Hope conquers despair!

Speranza ta vence desesperacion!

DEN e diccionario Webster’s Ninth New Collegiate Dictionary, desesperacion ta ser splicá como “perdimento total di speranza.” Claramente, anto, nos tin mester di speranza pa vence desesperacion!

Hende desafortuná cu ta keda obligá di biba riba caya no ta desesperá totalmente si nan tin speranza. Speranza asta por duna hende cu ta sufri di tormento di depresion mental e ánimo i forza pa wanta. Pero, tal speranza mester ta confiabel! Kico esei kier men?

E Base pa Speranza

Considera loke a pasa Sara, esposa di patriarca Abraham. Cumpliendo cu 90 aña di edad, e tabata sin yiu ainda i pa mashá tempo a desesperá di hamás produci yiu. Sin embargo, ora su casá tabatin 99 aña di edad, Jehova a repiti e promesa cu el a duna hopi aña promé—Abraham en berdad lo haya un “simía,” of heredero. Abraham tabata sa cu esei tabata un promesa confiabel. Imaginábo ki feliz Sara mester a keda ora, milagrosamente, tal suceso feliz a yega, i el a duna luz na Isaac! (Génesis 12:2, 3; 17:1-4, 19; 21:2) Abraham no a pone confianza den Dios por nada, manera apóstol Pablo a splica: “Debí ne promesa di Dios, [Abraham] no a vacila den un falta di fe, sino a bira poderoso mediante su fe, dunando gloria na Dios.”—Romano 4:20.

Skirbiendo na hudío cu a bira cristian den su dia, Pablo a razona cu nan por confia e promesa di salbacion di Dios mediante Jesús pa dos motibo sólido. Mencionando e promesa di Dios na Abraham i su huramento divino pa apoyé, e apóstol a debati: “Hende ta hura pa esun mayor, i nan huramento ta e fin di tur discusion, pasobra esei ta un garantía legal pa nan. Dje manera ei Dios, ora e tabatin e propósito di demonstra mas abundantemente na heredero dje promesa e incambiabilidad di su conseho, a drenta cu un huramento, pe, mediante dos cos incambiabel den locual ta imposibel pa Dios gaña, nos cu a hui ne refugio por tene un estímulo fuerte pa haya gara dje speranza poní dilanti nos.” (Hebreo 6:16-18) Sí, promesa di Dios ta berdadero i confiabel. Jehova Dios ta todopoderoso i e so por garantiza cumplimento di su mes palabra.

Speranza—“Tanto Sigur Como Firme”

Pablo a skirbi cu e speranza cristian ta “tanto sigur como firme.” (Hebreo 6:19) Pablo a conoce e raíz di su speranza. El a splica: “[Tal speranza] ta drenta padén dje cortina.” Kico esei kier men? Pablo tabata referi claramente ne tempel di Jerusalem di antigua. Den dje tabatin un Lugar Santísimo, cu un cortina a separá for di otro parti dje edificio. (Éxodo 26:31, 33; Mateo 27:51) Naturalmente, e tempel mes den Jerusalem a wordu destruí for di mashá tempo. Pues, awe, e Lugar Santísimo ta corresponde cu kico?

Cu cielo mes, unda Dios mes ta ser entronizá! Pablo a splica esei ora el a bisa cu Jesús, despues di su subimento na cielo “a drenta, no den un lugar santo cu man a traha [den e tempel den Jerusalem], cu ta un copia dje realidad, sino den cielo mes, awor pa presenta dilanti dje persona di Dios pa nos.” (Hebreo 9:24) Pues, e speranza cristian, cu ta yúdanos lucha contra desesperacion, ta depende no di político humano sino di un arreglo celestial. E ta depende di Esun cu Dios a nombra, esta, Jesucristo, cu a duna su bida como rescate pa nos picánan i cu awor ta presenta dilanti Dios na nos fabor. (1 Juan 2:1, 2) Además, segun cu e revista aki a mustra hopi bez, e mesun Jesús ta esun nombrá divinamente pa reina como Rey dje Reino celestial di Dios i ta haci esei desde 1914. E Reino celestial lo kita pronto loke ta hiba tanto hende na desesperacion.

Speranza—“Un Hanker pe Alma”

Pa convence lector cu nan speranza di salbacion mediante Jesús ta bon fundá, Pablo a usa un comparacion. El a splica cu “nos tin tal speranza como hanker pe alma.”—Hebreo 6:19.

Biahero manera Pablo a conoce hanker bon. Hanker di antigua tabata casi mescos cu hanker djawe, trahá hopi bez di heru cu dos punta manera djente pa gara fondo di lamá. Cu rumbo Roma rond di aña 58 EC, e barcu di Pablo tabata den peliger di pega. Pero, segun cu e barcu a drenta den awa mas secu, matrós “a tira cuater hanker for djatrás.” Gracias na tal hanker, e barcu den siguridad a wanta e tempestad.—Echo 27:29, 39, 40, 44.

Kico, anto, bo mester haci pa segura bo speranza tanto firme como hanker di manera cu bo por wanta dificultad económico, enfermedad fisical of emocional, of cualkier otro “tempestad” cu por pasábo? Primeramente, haci sigur cu promesa di Bijbel ta digno di confianza. “Haci sigur di tur cos.” (1 Tesalonicense 5:21) Por ehempel, e sigiente bez cu Testigo di Jehova ta papia cu bo, scucha loke nan ta bisa. Si nan no ta pasa hopi bez unda bo ta biba, búscanan den Salón di Reino mas cerca bo. Nan lo no obligábo di bira Testigo di Jehova, sino lo invitábo pa acepta un curso gratis di estudio bíblico, cu nan lo conduci na cua lugar i na cua tempo cu ta conbiníbo.

Tal estudio ta dunábo e siguranza di cu Dios ta “bira recompensador di hende cu ta busqué encarecidamente.” (Hebreo 11:6) Bo por siña cu pronto e Reino di Dios bao dje Rey, Cristo Jesús, lo kita corrupcion i desigualdad cu ta haci tanto hende desesperá awe. Bao dje Reino, e tera lo ser restorá na un paradijs, i Dios lo duna bida eterna na hende cu ta stimé. (Salmo 37:29; Revelacion 21:4) Ki un speranza glorioso!

Leza e Bijbel cu sumo atencion pa mira cu tal speranza ta berdadero. Anto traha pa desaroya un relacion personal estrecho cu Dios, birando amigo di dje mescos cu Abraham. (Santiago 2:23) Siendo cu Jehova Dios ta “Scuchador di oracion,” bisé tur bo preocupacion. Ora bo acudimento ta sincero, bo oracion por kita bo carga pisá i vence bo desesperacion. E spiritu di Dios asta por habri camina pa cambia e situacion cu ta afligíbo.—Salmo 55:22; 65:2; 1 Juan 5:14, 15.

“Mantene un Gara Firme”!

Despues di a recomenda pa otro disípelnan “haci sigur di tur cos,” Pablo a agrega: “Tene firmemente gará loke ta excelente.” (1 Tesalonicense 5:21) Un manera pa haci esei ta di asocia cu hende cu també ta tene firmemente gará e speranza cristian. E rey sabí Salomón a adverti: “Ken cu ta anda cu hende sabí lo bira sabí, pero ken cu tin tratamento cu hende estúpido lo pasa malu.” (Proverbio 13:20) No laga prehuicio of sintimento di bochorno strobábo di busca bon asociacion. Por ehempel, tin hende den Testigo di Jehova cu den pasado tabata sin speranza. Pero, nan estudio di Bijbel, hunto cu asociacion feliz cu otro hende creyente, ta fortalece nan relacion cu Jehova Dios i ta dúnanan un speranza confiabel manera hanker. Esei realmente ta vence desesperacion? Di tur manera.

Considera e caso di Anamaría, cu tabata hibá te na desesperacion pasobra el a sufri di tratamento brutal di su esposo. El a splica: “Mi a decidi di termina mi bida pero pa un motibo mi a decidi di haci oracion na Dios promé.” Mi ta corda cu mi a pidi, ‘Pakico bo no por yudámi? Mi a spera pa tanto tempo den bo, pero por nada.’ Mi a conclui mi oracion pensando cu bida no tin propósito, p’sei mi por wel ta morto. Ne momento ei tabatin batimento na porta. Mi a decidi di ignoré, sperando cu ken cu tabatei lo bai despues.

“E batimento a persisti, i mi a bira molestiá. Mi a seca mi lágrima i a bai pa mira ken tabata ne porta, sperando pa libra mi mes lihé di manera cu mi por cumpli cu mi intencion.” Pero, segun Anamaría, “gracias na Jehova Dios e no a sosode asina, pasobra ora mi a habri e porta, mi a haya dos señora hoven pará ei. Ta cierto cu mi a keda mashá confundí, i mi realmente no a comprende loke nan tabata bisa. Pero, nan a ofrecémi un buki cu por splica cu bida sí tin un propósito. Esei tabata net loke mi a falta pa rebiba mi interés den bida.” Su bishitante a haci arreglo pa un estudio bíblico regularmente cuné. Anamaría a siña bira un amiga di Dios. Esei, en buelta, a duné un propósito den bida. Awor e ta yuda otro hende desaroya confianza den Dios.

Kizás bo a spera pe fin di desesperacion sin comprende tur loke esei ta enbolbe. Pero, si na un tempo bo a pidi: “Laga bo reino bini. Laga bo boluntad ser cumplí, como den cielo, també riba tera,” anto bo a pidi binimento dje Reino di Dios bao di Jesucristo, locual lo caba cu tur loke ta hiba hende di curazón recto na desesperacion. (Mateo 6:10) Bo estudio personal di Bijbel i bo asociacion regularmente cu otro hende cu tin e mesun confianza por haci bo gara mas fuerte riba e speranza pe Reino di Jehova bini i trece Paradijs pe tera. (1 Timoteo 6:12, 19) Esei ta e speranza glorioso cu e revista aki ta anuncia den tur número. Acepta tal speranza cu tur bo curazón pa lucha contra desesperacion. Berdaderamente, speranza “no ta resulta den desilusion.”—Romano 5:5.

[Plachi na página 7]

Estudio di Bijbel ta dúnanos un speranza cu ta sirbi como “hanker di alma”