Entrená Bo Yu Desde Infancia

1, 2. Na ken mayornan mester acudí pa yudansa den cria nan yunan?

“YUNAN homber ta un herencia for di Jehova,” un mayor apreciativo a sclama un 3.000 aña pasá. (Salmo 127:3) En berdad, e goso di ser tata of mama ta un recompensa precioso di Dios, un recompensa cu ta disponibel pa mayoria hende casá. Sin embargo, esnan cu tin yu ta realisá pronto cu huntu cu e goso, ser tata of mama ta trece responsabilidadnan.

² Specialmente awe, criamentu di yu ta un tarea tremendo. No obstante, hopi a hacié cu éxito, i e salmista inspirá ta indicá e manera, bisando: “Aménos cu Jehova mes edificá e cas, ta en bano cu su trahadornan a traha duru riba dje.” (Salmo 127:1) Mas atentamente bo sigui e instruccionnan di Jehova, mas mihó tata of mama lo bo bira. Bijbel ta bisa: “Confia den Jehova cu tur bo curason i no dependé riba bo mes comprendimentu.” (Proverbionan 3:5) Bo ta dispuesto pa scucha na Jehova su conseho segun cu bo ta emprendé riba bo proyecto di 20 aña di cria yu?

 3. Ki responsabilidad tatanan tin den criamentu di yunan?

³ Den hopi cas rond mundu, hende homber ta mira entrenamentu di yu como un tarea principalmente di hende muher. Ta cierto cu e Palabra di Dios ta indicá cu ta e rol dje tata pa ser esun cu principalmente ta gana e pan. Sin embargo, tambe e ta bisa cu e tin responsabilidadnan den cas. Bijbel ta bisa: “Prepará bo trabou pafó, i hacié cla pa bo mes den cunucu. Despues tambe bo tin cu edificá bo famia.” (Proverbionan 24:27) Den Dios su bista, tata i mama ta socio den entrenamentu di yu.—Proverbionan 1:8, 9.

 4. Pakico nos no mester considerá yu homber superior na yu muher?

⁴ Con bo ta considerá bo yunan? Informe ta bisa cu na Asia “baby mucha muher hopi bes ta ricibí un bon biní poco caluroso.” Ta ser informá cu prehuicio contra mucha muhernan ainda ta existí na Latinoamérica, asta entre “famianan mihó informá.” Sin embargo, e berdad ta cu mucha muhernan no ta yunan di segunda clase. Jacob, un tata famoso di tempunan antiguo, a describí tur su yunan, incluyendo cualkier yu muher nací te cu e tempu ei, como “e yunan cu cua Dios a faborecé [mi].” (Génesis 33:1-5; 37:35) Di igual manera, Jesus a bendicioná tur “e muchanan chikitu” (muchanan homber i muher) cu a ser trecé cerca dje. (Mateo 19:13-15) Nos por ta sigur cu el a reflehá Jehova su punto di bista.—Deuteronomio 16:14.

 5. Kico un pareha mester tuma na consideracion ora di dicidí en cuanto e tamaño di nan famia?

⁵ Ta custumber den bo comunidad pa spera pa un muher duna lus na mas tantu yu cu ta posibel? Cuantu yu un pareha casá lo tin ta nan decision personal, esei ta nan derecho. Kico si mayornan ta falta e medionan pa alimentá, bisti i educá un cantidad di yu? Siguramente, e pareha mester considerá esaki ora di dicidí riba e tamaño di nan famia. Algun pareha cu no por cuida tur nan yunan ta encargá parientenan cu e responsabilidad pa cria algun di nan. E práctica aki ta deseabel? No realmente. I esei no ta kita e mayornan di nan obligacion pa cu nan yunan. Bijbel ta bisa: “Si un hende no ta percurá pa esnan cu ta di dje mes, i specialmente pa esnan cu ta miembro di su famia, el a nenga e fe.” (1 Timoteo 5:8) Parehanan responsabel ta trata na planea e tamaño di nan “famia” asina cu nan por ‘percurá pa esnan cu ta di nan mes.’ Nan por usa anticonceptivo pa controlá hañamentu di yu? Esei tambe ta un decision personal, i si parehanan casá dicidí pa haci esaki, e anticonceptivo cu nan scoge tambe ta un asuntu personal. “Cada un lo hiba su mes carga di responsabilidad.” (Galationan 6:5) Sin embargo, uso di anticonceptivo cu ta enbolbé cualkier forma di aborto ta bai contra e principionan bíblico. Jehova Dios ta “e fuente di bida.” (Salmo 36:9) P’esei, pa destruí un bida despues cu el a ser concibí lo mustra falta di respet grosero pa Jehova i ta ekivalente na asesinato.—Exodo 21:22, 23; Salmo 139:16; Jeremías 1:5.

 6. Na ki tempu e entrenamentu di un mucha mester cuminsá?

⁶ Proverbionan 22:6 ta bisa: “Entrená un mucha homber conforme cu e caminda p’e.” Entrenamentu di yunan ta un otro deber principal di mayornan. Sin embargo, na ki tempu, e entrenamentu ei mester cuminsá? Hopi trempan. Apostel Pablo a haci mencion cu Timoteo a ser entrená “desde infancia.” (2 Timoteo 3:15) E palabra griego usá aki por referí na un baby chikitu of asta na un yu cu no a nace. (Lucas 1:41, 44; Echonan 7:18-20) Pues, Timoteo a ricibí entrenamentu for di ora cu e tabata masha chikitu—manera mester ta. Infancia ta e tempu ideal pa cuminsá entrená un mucha. Asta un baby chikitu tin un hamber pa conocimentu.

 7. (a) Pakico ta importante pa ámbos mayor desaroyá un relacion estrecho cu e baby? (b) Ki relacion a existí entre Jehova i su Yu unigénito?

⁷ “Ora mi a mira mi baby pa promé biaha,” un mama ta bisa, “mi a namorá di dje.” Asina ta pasa cu mayoria mama. E laso bunita ei entre mama i baby ta crece segun cu nan ta pasa tempu huntu despues dje nacementu. Criamentu na pechu ta haci e intimidad ei crece. (Compará cu 1 Tesalonicensenan 2:7.) Un mama cu ta cariciá su yu i ta combersá cuné ta dunand’e loke ta crucial pa yena e necesidadnan emocional dje baby. (Compará cu Isaías 66:12.) Pero kico dje tata? E tambe mester forma un coneccion íntimo cu su desendiente nobo. Jehova mes ta un ehempel di esaki. Den e buki di Proverbionan, nos ta ser informá di Jehova su relacion cu su yu unigénito, kende ta ser representá bisando: “Jehova mes a producí mi como e principio di su caminda . . . Mi a yega di ta esun cu e tabata specialmente encariñá cuné dia tras dia.” (Proverbionan 8:22, 30; Juan 1:14) Di igual manera, un bon tata ta cultivá un relacion caluroso i amoroso cu su yu for di principio mes dje yu su bida. “Mustra hopi cariño,” un mayor ta bisa. “Ningun yu nunca a muri debí na hopi brasa cu sunchi.”

 8. Ki stimulacion mental mayornan mester duna babynan mas pronto posibel?

⁸ Pero babynan mester mas cu esei. For dje momento di nacementu, nan celebro ta cla pa ricibí i warda informacion, i mayornan ta e fuente principal di esaki. Tuma como ehempel idioma. Investigadornan ta bisa cu, con bon un yu ta siña papia i lesa ta “segun algun hende, estrechamente relacioná cu e naturalesa dje yu su interaccion for di principio cu su mayornan.” Papia cu bo yu i lesa p’e for di ora cu e ta baby. Pronto lo e kier imitá bo, i lo no dura muchu cu lo bo ta siñand’e lesa. Probablemente, lo e ta capas pa lesa promé cu e cuminsá scol. Esei lo ta útil specialmente si bo ta biba den un pais caminda maestronan ta poco i klasnan ta hopi yen.

 9. Cua ta e meta di mas importante cu mayornan mester tene presente?

⁹ E interes principal di mayornan cristian ta di yena e necesidadnan spiritual di nan yu. (Mira Deuteronomio 8:3.) Cu ki meta? Pa yuda nan yu desaroyá un personalidad manera di Cristo, en realidad, pa bisti “e personalidad nobo.” (Efesionan 4:24) Pa esaki nan mester considerá materialnan i métodonan adecuado pa edificá.

10. Cua cualidadnan yunan tin cu desaroyá?

¹⁰ E calidad di un edificio ta dependé en grande dje sorto di materialnan usá den e structura. Apostel Pablo a bisa cu e mihó materialnan di construccion pa personalidadnan cristian ta “oro, plata, piedranan precioso.” (1 Corintionan 3:10-12) Esakinan ta representá e cualidadnan manera fe, sabiduria, dicernimentu, lealtad, respet i aprecio amoroso pa Jehova i su leynan. (Salmo 19:7-11; Proverbionan 2:1-6; 3:13, 14) Con mayornan por yuda nan yunan for dje tempu mas trempan di infancia pa desaroyá e cualidadnan aki? Dor di sigui un procedura describí for di hopi tempu pasá.

11. Con mayornan israelita a yuda nan yunan desaroyá un personalidad piadoso?

¹¹ Djis promé cu e nacion di Israel a drenta e Tera Primintí, Jehova a bisa e mayornan israelita: “E palabranan aki cu mi ta mandando bo awe mester resultá di ta riba bo curason; i bo mester inculcá nan den bo yu homber i papia di nan ora bo ta sinta den bo cas i ora bo ta cana riba caminda i ora bo ta bai drumi i ora bo ta lanta.” (Deuteronomio 6:6, 7) Sí, mayornan mester ta ehempelnan, compañeronan, comunicadornan i maestronan.

12. Pakico ta vital pa mayornan ta un bon ehempel?

¹² Sea un ehempel. Promé, Jehova a bisa: “E palabranan aki . . . mester resultá di ta riba bo curason.” Despues, el a agregá: “Bo mester inculcá nan den bo yu homber.” Pues cualidadnan piadoso mester ta promé den e mayor su curason. E mayor mester stima e berdad i bib’é. Solamente e ora ei e por alcansá e mucha su curason. (Proverbionan 20:7) Pakico? Pa motibu cu yunan ta ser influenciá mas pa loke nan ta mira cu pa loke nan ta tende.—Lucas 6:40; 1 Corintionan 11:1.

13. Den pone atencion na nan yunan, con mayornan cristian por imitá Jesus su ehempel?

¹³ Sea un compañero. Jehova a bisa mayornan den Israel: ‘Papia cu bo yunan ora bo ta sinta den bo cas i ora bo ta cana riba caminda.’ Esaki ta rekerí dedicá tempu na e yunan sin importá con ocupá e mayornan ta. Jesus evidentemente a sinti cu muchanan tabata merecé su tempu. Durante e último dianan di su ministerio, “hende a cuminsá trece p’e muchanan chikitu p’e por a mishi cu esakinan.” Kico tabata Jesus su reaccion? “El a tuma e muchanan den su brasanan i a cuminsá bendicioná nan.” (Marco 10:13, 16) Imaginá bo, e último oranan di Jesus su bida tabata acercando rápidamente. Tog, el a duna e muchanan aki su tempu i atencion. Ki un bunita les!

14. Pakico ta beneficioso pa mayornan dedicá tempu na nan yu?

¹⁴ Sea un comunicador. Dedicando tempu na bo yu lo yudá bo comunicá cuné. Mas bo comunicá, mas mihó lo bo dicerní con su personalidad ta desaroyando. Sin embargo, corda, comunicá ta mas cu papia. “Mi mester a desaroyá e arte di scucha,” un mama na Brazil a bisa, “scuchando cu mi curason.” Su pacenshi a duna fruta ora su yu homber a cuminsá compartí su sintimentunan cuné.

15. Kico mester tene na mente ora ta toca recreo?

¹⁵ Muchanan mester di “un tempu pa hari . . . i un tempu pa bula rond,” un tempu pa recreo. (Eclesiástes 3:1, 4; Zacarías 8:5) Recreo ta masha productivo ora mayornan i yunan ta disfrutá di dje huntu. Ta un echo tristu cu den hopi hogar recreo ta nificá wakmentu di television. Aunke algun programa di television por ta entretenedor, hopi ta destruí bon balornan, i wakmentu di television tin e tendencia di sofocá comunicacion den un famia. P’esei, pakico no haci algu creativo cu bo yunan? Canta, hunga wega, asociá cu amigunan, bishitá lugánan agradabel. Actividadnan asina ta stimulá comunicacion.

16. Kico mayornan tin cu siña nan yunan tocante Jehova, i con nan mester haci esei?

¹⁶ Sea un maestro. “Bo mester inculcá [e palabranan aki] den bo yu homber,” Jehova a bisa. E contexto ta bisá bo loke i con pa siña. Promé, “bo mester stima Jehova bo Dios cu tur bo curason i tur bo alma i tur bo forsa vital.” (Deuteronomio 6:5) Anto, “e palabranan aki . . . bo mester inculcá.” Duna instruccion cu e meta pa desaroyá amor di henter alma pa Jehova i pa su leynan. (Compará cu Hebreonan 8:10.) E palabra “inculcá” ta nificá siña mediante ripiticion. Pues Jehova, en realidad, ta bisá bo cu e manera principal pa yuda bo yunan desaroyá un personalidad piadoso ta di papia tocante dje riba un base consistente. Esaki ta incluí tene un studio di Bijbel regular cu nan.

17. Kico mayornan mester desaroyá den nan yu? Pakico?

¹⁷ Mayoria mayor sa cu pa hinca informacion den un mucha su curason no ta fácil. Apostel Pedro a insta compañeronan cristian: “Manera criaturanan recien nací, desaroyá un anhelo p’e lechi puru cu ta pertenecé n’e palabra.” (1 Pedro 2:2) E expresion “desaroyá un anhelo” ta indicá cu hopi hende di naturalesa no ta hambrá pa alimento spiritual. Mayornan kisas mester haña maneranan pa desaroyá e anhelo ei den nan yu.

18. Cua ta algun método di siñansa di Jesus cu mayornan ta ser animá pa imitá?

¹⁸ Jesus a alcansá curasonnan dor di usa comparacionnan. (Marco 13:34; Lucas 10:29-37) E método di siñansa aki ta specialmente eficas cu muchanan. Siña principionan bíblico mediante uso di cuentanan colorido i interesante, kisas esnan hañá den e publicacion Mi buki di relato bíblico.a Enbolbé e muchanan. Laga nan usa nan creatividad den pinta i haci actuacion di sucesonan bíblico. Tambe Jesus a usa preguntanan. (Mateo 17:24-27) Imitá su método durante bo studio di famia. En bes di simplemente mencioná un ley di Dios, haci preguntanan manera, Pakico Jehova a duna nos e ley aki? Kico lo sosodé si nos warda e ley aki? Kico lo sosodé si nos no warda e ley aki? Preguntanan asina ta yuda un yu razoná i mira cu Dios su leynan ta práctico i bon.—Deuteronomio 10:13.

19. Si mayornan sigui principionan bíblico den trata cu nan yunan, ki bentahanan grandi e yunan lo disfrutá di dje?

¹⁹ Dor di ser un ehempel, un compañero, un comunicador i un maestro, bo por yuda bo yu for di su promé añanan desaroyá un relacion personal estrecho cu Jehova Dios. E relacion aki lo animá bo yu pa ta felis como un cristian. Lo e haci esfuerso pa biba di acuerdo cu su fe asta ora e enfrentá cu presion di su pareunan i tentacionnan. Semper yud’é apreciá e relacion precioso aki.—Proverbionan 27:11.

20. Kico ta disiplina, i con e mester ser aplicá?

²⁰ Disiplina ta entrenamentu cu ta corigí e mente i curason. Yunan tin mester di esei constantemente. Pablo ta consehá tatanan pa “sigui cria [nan yunan] den e disiplina i reglamentu mental di Jehova.” (Efesionan 6:4) Mayornan mester disipliná den amor, mescos cu Jehova ta haci. (Hebreonan 12:4-11) Disiplina basá riba amor por ser transmití dor di razonamentu. P’esei, ta ser bisá na nos pa “scucha na disiplina.” (Proverbionan 8:33) Con mester duna disiplina?

21. Ki principionan mayornan mester tin na mente ora di disipliná nan yunan?

²¹ Algun mayor ta pensa cu disipliná nan yunan ta enbolbé meramente papia cu nan den tononan menasante, zundrando nan, of asta insultando nan. Sin embargo, riba e mésun tópico di disiplina, Pablo ta spierta: “Boso, tatanan, no iritá boso yunan.” (Efesionan 6:4) Tur cristian ta ser instá pa ser “amabel pa cu tur, . . . instruyendo cu suavedad esnan cu no ta faborablemente dispuesto.” (2 Timoteo 2:24, 25) Aunke mayornan cristian ta reconocé e necesidad pa ta firme, nan ta trata na mantené e palabranan aki na mente ora di disipliná nan yunan. Sin embargo, tin biaha razonamentu no ta suficiente, i algun tipo di castigu por ta necesario.—Proverbionan 22:15.

22. Si mester castigá un yu, kico mester lagu’é comprendé?

²² Yunan distinto ta rekerí disiplina distinto. Algun no ta ser “corigí dor di simplemente palabranan.” Pa nan, e castigu duná de bes en cuando pa desobedencia por ta un salba bida. (Proverbionan 17:10; 23:13, 14; 29:19) Sin embargo, un mucha mester comprendé pakico e ta ser castigá. “E bara i reprendementu ta loke ta duna sabiduria.” (Proverbionan 29:15; Job 6:24) Ademas, castigu tin límite. “Lo mi tin cu castigá bo te na e grado apropiado,” Jehova a bisa su pueblo. (Jeremías 46:28b) Bijbel definitivamente no ta aprobá sutamentu cu rabia of golpiamentu severo, cu ta blousa i asta heridá un mucha.—Proverbionan 16:32.

23. Kico un mucha mester por dicerní ora su mayornan castigu’é?

²³ Ora Jehova a spierta su pueblo cu lo e disipliná nan, el a bisa promé: “No tene miedu . . . pasobra mi ta cu boso.” (Jeremías 46:28a) Di igual manera, disiplina di mayor, den loke sea e forma apropiado, nunca mester laga e mucha sintié rechasá. (Colosensenan 3:21) Mas bien, e mucha mester sinti cu disiplina ta ser duná pasobra e mayor ta ‘cuné,’ na su banda.

24, 25. Cua ta un menasa desagradabel for di cua muchanan mester ser protehá den e dianan aki?

²⁴ Hopi hende grandi ta refleccioná bek riba e tempu di nan infancia como un temporada felis. Nan ta corda un sintimentu caluroso di siguridad, un siguransa cu nan mayornan lo a protehá nan bou di tur circunstancia. Mayornan kier pa nan yunan sinti nan asina ei, pero den e mundu degenerá djawe, ta mas duru cu ántes pa mantené yunan fuera di peliger.

²⁵ Un menasa desagradabel cu a crece den añanan recien ta abusu sexual di mucha. Na Malasia, informe di abusu sexual di mucha a bira cuater biaha mas tantu den un periodo di dies aña. Na Alemania un 300.000 mucha ta ser abusá sexualmente tur aña, miéntras cu den un pais di Sur América, segun un investigacion, e cantidad calculá pa aña ta un cifra tolondrador di 9.000.000 mucha! Trágicamente, e mayoria dje muchanan aki ta ser abusá den nan mes cas dor di hende cu nan conocé i ta confia. Pero mayornan mester ta defensornan fuerte di nan yunan. Con mayornan por ser protectornan?

26. Cua ta algun manera cu muchanan por ser protehá, i con conocimentu por protehá un mucha?

²⁶ Siendo cu experencia ta mustra cu muchanan cu sa poco tocante sex ta specialmente vulnerabel pa abusadornan di mucha, un paso preventivo importante ta pa educá e mucha, asta ora e ta chikitu ainda. Conocimentu por percurá proteccion “for dje mal caminda, for dje homber cu ta papia cosnan perverso.” (Proverbionan 2:10-12) Cua conocimentu? Conocimentu di principionan bíblico, di loke ta moralmente bon i malu. Conocimentu tambe cu algun hende grandi ta haci cosnan malu i cu un persona yong no mester obedecé ora hende ta insinuá actonan inapropiado. (Compará cu Daniel 1:4, 8; 3:16-18.) No limitá instruccion asina na un solo ocasion. Pa mayoria mucha chikitu mester ripití un les promé cu nan cord’é bon. Segun cu muchanan ta crece bira un tiki mas grandi, un tata amorosamente lo respetá su yu muher su derecho na privacidad, i un mama esun di su yu homber—reforsando asina un mucha su sentido di loke ta corecto. I, naturalmente, un dje mihó proteccionnan contra abusu ta supervision estrecho di boso como mayornan.

27, 28. Ken ta mayornan su Fuente principal di yudansa ora nan ta enfrentá e desafio di cria un yu?

²⁷ En berdad, e entrenamentu di un mucha desde infancia ta un desafio, pero mayornan creyente no mester enfrentá e desafio nan so. Den pasado, den e tempu di e Huesnan, ora un homber yamá Manoa a haña sa cu e tabata bai bira tata, el a pidi Jehova pa guia den cria su yu. Jehova a contestá su oracionnan.—Huesnan 13:8, 12, 24.

²⁸ Den un manera similar awe, segun cu mayornan creyente ta lanta nan yunan, nan tambe por papia cu Jehova den oracion. Ser un mayor ta un tarea difícil, pero tin recompensanan grandi. Un pareha cristian na Hawai ta bisa: “Bo tin 12 aña pa entrená bo yu promé cu e añanan crítico ei di tiener. Pero si bo a traha duru pa aplicá principionan bíblico, ta tempu pa cosechá goso i pas ora nan dicidí cu nan kier sirbi Jehova di curason.” (Proverbionan 23:15, 16) Ora bo yu tuma e decision ei, abo tambe lo ser conmoví pa sclama: “Yunan homber [i yunan muher] ta un herencia for di Jehova.”