí na su balentia den bringamentu armá, pronto nan a promov’é na un posicion caminda e tabatin vários homber bou di dje. Finalmente, ora e tabatin solamente 17 aña di edad, el a cai prezu.

Hopi hende manera Chi Sun ta acudí na organisacionnan criminal pa haña e vínculo di famia cu nan no tabatin na cas. E miembronan ta bisa cu nan ta interesá den nan, pero hopi bes hóbennan ta keda desapuntá ora nan ripará cu cada miembro ta interesá principalmente den su mes.

Angel di Lus

Ora e asociacion criminal mas grandi di Hapon a ser designá como un grupo violento bou di un ley nobo anti-gèng na 1992, un di su lidernan a argumentá cu e grupo tabata considerá nan mes “cabayeroso,” luchando contra maldad. Ora e temblor teribel a dal Kobe na 1995, e mésun gèng a distribuí alimento, awa i otro provisionnan di emergencia na nan próhimo. “Generosidad asina,” Asahi Evening News a informá, “sigur ta reforsá e imágen duradero di yakuza na Hapon di cu nan ta bandidunan cu onor.”

Lidernan di asociacionnan criminal a purba hopi bes pa mantené un aparencia di ta caritativo. Pablo Escobar, e lider notorio dje cartel di droga di Medellín, Colombia, tabata pa e habitantenan dje barionan pober di su stad “un figura místico—teniendo un tiki di un Mesías, un Robin Hood i un Padrino den e sentido casi feudal di patrón, e doño,” Ana Carrigan a skirbi den Newsweek. El a traha pista pa muchanan core rolschaats i casnan decente pa e pobernan, i el a duna muchanan di caya trabou. E tabata un héroe pa esnan cu a beneficiá di su generosidad.

Sin embargo, criminalnan cu aparentemente a haña un escondite sigur den nan asociacion criminal, ta solamente peonnan di un criminal maestro universal. Bijbel ta revelá ken esun ei ta. “Satanas mes ta sigui transformá su mes den un angel di lus. P’esei no ta un gran cos si su ministernan tambe ta sigui transformá nan mes den ministernan di husticia. Pero nan fin lo ta conforme cu nan obranan.” (2 Corintionan 11:14, 15) Awe, mayoria hende no ta kere cu Satanas ta un berdadero persona. Un poëta frances di siglo 19 a bisa: “E estrategia mas ingenioso dje Diabel ta pa persuadí bo pa kere cu e no ta existí.” E ta loer for di scondí i ta manipulá loke ta sosodiendo, no solamente den asociacionnan criminal, sino tambe na tur parti di mundu. “Henter e mundu ta drumí den poder dje malbado,” Bijbel ta splica. Jesus a describí Satanas como “un matador ora el a cuminsá, . . . un mentiroso i e tata di mentira.”—1 Juan 5:19; Juan 8:44.

Profecianan di Bijbel ta revelá cu Satanas e Diabel tabata specialmente activo desde 1914. Desde e aña ei padilanti, el a bin ta mobilisá su compinchinan den un guera total contra Dios su pueblo. E ta halando humanidad den un remolino di cáos. E ta e motibu principal pakico crímen i organisacionnan criminal ta bona awe.—Revelacion 12:9-12.

Acaso un dia lo eliminá e celebro maestro tras dje organisacionnan criminal na mundu? Humanidad lo disfrutá di pas i ordu un dia? Abo por libra bo mes dje imperio malbado cu Satanas a traha riba tera awe?

[Nota]

[Kuadro na página 7]

Con pa Protehá Bo Famia

FALTA di un ambiente familiar caluroso i uní por pone hóbennan bira víctimanan fácil di asociacionnan criminal. Segun informe, na Merca e mayoria dje hóbennan cu ta haña nan enbolbí den asesinatonan di gèng ta bini di famianan kibrá of den condicionnan ménos faborabel. Un funcionario di un centro di detencion na Nort Carolina ta bisa: “Siendo ménos afortuná, nan ta ser conmoví fácilmente dor dje vínculo fuerte entre e lider i e miembronan di gèng i e sintimentu di unidad como un miembro di un organisacion, locual nan ta experenciá pa promé biaha den nan bida.”

Di manera similar, den Oriente un yakuza hóben cu ta dispuesto pa sirbi como un escudo bibiente pa su lider ta bisa: “Na cas mi tabata mi so henter ora. Aunke nos tabata un famia, nunca mi a sinti cu nos por tabatin un combersacion franco. . . . Pero awor mi por papia francamente cu e gainan.” Hóbennan solitario ta sinti nan gradicidu na e miembronan di un organisacion criminal cu ta trek nan hala den un sistema parecido na un famia.

“E hendenan di yakuza ta mustra hopi, hopi interes,” e lider di un grupo di mucha muher riba motosaikel na Okinawa ta bisa. “Kisas esei ta nan triki; pero, wak, como cu nunca nos a ser tratá cu gentilesa, esaki ta conmové nos.” E superintendente di un institucion pa mucha muhernan delincuente ta confirmá cu gèngsternan ta “hopi bon den conkistá e curason di mucha muhernan.” Ora mucha muhernan solitario yama nan meianochi, gèngsternan ta core bai cerca nan i ta scucha loke nan tin di bisa, sin cu necesariamente nan haci avancenan sexual.

Nan actitud di ta interesá ta dura solamente te ora cu nan a conkistá completamente e hóbennan cu nan ta purba di gara. Una bes nan ta atrapá, nan ta ser exprimí te n’e último gota di sanger—mucha muhernan den prostitucion i mucha hombernan den e mashin criminal.

Con Bo Por Protehá Bo Sernan Kerí?

“Boso, tatanan, no fada boso yunan pa nan no bira desanimá,” Bijbel ta amonestá. (Colosensenan 3:21) Esaki no ta animá mayornan pa ta permisivo. Un proverbio bíblico ta bisa: “Un mucha homber lagá pa su cuenta lo causa bergwensa pa su mama.” (Proverbionan 29:15) Mas bien, Bijbel ta animá tatanan—i mamanan tambe—pa ta razonabel den trata cu nan yunan, pa scucha nan, i pa tin comunicacion abierto cu nan. E ora ei, e yunan lo ta motivá pa confia nan mayornan cu un problema ora nan haña nan den pertá.

Ademas di tin comunicacion abierto, mayornan tin cu siña nan yunan balornan den bida. Na unda un tata por haña instruccionnan asina? Bijbel ta bisa: “Boso, tatanan, no iritá boso yunan, sino sigui cria nan den e disiplina i reglamentu mental di Jehova.” (Efesionan 6:4) Tuma tempu pa considerá Bijbel cu bo yunan mediante sesionnan di studio di Bijbel cu e famia. I inculcá den nan curason un temor saludabel pa Jehova di manera cu semper nan lo sigui e guia di Jehova pa nan mes bon.—Isaías 48:17.