Prólogo

Kerido Lektor,

“Bin, sigui mi.” (Marko 10:21) Bon mirá, ku e palabranan ei Hesukristu ta invitá nos pa siguié. Abo ta reakshonando riba su yamada? Si bo ta hasi esei, lo e tin un impakto profundo riba bo bida. Dikon?

Yehova a manda su Yu unigénito na mundu pa duna su bida komo un reskate. (Juan 3:16) Banda di esei, e Yu ei a mustra nos kon pa hiba nos bida. Den tur loke el a hasi, el a mantené su integridat i a hasi kurason di su Tata kontentu. Tambe Hesus a mustra nos kon nos por ta meskos ku su Tata. E palabranan i ­akshonnan di e Yu a reflehá perfektamente e manera di aktua i e boluntat di e Tata.—Juan 14:9.

Beibel ta bisa ku Hesus ta ‘un ehèmpel pa nos sigui den su pasonan.’ (1 Pedro 2:21) Si nos ke hala mas serka Yehova, si nos ke tin for di awor un bida ku berdadero propósito i si nos ke keda riba e kaminda ku ta hiba na bida eterno, nos tin ku sigui den e pasonan di Kristu ku sumo kuidou i atenshon.

Pa kuminsá e trayekto aki, nos tin ku familiarisá nos mes ku Hesus su bida riba tera. Pues, ta bale la pena pa studia kuidadosamente e deskripshon di Hesus ku tin konserbá den Beibel. Algu ku lo yuda nos mira mas kla kon nos por sigui Hesus ta di meditá riba e kosnan ku el a bisa i hasi, i konsiderá kon nos por imit’é den palabra i akshon.

Nos ta spera ku e publikashon aki lo yuda bo krese den bo amor pa Hesus i pa Yehova. I laga e amor ei motivá bo pa sigui den e pasonan di Hesus ku sumo kuidou i atenshon di manera ku abo por hasi Yehova su kurason kontentu awor i pa semper.