Alegrá ora un Pekadó Arepentí

Na vários okashon, durante su sirbishi aki riba tera, Hesus a enfatisá e importansia di humildat. (Lukas 14:8-11) E tabata ansioso pa haña tantu hende hòmber komo hende muhé humilde ku tabata ke sirbi Dios. Algun di e hendenan akí kisas ainda tabata bon konosí komo praktikadó di piká.

E fariseonan i e eskribanan tabata mira ku e personanan akí—hende ku nan tabata konsiderá indigno—tabata mustra interes den Hesus i su mensahe. P’esei nan tabata murmurá i bisa: “E hòmber akí ta risibí pekadó amablemente i ta kome huntu ku nan.” (Lukas 15:2) E eskribanan i e fariseonan tabata sinti ku nan tabata superior i tabata trata hende komun i koriente manera tera ku tabatin bou di nan pia. Pa demostrá e despresio ku nan tabatin pa e hendenan akí, nan tabata usa e ekspreshon hebreo “amhárets,” “hende di tera,” pa referí na e personanan akí.

Pero Hesus sí no tabata hasi asina; e tabata trata hende ku dignidat, bondat i kompashon. P’esei, hopi hende humilde, inkluso algun ku tabata konosí komo hasidó di maldat, tabata ansioso pa skuch’é. Awor, kon Hesus tabata sintié debí na e krítikanan ku e tabata haña pasobra e tabata yuda hende humilde? Kon el a reakshoná?

Wèl, nos ta haña kontesta pa e preguntanan ei den un ilustrashon konmovedor ku Hesus a konta, un ilustrashon similar na esun ku el a konta na Kapernaum. (Mateo 18:12-14) Den su ilustrashon, Hesus a hasi komo si fuera e fariseonan tabata hende hustu ku tabata protehá den e kurá di Dios. I e pueblo tabata manera hende ku a sali for di e kurá i ku tabata pèrdí.

Hesus a bisa: “Kua di boso ku tin 100 karné, i e pèrdè un di nan, lo no laga e sobrá 99 den mondi i bai buska esun pèrdí te ora e hañ’é? Anto ora e hañ’é, e ta pon’é riba su skouder i ta keda masha kontentu. I ora e yega kas, e ta manda yama su amigu- i bisiñanan i bisa nan: ‘Alegrá huntu ku mi, pasobra mi a haña mi karné ku tabata pèrdí.’”—Lukas 15:4-6.

Anto Hesus a apliká su ilustrashon, bisando: “Mi ta bisa boso ku asina tambe lo tin mas goso den shelu pa ún pekadó ku arepentí ku pa 99 hustu ku no tin nodi di arepentí.”—Lukas 15:7.

E echo ku Hesus a papia di arepentimentu lo mester a sorprendé e fariseonan. Dikon? Pasobra nan tabata pensa ku nan ta hustu i ku nan no tabatin motibu pa arepentí. Un par di aña promé, algun di nan a kritiká Hesus debí ku e tabata kome ku kobradó di belasting i pekadó. Hesus a bisa nan: “Mi no a bini pa yama hende hustu, sino pekadó.” (Marko 2:15-17) Komo ku e fariseonan tabata hustu den nan mes bista, nan no a sinti ku nan tabatin ku arepentí. Pues, no tabatin goso den shelu pa nan motibu. Di otro banda, pekadónan sinsero ku a arepentí sí a kousa goso den shelu.

Pa hasi su punto mas kla, esta, ku lo tin goso den shelu ora un pekadó arepentí i bolbe serka Dios, Hesus a konta un otro ilustrashon. Den esaki el a papia di un kas di famia i a bisa: “Kua muhé ku tin dies moneda di drakma, si e pèrdè un di nan, no ta sende un lampi, bari su kas i buska bon te ora e hañ’é? Anto ora e hañ’é, e ta manda yama su amigu- i bisiñanan i bisa nan: ‘Alegrá huntu ku mi, pasobra mi a haña e moneda di drakma ku mi a pèrdè.’”—Lukas 15:8, 9.

E aplikashon ku Hesus a duna pa e ilustrashon akí ta similar na esun di e karné pèrdí. El a bisa: “Asina tambe, mi ta bisa boso, lo tin goso entre e angelnan di Dios pa ún pekadó ku arepentí.”—Lukas 15:10.

Imaginá bo! E angelnan di Dios ta keda masha kontentu ora un pekadó arepentí i bolbe serka Dios. Esei ta spesialmente remarkabel pasobra si e pekadó ei bini na remarke pa haña e privilegio di forma parti di Dios su Reino selestial, e ta haña un posishon mas haltu ku e angelnan! (1 Korintionan 6:2, 3) No opstante, e angelnan no ta yalurs. Mirando esaki, kon nos mester sinti ora un pekadó arepentí i bolbe serka Dios?