Kibrando cu Crímen Organisá—“Mi Tabata Un Yakuza”
“PAPA, ora bo bin cas, laga nos bai reunion huntu. Primintí mi cu sí, okey?” Mi a ricibí e carta aki di mi di dos yu muher ora mi tabata den prizon p’e di tres biaha. E tabata asistiendo regularmente na e reunionnan di Testigonan di Jehova huntu cu mi esposa. Siendo cu e cartanan di mi famia tabata mi único fuente di consuelo, mi a primintié cu lo mi haci manera el a pidí mi.
‘Pakico mi ta hibando un bida criminal cu ta kitá mi di mi famia?’ mi a pensa den mi mes. Mi a corda e dianan ora mi tabata hopi yong. Tata a muri ora mi tabatin solamente 18 luna bieu, di manera cu mi no ta ni corda su cara. Mama a bolbe casa dos biaha despues di esei. E circunstancianan ei di famia a afectá mi profundamente, i na scol secundario mi a cuminsá asociá cu muchanan bagamundu. Mi a bira violento i a hañá mi hopi bes enbolbí den bringamentu pafó di scol. Ora mi tabata den mi di dos aña di scol secundario, mi a organisá un grupo di alumno pa bringa cu un otro grupo. Como resultado, mi a ser arestá i mandá pa un instituto coreccional pa un tempu.
Mi tabata manera un bala cu tabata lora for di un ceru bai den direccion di un bida di violencia. Pronto mi a forma un banda di delincuente i tabata sinta pornada banda dje oficina di un grupo di yakuza. Na edad di 18 aña, mi a bira un miembro completo dje grupo ei. Ora mi tabatin 20 aña, mi a ser arestá pa vários acto di violencia i a ser sentenciá na tres aña di prizon. Promé, mi a sinta e castigu den e Prizon Hubenil na Nara, pero mi comportacion no a mehorá. Di manera cu nan a mandá mi un otro prizon, unu pa adulto. Pero mi a bira pió i finalmente a terminá den Kyoto den un prizon pa criminalnan sin heful.
‘Di con mi ta sigui cometé crímennan asina?’ mi a puntra mi mes. Ora mi wak bek, mi ta realisá cu esei tabata debí na mi manera bobo di razoná. E tempu ei, mi tabata kere cu comportacion asina tabata macho, un prueba di mi masculinidad. Ora mi a sali for di prizon na edad di 25 aña, compañeronan mafioso a wak mi como un persona pa ser respetá. Awor e porta tabata habrí pa mi subi e trapi dje mundu criminal.
E Reaccion di Mi Famia
Mi a casa rond di e tempu ei, i pronto ami cu mi casá a haña dos yu muher. Pero mi bida no a cambia. Mi a sigui bai di un banda pa otro entre mi famia i polis—mi tabata bati hende i practicá extorsion. Cada incidente a yudá mi gana e respet di mi compañeronan gèngster i e confiansa di mi lider. Finalmente, mi “ruman homber” yakuza mas bieu a yega n’e top dje gèng i a bira e lider. Mi a alegrá di bira e homber number dos.
‘Kico mi casá i yunan tabata pensa di mi estilo di bida?’ mi a pensa den mi mes. Nan mester tabatin bergwensa di tin un criminal como esposo i como tata. Mi a ser encarcelá atrobe ora mi tabatin 30 aña i despues atrobe ora mi tabatin 32. E biaha aki, e sentencia di tres aña a cai mi hopi duru. Nan no a permití mi yunan bin bishitá mi. Mi a sinti falta di papia cu nan i brasa nan.
Rond dje tempu cu mi a cuminsá sinta mi último sentencia den prizon, mi casá a cuminsá studia Bijbel cu Testigonan di Jehova. Dia tras dia e tabata skirbí mi tocante e berdad cu e tabata siñando. ‘Ta di ki berdad mi casá ta papiando di dje?’ mi a puntra mi mes. Mi a lesa e Bijbel completo den prizon. Mi a pensa riba loke mi casá tabata bisando den su cartanan tocante un speransa pa e futuro i tocante Dios su propósitonan.
E speransa di cu hende lo biba pa semper den Paradijs riba tera tabata atractivo pa mi pasobra mi tabatin masha miedu di muri. Semper mi a pensa, ‘Si bo muri, bo ta e perdedor.’ Ora mi wak bek, mi ta realisá cu tabata miedu di morto cu a hací mi heridá otro hende promé cu nan por a heridá ami. E cartanan di mi casá a poné mi mira tambe con bano mi meta di subi e trapi den e mundu di gèng tabata.
Sin embargo, mi no a ser conmoví pa studia e berdad. Mi casá a dedicá su mes na Jehova i a bira un di su Testigonan bautisá. Aunke mi a bai di acuerdo den mi carta pa bai nan reunionnan, mi no tabata pensando di bira un Testigo di Jehova. Mi tabata sinti como si fuera mi casá i yunan a bai leu for di mi, lagando mi atras.
Saliendo for di Prizon
Por fin e dia a yega pa mi sali liber. Na e heki dje Prizon Nagoya, tabatin hopi gèngster pará den rei pa yamá mi bon biní. Sin embargo, den e gran multitud di hende, mi tabata buscando solamente mi casá i mi yu muhernan. Ora mi a mira mi yunan, kendenan a crece hopi den tres aña i mei di tempu, mi wowo a yena cu lágrima di emocion.
Dos dia despues di bai cas, mi a cumpli cu mi promesa na mi di dos yu i a asistí na un reunion di Testigonan di Jehova. Mi a keda sorprendí di mira e actitud alegre di tur presente. E Testigonan a duná mi un caluroso bon biní, pero mi no a sintí mi na cas einan. Despues, ora mi a haña sa cu esnan cu a bin cumindá mi tabata conocé mi antecedente criminal, mi a keda babucá. Pero, mi a sinti nan calor di amistad i a gusta e discurso basá riba Bijbel cu a ser duná. El a bai tocante hende bibando pa semper den Paradijs riba tera.
E idea di cu mi casá i mi yunan ta sobrebibí drenta Paradijs i cu ami ta ser destruí a preocupá mi masha hopi. Mi a meditá seriamente riba loke mi tabatin cu haci pa mi biba pa semper cu mi famia. Mi a cuminsá pensa pa kibra cu mi bida como gèngster, i mi a cuminsá studia Bijbel.
Kibrando cu Mi Bida Criminal
Mi a stop di asistí na e reunionnan dje gèng i a stop di asociá cu e yakuza. No tabata fácil pa cambia mi manera di pensa. Mi tabata core den un auto grandi importá djis p’e disfrute di esei—e tabata un manera pa satisfacé mi orguyo. A tumá mi tres aña promé cu mi a cambia mi auto pa un modelo modesto. Tambe mi tabatin un tendencia di busca e caminda mas fácil. Sin embargo, segun cu mi a siña e berdad, mi por a mira cu mi mester a cambia. Pero manera Jeremías 17:9 ta bisa, “e curason ta mas traicionero cu cualkier otro cos i ta desesperá.” Mi tabata sa loke tabata corecto, pero tabata hopi difícil pa aplicá loke mi tabata siñando. E problemanan cu mi tabata enfrentá tabata parce di ta manera un ceru grandi. Mi a cuminsá preocupá, i hopi biaha mi a pensa pa stop e studio i deshací dje idea di bira un Testigo di Jehova.
Te cu un dia, e ruman cu tabata studia Bijbel cu mi a invitá un superintendente biahero cu tabatin un antecedente similar na esun di mi pa duna un discurso público den nos congregacion. For di Akita, 600 kilometer leu, el a bin te na Suzuka pa animá mi. Despues di esei, ki ora cu mi a sintí mi cansá i a pensa di stop, mi tabata ricibí un carta for di dje, puntrando mi si ainda mi tabata canando firmemente den e caminda di Señor.
Mi a sigui pidi Jehova pa yudá mi kibra cu tur laso cu yakuza. Mi tabatin confiansa cu Jehova lo contestá mi oracion. Por fin, na april 1987, mi por a kita for dje organisacion di yakuza. Ya cu mi mes negoshi a pone cu mi mester a biaha bai afó tur luna, leu di mi famia, mi a cambia mi trabou pa unu di conserge. Esaki a laga mi atardinan liber pa actividadnan spiritual. Pa promé biaha, mi a ricibí un envelop cu un salario. E tabata poco, pero el a hací mi hopi felis.
Tempu mi tabata e homber number dos den un organisacion di yakuza, mi tabata bon pará den sentido material, pero awor mi tin rikesanan spiritual cu no ta disparcé. Mi conocé Jehova. Mi conocé su propósitonan. Mi tin principionan pa biba segun nan. Mi tin berdadero amigunan cu ta interesá den mi. Den e mundu di yakuza, gèngsternan tabata interesá superficialmente, pero mi no conocé ningun yakuza, ni sikiera un, cu lo sacrificá su mes na fabor di otronan.
Na augustus, 1988, mi a simbolisá mi dedicacion na Jehova mediante bautismo bou di awa, i e siguiente luna, mi a cuminsá dedicá por lo ménos 60 ora pa luna contando otro hende tocante e bon nobo cu a cambia mi bida. Mi a bin ta sirbi como minister di tempu completo desde mart 1989 i awor nan a duná mi e privilegio di sirbi como sirbidor ministerial den e congregacion.
Mi a logra kita mayoria dje rastronan di mi bida como yakuza. Pero tog tin un cu a keda. Esei ta e tatú riba mi curpa cu ta corda ami, i tambe mi famia i otronan, di mi pasado como yakuza. Un biaha, mi yu muher mayor a yega cas for di scol na yoramentu, bisando cu lo e no bai scol mas pasobra su amiganan a bis’é cu mi tabata un yakuza i tabatin tatú. Mi tabata por a papia dje asuntu cu mi yunan, i nan a bin comprendé e situacion. Mi ta spera cu anhelo riba e dia ora e tera lo ta un paradijs i mi carni lo bira “mas frescu cu den hubentud.” E ora ei mi tatúnan i recuerdonan di 20 aña di hiba un bida como yakuza lo ta cosnan di pasado. (Job 33:25; Revelacion 21:4)—Manera Yasuo Kataoka a relat’é.
[Plachi na página 11]
Mi ta anhelá e dia ora mi tatúnan lo ser kitá
[Plachi na página 13]
Na Salon di Reino cu mi famia