Yuda Bo Yunan Desaroyá Bon

ORA ta trata di cria yu, hopi mayor ta busca pariba pabou pa contestanan cu eigenlijk nan por haña ei mes den nan propio cas. Masha hopi famia tin un Bijbel, pero e ta para coge stof riba un planki di buki en bes cu nan us’é den criamentu di yu.

Ta cierto cu hopi hende awe ta duda cu por usa Bijbel como un guia den bida di famia. Nan ta descart’é como un buki anticuá, for di moda of demasiado estricto. Pero un examinacion onesto lo revelá cu Bijbel ta un buki práctico pa famianan. Laga nos mira con.

E Ambiente Bon

Bijbel ta bisa e tata cu e mester mira su yunan manera “taki di mata di olijfi tur rond di [su] mesa.” (Salmo 128:3, 4) Un palu yong delicado lo no crece bira un palu grandi cu ta producí fruta si e no ser cultivá cuidadosamente, si e no haña e nutricion, gordura i humedad corecto. Asina tambe, bon criamentu di yu ta rekerí esfuerso i cuido. Yunan tin mester di un ambiente sano pa por crece na madures.

E promé ingrediente pa un ambiente asina ta amor—entre e pareha casá i entre mayornan i yunan. (Efesionan 5:33; Tito 2:4) Hopi miembro di famia ta stima otro, pero no ta mira e necesidad pa expresá e amor ei. Pero, pensa un ratu: Lo bo por bisa cu bo a comunicá cu un amigu si bo a skirbié cartanan cu nunca bo a manda of nunca a skirbi e adres of a pone stampia riba nan? Mescos tambe, Bijbel ta mustra cu berdadero amor ta muchu mas cu un sintimentu cu ta conmové nos curason; e ta expresá su mes cu palabra i accion. (Compará cu Juan 14:15 i 1 Juan 5:3.) Dios a pone e ehempel, ora el a expresá su amor pa su Yu cu palabra: “Esaki ta mi Yu, esun stimá, kende mi a aprobá.”—Mateo 3:17.

Encomendacion

Con mayornan por mustra amor asina na nan yunan? Pa cuminsá, busca nan bon cualidadnan. Ta fácil pa haña falta cerca muchanan. Nan inmadures, falta di experencia i egoismo lo manifestá su mes den un cantidad di manera, dia aden dia afó. (Proverbionan 22:15) Pero nan lo haci hopi cos bon tur dia. Riba cuanan lo bo enfocá? Dios no ta concentrá riba nos faltanan, sino ta corda e bon cosnan cu nos ta haci. (Salmo 130:3; Hebreonan 6:10) Nos lo mester trata nos yunan mescos.

Un yonkuman ta remarcá: “Den henter mi bida na cas, mi no ta corda un biaha cu mi a haña un of otro forma di encomendacion—sea pa logronan na cas of na scol.” Mayornan, no cera wowo p’e necesidad vital aki den boso yunan! Tur mucha mester ser encomendá regularmente pa e bon cosnan cu nan ta haci. Esei lo reducí e rísico cu nan lo lanta siendo “desanimá,” convencí cu nada cu nan haci hamas lo ta suficiente bon.—Colosensenan 3:21.

Comunicacion

Un bon manera mas pa expresá amor na bo yunan ta dor di sigui e conseho di Santiago 1:19: “[Sea] lihé pa tende, slow pa papia, slow pa rabia.” Bo ta pone bo yunan expresá nan mes i bo ta ègt scucha loke nan tin di bisa? Si bo yunan sa cu lo bo duna nan un sermon promé cu nan caba di papia mes of cu lo bo rabia ora bo haña sa con nan en berdad ta sinti, e ora ei nan por wanta nan sintimentunan pa nan mes. Pero si nan sa cu lo bo ègt scucha, lo tin muchu mas chens cu nan lo ta abierto cu bo.—Compará cu Proverbionan 20:5.

Pero kico si nan revelá sintimentunan cu bo sa cu ta malu? Esaki ta tempu pa un contesta rabiá, un sermon of un disiplina? Ta cierto cu algun explosion infantil lo por hacié difícil pa ta “lihé pa tende, slow pa papia, slow pa rabia.” Pero, considerá atrobe Dios su ehempel cu su yunan. Acaso e ta crea un ambiente di temor insaludabel, di manera cu su yunan tin miedu di bis’é con nan en berdad ta sinti? No! Salmo 62:8 ta bisa: “Confia den [Dios] tur ora, O pueblo. Deshogá boso curason dilanti dje. Dios ta un refugio pa nos.”

P’esei, ora Abraham tabata preocupá tocante Dios su decision pa destruí e stadnan di Sódoma i Gomora, e no a vacilá pa bisa su Tata celestial: “Ta inconcebibel di bo cu bo ta actua den e manera aki . . . E Hues di tur e tera no ta bai haci loke ta recto?” Jehova no a reprendé Abraham; El a scuch’é i a calma su miedunan. (Génesis 18:20-33) Dios tin un pacenshi masha grandi i e ta cariñoso, asta ora su yunan ta revelá sintimentunan cu absolutamente no ta hustificá ni razonabel.—Jónas 3:10–4:11.

Mescos tambe mayornan mester crea un ambiente den cua e yunan ta sinti nan sigur pa revelá nan sintimentunan mas profundo, sin importá con preocupante esakinan por ta. Pues, si bo yu explotá di un manera ardiente, scuch’é. En bes di scual e, lagu’e sa cu bo a tuma nota di su sintimentunan i saca afó pakico e ta sinti asina. Por ehempel, lo bo por bisa: ‘Ta parce cu bo ta rabiá cu fulano. Bo kier contá mi kico a pasa?’

Con pa Manehá Rabia

Naturalmente, ningun mayor tin mes tantu pacenshi cu Jehova. I siguramente muchanan por pone e pacenshi di nan mayornan na prueba te n’e límite. Si bo sa rabia cu bo yunan de bes en cuando, no kere cu esei ta hací bo un mal mayor. Tin biaha lo bo tin tur rason pa ta rabiá. Dios mes ta rabia cu su yunan cu tur bon motibu, asta cu algun di nan cu e stima mashá. (Exodo 4:14; Deuteronomio 34:10) Pero, Su Palabra ta siña nos pa controlá nos rabia.—Efesionan 4:26.

Con? Tin biaha loke ta yuda ta tuma un ‘break’ pa un ratu pa asina bo rabia haña un chens di baha. (Proverbionan 17:14) I corda, Ta un mucha esaki ta! No verwagt comportacion adulto of un manera di razoná maduro for di dje. (1 Corintionan 13:11) Si bo comprendé pakico bo yu ta actua den un cierto manera, esei lo por baha bo rabia. (Proverbionan 19:11) No lubidá nunca e gran diferencia entre haci algu malu i ser un malbado. Si bo grit’é bis’é cu e ta mala mucha, esei lo por hacié pensa den su mes, ‘Wel, pakico purba ta bon mucha?’ Pero dor di corigí un mucha amorosamente, esei lo yud’é haci mihó otro biaha.

Con pa Mantené Ordu i Respet

Siña muchanan un sentido di ordu i respet ta un dje tareanan difícil cu mayornan tin pa haci. Den e mundu permisivo djawendia, hopi hende ta puntra nan mes si ta sikiera bon pa restringí nan yunan mes. Bijbel ta contestá: “E bara i reprendementu ta loke ta duna sabiduria; pero un mucha homber lagá pa su cuenta lo causa bergwensa pa su mama.” (Proverbionan 29:15) Algun hende no ta gusta e palabra “bara,” pensando cu esei ta implicá un of otro forma di abusu di mucha. Pero no ta asina. E palabra hebreo pa “bara” ta referí na un staf, manera esun cu un wardadó di carné ta usa pa guia—no agredí—su carnénan cuné.a Di manera cu e bara ta para pa disiplina.

Den Bijbel, duna disiplina ta nificá primeramente impartí siñansa. Ta p’esei e buki di Proverbionan ta bisa un cuater biaha, ‘scucha na disiplina.’ (Proverbionan 1:8; 4:1; 8:33; 19:27) Muchanan mester siña cu haci loke ta corecto ta trece un recompensa cuné i haci loke ta malu tin mal consecuencia. Castigu por yuda reforsá un scual pa mal comportacion, mescos cu recompensa—manera encomendacion—por reforsá bon comportacion. (Compará cu Deuteronomio 11:26-28.) Lo ta bon pa mayornan imitá Dios su ehempel ora ta trata di castigu, pasobra el a bisa su pueblo cu lo e castigá nan “te na e debido grado.” (Jeremías 46:28) Algun yu no mester mas cu algun palabra streng pa pone nan comportá nan mes bon. Otronan tin mester di medidanan mas fuerte. Pero castigu “te na e debido grado” nunca mag ta algu cu lo por haci un mucha berdadero daño emocional of físico.

Disiplina balansá mester encerá tambe siña yunan tocante límitenan. Hopi di esakinan ta claramente definí den Dios su Palabra. Bijbel ta siña respet pa e límitenan rond di propiedad personal. (Deuteronomio 19:14) E ta pone límitenan físico, haciend’e malu pa stima violencia of haci un otro hende daño deliberadamente. (Salmo 11:5; Mateo 7:12) E ta establecé límitenan sexual, condenando incesto. (Levítico 18:6-18) Asta e ta reconocé límitenan personal i emocional, prohibiendo nos pa yama hende nombernan ofensivo of empleá otro formanan di abusu verbal. (Mateo 5:22) Ta esencial pa siña muchanan tocante e límitenan aki—tantu cu palabra i cu ehempel—pa por crea un ambiente sano di famia.

Un clave mas pa mantené ordu i respet den famia ta sinta den comprendé e papel di cada miembro di famia. Den hopi famia awe, e papelnan ei ta vago of ta ser confundí cu otro. Den algun famia, un mayor lo confia un yu su problemanan pisá, problemanan cu e mucha no ta capas pa manehá. Den otronan, e yunan ta ser permití pa ta dictadornan chikitu, tumando decisionnan pa henter e famia. Cosnan asina ta malu i dañino. Mayornan tin e obligacion di percurá pa e necesidadnan di nan yunan chikitu—sea ta físico, emocional of spiritual—no vise versa. (2 Corintionan 12:14; 1 Timoteo 5:8) Considerá e ehempel di Jacob, kende a ahustá e paso di henter su famia plus e compania di criá i bestia, pa asina e biahe no ta demasiado pisá pa e chikitinnan. El a comprendé nan limitacionnan i a actua di acuerdo cu esei.—Génesis 33:13, 14.

Con pa Percurá pa Necesidadnan Spiritual

No tin nada mas vital pa un ambiente sano di famia cu spiritualidad. (Mateo 5:3) Muchanan tin un capacidad grandi pa asuntunan spiritual. Nan tin yen di pregunta: Pakico nos ta existí? Ken a traha tera i su animalnan, palunan, océanonan? Pakico hende ta muri? Kico ta sosodé despues? Pakico cos malu ta pasa cu bon hende? E lista ta parce infinito. Hopi bes, ta e mayornan ta esnan cu ta preferá pa no pensa riba cosnan asina.b

Bijbel ta urgi mayornan pa dedicá tempu na duna nan yunan entrenamentu spiritual. Cu términonan caluroso e ta describí e entrenamentu ei como un diálogo continuo entre mayornan i yunan. Mayornan lo por siña nan yunan tocante Dios i su Palabra ora nan ta cana huntu, sinta huntu na cas, ora di bai drumi—ki ora cu ta posibel.—Deuteronomio 6:6, 7; Efesionan 6:4.

Bijbel ta haci mas cu recomendá un programa spiritual asina. Tambe e ta percurá e materialnan cu lo bo tin mester. Wel, con lo bo a contestá un yu su preguntanan mencioná ariba? Bijbel tin e contestanan. Nan ta claro, nan ta fasinante i nan ta yena nos cu speransa den e mundu sin speransa aki. Mihó ainda, si bo yunan haña gara dje sabiduria bíblico, nan lo tin e anker di mas fuerte, e guia di mas sigur den e tempu confundidor djawe. Duna nan esei, i di berdad nan lo desaroyá bon—awor i tambe den futuro.

[Notanan]

[Komentario na página 11]

Busca manera pa duna bo yu encomendacion specífico regularmente

[Kuadro na página 9]

Con pa Yuda Yunan Desaroyá Bon

•Percurá un ambiente sigur den cua nan ta sinti nan stimá i kerí

•Encomendá nan regularmente. Sea specífico

•Sea un bon scuchadó

•Tuma un ‘break’ ora rabia bai haltu

•Fiha límitenan claro i consistente

•Adaptá disiplina na e necesidadnan di cada yu

•No spera mas di bo yu cu loke ta razonabel

•Percurá pa necesidadnan spiritual mediante studio regular dje Palabra di Dios

[Kuadro na página 10]

Un Buki Hopi Adelantá

PRECEPTONAN bíblico a yuda hende den Israel di antigwedad disfrutá di un nivel di bida di famia cu tabata muchu mas superior cu esun dje nacionnan rond di nan. Historiadó Alfred Edersheim ta comentá: “Pafó dje fronteranan di Israel, lo tabata casi inapropiado pa bisa cu tabata existí bida di famia, of asta famia, manera nos ta comprendé e términonan aki.” Por ehempel, entre e romanonan di antigwedad ley a duna e tata poder absoluto den e famia. E por a bende su yunan como catibu, pone nan traha como peon of asta ehecutá nan—sin cu por a castigu’é pa ley.

Algun romano a haña cu e hudiunan tabata straño dor cu nan a trata nan yunan cu cariño. De echo, e historiadó romano di promé siglo Tácito a skirbi un pasashi expresando odio contra e hudiunan, bisando cu nan custumbernan tabata “perverso i a la bes repugnante.” Sin embargo, el a admití: “Ta un crímen den nan pa mata un baby recien nací.”

Bijbel a duna un norma haltu. El a siña e hudiunan cu yunan tabata precioso—eigenlijk nan mester a ser mirá como un herencia for di Dios mes—i mester a ser tratá como tal. (Salmo 127:3) Evidentemente, hopi hudiu a biba conforme cu e conseho ei. Asta nan idioma a revelá e coneccion aki. Edersheim ta remarcá cu ademas di e palabranan pa yu homber i yu muher, hebreo antiguo tabatin nuebe palabra pa yu, cada un aplicando na un fase diferente di bida. Por ehempel, tabatin un palabra pa un yu cu tabata ser criá na pechu ainda i un otro pa unu cu a stop di bebe na pechu. Pa yunan un tiki mas bieu, tabatin un palabra cu tabata implicá cu esakinan tabata birando firme i fuerte. I pa hóbennan mas grandi, tabatin un palabra cu literalmente tabata nificá ‘sagudí bira liber.’ Edersheim ta comentá: “Siguramente, hende cu a observá e bida di mucha asina djacerca te pa duna un designacion gráfico na cada fase progresivo di su existencia, mester tabatin un apego amoroso na nan yunan.”