E Mesias—Un Berdadero Speranza?

El a yama su mes Moisés; pero su berdadero nomber ta perdí den pasado. Den siglo 5 EC, el a pasa den tur e isla di Creta convenciendo hudío cu e tabata e mesías cu nan a spera. El a bísanan cu pronto nan opresion, destierro i esclabitud lo termina. Nan a keré. Ora nan dia di liberacion a yega, hudío a sigi “Moisés” te na un barranca halto cant’i Lamá Mediterráneo. El a bísanan cu tur loke nan mester haci tabata di tira nan curpa den lamá i e awa lo separa dilanti nan. Hopi hende a obedece i a zambuya den lamá cu a nenga di separa. Un gran cantidad di hende a hoga; marinero i piscador a salba algun. Pero, nan no por a haya Moisés na ningun parti. E mesías ei a desparece.

KICO ta un mesías? Bo por pensa di palabra manera “salbador,” “rescatador,” i “lider.” Hopi hende ta kere cu un mesías ta un persona cu ta inspira speranza i debocion den sigidor di dje cu e promesa di líbranan for di opresion i dúnanan libertad. Siendo cu e pasado di humanidad ta principalmente un historia di opresion, no ta un sorpresa cu através dje ­siglonan a presenta hopi mesías asina. (Compara cu Eclesiastés 8:9.) Pero, mescos cu e supuesto Moisés di Creta, tal mesías a hiba nan sigidor mas tanto na desilusion i desaster en bez di na liberacion.

“Esaki ta Rey Mesías!” Asina e prestigioso rabí Akiba Ben-Josef a saluda Simón Barcoquebas na aña 132 EC. Barcoquebas tabata un homber fuerte cu tabata comandante di un poderoso ehército. Hopi hudío a kere cu por fin a yega e homber cu lo pone fin na nan opresion pa hopi tempo bao di mando dje Poder Mundial Romano. Barcoquebas a fracasá; cientos di miles di paisano di dje a paga pe fracaso cu nan bida.

Den siglo 12, un otro mesías hudío a presenta, awor den Yemen. Ora e califa, of gobernante, a pidi un siñal como prueba di cu e tabata mesías, el a sugeri pe califa cap su cabez i laga su resureccion pronto sirbi como señal. E califa a acepta e plan—i esei tabata e fin dje mesías di Yemen. Den e mesun siglo, un homber yamá David Alroy a bisa hudío den e Medio Oriente pa prepara pa sigié riba hala di angel pa bolbe ne Tera Santo. Hopi hende a kere cu e tabata mesías. Hudío di Bagdad a spera cu pacenshi riba dak di nan cas, felizmente ignorando ladrón cu a horta nan pertenencia.

Sabatai Zebí a presenta den Smirna den siglo 17. El a proclama na hudío den tur Europa cu e tabata mesías. Hende cristian, també, a scuché. Zebí a ofrece sigidor di dje liberacion—aparentemente door di permitínan practica picá libremente. Sigidor mas deboto di dje a corre paranda, den estado desnudo, a practica fornicacion, i incesto, anto a castiga nan curpa cu carbachi, a lora abao desnudo den sneu, i a dera nan curpa di pia te na nan nek den e tera friu. Ora Zebí a bai Turkía, nan a cogé i a bisé cu e mester conberti na islam of muri. El a conberti i hopi sigidor di dje a keda pasmá. No obstante, pe sigiente dos siglo, algun hende a sigi yama Zebí mesías.

Cristiandad també a produci su porcion di mesías. Den siglo 12, un homber yamá Tanquelino a forma un ehército di sigidor i a domina e stad di Antwerp. E mesías ei a yama su mes dios; i asta a bende e awa di su baño pa sigidor di dje bebe como sacramento! Un otro mesías “cristian” tabata Thomas Müntzer di Alemania di siglo 16. El a encabezá un rebelion contra autoridad civil local, bisando sigidor di dje cu esei tabata e bataya di Armagedón. El a primintí cu e por coge bala di cañón dje enemigo den su manga. En bez di esei, nan a mata su pueblo i a cap e cabez di Müntzer. Hopi otro mesías asina a presenta den cristiandad através dje siglonan.

Otro religion també tabatin hende mesiánico. Islam ta siñalá na Mahdí, of esun bon guiá, cu lo introduci un era di husticia. Den hinduismo algun hende a pretende di ser avatar, of encarnacion, di varios dios. I, segun The New Encyclopœdia Britannica, “asta un religion tanto opositor di mesías como budismo a origina e creencia, entre grupo mahayana, den e presentacion futuro di Buda Maitreya cu lo baha for di su habitacion celestial i hiba hende fiel na paradijs.”

Mesías di Siglo 20

Den siglo 20 aki, e necesidad pa un berdadero mesías ta mas urgente cu nunca; pues, no ta un sorpresa cu hopi hende ta usa e título. Den Congo di Africa entre 1920 i 1950, Simón Kimbangu i su sucesor Andrés “Jesús” Matswa tabata aclamá como mesías. Nan a muri, pero nan sigidor ta spera ainda pa nan bolbe i introduci un milenio africano.

A presenta den e siglo aki també hende “creyente den carga” den Nueva Guinea i Melanesia. Hende creyente ta warda barcu of avion cu un tripulacion di hende blancu manera mesías cu lo hácinan ricu i introduci un era di felicidad ora asta hende morto lo lanta.

Nacion industrializá també tabatin mesías. Algun ta lider religioso, tal como Sun Myung Moon, cu a nombra su mes como sucesor di Jesucristo i ta pretende di purifica mundo mediante un famía uní di sigidor di dje. Lider político també a purba di ocupa puesto di mesías, cu Adolf Hitler como ehempel mas horrible dje siglo aki cu su discurso grandioso dje Rijk di Mil Aña.

Di igual manera, filosofía i organizacion político a alcanza categoría mesiánico. Por ehempel, The Encyclopedia Americana ta bisa cu e teoría político di Marx i Lenín tin inclinacion mesiánico. I e organizacion di Naciones Unidas, aclamá na tur parti como e único speranza pa paz mundial, ta parce di a bira un mesías sustituto den e mente di hopi hende.

Un Berdadero Speranza?

E resumen breve aki solamente ta saca na cla cu e historia di movimento mesiánico ta principalmente un historia di gañamento, di speranza frustrá, i di ilusion mal fundá. Pues, ta apenas un sorpresa, anto, cu hopi hende djawe a bira dudoso tocante e speranza di un me­sías.

Pero, promé cu nos ta rechaza por completo e speranza mesiánico, nos mester siña primeramente di unda e ta bini. Realmente, “mesías” ta un palabra bíblico. E palabra hebreo ta ­ma·shiʹach, of “ungí.” Den tempo bíblico, tabatin bez cu rey i sacerdote tabata nombrá pa ocupá nan puesto den un ceremonia di ungimento, ora azeta fragante tabata bashá riba nan cabez. P’sei e palabra ­ma·shiʹach a aplica correctamente na nan. Tabatin homber també cu tabata ungí, of nombrá na un puesto special, sin e ceremonia di ungimento. Moisés ta ser yamá “Cristo,” of “ungí,” den Hebreo 11:24-26, pasobra Dios a scogé como su profeta i represen­tante.

Tal nificacion di mesías como “ungí” ta un distincion claro entre mesías bíblico i mesías falso cu nos a considera. Mesías bíblico no a nombra nan mes; ni un multitud di adorador no a scógenan. No, nan nombramento a bini djariba, di Jehova Dios mes.

Aunque e Bijbel ta menciona hopi mesías, e ta halza uno hopi mas halto cu e otronan. (Salmo 45:7) Tal Mesías ta e persona principal den profecía bíblica, e clave pa cumplimento di promesa bíblica mas animador. I tal Mesías realmente ta vence problema cu ta enfrentános awe.

E Salbador di Humanidad

E Mesías bíblico ta vence problema di humanidad door di bai na nan raíz. Ora nos promé mayornan, Adam i Eva, a rebela contra e Creador bao di instigacion di Satanás, un spiritu rebelde, nan realmente tabata horta ilegalmente e derecho fundamental di goberna. Nan tabata deseá di ser esnan cu ta decidi loke ta bon i loke ta malu. Asina nan a bandona e gobernacion amoroso i protector di Jehova Dios i a hinca e famía humano den e caos i miseria di autonomía, imperfeccion i morto.—Romano 5:12.

Tabata ki amoroso, anto, cu Jehova Dios a scoge tal tempo scur di historia humano pa percura pa tur humanidad un rayo di speranza. Ora Dios a leza sentencia pe rebeldenan humano, el a profetiza cu desendiente di nan lo tin un rescatador. Yamá e “simía,” e Salbador lo bini pa deshaci e daño terribel cu Satanás a haci ei den Eden; e Simía lo machica e cabez dje “colebra,” Satanás, i dale un aplastamento fatal.—Génesis 3:14, 15.

Desde tempo di antigua, hudío a mira e profecía como mesiánico. Varios tárgum, (interpretacion hudío dje Scritura Sagrado den uso común den e promé siglo) a splica cu e profecía lo ser cumplí “den e dia di Rey Mesías.”

No ta straño, anto, cu desde e principio mes, hende di fe a keda emocioná riba e promesa dje binidero Simía, of Salbador. Sí, imaginábo con Abraham a sintié ora Jehova a bisé cu e Simía lo bini den desendiente di dje, i cu “tur nacion dje tera”—no desendiente di dje so—lo “bendiciona nan mes” mediante e Simía.—Génesis 22:17, 18.

E Mesías i Gobernacion

Otro profecía despues a asocia e speranza cu e prospecto di bon gobierno. Den Génesis 49:10, Hudá, bisanieto di Abraham tabata bisá: “E bara real lo no aparta foi Hudá, ni e bara di comandante foi entre su pia, te cu Siló ta bini; i obedencia di pueblonan lo pertenece na dje.” Claramente, “Siló” mester goberna—i lo e no goberna hudío so sino “pueblonan.” (Compara cu Daniel 7:13, 14.) Hudío di antigua a identificá Siló como Mesías; realmente, algun tárgum hudío simplemente a usa e palabra “Mesías” of “rey Mesías” en bez di “Siló.”

Segun cu e luz di profecía inspirá a bira mas briyante, mas tabata revelá tocante e gobernacion dje Mesías. (Proverbio 4:18) Den 2 Samuel 7:12-16, rey David, un desendiente di Hudá, tabata bisá cu e Simía lo ser desendiente di dje. Además, e Simía lo ser un Rey extraordinario. Su trono, of gobernacion, lo permanece pa semper! Isaías 9:6, 7 ta apoya e punto: “Un yiu a nace na nos, un yiu homber tabata duná na nos; i e gobernacion di prinz [“heerschappij,” Nieuwe Vertaling] lo yega di ser riba su scouder. . . . Lo no tin fin dje abundancia dje gobernacion di prinz ni di paz, riba e trono di David i riba su reino pa establecé firmemente i sostené pa medio di derecho i pa medio di husticia, djawor padilanti i te na tempo indefinitivo. E celo mes di Jehova di ehército lo haci esei.”

Bo por imaginábo un gobierno asina? Un gobernador husto i recto cu ta establece paz i cu ta goberna pa semper. Ki diferente dje carreda lastimoso di mesías falso dje pasado! Leu di ser un lider engañoso cu a nombra su mes como mesías, e Mesías bíblico ta un gobernante mundial cu tur poder i autoridad necesario pa cambia e situacion di mundo.

Tal prospecto ta di gran importancia den nos tempo turbulento. Nunca humanidad tabatin tanto necesidad urgente di tal speranza asina. Pero, siendo cu ta mashá fácil pa kere den speranza falso, ta vital pa cada un di nos examina cuidadosamente e sigiente pregunta: Jesús di Nazaret tabata e Mesías profetizá manera tanto hende ta kere? E sigiente artículo lo considera e asunto.

[Kuadro na página 6]

Un Mesías den Brooklyn?

Recientemente tabatin den Israel poster, bordji, i luz di neón cu a proclama “Prepara pe binimento di Mesías.” Lubavitcher, un secta ultraortodoxa di hudío hasidim a lanza e campaña di publicidad cu a costa $400.000. Tin kerimento na tur parti dje grupo di 250.000 miembro di cu nan rabí venerable, Menachem Mendel Schneerson di Brooklyn, New York, ta Mesías. Pakico? Schneerson mes ta siña cu Mesías lo bini den e generacion aki. I segun e revista Newsweek, dirigente di Lubavitcher ta insisti cu e rabí di 90 aña di edad lo no muri promé cu Mesías ta yega. Pa siglonan e secta a siña cu cada generacion ta produci por lo menos un homber cu ta calificá como Mesías. Schneerson ta parce un hende asina pa sigidor di dje, i e no a nombra un sucesor. Sin embargo, e mayor parti di hudío no ta acepté como Mesías, segun Newsweek. E curant Newsday ta bisa cu rabí Eliezer Schach, di 96 aña di edad i rival di Schneerson, a yamé un “mesías falso.”

[Plachi na página 7]

E kerimento di cu Moisés di Creta tabata mesías a costa e bida di hopi hende