Boutismo i Bo Relashon ku Dios

 1. Dikon un funshonario di korte di Etiopia a pidi p’e batisá?

“ATA awa! Kiko ta stroba pa mi wòrdu batisá?” Esei ta e pregunta ku un funshonario di korte di Etiopia a hasi den promé siglo. Un kristian ku yama Felipe a kaba di mustr’é ku Hesus tabata e Mesias primintí. Profundamente konmoví pa loke el a siña for di e Skritura, e hòmber etiopio a tuma akshon. El a demostrá ku e kier batisá!—Echonan 8:26-36.

 2. Pakiko bo tin ku pensa seriamente riba boutismo?

² Si bo a studia e kapítulonan anterior di e buki aki kuidadosamente ku un Testigu di Yehova, kisas bo tambe ta sinti bo kla pa puntra: ‘Kiko ta stroba pa ami wòrdu batisá?’ Entre tantu ya bo a siña tokante Beibel su promesa di bida eterno den Paradeis. (Lukas 23:43; Revelashon 21:3, 4) Bo a siña tambe tokante e berdadero kondishon di e mortonan i e speransa di resurekshon. (Eklesiastés 9:5; Juan 5:28, 29) Probablemente bo tin un tempu ta asosiá ku Testigunan di Yehova na nan reunionnan i bo a mira pa bo mes kon nan ta praktiká e religion berdadero. (Juan 13:35) Mas importante ainda, kasi sigur bo a kuminsá desaroyá un relashon personal ku Yehova Dios.

 3. (a) Ki mandamentu Hesus a duna su siguidónan? (b) Kon ta batisá un persona p’e bira un kristian?

³ Kon bo por mustra ku bo ke sirbi Dios? Hesus a bisa su siguidónan: “Bai i hasi tur e nashonnan disipel di mi, i batisá nan.” (Mateo 28:19) Hesus mes a pone un ehèmpel dor di batisá den awa. No a djis sprengu awa riba dje òf basha un poko awa riba su kabes. (Mateo 3:16) E palabra “batisá” ta bin for di un ekspreshon griego ku ta nifiká “dòp.” P’esei boutismo kristian ta nifiká ser di dòp òf hinká kompletamente bou di awa.

 4. Kiko boutismo den awa ta indiká?

⁴ Boutismo den awa ta un rekisito pa tur hende ku ke tin un relashon ku Yehova Dios. Boutismo ta indiká públikamente ku bo tin e deseo di sirbi Dios. E ta mustra ku ta un delisia pa bo pa hasi e boluntat di Yehova. (Salmo 40:7, 8) Sin embargo, pa bo kualifiká pa boutismo bo tin ku dal sierto pasonan.

 5. (a) Kua ta e promé paso pa kualifiká pa boutismo? (b) Dikon reunionnan kristian ta importante?

⁵ Bo a kuminsá dal e promé paso kaba. Kon? Dor di gana konosementu di Yehova Dios i Hesukristu, podisé pa medio di un estudio sistemátiko di Beibel. (Juan 17:3) Pero tin mas kos pa bo siña. Kristiannan ke ta “yená ku e konosementu [eksakto di Dios] su boluntat.” (Kolosensenan 1:9) Un yudansa grandi den esaki ta di asistí na e reunionnan di kongregashon di Testigunan di Yehova. Ta importante pa asistí na e reunionnan ei. (Hebreonan 10:24, 25) Asistensia regular na reunion lo yuda bo oumentá bo konosementu di Dios.

 6. Kuantu konosementu di Beibel bo mester tin pa bo por kualifiká pa boutismo?

⁶ Klaru ku bo no tin nodi sa tur kos ku tin den Beibel pa bo por kualifiká pa boutismo. E funshonario di korte di Etiopia tabatin algun konosementu, pero e tabatin mester di yudansa pa komprondé sierto partinan di e Skritura. (Echonan 8:30, 31) Asina bo tambe tin hopi kos mas di siña ainda. De echo, nunka lo bo no stòp di siña tokante Dios. (Eklesiastés 3:11) Pero promé ku bo por batisá, bo mester sa i aseptá por lo ménos e siñansanan básiko di Beibel. (Hebreonan 5:12) E siñansanan ei ta enserá e bèrdat tokante e kondishon di e mortonan i e importansia di e nòmber di Dios i di su Reino.

 7. Ki efekto un estudio di Beibel mester tin riba bo?

⁷ Pero konosementu so no ta basta, pasobra “sin fe ta imposibel pa agradá [Dios].” (Hebreonan 11:6) Beibel ta bisa nos ku ora algun hende den e antiguo stat di Korinto a tende e mensahe kristian, nan “a kere i a wòrdu batisá.” (Echonan 18:8) Den un manera similar, un estudio di Beibel mester duna bo e fe ku Beibel ta e Palabra inspirá di Dios. Tambe un estudio di Beibel mester yuda bo haña fe den Dios su promesanan i den e echo ku Hesus su sakrifisio por salba bo.—Josué 23:14; Echonan 4:12; 2 Timoteo 3:16, 17.

 8. Kiko lo motivá bo pa kompartí ku otro hende loke bo a siña?

⁸ Segun ku fe ta krese den bo kurason, lo bo ripará ku ta difísil pa tene loke bo a siña pa bo so. (Jeremias 20:9) Lo bo sinti un motivashon fuerte pa papia ku otro hende tokante Dios i su propósito.—2 Korintionan 4:13.

9, 10. (a) Ku ken lo bo por kuminsá kompartí bèrdatnan bíbliko? (b) Kiko bo mester hasi si bo ke partisipá den e predikashon organisá di Testigunan di Yehova?

⁹ Kisas bo por kuminsá kompartí bèrdatnan bíbliko ku otro hende dor di papia ku takto tokante e bèrdatnan ei ku bo famia-, amigu-, bisiña- i koleganan. Ku tempu, lo bo ke partisipá den e predikashon organisá di Testigunan di Yehova. Ora ta asina leu, papia libremente ku e Testigu ku ta siña bo loke Beibel ta bisa. Si ta parse ku bo ta kualifiká pa prediká públikamente, lo hasi areglo pa abo ku esun ku ta siña bo reuní huntu ku dos ansiano di kongregashon.

¹⁰ Esaki lo duna bo chèns di sera konosí mihó ku algun di e ansianonan kristian ku ta pastoriá e tou di Dios. (Echonan 20:28; 1 Pedro 5:2, 3) Si e ansianonan aki nota ku bo ta komprondé i ta kere e siñansanan básiko di Beibel, ku bo ta biba na armonia ku e prinsipionan di Dios i ku realmente bo ke ta un Testigu di Yehova, nan lo laga bo sa ku bo ta kualifiká pa partisipá den e predikashon públiko komo un publikadó no-batisá di e bon nobo.

11. Ki kambionan algun hende lo tin ku hasi promé ku nan ta kualifiká pa partisipá den e predikashon públiko?

¹¹ Di otro banda, kisas lo bo tin ku hasi algun kambio den bo manera di biba i den bo kustumbernan pa bo por kualifiká pa partisipá den e predikashon públiko. Esaki kisas ta enserá ku bo tin ku stòp ku algun práktika ku bo a tene skondí pa otro hende. Pues anto, promé ku bo pidi pa bira un publikadó no-batisá, bo mester ta liber di pikánan serio, manera inmoralidat seksual, buracheria i uso di droga.—1 Korintionan 6:9, 10; Galationan 5:19-21.

12. Dikon ta nesesario pa repentí?

¹² Tin mas paso ku bo mester dal promé ku bo ta kualifiká pa boutismo. Apòstel Pedro a bisa: “Repentí . . . i kombertí, pa boso pikánan wòrdu kitá.” (Echonan 3:19) Repentí ta nifiká sinti duele sinsero pa algu ku bo a hasi. Ta mas ku klaru ku repentimentu ta apropiá si un persona a hiba un bida inmoral, pero e ta nesesario tambe asta si un hende a hiba un bida relativamente limpi moralmente. Dikon? Pasobra tur hende ta pekadó i tin mester di Dios su pordon. (Romanonan 3:23; 5:12) Promé ku bo a kuminsá studia Beibel, bo no tabata sa kiko ta Dios su boluntat. Pues anto, ta kon bo por a biba na pleno armonia ku su boluntat? P’esei repentimentu ta nesesario.

13. Kiko ke men kombertí?

¹³ Despues ku un persona repentí, e mester kombertí, es desir, bira bèk. Bo tin ku hasi mas ku djis sinti duele di bo estilo anterior di bida, bo tin ku rechas’é i ser firmemente determiná pa di awor en adelante hasi loke ta korekto. Repentí i kombertí ta pasonan ku bo mester dal promé ku bo batisá.

14. Kua paso importante bo tin ku dal promé ku bo batisá?

¹⁴ Tin un otro paso importante ku bo mester dal promé ku bo batisá. Bo tin ku dediká bo mes na Yehova Dios.

15, 16. Kiko dediká bo mes na Dios ta nifiká, i kiko ta motivá un persona pa hasi esaki?

¹⁵ Ora bo dediká bo mes na Yehova Dios den un orashon sinsero, bo ta primintí di dun’é deboshon eksklusivo pa semper. Pero dikon un persona lo ke hasi esei? Wèl, suponé ku un hòmber ta kuminsá namorá un mucha muhé. Mas e hòmber siña konos’é i mira e kualidatnan ekselente ku e tin, mas atraí e ta sintié na e mucha muhé. Ku tempu, ta natural ku lo e pidié pa kasa kuné. Ta bèrdat ku dor di kasa e hòmber lo tin ku bai karga mas responsabilidat. Pero amor lo motiv’é pa dal e paso importante ei.

¹⁶ Ora bo siña konosé i stima Yehova, bo ta sinti bo motivá pa sirbié sin reserva òf sin pone ningun límite den bo adorashon na dje. Ken ku ke sigui Dios su Yu, Hesukristu, tin ku “nenga su mes.” (Marko 8:34) Nos ta nenga nos mes dor di hasi sigur ku nos deseonan i metanan personal no ta stroba nos di rindi obedensia kompletu na Dios. Pues anto, promé ku bo por batisá, e hasimentu di Yehova Dios su boluntat mester ta bo propósito prinsipal den bida.—1 Pedro 4:2.

17. Dikon algun hende ta vasilá pa hasi un dedikashon na Dios?

¹⁷ Tin hende ta vasilá pa hasi un dedikashon na Yehova pasobra nan tin un poko miedu di dal un paso asina serio. Nan tin miedu ku nan mester rindi kuenta na Dios komo un kristian dediká. Komo ku nan ta teme ku nan lo por faya i desapuntá Yehova, nan ta pensa ku ta mihó nan no hasi un dedikashon na dje.

18. Kiko por motivá bo pa hasi un dedikashon na Yehova?

¹⁸ Segun ku bo ta haña mas amor pa Yehova, lo bo sinti bo motivá pa hasi un dedikashon na dje i hasi bo bèst pa kumpli kuné. (Eklesiastés 5:4) Despues di a hasi un dedikashon, sigur lo bo ke “kana na un manera digno di Señor, pa agrad’é den tur sentido.” (Kolosensenan 1:10) Debí na bo amor pa Dios, lo bo no pensa ku ta muchu difísil pa hasi su boluntat. Sin duda lo bo ta di akuerdo ku apòstel Juan, kende a skirbi: “Esaki ta e amor di Dios, ku nos ta warda su mandamentunan; i su mandamentunan no ta pisá.”—1 Juan 5:3.

19. Dikon bo no tin nodi tin miedu di hasi un dedikashon na Dios?

¹⁹ Bo no mester ta perfekto pa hasi un dedikashon na Dios. Yehova konosé nos limitashonnan i nunka e no ta ferwagt di nos mas di loke nos por hasi. (Salmo 103:14) E kier pa bo tin éksito i lo e sostené bo i yuda bo. (Isaias 41:10) Bo por ta sigur ku si bo konfia den Yehova ku henter bo kurason, lo e “dirigí bo bereanan” i hasi bo kaminda stret.—Proverbionan 3:5, 6.

20. Dikon dedikashon na Yehova no por keda un asuntu privá?

²⁰ Un kos ku por yuda bo hasi un dedikashon personal na Yehova den orashon ta di pensa riba e kosnan ku nos a kaba di konsiderá. Ademas, tur hende ku realmente ta stima Dios tin ku hasi “deklarashon públiko pa salbashon.” (Romanonan 10:10, NW) Kon bo ta hasi esei?

21, 22. Kon bo por hasi “deklarashon públiko” di bo fe?

²¹ Laga e kordinadó di e kuerpo di ansiano di bo kongregashon sa ku bo ke batisá. Lo e hasi areglo pa algun ansiano repasá ku bo vários pregunta ku ta abarká siñansanan básiko di Beibel. Si e ansianonan aki ta di akuerdo ku bo ta kualifiká, nan lo bisa bo ku bo por batisá na e próksimo oportunidat pa hasi esei.a Na okashonnan asina por lo general tin un diskurso ku ta repasá e nifikashon di boutismo. Na final di e diskurso e oradó ta invitá tur e kandidatonan pa boutismo pa kontestá dos pregunta simpel komo un manera pa nan hasi verbalmente un “deklarashon públiko” di nan fe.

²² Ta e boutismo mes ta loke ta identifiká bo públikamente komo un persona ku a hasi un dedikashon na Dios i ku awor ta un Testigu di Yehova. Kandidatonan pa boutismo ta ser hinká kompletamente bou di awa pa mustra públikamente ku nan a hasi un dedikashon na Yehova.

23. Kiko ta nifiká ser batisá “den nòmber di e Tata i di e Yu i di e spiritu santu”?

²³ Hesus a bisa ku su disipelnan lo a ser batisá “den nòmber di e Tata i di e Yu i di e spiritu santu.” (Mateo 28:⁠19) Esaki ta nifiká ku un kandidato pa boutismo ta rekonosé e outoridat di Yehova Dios i di Hesukristu. (Salmo 83:18; Mateo 28:18) Tambe e ta rekonosé e funshon i aktividat di Dios su spiritu santu òf forsa aktivo.—Galationan 5:22, 23; 2 Pedro 1:21.

24, 25. (a) Kiko boutismo ta simbolisá? (b) Ki pregunta mester di kontesta?

²⁴ Sin embargo, boutismo no ta djis un akto di bai bou di awa. E ta un símbolo di algu masha importante. Bai bou di awa ta nifiká ku bo a pone un fin na bo manera di biba anterior. Bin ariba bèk for di bou di awa ta indiká ku awor bo bida ta kuminsá di nobo pa hasi e boluntat di Dios. Kòrda tambe ku bo a hasi un dedikashon na Yehova Dios, no na un obra, na un kousa, na hende ni na un organisashon. Bo dedikashon i boutismo ta e komienso di un amistat masha será ku Dios, un relashon íntimo kuné.—Salmo 25:14.

²⁵ Boutismo no ta garantisá salbashon. Apòstel Pablo a skirbi: “Traha riba boso salbashon ku temor i temblamentu.” (Filipensenan 2:12) Boutismo ta djis un komienso. E pregunta ta: Kon bo por keda den e amor di Dios? Nos último kapítulo lo duna e kontesta.