Capitulo 7
Loke Dios A Haci pa Salba Humanidad
1, 2. (a) Con un oficial di ehército romano a yega na comprendé ken ta e Yu di Dios? (b) Pakico Jehova a permití Jesus muri?
UN PRIMAVERA atardi casi 2.000 aña pasá, un oficial di ehército romano a mira tres homber muri un morto lento i agonisante. E soldad ei a observá specialmente un di nan—Jesucristo. Jesus a ser clabá na un staca di palu. E cielu di merdia a bira pretu segun e momento di su morto a acercá. Ora el a muri, e tera a sagudí violentamente i e soldad a sclama: “Siguramente e homber aki tabata e Yu di Dios.”—Marco 15:39.
2 E Yu di Dios! E soldad ei tabatin razon. El a caba di presenciá e suceso di mas importante cu a yega di sosodé riba e tera. Na ocasionnan anterior, Dios mes a yama Jesus su Yu stimá. (Mateo 3:17; 17:5) Pakico Jehova a permití su Yu muri? Pasobra esaki tabata Dios su medio pa salba humanidad for di picá i morto.
SCOGI PA UN PROPOSITO SPECIAL
3. Pakico tabata apropiado cu Dios su Yu unigénito a ser scogí pa un propósito special relacioná cu humanidad?
3 Manera nos a siña anteriormente den e buki aki, Jesus tabatin un existencia prehumano. E ta ser yamá Dios su “Yu unigénito” pasobra Jehova a cre’é directamente. Despues di esei Dios a usa Jesus pa trece tur otro cos na existencia. (Juan 3:18; Colosensenan 1:16) Jesus tabata specialmente encariñá cu humanidad. (Proverbionan 8:30, 31) Nada straño cu Jehova a scoge su Yu unigénito pa sirbi un propósito special ora humanidad a cai bou di condenacion di morto!
4, 5. Promé cu Jesus a bini na tera, kico e Bijbel a revelá tocante e Simia Mesiánico?
4 Ora di pronunciá e sentencia riba Adam, Eva i Satanas den e hofi di Eden, Dios a papia di e futuro Rescatador como un “simia.” E Simia aki, of desendencia, lo a bini pa deshací di e teribel afliccionnan cu Satanas e Diabel, “e colebra original,” a ocasioná. En realidad, e Simia primintí lo aplastá Satanas i tur esnan cu a sigui’é.—Génesis 3:15; 1 Juan 3:8; Revelacion 12:9.
5 Pa siglonan, Dios gradualmente a revelá mas tocante e Simia, tambe yamá e Mesías. Manera ta ser mustrá den e cuadro na página 37, un cantidad di profecia a duna detayenan tocante hopi aspecto di su bida riba tera. Por ehempel, e mester a soportá maltratonan teribel afin di cumpli cu su rol den e propósito di Dios.—Isaías 53:3-5.
PAKICO E MESIAS MESTER A MURI
6. Segun Daniel 9:24-26, kico e Mesías lo logra, i con?
6 E profecia registrá na Daniel 9:24-26 a profetisá cu e Mesías—Esun Ungí di Dios—lo cumpli cu un propósito grandi. Lo e bini na tera “pa caba cu transgresion, i pa caba cu picá, i pa haci expiacion pa eror, i pa trece husticia” pa semper. E Mesías lo kita e condenacion di morto for di fiel humanidad. Pero con lo e haci esaki? E profecia ta splica cu lo e ser “cortá,” of matá.
7. Pakico e hudiunan a ofrecé sacrificionan di animal, i kico esakinan a prefigurá?
7 E israelitanan di antigua tabata conocí cu e concepto di expiacion pa eror. Den nan adoracion bou di e ley cu Dios a duna nan pa medio di Moises, regularmente nan a ofrecé sacrificionan di animal. Esaki a recordá e pueblo di Israel cu hende mester di algu pa expiá of cubri, nan picánan. Apostel Pablo a resumí e principio den e manera aki: “Aménos cu sanger ser dramá ningun pordon ta tuma lugá.” (Hebreonan 9:22) Cristiannan no ta bou di e ley di Moises cu su rekisitonan, tal como sacrificionan. (Romanonan 10:4; Colosensenan 2:16, 17) Tambe nan sa cu sacrificionan di animal no por proveé pordon completo i permanente pa picánan. Mas bien, e ofrendanan di sacrificio aki a prefigurá un sacrificio di hopi mas balor—esun di e Mesías, of Cristo. (Hebreonan 10:4, 10; compará cu Galationan 3:24.) Sin embargo, tal bes bo ta puntra, ‘Tabata realmente necesario pa e Mesías muri?’
8, 9. Cua cosnan precioso Adam i Eva a perde, i con nan accionnan a afectá nan desendiente?
8 Sí, e Mesías mester a muri pa humanidad por ser salbá. Pa comprendé pakico, nos mester corda bek e hofi di Eden i trata na capta ki enorme ta loke Adam i Eva a perde ora nan a rebeldiá contra Dios. Bida eterno a ser poné nan dilanti! Como yunan di Dios, tambe nan a disfrutá di un relacion directo cuné. Pero ora nan a rechasá Jehova su gobernacion, nan a perde tur esei i a trece picá i morto riba e rasa humano.—Romanonan 5:12.
9 Tabata como si fuera nos promé mayornan a malgastá un fortuna grandi, hincando nan mes den un debe enorme. Adam i Eva a pasa e debe ei pa nan yunan. Debí cu nos no a nace perfecto i sin picá, nos tur ta pecador i ta muri. Ora nos bira malu of ta bisa algu perhudicial cu nos ta deseá di hal’é atras, nos ta experenciando e efectonan di nos debe heredá—imperfeccion humano. (Romanonan 7:21-25) Nos único speransa ta consistí di recobrá loke Adam a perde. Sin embargo, nos no por merecé bida humano perfecto. Siendo cu tur hende imperfecto ta cometé picá, nos tur ta merecé morto, no bida.—Romanonan 6:23.
10. Kico tabata necesario pa cumpra bek loke Adam a perde?
10 Sin embargo, algu por a ser ofrecé en cambio pa e bida cu Adam a perde? Dios su norma di husticia ta rekerí balansa, “alma pa alma.” (Exodo 21:23) Pues un bida mester a ser ofrecé pa paga p’e bida cu a ser perdí. No cualkier bida humano lo yena e rekisito ei. Salmo 49:7, 8 ta bisa di hende imperfecto: “Ni un di nan di ningun manera por rescatá sikiera un ruman, ni duna na Dios un sacrificio p’e; (i e prijs dje rescate di nan alma ta asina precioso cu el a stop te na tempu indefiní).” E situacion ta sin speransa dor di esei? Siguramente cu no.
11. (a) Kico e palabra “rescate” ta nificá na hebreo? (b) Ken so por a rescatá humanidad i pakico?
11 Den e idioma hebreo, e palabra “rescate” ta nificá e suma pagá pa rescatá un persona for di cautiverio i tambe ta indicá ekivalencia. Solamente un homber cu bida humano perfecto por a ofrecé e ekivalente di loke Adam a perde. Despues di Adam, e único homber perfecto cu a nace riba tera tabata Jesucristo. P’esei, Bijbel ta yama Jesus “e último Adam” i ta sigurá nos cu Cristo “a duna su mes como un rescate corespondiente pa tur.” (1 Corintionan 15:45; 1 Timoteo 2:5, 6) Miéntras Adam a pasa morto pa su yunan, Jesus a pasa bida eterno. Promé Corintionan 15:22 ta splica: “Mescos cu den Adam tur ta muriendo, asina tambe den Cristo tur lo ser hací bibu.” Apropiadamente, anto, Jesus ta ser yamá “Tata Eterno.”—Isaías 9:6, 7.
CON E RESCATE TABATA PAGA
12. Na ki tempu Jesus a bira e Mesías i despues di esei ki curso di bida el a sigui tras di dje?
12 Den otoño di 29 E.C., Jesus a bai cerca su pariente Juan pa ser bautisá i di e manera ei a presentá su mes pa cumpli cu e boluntad di Dios. Na e ocasion ei Jehova a ungí Jesus cu spiritu santu. Asina Jesus a bira e Mesías, of Cristo, esun ungí dor di Dios. (Mateo 3:16, 17) Anto Jesus a cuminsá cu su ministerio di tres aña i mei. El a biaha dor di henter su tera natal, predicando tocante e Reino di Dios i reuniendo siguidornan fiel. Sin embargo, manera a ser profetisá, oposicion na dje pronto a aumentá.—Salmo 118:22; Echonan 4:8-11.
13. Cua sucesonan a hiba na Jesus su morto como un wardador di integridad?
13 Jesus cu curashi a exponé e hipocresia di e lidernan religioso, i nan a busca pa mat’é. Cu tempu nan a inventá un complot baho cu a enbolbé traicion, aresto impropio, un huicio ilegal i un acusacion falsu di instigacion contra autoridad. Jesus a ser golpiá, scupí, ridiculisá i batí cu un zwiep diseñá pa corta su carni. Anto e gobernador romano Poncio Pilato a sentenci’é na morto riba un staca di tormento. El a ser clabá na un staca di palu i cologá regt ei. Cada rosea tabata extremadamente doloroso, i a tuma oranan pa el a muri. Atrabes di e prueba ei, Jesus a mantené integridad perfecto na Dios.
14. Pakico Dios a permití su Yu sufri i muri?
14 Pues, tabata dia 14 di Nisan, 33 E.C., cu Jesus a duna su bida como “un rescate en cambio pa hopi.” (Marco 10:45; 1 Timoteo 2:5, 6) For di cielu, Jehova por a mira su Yu stimá sufri i muri. Pakico Dios a permití un cos asina teribel sosodé? El a permití esei pasobra el a stima humanidad. Jesus a bisa: “Dios a stima mundu asina tantu cu el a duna su Yu unigénito, pa tur cu ehercé fe den dje lo no ser destruí sino haña bida eterno.” (Juan 3:16) E morto di Jesus tambe ta siña nos cu Jehova ta un Dios di husticia perfecto. (Deuteronomio 32:4) Algun hende tal bes ta puntra nan mes pakico Dios no a laga un banda su principionan di husticia cu ta rekerí alma pa alma i ignorá e prijs di Adam su curso pecaminoso. E motibu ta cu Jehova semper ta actua di acuerdo cu su leynan i ta sostené nan, asta si esei ta costa e mes hopi.
15. Siendo cu lo tabata inhustu pa laga Jesus su existencia caba permanentemente, kico Jehova a haci?
15 Jehova su husticia tambe a rekerí pa Jesus su morto tin un resultado felis. Al fin i al cabo, lo tabata hustu pa laga fiel Jesus drumi pa semper den morto? Naturalmente cu no! E Scritura Hebreo a profetisá cu esun leal di Dios lo no keda den graf. (Salmo 16:10; Echonan 13:35) El a drumi den morto parti di tres dia i e ora ei Jehova Dios a resucit’é na bida como un ser spiritual poderoso.—1 Pedro 3:18.
16. Kico Jesus a haci ora el a bolbe bek na cielu?
16 Na su morto, Jesus a entregá su bida humano pa semper. Ora el a ser lantá pa bida den cielu, el a bira un spiritu dunador-di-bida. Ademas, ora Jesus a subi na e lugá di mas santu den universo, el a ser reuní bek cu su Tata stimá i formalmente a presentá na Dje e balor di su bida humano perfecto. (Hebreonan 9:23-28) E balor di e bida precioso ei por a ser aplicá na fabor di humanidad obediente. Kico esei ta nificá pa bo?
CRISTO SU RESCATE I ABO
17. Con nos por saca probecho di e pordon a base di Cristo su sacrificio di rescate?
17 Considerá tres manera den cua Cristo su sacrificio di rescate ta beneficiá bo asta awor. Promé, e ta trece pordon di picá. Pa medio di fe den e sanger dramá di Jesus, nos tin “e liberacion pa medio di rescate” sí, “e pordon di nos picánan.” (Efesionan 1:7) Pues asta si nos a cometé un picá serio, nos por pidi Dios pordon den Jesus su nomber. Si nos berdaderamente ta repentí, Jehova ta aplicá na nos e balor di e sacrificio di rescate di su Yu. Dios ta pordoná nos, dunando nos e bendicion di un bon concenshi, en bes di exigí e pena di morto cu nos ta trece riba nos mes dor di peca.—Echonan 3:19; 1 Pedro 3:21.
18. Den ki manera Jesus su sacrificio ta duna nos speransa?
18 Di dos, Cristo su sacrificio di rescate ta proveé e base pa nos speransa p’e futuro. Den un vision, apostel Juan a mira cu “un multitud grandi, cu ningun hende por a conta” lo sobrebibí e binidero fin cataclísmico di e sistema di cosnan aki. Pakico nan lo sobrebibí ora Dios ta destruí asina tantu otro hende? Un angel a bisa Juan cu e multitud grandi a “laba nan pañanan largu i a haci nan blancu den e sanger dje Lamchi,” Jesucristo. (Revelacion 7:9, 14) Tanten cu nos ta ehercé fe den e sanger dramá di Jesucristo i ta biba na armonia cu rekisitonan divino, nos lo ta limpi den bista di Dios i lo tin e speransa di bida eterno.
19. Con e sacrificio di Cristo ta proba cu e i su Tata ta stimá bo?
19 Di tres, e sacrificio di rescate ta e prueba di Jehova su amor fundamental. Cristo su morto tabata un expresion bibu di e dos actonan di amor mas grandi den historia di e universo: (1) Dios su amor den manda su Yu muri pa nos; (2) Jesus su amor den ofrecé su mes boluntariamente como un rescate. (Juan 15:13; Romanonan 5:8) Si nos berdaderamente ta ehercé fe, e amor aki ta aplicá na cada un di nos. Apostel Pablo a bisa: “E Yu di Dios . . . a stimá mi i a entregá su mes pa mi.”—Galationan 2:20; Hebreonan 2:9; 1 Juan 4:9, 10.
20. Pakico nos mester ehercé fe den e sacrificio di rescate di Jesus?
20 P’esei, laga nos mustra nos gratitud pa e amor cu Dios i Cristo a manifestá dor di ehercé fe den Jesus su sacrificio di rescate. Haciendo esei ta hiba na bida eterno. (Juan 3:36) Sin embargo, nos salbacion no ta e motibu mas importante pa Jesus su bida i morto riba tera. No, su interes primario tabata un cuestion asta mas grandi, unu universal. Manera nos lo mira den e siguiente capítulo, e cuestion ei ta toca nos tur pasobra e ta mustra pakico Dios a permití maldad i sufrimentu persistí pa asina tantu tempu den e mundu aki.
TEST BO CONOCIMENTU
Pakico Jesus mester a muri pa salba humanidad?
Con e rescate tabata pagá?
Den ki maneranan abo ta beneficiá di e rescate?
[Plachi di henter página 67]