Capítulo 28

E lucha contra dos bestia feroz

Vision 8—Revelacion 13:1-18

Tema: E bestia salbahe cu siete cabez, e bestia salbahe cu dos cachu, i e imagen dje bestia salbahe

Tempo di cumplimento: Desde e dia di Nimrod te ne tribulacion grandi

1, 2. (a) Kico Juan a bisa tocante e dragón? (b) Usando idioma simbólico, ki detaye Juan a duna dje organizacion visibel cu e dragón ta usa?

E DRAGÓN grandi a ser tirá abao ne tera! Nos estudio di Revelacion ta haci claro cu nunca mas e Colebra ni demoño sigidor di dje lo ta permití di bolbe na cielo. Pero nos no a caba ainda cu “esun yamá Diabel i Satanás, cu ta gaña tur e tera habitá.” E relato ta identifica sigientemente cu mas detaye e medio cu Satanás ta usa pa bringa contra e ‘muher i su simía.’ (Revelacion 12:9, 17) Juan a bisa tocante e dragón den forma di colebra: “I el a para ketu riba santo di lamá.” (Revelacion 13:1a) Pues, láganos pausa pa examina e instrumento dje dragón.

² E presencia di Satanás i di su demoñonan no por afligi cielo santo mas. Tal mal spiritu a ser sacá for di cielo i limitá na becindario dje tera. Sin duda esei ta splica e aumento tremendo di práctica di spiritismo den tempo actual. E Colebra astuto ainda ta mantene un organizacion spiritual corrupto. Pero, e ta usa un organizacion visibel també pa gaña humanidad? Juan ta bísanos: “Mi a mira un bestia salbahe subiendo for di lamá, cu diez cachu i siete cabez, i riba su cachu diez diadema, pero riba su cabez nomber blasfemoso. Awor, e bestia salbahe cu mi a mira tabata manera un leopardo, pero su pia tabata pia di oso, i su boca tabata boca di león. I e dragón a duna ne bestia su poder i su trono i gran autoridad.”—Revelacion 13:1b, 2.

 3. (a) Cua bestia feroz profeta Daniel a mira den un vision? (b) Bestia enorme di Daniel 7 ta representa kico?

³ Kico ta e bestia monstruoso? E Bijbel mes ta duna contesta. Promé cu e caimento di Babilonia na aña 539 PEC, Daniel, e profeta hudío, a mira vision cu a inclui bestia feroz. Den Daniel 7:2-8 el a detaya cuater bestia subiendo for di lamá, e promé a parce un león, e segundo un oso, e tercer un leopardo, i “atá mira! bestia di cuater, spantoso i terribel i extraordinariamente fuerte . . . i e tabatin diez cachu.” Esei ta parce mashá e bestia salbahe cu Juan a mira rond di aña 96 EC. E bestia ei també tin aparencia di león, oso, i leopardo, i tin diez cachu. Kico bestia enorme cu Daniel a mira ta representa? El a bísanos: “Tal bestia enorme . . . ta cuater rey cu lo lanta na pia for di tera.” (Daniel 7:17) Sí, tal bestia ta representa “rey,” of poder político di mundo.

 4. (a) Den Daniel 8, kico e chubat’i carné i e cabrito a simboliza? (b) Kico tabata indicá ora e cachu grandi dje cabrito tabata kibrá i cuater cachu a sali den su lugar?

⁴ Den un otro vision, Daniel a mira un cabrito cu un cachu grandi derota un chubat’i carné cu dos cachu. Angel Gabriel a splica na Daniel e nificacion di esei: “E chubat’i carné . . . ta representa rey di Media i Persia. I e chubat’i cabrito cu lana ta representa e rey di Grecia.” Gabriel a sigi pa profetiza cu e cachu grandi dje cabrito lo ser kibrá i cuater cachu lo sali den su lugar. Esei realmente a sosode mas cu 200 aña despues ora Alehandro Magno a muri i su reino tabata partí den cuater reino cu cuater general di dje a domina.—Daniel 8:3-8, 20-25.a

 5. (a) E palabra griego pa bestia ta duna cua indicacion? (b) E bestia salbahe di Revelacion 13:1, 2, hunto cu su siete cabez, ta simboliza kico?

⁵ Pues, ta keda claro cu e Autor dje Bijbel inspirá ta considera poder político di mundo como bestia. Ki clase di bestia? Un comentador a yama e bestia salbahe di Revelacion 13:1, 2 un “bruto,” i a sigi: “Nos ta acepta tur e nificacion cu θηρίον [the·rí·on, e palabra griego pa “bestia”] ta indica, tal como un monster cruel, destructivo, spantoso, golós, etc.”b Ki bon esei ta pinta e sistema político manchá cu sanger cu Satanás a usa pa domina humanidad! E siete cabez dje bestia salbahe ta representa e seis poder mundial principal cu história bíblica ta mencioná te ne dia di Juan, esta, Egipto, Asiria, Babilonia, Medo-Persia, Grecia, i Roma, i poder mundial di siete profetizá pa presenta despues.—Compara cu Revelacion 17:9, 10.

 6. (a) E siete cabez dje bestia salbahe ta hiba delantera den kico? (b) Con Jehova a usa Roma pa ehecuta su mes huicio riba e sistema di cosnan hudío, i con a bai cu hende cristian den Jerusalem?

⁶ Ta cierto cu tabatin otro poder mundial den pasado además dje sietenan ei—mescos cu e bestia salbahe cu Juan a mira tabata componí di un curpa i també siete cabez i diez cachu. Pero e siete cabez ta representa e siete poder principal cu, un tras di otro, a hiba delantera oprimiendo e pueblo di Dios. Na aña 33 EC, ora Roma tabata na mando, Satanás a usa tal cabez dje bestia salbahe pa mata e Yiu di Dios. Ne tempo ei, Dios a bandona e sistema di cosnan hudío sin fe i despues, na aña 70 EC, el a permiti Roma ehecuta su huicio riba e nacion. Felizmente, e berdadero Israel di Dios, esta, e congregacion di cristian ungí, a recibi advertencia di antemano, i esnan den Jerusalem i den Hudea a hui na siguridad pariba di rio Jordan.—Mateo 24:15, 16; Galatio 6:16.

 7. (a) Tabata tempo pa kico sosode ora e conclusion dje sistema di cosnan a yega i e dia di Señor a cuminza? (b) Kico a resulta di ser cabez di siete dje bestia salbahe di Revelacion 13:1, 2?

⁷ Sin embargo ne fin dje promé siglo EC, hopi hende dje congregacion di promé a apartá dje berdad, i e berdadero trigo cristian, e “yiunan di Reino,” tabata en gran parti sofocá pa mal yerba, “yiunan dje malbado.” Pero ora e conclusion dje sistema di cosnan a yega, cristian ungí a presenta di nobo como un grupo organizá. Durante e dia di Señor, e hustonan tabatin cu “briya tanto briyantemente como e solo.” Asina e congregacion cristian tabata organizá pa traha. (Mateo 13:24-30, 36-43) Ne tempo ei, e imperio romano no a existi mas. E enorme imperio británico, hunto cu e poderoso Estado Unidos di América, a ocupa e lugar principal den mundo. E poder mundial dobel a resulta di ser cabez di siete dje bestia salbahe.

 8. Pakico no mester parce un insulto pa compara e poder mundial dobel anglo-americano cu un bestia?

⁸ No ta un insulto pa identifica poder político na mando como un bestia salbahe? Esei ta loke algun opositor a bisa durante Gera Mundial II, ora e posicion di Testigo di Jehova, como un organizacion i como hende individual, tabata desafía den tribunal rond di mundo. Pero, para i pensa! E nacionan mes no ta adopta bestia di mondi como nan símbolo nacional? Por ehempel, tin e león británico, e águila americano, i e dragón chinés. Pues, pakico hende mester keha si e Autor divino dje Bijbel Santo també ta usa bestia pa simboliza poder mundial?

 9. (a) Pakico hende no mag keha e Bijbel ora e ta bisa cu Satanás ta duna e bestia salbahe su gran autoridad? (b) Ki detaye e Bijbel ta duna di Satanás, i con e ta influenciá gobierno?

⁹ Además, pakico hende mester keha ora e Bijbel ta bisa cu Satanás ta esun cu ta duna e bestia salbahe su gran autoridad? Dios ta e Fuente dje declaracion, i dilanti dje e ‘nacionan ta manera un gota di awa di emmer i manera un tiki stof.’ Mihor e nacionan trata di gana e fabor di Dios en bez di haya ofensivo loke su Palabra profético ta bisa di nan. (Isaías 40:15, 17; Salmo 2:10-12) Satanás no ta un persona di fantasía asigná pa tormenta alma di hende morto den un fierno di candela. No ta existi un lugar asina. Mas bien, Satanás ta ser pintá den e Scritura como un “angel di luz”—e maestro di engaño cu ta eherce influencia fuerte den asunto político general.—2 Corintio 11:3, 14, 15; Efesio 6:11-18.

10. (a) E echo cu tin un diadema pa cada un dje diez cachu ta indica kico? (b) E diez cachu i diez diadema ta simboliza kico?

¹⁰ E bestia salbahe tin diez cachu riba su siete cabez. Kizás cuater cabez tabatin un cachu cada un i tres cabez tabatin dos cachu cada un. Además, e tabatin diez diadema riba su cachunan. Den e buki di Daniel, bestia spantoso ta ser pintá, i e cantidad di cachu tin cu ser interpretá literalmente. Por ehempel, e dos cachu dje chubat’i carné a representa un imperio mundial componí di dos nacion, Media i Persia, mientras cu e cuater cachu dje cabrito a representa e cuater imperio co-existente cu a sali for dje imperio griego di Alehandro Magno. (Daniel 8:3, 8, 20-22) Sin embargo, e total di diez cachu dje bestia cu Juan a mira ta parce di ser simbólico. (Compara cu Daniel 7:24; Revelacion 17:12.) Nan ta representa e plenitud di nacion soberano cu ta compone henter e organizacion político di Satanás. Tur cachu asina ta violento i agresivo, pero manera e siete cabez ta indica, un solo poder mundial ta na mando alabez. Di igual manera, diez diadema ta indica cu tur nacion soberano ta eherce nan mando ne mesun tempo cu e nacion dominante, of poder mundial, dje tempo ei.

11. E echo cu e bestia salbahe tin “riba su cabez nomber di blasfemia” ta indica kico?

¹¹ E bestia salbahe tin “riba su cabez nomber di blasfemia,” halzando su mes i asina mustrando un gran falta di respet pa Jehova Dios i Cristo Jesús. E ta usa e nomber di Dios i di Cristo como engaño pa logra su meta político; i a hunga wega cu religion falso, asta permitiendo clero participa den procedimiento político. Por ehempel, e Cámara di Senador di Inglaterra ta inclui obispo. Cardenal católico a hunga papel político prominente den Francia i Italia, i mas recientemente, pastor ta ocupa puesto político den América Latina. Gobierno tin lema religioso, tal como “NOS TA CONFIA DEN DIOS,” riba nan placa, i riba nan cen di metal nan ta afirma aprobacion divino pa nan gobernante, bisando, por ehempel, cu nan ta manda cu e “poder di Dios.” Realmente, tur esei ta blasfemoso, pasobra e ta haci esfuerzo pa enbolbe Dios den wega sushi di político nacionalista.

12. (a) E subimento dje bestia salbahe for di “lamá” ta nifica kico, i na ki tempo el a cuminza sali? (b) E echo cu e dragón ta duna e bestia simbólico su gran autoridad ta indica kico?

¹² E bestia salbahe ta sali for di “lamá,” locual ta un símbolo apropiado pa humanidad turbulento di locual gobierno humano ta brota. (Isaías 17:12, 13) E bestia salbahe a cuminza sali for di lamá di humanidad turbulento leu atrás den dia di Nimrod (rond di siglo 21 PEC), ora un sistema di cosnan na oposicion cu Jehova a presenta pe promé bez despues di diluvio. (Génesis 10:8-12; 11:1-9) Pero solamente durante e dia di Señor e último dje siete cabez a presenta completamente. Ripara, també, cu e dragón ta esun cu a “duna ne bestia su poder i su trono i gran autoridad.” (Compara cu Lucas 4:6.) E bestia ta e creacion político di Satanás den e multitud di humanidad. Satanás berdaderamente ta “gobernante di mundo.”—Juan 12:31.

E golpi mortal

13. (a) Cua calamidad a sosode e bestia salbahe na principio di dia di Señor? (b) Di ki manera henter e bestia salbahe a sufri ora un cabez so a recibi un golpi mortal?

¹³ Na principio dje dia di Señor, calamidad a dal e bestia salbahe. Juan a informa: “I mi a mira un cabez di dje como morto cu un golpi mortal, pero su golpi mortal tabata curá, i tur e tera a sigi e bestia salbahe cu admiracion.” (Revelacion 13:3) E texto ta bisa cu un cabez dje bestia salbahe a recibi un golpi mortal, pero versículo 12 ta parce di indica cu e bestia completo a sufri. Pakico? Wel, tur cabez dje bestia no ta na mando hunto. Cada un den su turno a domina humanidad, specialmente e pueblo di Dios. (Revelacion 17:10) Pues, ora e dia di Señor a cuminza, tabatin un cabez so, número siete, na mando como e poder mundial dominante. E golpi mortal riba e cabez ei a causa hopi dolor pa tur e bestia salbahe.

14. Na ki tempo e golpi mortal a dalé, i con un oficial militar a detaya su efecto riba e bestia salbahe di Satanás?

¹⁴ Kico tabata e golpi mortal? Mas tardi, esei ta ser yamá un golpi di spada, i un spada ta símbolo di gera. E golpi di spada, duná na principio dje dia di Señor, mester ta relacioná cu e promé gera mundial, cu a desolá i a gasta e bestia salbahe político di Satanás. (Revelacion 6:4, 8; 13:14) Autor Mauricio Genevoix, cu tabata un oficial militar durante e gera, a bisa di dje: “Tur e mundo ta di acuerdo reconociendo cu den tur e pasado di humanidad, poco fecha tabatin e importancia di 2 di Augustus di 1914. Na principio tabata Europa i pronto despues casi tur humanidad a hayé enbolbí den un sosodimento horrible. Conbenio, acuerdo, ley moral, tur fundeshi a tembla; di un dia pa otro tur cos tabata poní na duda. E sosodimento a surpasa tanto presintimiento di instinto como anticipacion razonabel. Enorme, caótico, monstruoso, ainda e ta lástranos tras di dje.”—Mauricio Geneviox, miembro di Académie Française, citá den e buki Promise of Greatness (1968).

15. Con cabez di siete dje bestia salbahe a recibi su golpi mortal?

¹⁵ E gera tabata un desaster principal pe dominante cabez di siete. Hunto cu otro nacion europeo, Bretaña a perde un cantidad tremendo di su hovenan. Den un bataya so, e bataya dje rio Somme na 1916, 420.000 británico a muri, hunto cu 194.000 francés i 440.000 alemán—mas cu un miyón morto! Económicamente, també, Bretaña—hunto cu tur Europa—tabata aplastá. E enorme imperio británico a keda tolondrá bao dje golpi i nunca a recobrele completamente. En berdad, e gera, cu 28 nacion principal participando, a haci mundo henter tambaleá como si fuera cu un golpi mortal. Dia 4 di Augustus di 1979, 65 aña so despues di principio di Gera Mundial I, The Economist di Londres, Inglaterra, a comenta: “Na 1914 mundo a perde un armonía cu e no por a recobra desde e tempo ei.”

16. Durante e promé gera mundial, con Estados Unidos a mustra cu e tabata parti di un poder mundial dobel?

¹⁶ Ne mesun tempo, e Gera Grandi, locual e tabata yamá ne tempo ei, a habri camina pa Estados Unidos sali claramente como parti dje poder mundial anglo-americano. Durante e promé parti dje gera, opinion público a stroba Estados Unidos di drenta den e conflicto. Pero, manera historiadora Esmé Wingfield-Stratford a skirbi, “tur tabata un cuestion di si, ne tempo ei di crisis supremo, Gran Bretaña i Estados Unidos por dera nan diferencia pa mantene [nan] unidad dominante i cumpli cu nan responsabilidad común.” Sosodimento ta mustra cu esei ta loke nan a haci. Na 1917 Estados Unidos a contribui su recurso i soldadnan pa reforza e esfuerzo di gera di Aliado vacilante. Asina, cabez di siete, e combinacion di Gran Bretaña i Estados Unidos, a sali vencedor.

17. Kico a pasa e sistema terrenal di Satanás despues dje gera?

¹⁷ E mundo despues dje gera tabata mashá diferente. E sistema terrenal di Satanás, aunque e golpi mortal a desolé, a rebiba i a bira mas fuerte cu nunca i asina a gana e admiracion di hende debí na su poder di recupera.

18. Con nos por bisa cu humanidad en general a “sigi e bestia salbahe cu admiracion”?

¹⁸ Historiador Charles L. Mee, Jr., a skirbi: “E colapso dje sistema bieu [cu e promé gera mundial a causa] tabata necesario pa habri camina pa autonomía, e liberacion di nacion i clase nobo, e presentacion di libertad i independencia nobo.” Hibando e delantera despues dje gera tabata cabez di siete dje bestia salbahe, curá awor, i cu América hungando e papel dominante. E poder mundial dobel a hiba delantera bogando tanto pe Liga di Nacion como pa Nacion Uní. Pa aña 2005, poder político di EU a guía nacion cu mas privilegio pa crea un mihor moda di biba, pa combati maleza, i pa adelanto di tecnología. E asta a pone 12 homber riba luna. P’sei, no ta straño cu humanidad en general ta “sigi e bestia salbahe cu admiracion.”

19. (a) Di ki manera humanidad asta a bai mas ayá cu admiracion dje bestia salbahe? (b) Ken tin poder innengable riba tur reino di mundo, i con nos sa esei? (c) Con Satanás ta duna autoridad ne bestia salbahe, i cu cua efecto riba e mayoría di humanidad?

¹⁹ Humanidad asta a bai mas ayá cu admiracion dje bestia salbahe, manera Juan a sigi bisa: “I nan a adora e dragón pasobra el a duna autoridad ne bestia salbahe, i nan a adora e bestia salbahe cu e palabra: ‘Ken ta manera e bestia salbahe, i ken por haci gera contra dje?’” (Revelacion 13:4) Durante cu Jesús tabata aki riba tera, Satanás a bisa cu e tabatin autoridad riba tur reino di mundo. Jesús no a nenga esei; realmente e mes a yama Satanás gobernante di mundo i a nenga di participa den político di su dia. Juan a skirbi despues na cristian berdadero: “Nos sa cu nos ta origina cu Dios, pero henter mundo ta bao di poder dje malbado.” (1 Juan 5:19; Lucas 4:5-8; Juan 6:15; 14:30) Satanás ta duna autoridad ne bestia salbahe, i e ta haci esei riba un base nacionalista. Pues, en bez di ser uní den banchi di amor divino, humanidad ta keda partí pa orguyo di tribu, raza, i nacion. En realidad, e mayoría grandi di hende ta adora e parti dje bestia salbahe cu ta manda den e tera unda nan ta biba. Asina e bestia henter ta gana admiracion i adoracion.

20. (a) Den ki sentido hende ta adora e bestia salbahe? (b) Pakico hende cristian cu ta adora Jehova Dios no ta participa den tal adoracion dje bestia salbahe, i nan ta sigi ehempel di ken?

²⁰ Adora den ki sentido? Den e sentido di pone amor pa patria promé cu amor di Dios. Mayor parti di hende ta stima nan tera natal. Como bon ciudadano, cristian berdadero també ta respeta gobernante i emblema dje país unda nan ta biba, ta obedece ley, i ta haci un contribucion positivo ne bienestar di nan comunidad i di nan beciña. (Romano 13:1-7; 1 Pedro 2:13-17) Sin embargo, nan no por rindi debocion ciegu na un cierto país i opone tur otro. E lema “Nos patria, teniendo razón of no” no ta un siñanza cristian. Pues, hende cristian cu ta adora Jehova Dios no por participa den rindimento di adoracion patriótico orguyoso na ningun parti dje bestia salbahe, pasobra esei ta mescos cu adoracion dje dragón—e fuente di autoridad dje bestia. Nan no por puntra cu admiracion: “Ken ta manera e bestia salbahe?” Mas bien, nan ta sigi ehempel di Miguel—kende su nomber kier men “Ken Ta Manera Dios?”—mientras cu nan ta apoya e soberanía universal di Jehova Dios. Ne tempo siñalá di Dios, Miguel, esta, Cristo Jesús, lo bringa contra e bestia salbahe i vencé, mescos cu el a triunfa den e sacamento di Satanás foi cielo.—Revelacion 12:7-9; 19:11, 19-21.

Hacimento di gera contra e santonan

21. Ki detaye Juan a duna dje manera cu Satanás ta guia e bestia salbahe?

²¹ Satanás astuto tabatin plan pa guia e bestia salbahe pa logra su meta. Juan a splica esei: “I un boca cu a papia cosnan grandi i blasfemia tabata duná ne [bestia cu siete cabez], i autoridad pa actua cuarentidos luna tabata duná né. I el a habri su boca den blasfemia contra Dios, pa blasfema su nomber i su residencia, asta esnan cu ta biba den cielo. I e tabata permití di haci gera contra e santonan i véncenan, i autoridad tabata duná né riba tur tribu i pueblo i lenga i nacion. I tur hende cu ta biba riba tera lo adoré; e nomber di ningun di eseinan ta pará skirbí den e rol di bida dje Lamchi cu tabata matá, desde fundamento di mundo.”—Revelacion 13:5-8.

22. (a) E 42 luna ta referi na cua periodo di tempo? (b) Di ki manera cristian ungí tabata ‘vencí’ durante e 42 luna?

²² E 42 luna mencioná ei ta parce di ser mescos cu e tres aña i mei durante locual e santonan tabata persigí pe cachu cu a sali for di un bestia dje profecía di Daniel. (Daniel 7:23-25; mira també Revelacion 11:1-4.) Pues, desde fin di 1914 te cu 1918, mientras cu e nacionan den gera tabata literalmente destruyendo otro manera bestia salbahe, ciudadano di tal nacion tabata bao di presion di adora e bestia salbahe, pa participa den e religion di nacionalismo, i asta keda cla pa muri pa nan patria. Tal presion a resulta den sufrimento intenso di parti di hopi di esnan ungí, cu a kere cu sobre todo nan ta debe nan obedencia na Jehova Dios i na su Yiu, Cristo Jesús. (Echo 5:29) Nan prueba a yega un culminacion na Juni di 1918, ora nan a keda ‘vencí.’ Na América, oficial prominente i otro representante dje Sociedad Watch Tower tabata encarcelá inhustamente, i predicacion organizá di nan rumanan cristian tabata mashá strobá. Teniendo autoridad “riba tur tribu i pueblo i lenga i nacion,” e bestia salbahe a frena e trabao di Dios mundialmente.

23. (a) Kico ta e “rol di bida dje Lamchi,” i kico ta sigi te na su cabamento desde 1918? (b) Pakico cualkier aparente victoria dje organizacion visibel di Satanás riba e “santonan” ta simplemente un victoria bano?

²³ Esei a parce un victoria pa Satanás i su organizacion. Pero esei no a resulta den beneficio di largu plazo pa nan, siendo cu ningun hende den e organizacion visibel di Satanás tin nan nomber skirbí den e “rol di bida dje Lamchi.” Simbólicamente, e rol ta contene e nomber di esnan cu lo goberna cu Jesús den su Reino celestial. E promé nombernan tabata skirbí den dje na Pentecoste di aña 33 EC. I durante e añanan desde esei, mas i mas nomber tabata agregá. Desde 1918, seyamento dje resto dje 144.000 heredero di Reino a sigi pa bira completo. Pronto, e nomber di nan tur lo ser skirbí permanentemente den e rol di bida dje Lamchi. En cuanto opositor cu ta adora e bestia salbahe, ningun di nan ta haya nan nomber skirbí den e rol. Pues, cualkier victoria cu nan por parce di gana riba e “santonan” ta un banidad, simplemente temporal.

24. Juan a pidi hende cu comprendimento penetrante scucha kico, i kico palabra cu nan a scucha ta nifica pe pueblo di Dios?

²⁴ Awor Juan a pidi esnan cu tin comprendimento penetrante pa scucha cu sumo atencion: “Si algun tin orea, lagué tende.” Anto el a sigi bisa: “Si algun ta pa cautiverio, nan ta bai den cautiverio. Si algun ta mata cu spada, nan tin cu ser matá cu spada. Aki ta loke ta nifica awante i fe dje santonan.” (Revelacion 13:9, 10) Jeremías a skirbi palabra mashá parecido di esei añanan promé cu 607 PEC, pa mustra cu nada por stroba e huicio di Jehova pe stad infiel di Jerusalem. (Jeremías 15:2; mira també Jeremías 43:11; Zacarías 11:9.) Durante su tempo di gran prueba, Jesús a haci claro cu sigidor di dje no mag haci compromiso ora el a bisa: “Tur esnan cu ta tuma spada lo perece pa spada.” (Mateo 26:52) Di igual manera, awor den e dia di Señor, e pueblo di Dios tin cu pega firmemente na principio bíblico. Lo no tin escape final pa hende cu ta adora e bestia salbahe i cu no ta arrepenti. Nos tur tin mester di awante hunto cu fe inquebrantable pa sobrebiba e persecucion i prueba di futuro.—Hebreo 10:36-39; 11:6.

E bestia salbahe cu dos cachu

25. (a) Con Juan a pinta un otro bestia salbahe simbólico cu a presenta riba mundo? (b) E dos cachu dje otro bestia salbahe i su salimento for di tera ta indica kico?

²⁵ Pero awor un otro bestia salbahe ta presenta den mundo. Juan a informa: “I mi a mira un otro bestia salbahe subi for di tera, i e tabatin dos cachu manera lamchi, pero el a cuminza papia manera dragón. I e ta eherce tur e autoridad dje promé bestia salbahe den su bista. I e ta haci e tera i esnan cu ta biba riba dje adora e promé bestia salbahe, kende su golpi mortal tabata curá. I e ta haci siñal grandi, di manera cu e asta a haci candela baha foi cielo ne tera den bista di humanidad.” (Revelacion 13:11-13) E bestia salbahe tin dos cachu, indicando asociacion cu dos poder político. I Juan a bisa cu el a sali for di tera, no for di lamá. Pues, e ta sali for dje sistema di cosnan terrenal cu Satanás a establece caba. E tin cu ser un poder mundial, na existencia caba, cu ta hunga un papel significante durante e dia di Señor.

26. (a) Kico ta e bestia salbahe cu e dos cachu, i con e ta relacioná cu e bestia salbahe original? (b) Den ki sentido cachu dje bestia cu dos cachu ta parce cachu di lamchi, pakico e ta “manera dragón” ora e ta papia? (c) Hende nacionalista realmente ta adora kico, i nacionalismo a ser compará cu kico? (Mira nota.)

²⁶ Kico esei por tá? E poder mundial anglo-americano—mescos cu cabez di siete dje promé bestia salbahe pero hungando un papel special! Ponimento di dje so den e vision como un otro bestia salbahe ta yúdanos mira mas claramente con e ta actua independientemente den mundo. E bestia salbahe simbólico cu dos cachu ta componí di dos poder político co-existente, independiente, pero cooperativo. Su dos cachu “manera lamchi” ta sugeri cu e ta pretende di ser suave i inofensivo, cu un forma di gobierno iluminá i cu tur e mundo mester acudi na dje. Pero e ta papia “manera dragón” pasobra e ta usa presion i amenaza i asta violencia mes unda cu hende no ta acepta su forma di gobernacion. E no ta estimula sumision ne Reino di Dios bao di gobernacion dje Lamchi di Dios sino, mas bien, sumision na interés di Satanás, e dragón grandi. E ta promove desunion nacionalista i odio cu ta resulta den e adoracion dje promé bestia salbahe.c

27. (a) E echo cu e bestia salbahe cu dos cachu ta haci candela baha foi cielo ta indica cua actitud di dje? (b) Con hopi hende ta considera e paralelo moderno dje bestia salbahe cu dos cachu?

²⁷ E bestia salbahe cu dos cachu ta haci siñal grandi, asta haciendo candela baha foi cielo. (Compara cu Mateo 7:21-23.) E siñal ei ta hácinos corda Elías, e profeta di Dios di antigua cu a participa den un competencia cu profeta di Baal. Ora Elías a logra haci candela baha foi cielo den e nomber di Jehova, esei a duna prueba fuera di duda cu e tabata un berdadero profeta i cu profeta di Baal tabata falso. (1 Rey 18:21-40) Mescos cu profeta di Baal, e bestia salbahe cu dos cachu ta kere cu e tin identificacion adecuado como profeta. (Revelacion 13:14, 15; 19:20) Sí, e ta bisa cu el a vence e poder di maldad den dos gera mundial, i tabata victorioso riba e asina yamá comunismo sin Dios! En realidad, loke ta corresponde cu e bestia salbahe cu dos cachu awendia hopi hende ta considera como e protector di libertad i un fuente di bon cosnan material.

E imagen dje bestia salbahe

28. Con Juan a mustra cu e bestia salbahe cu dos cachu no ta tanto inocente como cachu semehante di esnan di lamchi ta indica?

²⁸ E bestia salbahe cu dos cachu ta tanto inocente como su cachu di lamchi ta indica? Juan a sigi bisa: “I e ta gaña hende cu ta biba riba tera, debí na siñal cu e tabata permití di haci den bista dje bestia salbahe, mientras cu e ta bisa hende cu ta biba riba tera traha un imagen dje bestia salbahe cu tabatin e golpi di spada i toch a rebiba. I e tabata permití di duna rosea ne imagen dje bestia salbahe, di manera cu e imagen dje bestia salbahe por papia i també causa matamento di tur hende cu di ningun manera a adora e imagen dje bestia salbahe.”—Revelacion 13:14, 15.

29. (a) Ki propósito e imagen dje bestia salbahe tini, i na ki tempo e imagen tabata trahá? (b) Pakico e imagen dje bestia salbahe no ta un standbeeld sin bida?

²⁹ Kico ta e “imagen dje bestia salbahe,” i ki propósito e tin? Su propósito ta pa promove adoracion dje bestia salbahe cu siete cabez di locual e ta un imagen i p’sei, en realidad, ta mantene existencia dje bestia salbahe. E imagen tabata trahá despues di sobrebibencia dje bestia salbahe cu siete cabez ta rebiba for di golpi di spada, es decir, despues di fin dje promé gera mundial. Esei no ta un standbeeld sin bida, tal como Nabucudonosor a traha riba sabana di Dura. (Daniel 3:1) E bestia salbahe cu dos cachu ta duna bida ne imagen di manera cu e por biba i hunga un papel den historia di mundo.

30, 31. (a) Echo di pasado ta identifica e imagen di ser kico? (b) Algun hende a ser matá pasobra nan a nenga di adora e imagen? Splica.

³⁰ E desaroyo di historia ta identifica e imagen como e organizacion cu Gran Bretaña i Estado Unidos a propone, a promove, i a apoya i cu tabata conocí na principio como e Liga di Nacion. Despues, den Revelacion capítulo 17, e ta presenta bao di otro símbolo, esun di un bestia salbahe di color scarlata cu ta biba i ta hala rosea i cu tin un existencia independiente. Tal cuerpo internacional ta ‘papia,’ pasobra e ta broma cu e so por trece paz i siguridad pa humanidad. Pero en realidad el a bira un foro pa nacion miembro zundra otro i insulta otro. E ta haci amenaza di expulsa, pa causa un existencia mescos cu morto, cualkier nacion of pueblo cu no ta buig pa su autoridad. E Liga di Nacion realmente a expulsa nacion cu no a acepta su ideología. Na principio dje tribulacion grandi, “cachu” militarista dje imagen dje bestia salbahe lo hunga un papel destructivo.—Revelacion 7:14; 17:8, 16.

³¹ Desde Gera Mundial II, e imagen dje bestia salbahe—manifestá awor como e Organizacion di Naciones Unidas—a haci matamento caba literalmente. Por ehempel, na 1950 un ehército di NU a participa den e gera entre Nortcorea i Zuidcorea. Ehército di NU, hunto cu zuidcoreano, a mata segun calculacion 1.420.000 nortcoreano i chinés. També, entre 1960 i 1964, ehército di NU tabata activo den Congo (Kinshasa). Además, lider di mundo, incluyendo papa Pablo VI i Juan Pablo II, a sigi afirma cu tal imagen ta e último i mihor speranza di hende pa paz. Nan ta insisti cu si humanidad no ta rindi sirbishi na dje, e raza humano lo destrui su mes. Asina, simbólicamente nan ta causa e matamento di tur hende cu ta nenga di coopera cu e imagen i adoré.—Deuteronomio 5:8, 9.

E marca dje bestia salbahe

32. Ki detaye Juan a duna di guiamento di Satanás dje parti político di su organizacion visibel pa causa sufrimento pe resto dje simía dje muher di Dios?

³² Awor Juan a mira con Satanás ta guia e parti político di su organizacion visibel pa causa e mayor sufrimento posibel pe resto dje simía dje muher. (Génesis 3:15) El a bolbe duna detaye dje “bestia salbahe” mes: “I e ta pone bao di obligacion tur hende, chikito i grandi, i ricu i pober, liber i esclabo, pa nan pone marca den nan man drechi of riba nan frenta, i pa ningun hende por cumpra of bende solamente hende cu tin e marca, e nomber dje bestia salbahe of e número di su nomber. Aki ta unda sabiduría ta drenta: Laga hende cu tin inteligencia calcula e número dje bestia salbahe, pasobra esei ta número di un hende; i su número ta seis cien sesentiseis.”—Revelacion 13:16-18.

33. (a) Menciona e nomber dje bestia salbahe. (b) Número seis ta ser asociá cu kico? Splica.

³³ E bestia salbahe tin un nomber, i su nomber ta un número: 666. Seis, como un número, ta asociá cu enemigo di Jehova. Un homber filisteo di refaím tabata di “tamaño extraordinario,” i “dede di su man i pia tabata na cantidad di seis.” (1 Crónica 20:6) Rey Nabucodonosor a traha un imagen di oro 6 codo hanchu i 60 codo halto, pa uni funcionario político di dje den un solo adoracion. Ora sirbidor di Dios a nenga di adora e imagen di oro, e rey a manda pa nan ser tirá den un fornu di candela. (Daniel 3:1-23) Número seis no ta yega siete, locual ta representa loke ta completo desde e punto di bista di Dios. P’sei, seis tres bez ta representa imperfeccion grosero.

34. (a) E echo cu e número dje bestia salbahe ta e “número di un hende” ta indica kico? (b) Pakico 666 ta un nomber apropiado pe sistema político mundial di Satanás?

³⁴ Nomber ta identifica un persona. Pues, con e numero ei ta identifica e bestia? Juan a bisa cu esei ta “número di un hende,” i no ta nomber di un persona spiritual, pues e nomber ta yuda confirma cu e bestia salbahe ta terrenal, simbolizando gobierno humano. Mescos cu seis no ta yega siete, asina 666—seis te ne tercer grado—ta un nomber apropiado pe sistema político gigantesco di mundo cu ta malogra tanto miserablemente sin satisface requisito di perfeccion di Dios. E bestia salbahe político di mundo ta manda como supremo bao dje nomber-número 666, mientras cu político grandi, religion grandi, i comercio grandi ta mantene e funcionamento dje bestia salbahe como opresor di humanidad i como persigidor dje pueblo di Dios.

35. Kico kier men marcamento di frenta of di man drechi cu e nomber dje bestia salbahe?

³⁵ Kico kier men recibi e marca riba frenta of man drechi dje nomber dje bestia salbahe? Ora Jehova a duna Israel e Ley, el a bísanan: “Boso tin cu aplica e palabra aki di mi na boso curazón i na boso alma i máranan como siñal riba boso man, i nan mester sirbi como banchi frontal entre boso wowo.” (Deuteronomio 11:18) Esei kier men cu israelita tabatin cu mantene e Ley constantemente dilanti nan, di manera cu el a influenciá tur nan accion i pensamento. E Scritura ta bisa cu e 144.000 ungínan tin e nomber dje Tata i di Jesús skirbí riba nan frenta. Esei ta identificánan como perteneciendo na Jehova Dios i na Jesucristo. (Revelacion 14:1) Imitando esei, Satanás ta usa e marca demoniaco dje bestia salbahe. Ken cu ta participa den actividad diario tal como cumpra i bende ta bao di presion di haci cosnan manera e bestia salbahe ta hácinan, manera, por ehempel, e celebracion di dia liber. Ta di spera cu nan lo adora e bestia salbahe, lagué manda den nan bida, pa nan recibi su marca.

36. Hende cu a nenga di acepta e marca dje bestia salbahe tabatin cua problema?

³⁶ Hende cu ta nenga di acepta e marca dje bestia salbahe tin problema constantemente. Por ehempel, cuminzando despues di 1930, nan tabatin cu pleita hopi caso dilanti raad i wanta violencia di multitud desordená i otro persecucion. Den país totalitario, nan tabata cerá den concentrasicamp, unda hopi a muri. Desde e segundo gera mundial, hovenan incontabel a wanta encarcelacion largu, algun asta tabata torturá i matá, pasobra nan a nenga di viola nan neutralidad cristian. Den otro país hende cristian literalmente no por a cumpra ni bende; algun no por bira doño di propiedad; hende muher tabata violá, otronan matá, of sacá for di nan tera natal. Pakico? Pasobra pa nan mantene un bon concenshi, nan a nenga di cumpra tarheta di miembro di partido político.d—Juan 17:16.

37, 38. (a) Pakico mundo ta un lugar dificultoso pa hende cu ta nenga di recibi e marca dje bestia salbahe? (b) Ken ta warda integridad, i nan ta keda determiná di haci kico?

³⁷ Den algun parti di mundo, religion ta asina inculcá den hende i den nan bida cu ken cu ta para firme pa berdad bíblico ta ser sacá for di famía i rechazá pa amigo di antes. Mashá fe ta necesario pa wanta esei. (Mateo 10:36-38; 17:22) Den e mundo aki unda e mayoría ta adora riqueza material i unda falta di onradez ta abunda, hopi bez cristian berdadero tin cu confia totalmente den Jehova Dios, confiando cu lo e apoyánan den nan sigimento dje camina recto. (Salmo 11:7; Hebreo 13:18) Den un mundo yen di inmoralidad, mashá determinacion ta necesario pa keda limpi i puro. Hopi bez hende cristian cu ta bira malu ta bao di presion di docter i enfermera pa viola e ley di Dios tocante e santidad di sanger; nan asta tin cu resisti contra ordu di huez cu ta na conflicto cu nan fe. (Echo 15:28, 29; 1 Pedro 4:3, 4) I den e tempo aki di aumento di desempleo, ta bira cada bez mas dificultoso pa cristian berdadero evita trabao cu por nifica violacion di nan integridad dilanti Dios.—Miqueas 4:3, 5.

³⁸ Sí, mundo ta un lugar dificultoso pa hende cu no tin e marca dje bestia salbahe. Ta un demonstracion sobresaliente dje poder i bendicion di Jehova cu e resto dje simía dje muher, i també e mas cu seis miyón hende dje multitud grandi, ta warda nan integridad apesar di tur presion poní riba nan pa viola e ley di Dios. (Revelacion 7:9) Unidamente, den tur e mundo, láganos tur sigi engrandece Jehova Dios i su camina di husticia, mientras cu nos ta nenga di recibi e marca dje bestia salbahe.—Salmo 34:1-3.

[Nota]

[Plachi na página 195]

E tabata permití di duna rosea ne imagen dje bestia salbahe