Capítulo 86

E relato di un yiu perdí

YA cu el a caba di conta dos comparacion na fariseo tocante hayamento di un carné perdí i un moneda di dracma perdí, Jesús a sigi conta awor un otro comparacion. Esei tabata tocante un tata amoroso i su tratamento cu su dos yiu, cada un di locual tabatin falta serio.

Pa cuminza, tabatin e yiu menor, e persona principal den e comparacion. El a recibi su herencia, locual su tata a duné sin tarda. Anto el a bandona cas i a enbolbele den un moda di biba mashá inmoral. Pero, leza e cuenta segun cu Jesús a conté, i mira si bo por determina ken e personanan den dje mester representa.

Jesús a cuminza: “Un cierto homber tabatin dos yiu. I esun menor a pidi su tata, ‘Tata, dunámi e parti dje propiedad cu ta correspondémi.’ Anto [e tata] a parti su medio di biba cu nan.” Kico e yiu menor a haci cu loke el a recibi?

Jesús a splica: “Mas tardi, no hopi dia despues, e yiu menor a recoge tur cos hunto i a bai den stranhería na un país lehano, i ei el a malgasta tur su propiedad, hibando un bida corrupto.” Realmente, el a gasta su placa bibando cu prostituta. Despues, tempo dificultoso a yega, manera Jesús a sigi conta:

“Ora el a gasta tur cos, un hamber severo a yega den tur e país, i el cuminza padece necesidad. E asta a bai i a conecta su mes cu un ciudadano dje país, i el a mandé na su cunucu pa warda porco. I el a deseá di sacié cu bonch’i kwihi cu porco tabata come, i ningun hende no a duné nada.”

Ta ki degradante pa keda obligá di ser wardador di porco, siendo cu tal bestia tabata impuro segun e Ley! Pero, loke a duna e yiu mas dolor tabata e hamber persistente cu asta a hacié deseá e cuminda cu porco tabata come. Debí ne calamidad terrible, Jesús a bisa cu “el a bolbe na su sano huicio.”

Sigiendo cu e cuenta, Jesús a splica: “El a bisa [den su mes], ‘cuanto peón di mi tata tin pan na abundancia, mientras cu mi ta muri aki di hamber! Mi ta lanta i bai cerca mi tata i bisé: “Tata, mi a peca contra cielo i contra bo. Mi no ta digno mas di ser yamá bo yiu. Hacími manera un peón di bo.”’ Pues, el a lanta i a bai cerca su Tata.”

Esaki ta algo pa tuma na cuenta: Si su tata a bira contra dje i a grité cu rabia ora el a bandona su cas, e yiu probablemente lo no a keda tanto determiná tocante loke e mester haci. E por a decidi di bolbe i purba di haya trabao na otro parti di su patria di manera cu e no tabatin cu enfrenta su tata. Sin embargo, ningun idea asina a drenta su mente. E kier a bai cas!

Claramente, e tata den e comparacion di Jesús a representa nos Tata amoroso i misericordioso celestial, Jehova Dios. I kizás bo ta reconoce també cu e yiu perdí, of desperdicioso, ta representa hende conocí como pecador. Fariseo, cu locual Jesús tabata papia, na antes a critica Jesús pasobra el a come net cu hende asina. Pero, ken e yiu mayor a representa?

Ora e Yiu Perdí A Bolbe

Ora e yiu perdí, of desperdicioso, dje comparacion di Jesús a bolbe ne cas di su tata, con nan a recibié? Leza detaye di Jesús:

“Mientras cu e tabata leu ainda, su tata a haya bista di dje i a compadecé, i a corre i a brazé i a zunché tiernamente.” Ki un tata misericordioso i amoroso, representando asina bon nos Tata celestial, Jehova!

Probablemente e tata a tende dje bida corrupto dje yiu. Sin embargo, el a recibié na cas sin spera un splicacion en detaye. Jesús també tabatin un spiritu cariñoso, tumando iniciativa pa acerca hende pecador i cobrador di belasting, cu e yiu perdí a representá den e comparacion.

Ta cierto cu e tata entendido dje comparacion di Jesús sin duda tabatin algun idea dje arrepentimento di su yiu, mirando su cara tristu i desconsolá ora el a bolbe. Pero e iniciativa amoroso dje tata a haci mas fácil pe yiu confesa su picánan, manera Jesús a bisa: “Anto e yiu a bisé, ‘Tata, mi a peca contra cielo i contra bo. Mi no ta digno mas di ser yamá bo yiu. Hacími manera un peón di bo.’”

Sin embargo, e palabra apenás a sali for di boca dje yiu ora su tata a tuma accion, mandando su esclabonan: “Lihé! trece un mantel, esun mihor, i bistié cuné, i pone un rinchi riba su man i sandalia riba su pia. I trece e torito gordu, maté i láganos come i goza, pasobra mi yiu tabata morto i a bolbe biba; i e tabata perdí i tabata hayá.” Anto nan a cuminza “goza.”

Entretanto, e “yiu mayor” dje tata tabata den e campo. Mira si bo por identifica ken e ta representa, scuchando e resto dje cuenta. Jesús a bisa dje yiu mayor: “Ora el a bini i a yega cerca e cas el a tende un concierto di música i baliamento. Di manera cu el a yama un criá cerca dje i a puntra kico esei a nifica. El a bisé, ‘Bo ruman a bini, i bo tata a mata e torito gordu, pasobra el a recobré den bon salud.’ Pero el a rabia i no kier a drenta. Anto su tata a sali i a cuminza rogué. Contestando, el a bisa su tata, ‘Ta haci tanto aña caba cu mi a traha pa bo manera esclabo i ni un solo biaha mi a viola bo mandamento, i no obstante, ni un solo biaha bo a dunámi un cabrito pa mi goza cu mi amigonan. Pero asina cu e yiu ei di bo a yega cu a come bo medio di biba cu prostituta, bo a mata e torito gordu pe.’”

Ken, manera e yiu mayor, a sigi critica e misericordia i atencion prestá na hende pecador? Esei no tabata scriba i fariseo? Siendo cu ta nan crítico di Jesús pa motibo cu el a recibi hende pecador locual a haci Jesús conta e comparacion, nan claramente mester ta hende cu e yiu mayor a representa.

Jesús a conclui su comparacion cu e peticion dje tata ne yiu mayor: “Yiu, bo semper tabata cerca mi, i tur loke ta di mi ta di bo; pero nos simplemente tabatin cu goza i alegra, pasobra esaki, bo ruman, tabata morto i a yega di biba, i tabata perdí pero tabata hayá.”

Asina Jesús no a declará loke e yiu mayor a haci despues. Realmente, mas tardi, despues di morto i resureccion di Jesús, “un multitud grandi di sacerdote a cuminza keda obediente ne fe,” posiblemente incluyendo algun dje grupo cu e “yiu mayor” a simboliza cu locual Jesús tabata papia e ora ei.

Pero, ken den e dia djawe e dos yiu ta representa? Eseinan mester ta hende cu a yega di conoce suficiente tocante e propósito di Jehova pa pone base pa drenta den un relacion cuné. E yiu mayor ta representa algun miembro dje “trupa chikito,” of “congregacion di primogénito cu a ser matriculá den cielo.” Eseinan a adopta un actitud similar cu esun dje yiu mayor. Nan no tabatin ningun deseo di recibi un grupo terrenal, e “otro carnénan,” cu nan a kere tabata recibi tur e atencion.

En cambio, e yiu perdí ta representa esnan dje pueblo di Dios cu ta bandona e berdad pa nan goza di placer cu mundo ta ofrece. Sin embargo, cu tempo nan ta bolbe cu arrepentimento i ta bira sirbidor activo di Dios di nobo. En berdad, ki amoroso i misericordioso e Tata ta keda en cuanto esnan cu ta reconoce nan necesidad di pordón i ta bolbe na dje! Lucas 15:11-32; Levítico 11:7, 8; Echo 6:7; Lucas 12:32; Hebreo 12:23; Juan 10:16.

▪ Jesús a conta e comparacion of cuenta aki na ken, i pakico?

▪ Ken ta e persona principal den e cuenta, i kico a pasé?

▪ Ken den e dia di Jesús e tata i yiu menor a representa?

▪ Con Jesús a imita ehempel dje tata misericordioso den su comparacion?

▪ Con e yiu mayor a considera e recepcion di su ruman, i con fariseo a comportánan manera e yiu mayor?

▪ Cua aplicacion e comparacion di Jesús tin den nos dia?