LÈS 14
Kon Nos Por Adorá Dios na un Manera Ku Ta Agrad’é?
Manera e lès anterior a splika, no ta tur religion ta agradá Dios. Sinembargo, nos por adorá nos Kreador na un manera ku ta agrad’é. Ki “forma di adorashon [òf, religion]” ta agradá Dios? (Santiago 1:27) Laga nos wak kon Beibel ta kontestá e pregunta ei.
1. Kon nos por sa kon Dios ke pa nos ador’é?
Nos por haña sa esei den Beibel. Hesus a bisa Dios: “Bo palabra ta e bèrdat.” (Huan 17:17) Algun religion ta pasa por haltu di e bèrdatnan ku tin den e Palabra inspirá di Dios, Beibel. Nan ta remplasá e siñansanan ku tin den Beibel ku siñansa i tradishon di hende. Pero, Yehova no ta niun tiki kontentu ku nan a ‘pone su mandamentunan un banda.’ (Lesa Marko 7:9.) Di otro banda, Dios ta keda kontentu ora nos ta ador’é manera Beibel ta bisa i ta sigui e konsehonan ku tin den Beibel.
2. Kon nos mester adorá Yehova?
Komo ku Yehova ta nos Kreador, nos mester dun’é nos deboshon eksklusivo. (Revelashon 4:11) Esaki ta enserá ku nos mester stima i adorá é so, sin usa ídolo òf imágen den nos adorashon.—Lesa Isaías 42:8.
Nos adorashon mester ta limpi i agradabel òf, aseptabel, den bista di Yehova. (Romanonan 12:1) Esaki ta enserá ku nos mester obedesé su leinan. Por ehèmpel, hende ku ta stima Yehova ta balorá i ta obedesé su leinan tokante matrimonio. Ademas, nan ta evitá tur loke por hasi nan mes òf otro hende daño, manera uso di tabako òf droga i mal uso di alkohòl.a
3. Dikon nos mester adorá Yehova huntu ku otro sirbidó di Yehova?
Nos reunionnan semanal ta duna nos oportunidat pa “alabá Yehova . . . den kongregashon.” (Salmo 111:1, 2) Un manera ku nos ta adorá Dios huntu ta di kanta kantika di alabansa na dje. (Lesa Salmo 104:33.) Yehova ke pa nos reuní huntu pasobra e ta stima nos i pasobra e sa ku e reunionnan lo yuda nos disfrutá di bida pa semper. Na nos reunionnan, nos ta haña oportunidat pa animá otro.
KIKO MAS NOS POR SIÑA?
Laga nos wak dikon Yehova no ke pa nos usa imágen den nos adorashon. Ademas, wak den ki manera importante nos por alabá Dios.
4. Nos no mester usa imágen den nos adorashon
Kon nos por sa ku Dios no ta keda kontentu ora nos ta usa imágen pa ador’é? Pasa e VIDIO. Despues, analisá e siguiente pregunta:
Kiko a sosodé ora algun hende di e pueblo di Dios di antigwedat kier a ador’é usando un imágen?
Algun hende ta usa imágen ora nan ta adorá Dios, pasobra asina nan ta sinti ku nan ta mas serka Dios. Pero bo ta kere ku hasiendo esei lo hala bo mas serka dje òf mas leu di dje? Lesa Éksodo 20:4-6 i Salmo 106:35, 36. Despues, analisá e siguiente preguntanan:
Kiko hende sa usa pa adorá Dios?
Kiko Yehova ta pensa tokante uso di imágen?
Kiko abo ta pensa tokante uso di imágen?
5. Ora nos ta adorá Yehova so, nos lo ta liber di siñansa falsu
Wak kon nos por ta liber di siñansa falsu ora nos ta adorá Yehova na e manera ku ta agrad’é. Pasa e VIDIO.
Lesa Salmo 91:14. Despues, analisá e siguiente pregunta:
Kiko Yehova a primintí ku lo e hasi pa nos ora nos ta stim’é i ta adorá é so?
6. Nos ta adorá Yehova na nos reunionnan
Ora nos ta kanta i ta duna komentario na reunion, nos ta alabá Yehova i ta animá tur hende presente. Lesa Salmo 22:22. Despues, analisá e siguiente preguntanan:
Bo ta gusta tende komentario na reunion?
Abo tambe ke prepará un komentario pa bo duna na reunion?
7. Yehova ta keda kontentu ora nos ta konta otro hende loke nos ta siña
Bo por kuminsá konta otro hende loke bo ta siñando for di Beibel for di awor. Lesa Salmo 9:1 i 34:1. Despues, analisá e siguiente pregunta:
Kiko bo a siña for di Beibel ku bo tin gana di konta otro hende?
LOKE HENDE SA BISA: “Tur hende por skohe pa nan mes kon nan ta adorá Dios.”
Kiko bo ta pensa?
RESÚMEN
Nos ta hasi nos Kreador Yehova kontentu ora nos ta adorá é so, ta alab’é na nos reunionnan i ta konta otro hende loke nos ta siñando for di Beibel.
Repaso
Kon nos por haña sa kon Dios ke pa nos ador’é?
Dikon nos tin ku adorá Yehova so?
Dikon nos tin ku adorá Yehova huntu ku otro sirbidó di dje?
MAS INFORMASHON INTERESANTE
Lesa e relato “Mi No Ta Adorá Imágen Mas” pa wak kon un señora a libra su mes di adorashon falsu.
“Beibel Ta Kambia Bida di Hende” (E Toren di Vigilansia di 1 di yüli 2011, na spañó)
Wak kiko por yuda bo duna komentario na e reunionnan.
“Alabá Yehova den Kongregashon” (E Toren di Vigilansia di yanüari 2019)
Wak kon un hòmber a benefisiá mashá di e reunionnan aunke no tabata fásil pa e bai.
Hopi hende ta pensa ku krus ta representá kristianismo. Pero nos mester usa krus ora di adorá Dios?
“Pakiko Testigunan di Yehova No Ta Usa Krus den Nan Adorashon?” (artíkulo riba jw.org)
a Nos lo trata e tópikonan akí mas despues den otro lès.