LÈS 11
Kon Bo Por Saka Máksimo Benefisio for di Bo Lesamentu di Beibel?
Bo a yega di haña bo ku un proyekto grandi pa hasi? Kisas bo a sinti ku e proyekto ta muchu difísil i bo a pensa dos tres biaha promé ku bo a kuminsá kuné. Awor, pa e proyekto por parse mas fásil, bo a disidí di hasié tiki tiki. Kisas bo ta haña ku lesamentu di Beibel ta un proyekto grandi. Kisas bo ta puntra bo mes: ‘Unda mi kuminsá?’ Den e lès akí, nos lo trata algun punto ku por yuda bo disfrutá di bo lesamentu di Beibel i di bo kurso di Beibel.
1. Dikon nos mester lesa Beibel regularmente?
Un persona ku ta lesa Beibel òf Lei di Yehova regularmente lo ta felis i eksitoso. (Lesa Salmo 1:1-3.) Pa bo por kuminsá ku bo lesamentu di Beibel, purba di lesa Beibel djis pa un par di minüt tur dia. Mas bo lesa Beibel, mas gana bo ta haña di sigui les’é.
2. Kiko bo por hasi pa benefisiá mas di bo lesamentu di Beibel?
Pa bo por saka máksimo benefisio for di bo lesamentu di Beibel, bo mester stòp un ratu durante bo lesamentu i pensa riba loke bo ta lesando. Pues, nos meta mester ta pa lesa Beibel i meditá riba loke nos ta lesa. (Hosue 1:8) Segun ku bo ta lesa, hasi bo mes pregunta manera: ‘Kiko esaki ta siña mi tokante Yehova Dios? Kon mi por usa loke mi a kaba di siña den mi bida? Kon mi por usa e tekstonan akí pa yuda otro hende?’
3. Na ki momento di dia ta mas fásil pa bo lesa Beibel?
Bo ta sinti ku ta difísil pa bo traha tempu pa lesa Beibel? No ta abo so ta sinti asina. Beibel ta animá nos pa usa nos “tempu di e mihó manera.” (Efesionan 5:16) Pa hasi esei, skohe un ora spesífiko pa lesa Beibel tur dia. Por ehèmpel, tin hende ta apartá tempu pa lesa Beibel mainta trempan. Otro hende ta lesa Beibel mèrdia, kisas durante nan pousa. Anto algun otro hende ta lesa Beibel anochi promé ku nan bai drumi. Ki ora lo ta e mihó momento pa abo lesa Beibel?
KIKO MAS NOS POR SIÑA?
Laga nos wak kon bo por hasi bo lesamentu di Beibel mas interesante. Ademas, wak kon bo por prepará e lèsnan di bo kurso di Beibel pa asina bo saka máksimo benefisio for di nan.
Kisas ántes nos no tabata gusta un tipo di kuminda, pero ku tempu nos a kuminsá gust’é. Asina tambe nos por kuminsá disfrutá di nos lesamentu di Beibel
4. Kiko bo por hasi pa disfrutá di bo lesamentu di Beibel?
Kisas no ta fásil pa bo kuminsá lesa Beibel. Sinembargo, meskos ku bo por kuminsá gusta un kuminda ku nunka bo a yega di purba promé, asina bo por kuminsá gusta lesa Beibel òf “krea un anhelo” pa les’é. Lesa 1 Pedro 2:2. Despues, analisá e siguiente pregunta:
Si bo lesa Beibel tur dia, bo ta kere ku lo bo disfrutá di dje i haña gana di sigui les’é?
Pasa e VIDIO pa wak kon algun hende a kuminsá disfrutá di nan lesamentu di Beibel. Despues, analisá e siguiente preguntanan:
Ki opstákulo e hóbennan den e vidio mester a vense?
Kiko a yuda nan pa sigui lesa Beibel regularmente?
Kon e hóbennan a hasi nan lesamentu di Beibel mas interesante?
Sugerensia pa yuda bo kuminsá lesa Beibel:
Skohe un tradukshon di Beibel ku ta konfiabel i fásil pa lesa. Ora di skohe un tradukshon di Beibel, bo por usa Tradukshon di Mundu Nobo ku ta en parte disponibel na papiamentu. Ademas, Tradukshon di Mundu Nobo kompleto ta disponibel na spañó i na mas idioma.
Bo por kuminsá lesa un parti di Beibel ku ta parse bo mas interesante. Pa bo por haña un idea kiko bo por kuminsá lesa, wak e kuadro “Kuminsá Lesa Beibel.”
Marka loke bo a lesa kaba. Usa e programa “Mi Lesamentu di Beibel” den e publikashon akí pa marka loke bo a lesa.
Usa JW Library® app. Bo por usa e app akí pa lesa i skucha Beibel na vários idioma riba bo telefòn òf tablet na unda ku bo ta.
Usa e foyeto Yudansa pa Studia e Palabra di Dios. Den e foyeto akí, bo por haña mapa i tabèl ku lo yuda bo hasi bo lesamentu di Beibel mas interesante.
5. Prepará pa bo kurso di Beibel
Lesa Salmo 119:34. Despues, analisá e siguiente pregunta:
Dikon ta importante pa bo hasi orashon promé ku bo lesa Beibel òf promé ku bo prepará pa bo kurso di Beibel?
Pa saka máksimo benefisio for di bo kurso di Beibel, kiko bo mester hasi promé ku kada lès? Ata algun sugerensia pa yuda bo prepará pa e lèsnan:
Lesa e promé parti di kada lès.
Buska tur teksto den Beibel i lesa nan. Purba di komprondé kon e tekstonan ta relashoná ku e informashon.
Marka e palabra- òf frasenan prinsipal ku ta kontestá kada pregunta. Esei lo yuda bo ora di analisá e lèsnan huntu ku e persona ku ta studia bo.
Bo tabata sa?
Atraves di aña, Testigunan di Yehova a usa vários tradukshon di Beibel. Pero nos ta gusta usa Tradukshon di Mundu Nobo di e Santu Skritura pasobra e ta un tradukshon eksakto, fásil pa komprondé i e tin e nòmber di Dios den dje.—Wak e artíkulo “Testigunan di Yehova Tin Nan Mes Beibel?” riba jw.org.
LOKE HENDE SA BISA: “Bo mester hasi hopi esfuerso pa lesa i studia Beibel, i mi no tin tempu ni energia pa hasi esei.”
Kiko abo mes ta pensa?
RESÚMEN
Pa bo saka máksimo benefisio for di loke Beibel ta siña, traha tempu pa lesa Beibel, pidi Yehova yuda bo komprondé loke bo ta lesa i prepará e lèsnan di bo kurso di Beibel.
Repaso
Kiko lo yuda bo saka máksimo benefisio for di Beibel?
Ki ora abo por lesa Beibel i hasi estudio personal?
Dikon ta bon pa bo prepará pa bo kurso di Beibel?
MAS INFORMASHON INTERESANTE
Wak algun sugerensia ku por yuda bo saka máksimo benefisio for di bo lesamentu di Beibel.
“Kon Bo Por Benefisiá Mas di Bo Lesamentu di Beibel?” (E Toren di Vigilansia Num. 1 2017)
Wak tres manera ku bo por lesa Beibel.
“Kon Beibel Por Yuda Mi?—Parti 1: Siña Konosé Bo Beibel” (artíkulo riba jw.org)
Wak kiko por yuda bo disfrutá di bo lesamentu di Beibel.
Wak ki sugerensia algun hende ku tin hopi tempu ta lesa Beibel ta duna tokante kon pa studia Beibel.