Prizoneronan di Pobresa

NA AÑA 33 E.C., Jesucristo a bisa su disipelnan: “Semper boso tin hende pober cerca boso.” (Mateo 26:11) Ta kico precis e tabata kier men? Acaso e tabata bisando cu nunca lo bin un solucion pa pobresa?

James Speth, administradó dje Programa di Desaroyo di Nacionnan Uní, a declará: “Nos no por aceptá cu semper nos lo tin [pobresa]. E mundu moderno tin e recursonan, e abilidad i experticio pa pasa pobresa pa olvido.” Pero di berdad e mundu moderno por eradicá pobresa?

Ta evidente cu e Asamblea General di Nacionnan Uní ta spera cu esfuersonan humano por caba cu pobresa, ya cu el a proclamá e añanan 1997 te cu 2006 como e promé “Década di Nacionnan Uní pa Eradicá Pobresa.” Nacionnan Uní a proponé pa traha huntu cu gobiernu, pueblo i institucionnan pa stimulá desaroyo económico, mehorá acceso na servicionan básico, mehorá e condicion di hende muher i generá entrada i empleo.

Metanan sublime! Pero e comunidad di mundu lo alcansá nan algun dia? Considerá algun dje obstáculonan cu ta stroba cu hende por eradicá pobresa.

Hamber i Malnutricion

Ayembe, cu ta biba na Zaire, tin 15 miembro di famia cu ta dependé di dje. Tin biaha e famia por come un biaha pa dia so: papa di maishi sasoná cu salu, sucu i blachi di yuca. Tin biaha nan no tin nada di come pa dos of tres dia. Ayembe ta bisa: “Mi ta warda te ora cu e muchanan yora pa cuminda pa mi cushiná.”

Nan caso no ta único. Na paisnan den desaroyo, 1 di cada 5 persona ta bai drumi cu hamber tur anochi. Mundialmente, rond di 800 miyon hende—di cua 200 miyon ta mucha—ta crónicamente malnutrí. E muchanan aki no ta crece normal; nan ta bira malu hopi. Nan no ta presta bon na scol. Ora nan bira adulto nan ta sufri consecuencia dje cosnan aki. Pues, hopi bes pobresa ta hiba na malnutricion, loke na su turno ta contribuí na pobresa.

Pobresa, hamber i malnutricion ta existí riba un escala asina inmenso, cu no tin ningun medida político, económico of social cu por eliminá nan. En berdad, e situacion no ta birando mihó sino pió.

Problema cu Salú

Segun e Organisacion Mundial di Salú, pobresa ta “e malesa mas mortífero di mundu” i “e principal causa fundamental di morto, malesa i sufrimentu.”

E buki An Urbanizing World: Global Report on Human Settlements, 1996 a remarcá cu por lo ménos 600 miyon hende na Latino América, Asia i Africa tabata biba den bibiendanan asina deplorabel—sin awa limpi, saniamentu ni riolering—cu nan bida i salú tabata constantemente na peliger. Mundialmente, mas cu mil miyon hende no tin awa limpi. Cientos di miyones no por aford un dieta balansá. Tur e factornan aki ta haci difícil pa hende pober prevení malesa.

Hopi bes hende pober no por trata malesa tampoco. Ora hende pober bira malu, kisas nan no por paga pa e remedi of e tratamentu médico apropiado. Hende pober ta muri yong; esnan cu ta keda na bida kisas ta sigui biba cu malesanan crónico.

Zahida, un bendedó na marshe na Maldívas, ta bisa: “Pobresa ta nificá malesa, loke ta strobá bo di traha.” I claro, si no tin trabou, bo ta cai mas profundo den pobresa. E resultado ta un ciclo cruel i mortífero den cua pobresa i malesa ta intensificá otro.

Desempleo i Salario Abou

Un otro aspecto di pobresa ta desempleo. Rond mundu, tin 120 miyon hende cu por traha, pero cu no por haña trabou. Miéntras tantu, rond di 700 miyon otro hende ta traha hopi bes dia di trabou largu djis pa gana un chipichipi, cu cua apénas nan por satisfacé nan necesidadnan básico.

Rudeen ta core un taxi-baiskel na Cambodia. E ta bisa: “Pa mi, pobresa ta traha mas cu 18 ora pa dia, pero tog sin gana suficiente pa ami, mi casá i dos yunan come.”

Destruccion dje Medio Ambiente

Enlasá cu pobresa, ta e destruccion di e medio ambiente. Elsa, un investigadó na Guyana, Sur América, a comentá: “Pobresa ta e destruccion di naturalesa: e selva, tera, bestianan, riunan i lagonan.” Ata aki otro ciclo trágico: pobresa ta hiba na destruccion di medio ambiente, loke ta continuá e situacion di pobresa mas i mas.

For di antaño hende a usa cunucu pa cultivá e tera te ora e agotá, of pa otro propósito. Mescos ta e caso cu rosamentu di selva: habri mondi pa planta cunucu of pa usa e palu pa construccion of pa candela. Debí cu e cantidad di hende riba tera ta aumentá, e situacion a bira crítico.

Segun e Fondo Internacional pa Desaroyo di Agricultura, durante e último 30 añanan, casi 20 porciento dje capa mas ariba di tera di cunucunan a bai perdí, foral debí na un falta di tantu e placa como e tecnologia necesario pa aplicá medidanan di conserbacion. Durante e mésun periodo ei, miyones di hectar a bira desierto pa motibu di sistemanan di irigacion mal trahá of mal mantené. I tur aña hende ta basha cientos di miles di hectar di selva abou pa habri tereno pa cunucu of pa haña palu pa construccion of pa candela.

E destruccion aki ta ligá cu pobresa den dos manera. Promé, hopi bes hende pober ta haña nan obligá di explotá e medio ambiente debí na nan necesidad pa cuminda i palu pa candela. Cu ki cara bo ta bai papia di desaroyo sin daña e medio ambiente of dje bienestar di futuro generacionnan cu esnan cu ta hambrá i pober, i cu ta haña nan obligá di daña e recursonan natural pa sobrebibí awor aki mes? Di dos, hopi bes hende ricu ta explotá e recursonan natural di hende pober pa ganashi. Asina e destruccion di recursonan natural dor di hende ricu i pober ta aumentá pobresa.

Educacion

Alicia, un trahadó social urbano na Filipínas, a declará: “Pobresa ta un muher cu ta manda su yunan bai pidi limosna riba caya en bes di manda nan scol, pasobra sino lo no tin nada pa come. E mama sa cu e ta ripitiendo un ciclo cu tin’é atrapá, pero e no ta mira niun otro salida.”

Un 500 miyon mucha no tin scol. Mil miyon adulto ta funcionalmente analfabeta. Sin un educacion, ta difícil pa haña un bon trabou. Di manera cu pobresa ta hiba na falta di educacion, loke ta hiba na mas pobresa.

Bibienda

Den paisnan pober, i asta den algun pais ricu tin scarcedad di bibienda. Un informe ta bisa cu den e último cincu añanan casi un cuart miyon habitante di New York City a keda, na un momento dado, den asilo pa hende sin cas. Europa tambe tin su hende pobernan. Na Londen, rond di 400.000 hende ta registrá como sin cas. Na Francia mei miyon hende no tin cas.

Na paisnan den desaroyo, e situacion ta pió ainda. Cantidad di hende ta basha bai stad, tentá p’e soño di por logra haña cuminda, trabou i un mihó bida. Den algun stad, mas cu 60 porciento dje poblacion ta biba den barionan di kròt. Asina pobresa den cunucu ta fomentá pobresa den stad.

Poblacion

Un cos cu ta empeorá e problemanan aki ta crecementu di poblacion. E poblacion di mundu a bira mas cu dos bes mas tantu den e último 45 añanan. Nacionnan Uní ta calculá cu pa aña 2000 e cifra aki lo aumentá te na 6,2 mil miyon, i pa aña 2050 te na 9,8 mil miyon. E áreanan mas pober di mundu tin e crecementu mas haltu. Dje rond di 90 miyon babynan cu a nace na 1995, 85 miyon a nace den paisnan unda ménos por percurá pa nan.

Bo ta kere cu di ripiente humanidad lo cooperá pa eradicá pobresa pa semper dor di resolvé e problemanan di hamber, malesa, desempleo, destruccion di medio ambiente, falta di educacion, mal bibienda i guera? Probablemente no.

Acaso esei ta nificá cu e situacion no tin salida? No, pasobra tin un solucion na bista i esaki lo bini sigur. Pero no via esfuersonan humano. Con anto? I kico dje palabranan di Jesus ora el a bisa: “Semper boso tin hende pober cerca boso”?

[Kuadro na página 7

Esnan Mas Pober dje Pobernan

Na 1971 Nacionnan Uní a lansa e frase “paisnan ménos desaroyá” pa describí e “paisnan den desaroyo mas pober i económicamente mas débil.” E tempu ei tabatin 21 dje paisnan aki. Awor tin 48 di nan, di cua 33 ta na Africa.

[Plachi na página 5]

Miyones ta traha dianan di trabou largu pa poco cen

[Rekonosementu]

Godo-Foto

[Plachi na página 6]

Luho i pobresa lado a lado

[Plachi na página 7]

Miyones di hende ta biba den bibiendanan deplorabel