Hobennan Sa Puntra . . .

Di Con Mi No Por Haña e Cosnan cu Mi Kier?

“Tin algun cos hopi great cu mi tin masha gana di nan; pero mi mayornan no por cumpra nan.”—Mike.

TIN cosnan cu bo tin ègt gana di nan, pero cu bo no por haña? Kisas bo ta anhelá e stereo set nobo ei, e sapatunan cu tur otro mucha tin of djis un jeans nobo cu marca dje diseñadó. Algun di bo pareunan sí tin e cosnan ei i ta show nan cu orguyo. Pues, si bo mayornan a bisa bo cu nan no tin cen pa cumpra nan, kisas bo ta keda decepcioná.

Pero, aunke ta masha normal cu un persona kier cierto cosnan material, pa hopi hóben e deseo di por tin cierto cos ta casi un obsesion. Ta parce cu gran parti di esaki ta debí na propaganda di medionan di comunicacion. Propaganda yamativo di television, revista i radio ta transmití e mensahe cu a ménos cu bo ta bisti cierto paña of ta usa producto di cierto marca, bo ta un fracaso teribel. Wel, na Merca so tienernan ta gasta riba 100 mil miyon dollar pa aña!

Anto tambe tin e preshon di pareunan. Un artículo den e revista Marketing Tools ta bisa cu “den e mundu cruel i ingenuo di adolesentenan, si e grupo social cu bo ta aspirá pa pertenecé na dje ta haña cu bo no ta den stail, esei no ta djis un asuntu cu bo no a alcansá nan norma, ni sikiera cu nan a rechasá bo: esei ta un característica cu bo ta E Fracaso.” Kico ta e clave pa ta “den stail”? Den hopi círculo esei ta: tin lo mihó i lo último den cosnan material. I si bo no tin cen pa cumpra nan? “Ta masha, masha duru mes,” un hóben cristian ta admití. “Bo ta bai scol cu paña cu no ta di marca, i tur hende ta tenta bo.” Un otro hóben ta admití: “Tin biaha mi ta sinti cu nan ta laga mi afó.”

Hóbennan cu ta biba den paisnan den desaroyo, caminda hende ta traha duru pa oranan largu djis pa por satisfacé e necesidadnan básico di bida, por sinti un preshon similar. Si esaki ta e caso cu bo famia, di mes bo por ta anhelá pa un mihó estilo di bida. Por ta bo tambe a cuminsá desaroyá un anhelo pa e pañanan, cas i autonan caru cu e programanan di television i películanan di paisnan mas ricu ta promové. Ya cu por parce cu nunca lo bo no alcansá e cosnan ei, bo por bira amargá of asta deprimí.

Sea bo ta biba den un pais pober of ricu, rabia of frustra pasobra bo no por tin cierto cosnan por solamente perhudicá bo. Tambe esei por hiba na pelea constante cu bo mayornan. E pregunta ta: Con bo por trata cu e situacion?

Un Punto di Bista Balansá di Cos Material

Na promé lugá, realisá cu no ta Jehova Dios su deseo pa su pueblo biba den pobresa of sin loke nan tin ègt mester di dje. Corda cu Dios no a pone Adam cu Eva den un landfill, sino den un hofi bunita yen di palu deseabel pa bista. (Génesis 2:9) Mas despues, algun sirbidó di Dios, manera Abraham, Job i Sálomon, tabatin hopi posesion. (Génesis 13:2; Job 1:3) Sí, Sálomon tabatin asina tantu oro, cu durante su reinado nan a considerá plata como “absolutamente nada”!—1 Reynan 10:21, 23.

Pero, por lo general, mayor parti dje pueblo di Dios tabata di recurso modesto. Jesucristo mes tabata pober; e no tabatin ni sikiera ‘un lugá pa pone su cabes.’ (Mateo 8:20) Tog, bo no ta lesa nunca cu Jesus a keha cu e no por a cumpra e cosnan cu e tabatin gana di dje. Mas bien, el a siña hende: “Nunca no sea anshá i bisa: ‘Kico nos lo come?’ of: ‘Kico nos lo bebe?’ of: ‘Kico nos lo bisti?’ . . . Pasobra boso Tata celestial sa cu boso tin mester di tur e cosnan aki. Sigui busca, anto, promé e reino i Su husticia, i tur e otro cosnan aki lo ser agregá na boso.”—Mateo 6:31-33.

Esaki no kier men cu Dios ta obligá na cumpli cu un hende su anhelo di tin paña di marca of aparato electrónico. Dios ta percurá pa loke nos tin mester, no necesariamente pa loke nos tin gana di dje. P’esei Bijbel ta urgi nos pa keda contentu cu solamente “cuminda, paña i dak.” (1 Timoteo 6:8) Pero, laga nos ta realista, no ta fácil pa keda contentu cu loke bo tin. Un hóben cu yama Mike ta admití cu “bo tin un lucha constante entre loke bo tin gana di dje i loke bo tin mester.” Ademas di nos propio inclinacionnan egoista, nos tin cu lucha contra e influencia di Dios su enemigu principal, Satanas e Diabel. (1 Juan 5:19) I un di su trikinan di mas bieu ta di laga hende sinti cu nan ta perdiendo algu. Asina el a seducí Eva pa pensa cu Eva a ser privá di algu, maske el a biba den un paradijs perfecto!—Génesis 3:2-6.

Con bo por evitá di cai den e trampa di ta malcontentu? Por ta e ta zona manera un dicho comun, pero tin hopi motibu pa ta gradicidu. No keda absorbá den pensamentunan negativo tocante loke bo no tin. Pensa positivo, i recordá bo mes dje cosnan cu sí bo tin. (Compará cu Filipensenan 4:8.) Mike ta bis’é asina aki: “Tin hopi cos cu mi tin ègt gana di nan, pero mi no ta keda pensa riba nan.”

Loke tambe ta yuda ta pa no core aceptá e propagandanan astuto cu ta traha cu bo emocionnan.a (Proverbionan 14:15) Promé cu bo yega n’e conclusion cu lo bo “muri” si bo no tin e kedsnan nobo ei of e CD-player ei, purba analisá e situacion cu calmu. Puntra bo mes: ‘Di berdad mi tin mester di esaki? E ta sirbi un propósito práctico? Loke mi tin caba no ta suficiente?’ Tene masha cuidou foral cu propagandanan cu ta promové e prestigio di tin un cierto cos. Apostel Juan su palabranan na 1 Juan 2:16 ta pone nos pensa seriamente: “Tur loke tin den mundu—e deseo di carni i e deseo di wowo i e exhibicion grandioso di bo medio di biba—no ta originá cu e Tata, sino ta originá cu mundu.”

Ora cu di Berdad Bo Mester di Algu

Kico si tin algu cu di berdad bo tin mester? Analisá e asuntu promé cu bo papia cu bo mayornan tocante dje. Prepará pa splica precis di con bo tin mester dje cos aki, con bo tin pensá di us’é i pakico bo ta haña cu lo e beneficiá bo. Podisé bo mayornan lo haña un manera pa hink’é den e presupuesto dje famia. Pero, kico si, kisas pa awor, nan no por? Por ta bo no tin otro opcion sino di tene pacenshi. (Eclesiástes 7:8) Nos ta biba den “tempu crítico, duru pa trata cuné,” i hopi mayor simplemente no tin e cen pa cumpra tur e cosnan cu nan yunan ta pidi. (2 Timoteo 3:1) Si bo evitá di pidi bo mayornan cosnan irazonabel, en realidad bo por haci nan tarea difícil un poco mas fácil.

Sin embargo, kisas bo mes por tuma e iniciativa. Por ehempel, bo ta haña zakgeld? Si ta asina, purba siña planea e uso di bo placa cuidadosamente, pa asina bo por spar un parti di dje tur luna. Por ta bo por asta habri un cuenta di spar na un banco cerca di bo cas. (Compará cu Lucas 19:23.) Esei ta loke un hobencita cu yama Abigail a haci. E ta bisa: “Mi a traha dos stapel di placa, unu pa mi cuenta di banco i e otro pa gasta.” Si bo tin suficiente edad pa esei, bo por asta purba haci algun trabou los of part-time.b Sea cual sea e caso, si bo mayornan mira cu di berdad bo kier cumpra algu i cu bo ta busca manera di spar placa, nan lo por sinti nan impulsá pa yuda bo cu un parti dje gastu, si esei ta posibel.

Lo ta bon tambe pa bo haci algun cambio den bo manera di haci compra. Por ehempel, si un cos ta muchu caru pa bo, kisas ta posibel pa negoshá un prijs mas abou. Si bo no logra cu esei, warda i wak si nan no ta pone e artículo na baratio. Bai na otro pacus pa wak si bo no por haña e mésun cos ei pa un prijs mas abou. Siña examiná artículonan bon, pa wak si nan ta di calidad; tin biaha artículo cu no ta di marca ta bon ganga.c

Siña Keda Contentu

Proverbionan 27:20 ta spierta: “Sheol i e lugá di destruccion mes no ta keda satisfecho; ni wowo di un hende no ta keda satisfecho.” Sí, mescos cu graf tin un apetit insaciabel, asina tin hende cu semper kier mas i mas, sin importá cuantu nan tin caba. Evitá e manera di pensa egoista ei. A lo largu, golosidad ta trece nada otro sino frustracion i infelicidad. Un hóben cu yama Jonathan ta comentá: “Si semper bo felicidad ta dependé di tin cos, lo bo no ta felis nunca. Semper lo tin algu nobo cu bo kier. Bo tin cu siña ta felis cu loke bo tin.”

Si bo keda contentu, bo por manehá e preshon for di bo pareunan. E hóben Vincent ta bisa: “Djis pasobra mi mira un hende cu keds di marca no kier men cu ami tin cu core bai cumpra unu pa mi mes.” Claro, de bes en cuando, bo por sinti bo malu ora bo no por haña loke bo kier. Pero no lubidá nunca cu Jehova conocé bo necesidadnan. (Mateo 6:32) I den un futuro no masha leu, lo e “satisfacé e deseo di tur cos bibiente.”—Salmo 145:16.

[Notas]

[Komentario na página 13]

“Bo ta bai scol cu paña cu no ta di marca, i tur hende ta tenta bo”

[Plachi na página 14]

Bo por ta felis sin tin tur loke bo tin gana di dje