El “A Tene Kompashon”

1-3. (a) Kon Hesus a reakshoná ora dos limosnero siegu a rog’é pa yuda nan? (b) Kiko e ekspreshon “tene kompashon” ta nifiká? (Wak nota na pia di página.)

DOS hòmber siegu tabata sintá kantu di kaminda, djis pafó di Jeriko. Tur dia nan tabata bin einan, buska un lugá kaminda probablemente hopi hende lo pasa i pidi limosna públikamente. Sin embargo, e dia aki nan lo a eksperensiá algu ku lo a kambia nan bida drástikamente.

² Diripiente, e limosneronan a tende un werewere. Ya ku nan no por mira, un di nan a puntra ta kiko ta pasando, i e hendenan a bis’é ku “Hesus di Názarèt tabata pasa.” Hesus tabata riba kaminda pa bai Yerusalèm pa último biaha. Pero e no tabata su so; un multitut grandi tabata siguié. Ora ku e limosneronan a tende ta ken ta pasando, nan a kousa un konmoshon ku nan gritu: “Señor, Yu di David, tene miserikòrdia di nos!” Iritá, e multitut a manda e limosneronan keda ketu, pero e hòmbernan tabata desesperá. Nan a nenga di stòp di grita.

³ Hesus a tende nan gritamentu riba e bochincha di e multitut. Kiko lo el a hasi? E tabatin hopi kos ta pisa su kabes i su kurason. E tabata a punto di kuminsá e último siman di su bida riba tera. E tabata sa ku sufrimentu i un morto kruel tabata sper’é na Yerusalèm. Tòg e no a keda sin hasi kaso di e gritunan insistente. El a para i a pidi pa trese e personanan ku tabata gritando serka dje. Nan a rog’é: “Señor, nos kier pa nos wowonan wòrdu habrí.” Hesus a “tene kompashon” di nan i a mishi ku nan wowonan; i nan a rekobrá nan bista.a Mesora nan a kuminsá sigui Hesus.—Lukas 18:35-43; Mateo 20:29-34.

 4. Kon Hesus a kumpli ku e profesia ku lo e “tin kompashon di e pober”?

⁴ Esaki no tabata e úniko biaha ku Hesus a mustra kompashon. Na hopi okashon i bou di diferente sirkunstansia, Hesus a sinti su mes profundamente konmoví pa mustra kompashon. Profesia bíbliko a predisí ku lo e “[tabatin] kompashon di e pober.” (Salmo 72:13) Anto en bèrdat Hesus a mustra komprenshon pa e sintimentunan di otro hende. El a tuma e inisiativa pa yuda hende. Su kompashon tabata un forsa ku a motiv’é den su predikashon. Laga nos mira kon e Evangelionan ta revelá e tierno kompashon ku tabatin tras di tur loke Hesus a bisa i hasi, i konsiderá kon nos tambe por demostrá e mesun kompashon aki.

5, 6. Ki ehèmpelnan ta mustra ku Hesus tabata un hòmber ku a sinti pa otro hende?

⁵ Hesus tabata un hòmber di empatia, es desir, el a sinti profundamente pa otro hende. El a komprondé i kompartí e sintimentunan di hende ku tabata sufri. Apesar ku e no a eksperensiá tur nan sirkunstansianan, el a sinti realmente nan doló den su kurason. (Hebreonan 4:15) Ora el a kura un señora ku a sufri di un derame di sanger pa 12 aña, el a deskribí e señora su malesa komo un “aflikshon.” Pues el a rekonosé ku e malesa ei a kousa e señora hopi angustia i sufrimentu. (Marko 5:25-34) Ora el a mira Maria i e hendenan ku tabata huntu kuné ta yora e morto di Lázaro, nan tristesa a konmov’é asina tantu ku el a bira sumamente emoshoná. Ounke e tabata sa ku e ta bai resusitá Lázaro, el a keda asina konmoví ku su wowonan a yena ku awa.—Juan 11:33, 35.

⁶ Na un otro okashon, un leproso a aserká Hesus i a rog’é: “Si bo kier, bo por hasi mi bira limpi.” Kon Hesus, un hòmber perfekto ku nunka di su bida tabata malu, a reakshoná? El a sinti pa e leproso. Sí, e tabata “yen di kompashon.” (Marko 1:40-42) Anto el a hasi algu ekstraordinario. E tabata sa bon-bon ku bou di Lei e leprosonan tabata impuru i no tabatin mag di bin kaminda tin hende. (Levítiko 13:45, 46) No tin duda ku Hesus por a kura e hòmber aki sin mishi kuné. (Mateo 8:5-13) Sin embargo, el a skohe pa saka su man i mishi ku e leproso, bisando: “Mi kier, sea limpi.” Mesora e lepra a kita. Hesus sí a ekspresá un kompashon masha tierno!

 7. Kiko por yuda nos kultivá empatia, i kon nos lo por ekspresá e kualidat aki?

⁷ Komo kristian, nos mester imitá Hesus den sinti pa otro hende. Beibel ta urgi nos pa ‘tene kompashon ku otro.’b (1 Pedro 3:8) Kisas no ta fásil pa komprondé e sintimentunan di hende ku ta sufri di un malesa króniko òf di depreshon, foral si nos mes no a yega di sufri di e kosnan ei. Pero kòrda ku pa bo sinti pa otro hende bo no tin nodi pasa den e mesun sirkunstansianan. Hesus a sinti pa hende malu apesar ku e mes nunka a yega di bira malu. Pues anto, kon nos por kultivá empatia? Pa medio di skucha ku pasenshi ora ku hende ku ta sufri ta deshogá nan mes i ta konta nan sintimentunan. Nos lo por puntra nos mes: ‘Si ami tabata den nan situashon, kon lo mi a sinti?’ (1 Korintionan 12:26) Si nos bira mas konsiente di e sintimentunan di otro hende, nos lo ta mihó prepará pa “enkurashá esnan ku ta falta ánimo.” (1 Tesalonisensenan 5:14) Tin biaha nos por mustra empatia no solamente ku palabra, sino tambe ku lágrima. Romanonan 12:15 ta bisa: “Yora ku esnan ku ta yora.”

8, 9. Kon Hesus a tene kuenta ku sintimentu di otro hende?

⁸ Hesus a tene kuenta ku otro hende, i el a sòru pa e no a hùrt nan sintimentu. Kòrda por ehèmpel e biaha ku nan a trese serka Hesus un hòmber surdu ku kasi no por a papia. Aparentemente Hesus a sinti ku e hòmber aki tabatin poko bèrgwensa, i el a hasi algu ku normalmente e no sa hasi ora di kura hende: “El a hala [e hòmber] un banda, apartá for di e multitut.” Den privá i sin ku e multitut tabata para wak, el a kura e hòmber.—Marko 7:31-35.

⁹ Hesus a aktua ku e mesun konsiderashon ora nan a trese un hòmber siegu serka dje i a pidié kur’é. Hesus a “kohe e siegu na su man i a hib’é pafó di e pueblito.” Anto el a kura e hòmber stap pa stap. Esaki kisas a permití e hòmber su selebro i wowonan ahustá gradualmente na e bistanan asombroso i kompliká di e mundu yen di lus di solo rònt di dje! (Marko 8:22-26) Hesus sí a tene konsiderashon ku hende!

10. Den ki maneranan nos por tene kuenta ku sintimentu di otro hende?

¹⁰ Komo siguidó di Hesus, nos tambe mester tene kuenta ku sintimentu di otro hende. Pues, nos tin ku paga tinu kon nos ta papia, kòrdando ku si nos usa nos lenga sin pensa, esei por ofendé otro hende. (Proverbionan 12:18; 18:21) Kristiannan ta mustra komprenshon pa e sintimentunan di otro hende, p’esei no tin lugá entre nan pa palabranan skèrpi, komentarionan di menospresio ni sarkasmo ku ta pika. (Efesionan 4:31) Ansianonan, kon boso por tene kuenta ku sintimentu di otro hende? Ora di duna konseho, suavisá boso palabranan ku bondat, i permití esun ku ta skucha boso mantené su dignidat. (Galationan 6:1) Mayornan, kon boso por tene kuenta ku sintimentu di boso yunan? Ora di disipliná boso yunan, purba hasi esei den un manera ku no ta brongosá nan sin ta na nodi.—Kolosensenan 3:21.

11, 12. Kua relatonan bíbliko ta mustra ku hende no mester a pidi Hesus pa mustra kompashon na otronan?

¹¹ No ta tur biaha hende mester a pidi Hesus pa e mustra kompashon. De echo, kompashon no ta un kualidat pasivo sino aktivo, un kualidat ku ta motivá un persona pa hasi algu pa yuda. P’esei no ta un sorpresa ku tierno kompashon a motivá Hesus pa tuma e inisiativa pa yuda otro hende. Por ehèmpel, ora ku un multitut grandi a keda ku Hesus pa tres dia, sin kuminda, ningun hende no mester a bis’é ku e hendenan tabatin hamber òf sugerié pa hasi algu al respekto. E relato ta bisa: “Hesus a yama su disipelnan serka dje i a bisa: ‘Mi tin kompashon di e multitut, pasobra ya ta tres dia kaba ku nan ta serka mi, i nan no tin nada di kome; i mi no kier manda nan bai ku hamber, pa nan no desmayá na kaminda.’” Anto kompletamente di su propio boluntat, el a alimentá e multitut milagrosamente.—Mateo 15:32-38.

¹² Konsiderá un otro relato. Na aña 31, ora ku Hesus tabata yegando serka di e stat di Nain, el a topa un esena tristu. Un proseshon di entiero tabata saliendo for di e stat, kisas rumbo pa e grafnan den e serunan ei banda, pa dera ‘e úniko yu hòmber di un biuda.’ Bo por imaginá e doló den e mama ei su kurason? E tabata a punto di dera su úniko yu, i e no tabatin un kasá pa kompartí su tristesa. Di tur e hendenan den e proseshon, Hesus su bista a kai riba e biuda ku awor no tabatin su yu mas. Loke el a mira a konmov’é, sí, “el a sinti kompashon p’e.” Ningun hende no tabatin nodi rog’é. E kompashon den su kurason a motiv’é pa tuma e inisiativa. Pues, “el a yega serka i a mishi ku e kaha di morto,” anto el a resusitá e yònkuman. Kiko a pasa despues? Hesus no a pidi e yònkuman pa djòin e multitut grandi ku tabata biaha huntu ku Hesus. Na lugá di esei, Hesus “a entreg’é bèk na su mama.” Asina el a hasi nan un famia atrobe i a perkurá pa e biuda tin un hende pa kuid’é.—Lukas 7:11-15.

13. Kon nos por imitá Hesus den tuma e debido inisiativa pa yuda personanan den nesesidat?

¹³ Kon nos por imitá e ehèmpel di Hesus? Klaru ku nos no por hasi milager pa kuminda rende ni resusitá morto. Pero sí nos por imitá Hesus den tuma e inisiativa pa yuda personanan den nesesidat. Kisas un ruman den fe a haña un sla finansiero òf a pèrdè su trabou. (1 Juan 3:17) E kas di un biuda kisas tin mester di reparashonnan urgente. (Santiago 1:27) Podisé nos konosé un famia ku a kaba di pèrdè un ser kerí i ku tin mester di konsuelo òf kualke otro yudansa práktiko. (1 Tesalonisensenan 5:11) Den kasonan di berdadero nesesidat, nos no tin ku warda te ora hende pidi nos pa nos ofresé yudansa. (Proverbionan 3:27) Kompashon lo motivá nos pa tuma e debido inisiativa pa yuda, te kaminda nos sirkunstansianan ta permití. No lubidá nunka ku un simpel akto di bondat òf un par di palabra di konsuelo papiá di kurason por ta ekspreshonnan impaktante di kompashon.—Kolosensenan 3:12.

14. Dikon Hesus a duna prioridat na e trabou di prediká e bon nobo?

¹⁴ Manera nos a mira den Sekshon 2 di e buki aki, Hesus tabata un ehèmpel sobresaliente den e trabou di prediká e bon nobo. El a bisa: “Mi mester prediká e reino di Dios na e otro statnan tambe, pasobra ta pa e propósito aki mi a wòrdu mandá.” (Lukas 4:43) Dikon el a duna prioridat na e trabou aki? Prinsipalmente debí na su amor pa Dios. Pero Hesus tabatin un motibu mas: Kompashon sinsero a motiv’é pa reakshoná riba e nesesidat spiritual di otro hende. Di tur e maneranan ku el a demostrá kompashon, ningun no tabata mas importante ku satisfasé e hamber spiritual di hende. Laga nos analisá dos insidente ku ta revelá kon Hesus a mira e hendenan na ken el a prediká. E konsiderashon aki por yuda nos analisá nos propio motibunan pa partisipá den e ministerio públiko.

15, 16. Deskribí dos insidente ku ta revelá kon Hesus a mira e hendenan ku el a prediká na dje.

¹⁵ Na aña 31, ora Hesus tabatin mas o ménos dos aña trahando duru den e ministerio, el a oumentá su esfuerso pa “pasa den tur e statnan i pueblitonan” di Galilea. Loke el a mira a konmové su kurason. Apòstel Mateo a informá: “Ora ku el a mira e multitutnan, el a sinti kompashon pa nan, pasobra nan tabata kansá i plamá, manera karné sin wardadó.” (Mateo 9:35, 36) Hesus a sinti pa e pueblo komun. E tabata bon konsiente di e kondishon spiritual deplorabel ku nan tabata aden. E tabata sa ku e lidernan religioso—nèt esnan ku lo mester a pastoriá nan—a maltratá nan i neglishá nan sin miserikòrdia. Motivá pa kompashon profundo, Hesus a traha duru pa hiba e mensahe di speransa na e hendenan. Loke mas nan tabatin mester ta e bon notisia di e Reino di Dios.

¹⁶ Algu similar a pasa vários luna despues, serka di e tempu di Pasku Hudiu na aña 32. Na e okashon ei, Hesus ku su apòstelnan a subi un boto i a krusa Laman di Galilea pa bai na e otro banda pa nan por a haña un lugá ketu pa sosegá. Pero un multitut di hende a kore a lo largu di kosta i a yega na e otro banda promé ku e boto. Kon Hesus a reakshoná? “Ora Hesus a baha for di boto, el a mira un multitut grandi, i el a sinti kompashon pa nan, pasobra nan tabata manera karné sin wardadó; i el a kuminsá siña nan hopi kos.” (Marko 6:31-34) Un biaha mas, Hesus a “sinti kompashon” di e pueblo debí na nan kondishon spiritual deplorabel. Meskos ku “karné sin wardadó,” nan tabata spiritualmente hambrá i lagá pa nan kuenta pa perkurá pa nan mes. Kompashon ta loke a motivá Hesus pa prediká i no simplemente un sentido di deber.

17, 18. (a) Kiko ta motivá nos pa partisipá den e ministerio? (b) Kon nos por kultivá kompashon pa otro hende?

¹⁷ Kiko ta motivá nos komo siguidó di Hesus pa partisipá den e ministerio? Manera nos a mira den Kapítulo 9 di e buki aki, nos tin un enkargo, un responsabilidat, pa bai prediká i hasi disipel. (Mateo 28:19, 20; 1 Korintionan 9:16) Pero nos motivashon pa partisipá den e trabou aki mester ta mas ku simplemente un sentido di deber òf obligashon. Mas ku tur kos ta amor pa Yehova ta motivá nos pa prediká e bon nobo di su Reino. Ademas, kompashon pa hende ku no ta kompartí nos kreensianan tambe ta motivá nos pa prediká. (Marko 12:28-31) Pues, kon nos por kultivá kompashon pa hende?

¹⁸ Nos tin ku mira hende manera Hesus a mira nan, esta, “kansá i plamá, manera karné sin wardadó.” Imaginá si bo haña un lamchi ku ta kompletamente pèrdí. E pober kriatura tin hopi hamber i set ya ku e no tabatin un wardadó pa hib’é kaminda tin yerba bèrdè i awa. Lo bo no sinti pa e lamchi ei? Lo bo no hasi bo bèst pa dun’é algu di kome i di bebe? E lamchi ei ta manera hopi hende ku ainda no konosé e bon nobo. Neglishá pa wardadónan religioso falsu, nan tin hopi hamber i set spiritual i nan no tin un berdadero speransa pa futuro. Nos tin loke nan mester, esta, e alimento spiritual nutritivo i awa refreskante di e bèrdat ku e Palabra di Dios ta kontené. (Isaias 55:1, 2) Ora nos reflekshoná riba e nesesidat spiritual di e hendenan rònt di nos, nos ta sinti pa nan. Si nos ta sinti profundamente pa hende, meskos ku Hesus a sinti, nos lo hasi tur loke nos por pa kompartí e speransa di Reino ku nan.

19. Kiko nos lo por hasi pa yuda motivá un studiante di Beibel ku ta kualifiká pa partisipá den e ministerio públiko?

¹⁹ Kon nos por yuda otro hende sigui e ehèmpel di Hesus? Suponé ku nos ke animá un studiante di Beibel ku ta kualifiká, p’e kuminsá partisipá den e trabou di prediká públikamente. Òf kisas nos ke yuda un persona inaktivo pa partisipá plenamente den e ministerio atrobe. Kon nos por yuda nan? Nos tin ku motivá nan kurason. Kòrda ku na promé lugá Hesus a “sinti kompashon” pa hende, anto kaba el a siña nan. (Marko 6:34) Pues si nos por yuda nan kultivá kompashon, nan kurason muy probablemente lo motivá nan pa ta manera Hesus i kompartí e bon nobo ku otro hende. Nos lo por puntra nan: “Kon e echo ku bo a aseptá e mensahe di Reino a mehorá bo bida? Kiko di e hendenan ku ainda no konosé e mensahe aki? Akaso nan tambe no tin mester di e bon nobo? Kiko abo por hasi pa yuda nan?” Klaru ku e motivashon di mas fuerte pa partisipá den e ministerio ta amor pa Dios i e deseo di sirbié.

20. (a) Kiko ser un siguidó di Hesus ta enserá? (b) Kiko nos lo konsiderá den e siguiente kapítulo?

²⁰ Ser un siguidó di Hesus ta enserá mas ku simplemente ripití su palabranan i kopia su echonan. Nos tin ku kultivá e mesun “aktitut” mental ku e tabatin. (Filipensenan 2:5) Nos por ta masha gradisidu anto ku Beibel ta revelá na nos e pensamentu- i sintimentunan ku tabatin tras di tur loke Hesus a bisa i hasi! Si nos familiarisá nos mes ku “e mente di Kristu,” nos lo ta mihó prepará pa kultivá komprenshon i kompashon sinsero i asina trata otro hende manera Hesus a trata hende en general. (1 Korintionan 2:16) Den e siguiente kapítulo nos lo konsiderá e vários maneranan ku Hesus a demostrá amor spesialmente na su siguidónan.