Kiko Hesus Tabata Ke Men ku “Sigui Mi”?

1, 2. Kua ta e mihó invitashon ku un hende por haña, i ki pregunta nos lo por hasi nos mes?

KUA ta e mihó invitashon ku bo a yega di haña? Podisé tabata e biaha ku bo a haña un invitashon pa asistí na un okashon spesial, kisas e kasamentu di dos hende ku bo tin hopi kariño p’e. Òf lo bo por pensa riba e dia ku bo a haña e invitashon pa aseptá un trabou importante. Si bo a yega di haña e tipo di invitashonnan ei, sin duda bo a sinti bo masha emoshoná, asta onrá, di a haña nan. Pero echo ta ku bo a haña un invitashon hopi mas mihó. Kada un di nos a haña e invitashon ei. Anto e manera ku nos ta reakshoná riba dje lo tin un efekto profundo riba nos. Ta e desishon di mas importante ku nos lo tuma den bida.

² Kua invitashon esei ta? E ta bin di Hesukristu, e Yu unigénito di Dios Todopoderoso, Yehova, i e ta pará skirbí den Beibel. Na Marko 10:21 nos ta lesa e palabranan aki di Hesus: “Bin, sigui mi.” Bon mirá, ta un invitashon ku Hesus ta ekstendé na kada un di nos. Ta bon pa nos puntra nos mes: ‘Kon lo mi reakshoná riba e invitashon ei?’ Podisé bo ta pensa ku e kontesta mester ta bisto. Ta ken lo nenga un invitashon maravioso asina? Pa straño ku por parse, mayoria hende ta neng’é. Dikon?

3, 4. (a) Kiko hende lo por a haña envidiabel di e hòmber ku a aserká Hesus pa puntr’é tokante bida eterno? (b) Ki bon kualidatnan Hesus lo a mira den e hóben gobernante riku?

³ Ban wak e ehèmpel di un hòmber ku a haña e invitashon ei direktamente for di Hesus un 2.000 aña pasá. E tabata un hòmber masha respetá. E tabatin por lo ménos tres kos ku hende sa konsiderá deseabel, asta envidiabel: hubentut, rikesa i poder. Segun e relato bíbliko, e tabata un “hóben,” tambe e tabata “masha riku mes” i e tabata un “gobernante.” (Mateo 19:20; Lukas 18:18, 23) Sin embargo, e yònkuman aki tabatin un kualidat mas importante ainda. El a tende di e Gran Maestro, Hesus, i el a gusta loke el a tende.

⁴ Mayoria gobernante den e tempu ei no a duna Hesus e rèspèt ku el a meresé. (Juan 7:48; 12:42) Pero e gobernante aki sí a aktua diferente. Beibel ta konta nos: “Ora ku [Hesus] tabata sali bai pa sigui su kaminda, un hòmber a kore bin serka dje i a kai na rudia su dilanti i a puntr’é: ‘Bon Maestro, kiko mi mester hasi pa heredá bida eterno?’” (Marko 10:17) Bo a nota kon ansioso e hòmber aki tabata pa papia ku Hesus? El a kore bin serka Hesus den públiko, meskos ku kualke hende pober i di kondishon humilde kisas lo a hasi. Es mas, el a hinka rudia respetuosamente dilanti di Kristu. Pues e tabatin un grado di humildat i tabata konsiente di su nesesidat spiritual. Hesus a apresiá e tipo di bon kualidatnan ei. (Mateo 5:3, NW; 18:4) Ta di komprondé anto ku ‘ora Hesus a wak é, el a stim’é.’ (Marko 10:21) Kon Hesus a kontestá e pregunta di e hòmber hóben aki?

 5. Kiko Hesus a kontestá e hòmber hóben i riku, i kon nos por sa ku e “un kos” ku e tabata falta no a nifiká ku e mester tabata pober? (Wak tambe e nota na pia di página.)

⁵ Hesus a mustra e hòmber ku su Tata a duna informashon kaba riba e pregunta importante ei tokante kon pa haña bida eterno. Hesus a referí na e Skritura, i e hòmber a konfirmá ku e tabata obedesé e Lei di Moisés fielmente. Pero Hesus, ku su komprondementu penetrante ekstraordinario, a ripará algu mas profundo. (Juan 2:25) El a ripará ku e gobernante aki tabatin un problema spiritual, anto un problema serio. P’esei Hesus a bis’é: “Un kos bo falta.” Kiko e “un kos” ei tabata? Hesus di kuné: “Bai i bende tur loke bo tin, i duna na hende pober.” (Marko 10:21) Akaso Hesus tabata ke men ku un persona mester ta blo bashí pa e por sirbi Dios? Nò.a Kristu kier a revelá algu di gran importansia.

 6. Ki invitashon Hesus a ekstendé na e hóben gobernante riku, i kiko su reakshon a revelá tokante su kurason?

⁶ Pa saka na kla kiko e hòmber tabata falta, Hesus a ofres’é un oportunidat maravioso: “Bin, sigui mi.” Djis imaginá: E Yu di e Dios Haltísimo a invitá e hòmber ei personalmente pa siguié! Tambe Hesus a primintié un rekompensa inimaginabel. Hesus a bis’é: “Lo bo tin tesoro den shelu.” E hóben gobernante riku a gara e oportunidat aki, e invitashon magnífiko aki? E relato ta bisa: “E palabranan aki a hasié bira masha afligí, i el a bai tur tristu, pasobra e tabata doño di hopi propiedat.” (Marko 10:21, 22) Pues Hesus su palabranan inesperá a revelá un problema den e hòmber aki su kurason. Su kurason tabata muchu pegá na su propiedat i, sin duda, pegá na e poder i prestigio ku rikesa ta trese kuné. Lamentablemente, su amor pa e kosnan ei a surpasá tur e amor ku e tabatin pa Kristu. Pues anto, e “un kos” ku e tabata falta ta amor di henter kurason pa Hesus i Yehova, un amor di sakrifisio propio. Komo ku e hòmber hóben tabata falta e amor ei, el a rechasá e mihó invitashon di su bida! Pero, kiko esaki tin keber ku abo?

 7. Dikon nos por tin sigur ku Hesus su invitashon ta inkluí nos awe?

⁷ Hesus su invitashon no tabata limitá na e hòmber ei; tampoko e tabata pa solamente un par di hende. Hesus a bisa: “Si un hende kier bin mi tras, lag’é . . . sigui mi.” (Lukas 9:23) Tuma nota ku “un hende” por ta un siguidó di Kristu si di bèrdat e “kier.” Dios ta hala e tipo di personanan ei di kurason onrado na su Yu. (Juan 6:44) No ta hende riku so, ni hende pober so, ni esnan di sierto rasa òf nashon so ni tampoko esnan ku a biba den e tempu ei so, sino tur hende ta haña e oportunidat pa aseptá Hesus su invitashon. Pues e palabranan di Hesus, “Bin, sigui mi,” en bèrdat ta apliká na abo tambe. Pakiko lo bo ke sigui Kristu? I kiko presis esei ta enserá?

 8. Ki nesesidat tur hende tin, i dikon?

⁸ Tin un bèrdat ku nos mester rekonosé: Komo hende, nos tin e nesesidat básiko di haña bon liderato. No ta tur hende ta atmití ku nan tin e nesesidat aki, pero e t’ei sí. Yehova a inspirá su profeta Jeremias pa skirbi e bèrdat eterno aki: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.” (Jeremias 10:23) Hende no tin ni e kapasidat ni e derecho di goberná nan mes. Bon mirá, gran parti di historia humano ta un registro di mal liderato. (Eklesiastés 8:9) Den tempu di Hesus, e lidernan a oprimí e pueblo, abusá di nan i engañá nan. Hesus a duna un bon deskripshon di hende komun ora el a bisa ku nan tabata “manera karné sin wardadó.” (Marko 6:34) Awe humanidat ta den mesun situashon. Komo grupo i komo personanan individual, nos tin mester di liderato ku nos por konfia i respetá. Hesus ta satisfasé e nesesidat ei? Ban konsiderá vários motibu pakiko e kontesta ta sí.

 9. Kiko ta distinguí Hesus for di tur otro lider?

⁹ Na promé lugá, ta Yehova Dios a skohe Hesus. Mayoria lider humano ta ser skohé pa otro hende imperfekto, kendenan hopi biaha ta ser engañá i ta inkliná pa husga kosnan robes. Hesus ta un otro tipo di lider. E título ku e tin mes ta indiká esei. E palabra “Kristu,” meskos ku e palabra “Mesias,” ta nifiká “Ungí.” I esun ku a ungi Hesus—es desir, dun’é un nombramentu spesial na un posishon sagrado—ta netamente e Señor Soberano di universo. Yehova Dios a bisa di su Yu: “Ata mi sirbidó ku mi a skohe, mi stimá, den kende mi alma tin goso; lo mi pone mi spiritu riba dje.” (Mateo 12:18) No tin ningun otro persona ku sa mihó ku nos Kreadó ki tipo di lider nos mester. Yehova su sabiduria ta infinito, pues nos tin sufisiente motibu pa konfia e persona ku el a skohe.—Proverbionan 3:5, 6.

10. Dikon Hesus su ehèmpel ta e mihó ehèmpel pa hende sigui?

¹⁰ Na di dos lugá, Hesus a pone un ehèmpel perfekto pa nos, un ehèmpel ku ta inspirá nos. E mihó tipo di lider tin kualidatnan ku su súpditonan por atmirá i imitá. E ta dirigí hende mediante su ehèmpel, i ta inspirá nan pa bira mihó hende. Kua ta e kualidatnan ku lo bo atmirá mas den un lider? Kurashi? Sabiduria? Kompashon? Kiko di perseveransia ora e ta konfrontá difikultat? Segun ku bo ta studia e registro di Hesus su bida riba tera, lo bo deskubrí ku e tabatin tur e kualidatnan ei, i asta mas! Siendo ku Hesus tabata un refleho perfekto di su Tata selestial, e tabatin tur kualidat divino a la perfekshon. E tabata di bèrdat un hende perfekto den tur sentido. Pues den tur loke el a hasi, den delaster un palabra ku el a ekspresá, den delaster un sintimentu ku el a revelá, nos ta haña algu ku ta bale la pena pa nos imitá. Beibel ta bisa ku el a ‘laga un ehèmpel pa bo sigui den su pasonan’ ku sumo kuidou i atenshon.—1 Pedro 2:21.

11. Kon Hesus a duna prueba di ta “e bon wardadó”?

¹¹ Na di tres lugá, Kristu a kumpli ku su afirmashon: “Ami ta e bon wardadó.” (Juan 10:14) Pa hende den tempu bíbliko, e komparashon ku wardadó tabata basá riba algu konosí. Wardadónan tabata traha duru pa kuida e karnénan ku tabata na nan enkargo. Un “bon wardadó” tabata pone e siguridat i bienestar di su tou promé ku di dje mes. Por ehèmpel, Hesus su antepasado David tabata un wardadó tempu ku e tabata hóben, i na mas ku un okashon, el a riska su bida pa defendé su karnénan kontra atake di bestia feros. (1 Samuel 17:34-36) Hesus a bai asta mas leu na fabor di su siguidónan humano. El a entrega su bida pa nan. (Juan 10:15) Kuantu lider tin tal aktitut di sakrifisio propio?

12, 13. (a) Den ki sentido un wardadó konosé su karnénan, i den ki manera nan konos’é? (b) Dikon abo lo ke ta bou di e liderato di e Bon Wardadó?

¹² Hesus tabata “e bon wardadó” den un otro sentido tambe. Refiriendo na e karnénan, el a bisa: “Mi konosé esnan ku ta di mi, i esnan ku ta di mi, konosé mi.” (Juan 10:14) Meditá un ratu riba Hesus su ilustrashon. Pa un opservadó kasual, un tou di karné lo por parse simplemente un bola di lana riba otro. Sin embargo, e wardadó konosé kada un di su karnénan. E sa kua hembra lo tin mester di su yudansa djis akí ora di wèrp, kua ta e lamchinan ku ainda e tin ku karga pasobra nan ta muchu chikí i suak pa kana riba nan mes forsa, i kua karné resientemente tabata malu òf heridá. E karnénan tambe konosé nan wardadó bon. Nan ta rekonosé su bos, i nunka ta bruha kere ku ta bos di un otro wardadó. Ora e bos di e wardadó tin un tono di alerta òf ta indiká ku tin algu urgente, nan ta reakshoná rápidamente. Kaminda e dirigí nan, nan ta siguié. Anto e wardadó sa presis unda e tin ku hiba nan. E sa unda tin yerba bèrdè na abundansia, unda tin awa limpi i refreskante, unda tin sabana fuera di peliger. Segun ku e ta vigilá e karnénan, nan ta sinti ku nan ta sano i salvo.—Salmo 23.

¹³ Abo no ta anhelá un liderato asina? E Bon Wardadó tin un registro inkomparabel di ta trata su siguidónan presisamente asina. E ta primintí di guia bo for di awor na un bida felis i satisfasiente i tambe na un futuro eterno! (Juan 10:10, 11; Revelashon 7:16, 17) P’esei nos mester sa kiko presis sigui Kristu ta enserá.

14, 15. Pa un hende ta un siguidó di Kristu, dikon no ta basta p’e djis deklará ku e ta un kristian òf p’e forma un laso emoshonal ku Hesus?

¹⁴ Awe, miónes i miónes di hende probablemente ta sinti ku nan a aseptá Kristu su invitashon. De echo, nan ta yama nan mes kristian. Podisé nan ta pertenesé na e religion den kua nan mayornan a batisá nan. Òf kisas nan ta pretendé ku nan tin un laso emoshonal ku Hesus i ta asept’é komo nan Salbadó personal. Pero akaso esei ta hasi nan siguidó di Kristu? Ta esei Hesus tabatin na mente ora el a invitá nos pa bira su siguidó? Esaki ta enserá hopi mas kos.

¹⁵ Konsiderá e mundu di kristiandat, esta, e nashonnan kaminda mayor parti di nan siudadanonan ta pretendé di ta siguidó di Kristu. Kristiandat ta praktiká e siñansanan di Hesukristu? Òf nos ta mira den e paisnan ei e mesun odio, opreshon, kriminalidat i inhustisia ku nos ta haña den e restu di mundu? E lider hindú respetá Mohandas Gandhi a yega di bisa: “Mi no sa di ningun hende ku a hasi mas pa humanidat ku Hesus. Pa bisa bèrdat, no tin nada malu ku kristianismo.” El a agregá: “E problema ta ku boso, kristiannan. Boso no ta ni apliká boso mes siñansanan.”

16, 17. Kiko ta falta hopi biaha den e hendenan ku ta pretendé di ta kristian, i kiko ta distinguí nan for di berdadero siguidónan di Kristu?

¹⁶ Hesus a bisa ku su berdadero siguidónan lo ta konosí prinsipalmente pa nan akshonnan i no simplemente a base di loke nan ta bisa òf e nòmber ku nan ta duna nan mes. Por ehèmpel, el a bisa: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu.” (Mateo 7:21) Dikon asina tantu hende ku ta pretendé ku Hesus ta nan Señor no ta hasiendo e boluntat di su Tata? Kòrda riba e hóben gobernante riku. Hopi biaha, tin ‘un kos ku ta falta’ den e hendenan ku ta pretendé di ta kristian. Esei ta amor di henter nan alma pa Hesus i pa Esun ku a mand’é.

¹⁷ Kon esei por ta? E miónes di hendenan ku ta yama nan mes kristian no ta pretendé tambe di ta stima Kristu? Indudablemente ku sí. Pero amor pa Hesus i pa Yehova ta enserá mas ku simpel palabra. Hesus a bisa: “Si un hende ta stima mi, e lo warda mi palabra.” (Juan 14:23) Anto papiando komo wardadó, el a bisa un biaha mas: “Mi karnénan ta tende mi bos, i mi konosé nan, i nan ta sigui mi.” (Juan 10:27) Sí, e berdadero prueba di nos amor pa Kristu no ta simplemente loke nos ta bisa ni loke nos ta sinti sino prinsipalmente loke nos ta hasi.

18, 19. (a) Ki efekto loke nos ta siña tokante Hesus mester tin riba nos? (b) Kiko ta e propósito di e buki aki, i kon lo e benefisiá personanan ku ya pa hopi tempu ta konsiderá nan mes siguidó di Kristu?

¹⁸ Sin embargo, nos akshonnan ta originá for di algu. Nan ta reflehá e persona ku nos realmente ta di paden. Ta einan nos trabou mester kuminsá. Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Si nos atkerí konosementu eksakto tokante Hesus i meditá riba dje, esei lo tin efekto riba nos kurason. Nos lo bin stim’é mas i mas, i kultivá den nos mes un deseo kada bes mas grandi pa siguié diariamente.

¹⁹ Ta esaki ta e propósito di e buki aki. Su meta no ta pa duna un resúmen kompletu di e bida i ministerio di Hesus, sino pa yuda nos mira den un forma mas kla kon nos por sigui Hesus.b E buki aki ta prepará di tal manera ku e ta yuda nos wak den e spil di e Skritura i puntra nos mes: ‘Di bèrdat mi ta siguiendo Hesus?’ (Santiago 1:23-25) Podisé ya pa hopi tempu bo ta konsiderá bo mes un karné ku ta sigui e guia di e Bon Wardadó. Sin embargo, bo no ta di akuerdo ku semper nos por haña maneranan pa mehorá? Beibel ta urgi nos: “Saminá boso mes pa wak si boso ta den e fe; saminá boso mes!” (2 Korintionan 13:5) Ta bale la pena pa nos hasi sigur ku en bèrdat nos ta ser guiá pa nos amoroso Bon Wardadó, Hesus, kende Yehova mes a nombra pa guia nos.

20. Kiko nos lo konsiderá den e siguiente kapítulo?

²⁰ Nos ta spera ku bo estudio di e buki aki lo yuda bo fortalesé bo amor pa Hesus i pa Yehova. Segun ku e amor ei ta guia bo den bida, lo bo haña e pas i satisfakshon di mas grandi ku ta posibel den e mundu bieu aki. Ademas, lo bo biba pa alabá Yehova pa semper pa e echo ku el a perkurá e Bon Wardadó pa nos. Klaru ku nos estudio di Kristu mester ta basá riba e fundeshi korekto. P’esei ta na su lugá ku den Kapítulo 2 nos lo bai analisá Hesus su papel den Yehova su propósito universal.