Ora Speransa I Amor Ta Disparce

UN MUCHA MUHER canades di 17 aña a skirbi e motibunan pakico e kier a muri. Entre otro cosnan, el a mencioná: ‘Mi ta sintí mi mi so i tin miedu di futuro; mi ta sintí mi hopi mas inferior cu mi coleganan di trabou; miedu di guera nuclear, capa di ozon; mi ta ègt mahos, p’esei nunca lo mi haña un casá i lo mi hañá mi ta keda mi so; mi no ta kere cu tin muchu cos mas pa biba p’e, wel, pakico ward’é bini; mi morto lo kita un peso for di tur otro hende; ningun hende lo por hùrt mi mas.’

Esakinan por ta algun dje motibunan pakico hóbennan ta mata nan mes? Na Cánada, “despues di desgracia cu vehículo di motor, suicidio ta e causa mas comun di morto entre nan.”—The Globe and Mail.

Profesor Riaz Hassan, dje Universidad Flinders di Sur Australia, ta declará den su ensayo “Bidanan Sin Biba: Tendencianan den Suicidio Hubenil”: “Tin vários motibu sociológico relacioná cu e cuestion i ta parce cu nan a influenciá masha tantu e aumento den suicidio di adolesentenan. Por mencioná e porcentahe haltu di desempleo entre hóbennan, cambionan den e famia australiano, aumento di uso di droga, aumento di violencia hubenil, salú mental i un brecha cada bes mas grandi entre ‘libertad teorético’ i autonomia experimental.” Tambe e ensayo ta declará cu e resultadonan di vários encuesta a revelá cu hopi hóben ta pesimista tocante futuro i e ta indicá cu “un gran proporcion di hóben ta mira nan futuro i esun di mundu cu temor i temblamentu. Nan ta imaginá nan un mundu ruiná dor di guera nuclear i destruí dor di polucion i degeneracion di medio ambiente, un sociedad deshumanisá den cua tecnologia ta bai for di man i unda tin desempleo na tur parti.”

Segun un encuesta di Gallup bou di hóbennan entre 16 pa 24 aña, otro motibunan mas pa suicidio ta e brecha creciente entre ricu cu pober, e cantidad aumentante di famianan cu un solo mayor, e echo cu uso di arma ta bira mas i mas comun, abusu di mucha i un ‘falta general di fe den futuro.’

Newsweek ta informá cu na Merca “e presencia di arma di candela ta kisas e factor mas determinante [den suicidio hubenil]. Un estudio cu a compará víctimanan di suicidio hubenil cu no tabatin trastorno mental bisto, cu muchanan cu no a cometé suicidio, a haña un diferencia so: un scopet armá den cas. Ke men, no ta cierto cu scopet no ta mata hende.” Anto tin miyones di cas cu tin scopet armá!

Miedu i un sociedad desinteresá por hiba hóbennan vulnerabel fácilmente na rand di suicidio. Considerá esaki: E porcentahe di crímennan violento cometí contra muchanan di 12 pa 19 aña ta mas cu dos bes mas tantu cu e crímennan contra e poblacion en general. Estudionan a saca afó cu “mucha muhernan entre 14 pa 24 aña tin mas chens di ser atracá,” segun e revista Maclean’s. “Mayoria biaha, ta hende muher ta ser atacá i asesiná dor di hende cu ta pretendé di stima nan.” E resultado? Esaki i otro miedunan “ta mata e confiansa i e sentido di siguridad dje mucha muhernan aki.” Den un estudio, casi un tercer parti dje víctimanan di violacion cu a ser entrevistá a pensa di cometé suicidio.

Un informe for di Nueva Zelandia ta duna un otro perspectiva riba suicidio cometí dor di hóbennan, declarando: “Mundu su balornan materialista dominante cu ta definí éxito personal como poseé fortuna, bunitesa i poder, ta duna hopi hóben un sintimentu fuerte di cu nan ta inútil i cu sociedad ta rechasá nan.” Ademas, The Futurist ta bisa esaki: “[Hóbennan] tin un disposicion natural fuerte pa haña gratificacion instantáneo. Nan kier tur cos i nan kier e awor. Nan programanan faborito di television ta novela. Nan tin gana pa nan mundu ta yená cu e mésun hendenan ei di aparencia bunita, bistí na último moda, yen di placa i cu hopi prestigio, sin cu nan tin cu traha muchu duru.” E totalidad dje ilusionnan irealístico ei, ta parce di causa un grado di desesperacion i lo por hiba na suicidio.

Un Cualidad cu Ta Salba Bida?

Shakespeare a skirbi: “Amor ta consolá mescos cu solo despues di awaceru.” Bijbel ta bisa: “Amor nunca ta faya.” (1 Corintionan 13:8) E cualidad aki ta un factor clave den e problema di hóbennan cu kier cometé suicidio: nan tin un anhelo pa amor i comunicacion. The American Medical Association Encyclopedia of Medicine ta declará: “Por lo general hende cu e inclinacion di cometé suicidio ta sufri di un soledad profundo i tin biaha e chens pa papia cu un scuchadó comprensivo i empático ta tur loke ta necesario pa prevení e acto di desesperacion.”

Hopi bes hóbennan tin un necesidad masha grandi mes di amor i di sinti cu nan ta pertenecé un caminda. Cada bes ta bira mas i mas difícil pa satisfacé e necesidad aki den un mundu destructivo i sin amor, un mundu den cua nan tin masha poco of nada mes di bisa. Rechaso di parti di mayornan dor cu famianan ta kibra for di otro i dor di divorcio por bira un factor cu por hiba na suicidio hubenil. I e rechaso aki por tuma hopi forma.

Considerá e caso di mayornan cu no sa ta na cas cu nan yunan. Tal bes Mama cu Tata ta totalmente absorbá den nan trabou of ta dedicá nan na un of otro forma di recreo den cua e yunan no ta participá. E mensahe indirecto cu nan ta manda pa nan yunan ta un rechaso bastante abierto. E periodista i investigadó prominente Hugh Mackay ta remarcá cu “mayornan ta birando mas i mas egocéntrico. Nan ta pone nan mes promé pa nan mantené nan estilo di bida. . . . Pa bisa flat, yunan a bai for di moda. . . . Bida ta duru i tur esei ta pone cu hende ta ocupá un poco cu nan mes interesnan.”

Otro cos mas. Den algun cultura hombernan cu ta mira nan mes como macho no kier pa hende mira nan ta cria yu. Periodista Kate Legge a expres’é hopi bon: “Por lo general, hombernan cu tin e inclinacion di traha den servicionan público, ta scoge profesionnan di salba bida of paga candela mas bien cu esnan di cuida hende . . . Nan ta preferá e heroismo fuerte anónimo di lucha contra forsanan externo, cu e trabounan unda mester atendé cu hende.” I, naturalmente, un dje tareanan cu bo mester atendé mas tantu cu hende ta ora bo ta un mayor. Neglishá bo responsabilidad como mayor ta mescos cu rechasá un yu. Como resultado, bo yu lo por desaroyá un imágen negativo di su mes i abilidadnan social deficiente. The Education Digest ta remarcá: “Si muchanan no tin un imágen positivo di nan mes, nan no tin un base pa tuma decisionnan cu ta na nan propio bienestar.”

E Resultado Por Ta Desesperacion

Investigadónan ta kere cu desesperacion ta un dje factornan principal cu ta hiba na suicidio. Gail Mason, un escritora riba suicidio hubenil na Australia, a comentá: “Ta parce cu ideanan pa cometé suicidio ta relacioná mas cu desesperacion, cu nan tin di haber cu depresion. Tin biaha hende ta mira desesperacion como un síntoma di depresion. . . . Normalmente e ta tuma e forma di un sentido general di ta anshá i desanimá pa loke ta futuro di hóbennan, i en particular nan futuro económico; i na un grado menor, un sintimentu di desesperacion relacioná cu e situacion mundial.”

E mal ehempelnan di desonestidad cu lidernan di pueblo ta pone no ta inspirá hóbennan pa subi nan mes nivel di ética i moralidad. Nan ta haña un actitud di “ki mi ta wori?” Harper’s Magazine ta comentá riba e abilidad di hóbennan pa detectá hipocresia, bisando: “Hóbennan, cu nan nanishi skerpi pa hipocresia, ta de echo lesadónan hopi apto, pero no di buki. Loke nan ta lesa asina bon ta e indicacionnan social cu ta bini di un mundu den cua nan lo tin cu bai gana nan pan.” I ta kico e señalnan ei ta bisa? Autor Stephanie Dowrick ta observá: “Nunca promé nos a ser inundá cu informacion tocante con pa biba. Nunca nos tabata mas ricu of mas educá, pero tog tin desesperacion na tur parti.” Anto tin masha poco bon ehempel di conducta den e rangonan haltu dje sociedad político i religioso. Dowrick ta haci un par di pregunta mashá al caso: “Con nos ta adkerí sabiduria, animacion of asta nificacion for di sufrimentu sin sentido? Con nos ta cultivá amor den un ambiente egoista, golos i di mal beis?”

Lo bo haña contesta pa e preguntanan aki den nos siguiente artículo, i kisas lo bo keda sorprendí.

[Komentario na página 6]

“Un gran proporcion di hóben ta mira nan futuro i esun di mundu cu temor i temblamentu”

[Komentario na página 7]

“E chens pa papia cu un scuchadó comprensivo i empático ta tur loke ta necesario pa prevení e acto di desesperacion”

[Kuadro na página 6]

Algun Indicacion di Suicidio

• Problema cu drumimentu, falta di apetit

• Isolacion i alehamentu, haña accidente lihé

• Bai for di cas

• Cambionan drástico den aparencia

• Uso di droga i/of abusu di alcohol

• Alterá, bira agresivo

• Papia di morto, skirbi mensahenan di autodestruccion, pinta cosnan cu ta mustra violencia, foral contra su mes

• Sintimentunan di culpa

• Desesperacion, ansiedad, depresion, episodionan di gritamentu

• Regalá pertenencianan personal

• No por concentrá pa hopi ratu

• Perde interes den actividadnan placentero

• Crítica propio

• Promiscuidad sexual

• Di ripiente ta bai atras na scol, no kier bai scol

• Bira miembro di culto of gèng

• Euforia despues di depresion

Sacá for di Teens in Crisis (Asociacion Mericano di Administradónan di Scol) i Depression and Suicide in Children and Adolescents, di Philip G. Patros i Tonia K. Shamoo

[Plachinan na página 7]

Amor caluroso i compasion por yuda un hóben apreciá bida