E Presencia di Mesias i su Gobernacion

“E Jesucristo ei cu a wordu recibí na cielo for di boso lo bini asina dje mesun manera cu boso a miré bai cielo.”—ECHO 1:11.

DIESUN homber a para bandariba di Ceru di Olijfi mirando fihamente na cielo. Jesucristo a caba di subi foi nan, i su curpa a desparece poco poco te cu un nubia a tapé. Durante e añanan cu nan tabata cu Jesús, e hombernan a mira Jesús duna un abundancia di prueba di cu e tabata Mesías; nan asta a experimenta e angustia di su morto i e hubileo di su resureccion. Awor el a bai.

² Dos angel a presenta di ripiente i a papia e sigiente palabra di consuelo: “Homber di Galilea, pakico boso ta para mirando na cielo? E Jesucristo ei cu a wordu recibí na cielo for di boso lo bini asina dje mesun manera cu boso a miré bai cielo.” (Echo 1:11) Ki un consuelo—e subimento di Jesús na cielo no kier men cu e no tabatin nada mas cu ber cu e tera i cu humanidad! Al contrario, Jesús lo bolbe. Sin duda tal palabra a yena e apóstolnan cu speranza. Miyones di hende djawe també ta duna mashá importancia ne promesa dje bolbimento di Cristo. Algun ta papia di dje como e “segunda benida” of “advenimento.” Sin embargo, ta parce cu e mayoría ta parce confundí tocante e berdadero nificacion dje bolbimento di Cristo. Di ki manera Cristo ta bolbe? Na ki tempo? I con esei ta afecta nos bida awe?

Con Cristo ta Bolbe

³ Segun e buki na inglés Un cristología evangélica, “e segunda benida of buelta di Cristo (parousia) ta establece e reino di Dios, di manera final i abierto, i pa tur eternidad.” Hopi hende ta kere cu e buelta di Cristo lo ser completamente visibel, i cu tur habitante dje planeta por miré físicamente. Pa apoya tal idea, hopi hende ta cita Revelacion 1:7, cu ta bisa: “Mira! E ta bini cu nubia, i tur wowo lo miré, i esnan cu a traspasé.” Pero, nos mester kere e texto literalmente?

⁴ No lubida, e buki di Revelacion tabata presentá cu “siñal.” (Revelacion 1:1) E texto, anto, mester ta simbólico; den cualkier caso, con “esnan cu a traspasé” por mira Cristo bolbe? Nan ta morto caba pa casi 20 siglo! Además, angel a bisa cu Cristo lo bolbe “dje mesun manera” cu el a bai. Wel, con el a bai? Ora miyones di hende a waké? No, un poco hende fiel so a mira su baimento. I ora angel a papia cu e apóstolnan, nan literalmente a mira Cristo te cu el a yega cielo? No, un nubia a kita Jesús for di nan bista. Un poco despues, Cristo mester a drenta den cielo spiritual como un ser spiritual, invisibel pa wowo humano. (1 Corintio 15:50) Pues, tur loke e apóstolnan por a mira tabata e principio dje subimento di Jesús; nan no por a mira e parti final, ora el a yega e presencia celestial di su Tata, Jehova Dios. Nan por a mira esei solamente cu nan wowo di fe.—Juan 20:17.

⁵ E Bijbel ta siña cu Jesús lo bolbe casi mescos. Jesús mes a bisa un poco promé cu su morto: “Aki un poco i e mundo lo no mirámi mas.” (Juan 14:19) El a bisa també cu “e reino di Dios no ta bini notablemente visibel.” (Lucas 17:20) Pues, den ki sentido ‘tur wowo lo miré’? Pa contestá e pregunta nos tin cu comprende bon e nificacion dje palabra cu Jesús i su sigidornan a usa en cuanto su buelta.

⁶ Realmente, Cristo ta haci hopi mas cu simplemente “bolbe.” E palabra, mescos cu “binimento,” “yegada,” of “advenimento,” ta indica un solo acto pasando den un momento breve di tempo. Pero e palabra griego cu Jesús i sigidor di dje a usa ta nifica hopi mas. E palabra ta pa·rou·siʹa, cu literalmente kier men “ser cerca” of “presencia.” E mayor parti di escolástico ta di acuerdo bisando cu e palabra no solamente ta haci referencia na un yegada sino també na un presencia despues—mescos cu e bishita oficial di un persona real. E presencia no ta un suceso breve; sino ta un época special, un espacio di tempo siñalá. Den Mateo 24:37-39, Jesús a bisa cu e “presencia [pa·rou·siʹa] dje Yiu di hende” lo ser mescos cu e “dianan di Noé” cu a culmina den e diluvio. Noé tabata traha e arca i duna advertencia na hende malbado pa hopi aña promé cu e diluvio a yega i a destrui e corrupto sistema mundial. Di igual manera, anto, e presencia invisibel di Cristo ta dura pa un periodo di hopi aña promé cu e també ta culmina den un destruccion grandi.

⁷ E pa·rou·siʹa no por ta físicamente visibel pa wowo humano. Si ta asina, pakico Jesús a dedica tanto tempo, manera nos lo mira, dunando sigidor di dje un siñal pa yúdanan distingi su presencia?a Pero, ora Cristo ta bini pa destrui e sistema mundial di Satanás, su presencia lo ser manifestá innengablemente pa tur e mundo. Anto, e ora ei “tur wowo lo miré.” Asta opositor di Jesús por mira, pa nan desmayo, cu e reinado di Cristo ta real.—Mira Mateo 24:30; 2 Tesalonicense 2:8; Revelacion 1:5, 6.

Na ki Tempo e ta Cuminza?

⁸ E presencia dje Mesías ta cuminza cu un suceso cu ta cumpli cu un tema cu ta ser repití den profecía mesiánica. Cristo ta ser coroná como Rey den cielo. (2 Samuel 7:12-16; Isaías 9:6, 7; Ezekiel 21:26, 27) Jesús mes a mustra cu su presencia lo ser enlazá cu su reinado. Den varios comparacion, el a compara su mes cu un doño cu a laga su cas i esclabonan atrás, a haci biahe largu na un “país distante” unda el a recibi “poder real.” El a haci un comparacion asina como un parti di su contesta pa pregunta dje apóstolnan tocante e tempo dje principio di su pa·rou·siʹa; el a conta un otro comparacion pasobra “nan tabata imaginánan cu e reino di Dios lo presenta instantáneamente.” (Lucas 19:11, 12, 15; Mateo 24:3; 25:14, 19) Pues, durante su tempo riba tera como hende, su coronacion tabata mashá leu den futuro ainda, pa tuma lugar den e “país distante” di cielo. Na ki tempo el a sosode?

⁹ Ora disípel di Jesús a puntré: “Ki siñal lo tin di bo presencia i dje conclusion dje sistema di cosnan?” Jesús a contestá dunando nan tur detaye dje tempo futuro. (Mateo, capítulo 24; Marco, capítulo 13; Lucas, capítulo 21; mira també 2 Timoteo 3:1-5; Revelacion, capítulo 6.) E siñal ta pinta en detaye un tempo turbulento. Esei ta un tempo marcá cu gera internacional, aumento di crimen, kibramento di bida di famía, epidemia di ­maleza, hamber, i temblor—no como problema local sino como crisis di alcance mundial. Esei ta parce e mundo djawe? Tur dia cu ta pasa ta confirma cu siglo 20 aki ta cuadra perfectamente cu detaye cu Jesús a duna.

¹⁰ Historiador ta di acuerdo cu 1914 tabata e punto culminante den historia humano, un aña crítico despues di locual hopi problema asina a cuminza bai for di control, aumentando na escala mundial. Sí, suceso fisical di mundo na cumplimento di profecía bíblica ta siñala na 1914 como e aña ora Jesús a cuminza reina como Rey den cielo. Además, un profecía den Daniel capítulo 4 ta duna evidencia cronológico cu ta siñala ne mesun aña, esta, 1914, como e tempo ora e Rey nombrá di Jehova a cuminza goberna.b

Pakico un Tempo Turbulento?

¹¹ Sin embargo, algun hende ta puntra, ‘Pakico tin tanto problema den e mundo si Mesías ta goberna den cielo? Su gobierno ta impotente?’ Un ilustracion por yuda. Un presidente malbado ta goberna un país. El a establece un sistema corrupto cu tengla extendiendo te na tur rincón dje país. Pero, tin un eleccion; i un bon hende ta gana. Kico lo pasa? Mescos cu den e caso di algun país democrático, varios luna ta pasa promé cu e presidente nobo ta ser inaugurá. Con e dos homber ta reacciona durante e tempo ei? E bon hende lo ataca un bez i deshaci tur cos malu cu e expresidente a haci den tur e país? Mas bien, lo e no concentra riba e stad capital promé, estableciendo un gabinete nobo i duna aviso na tur compinchi i amigo corrupto dje expresidente? Dje manera ei, ora e ta recibi plena autoridad, e por goberna for di un puesto limpi i eficaz. En cuanto e presidente corrupto, lo e no probecha dje corto tempo cu ta kedé pa hiba for dje país tur riqueza cu e por promé cu e ta perde tur su poder?

¹² Algo parecido ta sosode den e pa·rou·siʹa di Cristo. Revelacion 12:7-12 ta mustra cu ora Cristo tabata hací Rey den cielo, e promé cos cu el a haci tabata di saca Satanás i su demoñonan foi cielo, asina haciendo limpi e sitio di Su gobierno. Despues di a sufri tal derota sperá pa tanto tempo, kico Satanás ta haci ya cu ta “kedé poco tempo mas” promé cu Cristo ta eherce su plena autoridad aki riba tera? Mescos cu e presidente corrupto, e ta purba di saca tur cos posibel for dje sistema bieu aki. E no ta busca placa; e ta busca bida humano. E kier alehá tanto hende posibel for di Jehova Dios i su Rey reinante.

¹³ No ta straño, anto, cu e principio dje gobernacion di Mesías ta nifica un tempo di ‘ai dje tera.’ (Revelacion 12:12) Di igual manera, Salmo 110:1, 2, 6 ta mustra cu Mesías ta cuminza su gobernacion ‘meimei di su enemigonan.’ Mas tardi lo e aplasta completamente e “nacionan,” hunto cu tur aspecto dje sistema corrupto di Satanás, mandándonan na olvido!

Ora Mesías ta Goberna e Tera

¹⁴ Despues cu Jesucristo, e Rey Mesiánico, ta destrui e sistema di Satanás i tur hende cu ta apoyé, finalmente e por cumpli cu profecía bíblico maraviyoso cu ta duna detaye di su Reino di mil aña. Isaías 11:1-10 ta yúdanos mira exactamente ki clase di gobernante Mesías lo tá. Versículo 2 ta bísanos cu lo e tin “e spiritu di Jehova . . . , e spiritu di sabiduría i di comprendimento, e spiritu di conseho i di forza.”

¹⁵ Considera loke e ‘spiritu di forza’ lo nifica den e gobernacion di Jesús. Ora e tabata riba tera, e tabatin un grado di forza di Jehova, cu locual e por a haci milagro. I el a demonstra un deseo di curazón pa yuda hende, bisando, “Mi kier.” (Mateo 8:3) Pero, milagro di Jesús dje tempo ei tabata solamente un bistazo di loke lo e haci ora e ta reina for di cielo. Jesús lo haci milagro na escala mundial! Hende enfermo, ciegu, sordu, mancarón i coho lo ser curá pa semper. (Isaías 35:5, 6) Un abundancia di cuminda, partí sin distincion, lo pone fin na hamber pa semper. (Salmo 72:16) Kico dje miyones di hende incontable cu ta den graf cu Dios tin gusto di corda? E “forza” di Jesús lo inclui e poder pa resusitánan, i duna cada un e oportunidad di biba pa semper den Paradijs! (Juan 5:28, 29) No obstante, apesar di tur su forza, e Rey Mesiánico semper lo keda profundamente humilde. E ta haya “gozo . . . den e temor di Jehova.”—Isaías 11:3.

¹⁶ E Rey també lo ser un Huez perfecto. “Lo e no huzga riba simplemente aparencia na su wowo, ni reprende simplemente segun loke su orea ta tende.” Cua huez humano, sea awor of den pasado, por ta pintá asina? Asta homber mashá huicioso por huzga solamente segun loke nan ta mira of ta tende, usando cualkier sabiduría of discernimiento cu nan por tin. P’sei, huez i hurado dje mundo bieu por ta bao di influencia of confundí cu inteligencia sofisticá, of triki dilanti raad, of evidencia contradictorio. Hopi bez ta hende ricu i poderoso so cu por paga abogado pa defendénan, en realidad cumpra husticia. Lo no ta asina bao dje Huez Mesiánico! E ta leza curazón. Nada ta scapa su atencion. Husticia, templá cu amor i misericordia, no ta pa bende. Lo e semper triunfa.—Isaías 11:3-5.

Con Su Gobernacion ta Afectábo

¹⁷ Ta di comprende cu e gobernacion di Mesías ta eherce un influencia profundo riba su pueblo. E ta cambia hende. Isaías 11:6-9 ta mustra exactamente ki profundo tal cambio tá. E profecía ta pinta un cuadro conmovedor di bestia peligroso cu ta come víctima—oso, lobo, leopardo, león, cobra—den compañía di bestia doméstico inofensivo i asta mucha. Pero tal bestia comedor di carni no ta un peliger! Pakico? Versículo 9 ta contestá: “Nan lo no haci ningun daño ni causa ningun ruina den tur mi ceru santo; pasobra e tera siguramente lo ta yen dje conocimento di Jehova mescos cu awa ta yena lamá mes.”

¹⁸ Naturalmente, e “conocimento di Jehova” no por tene ningun efecto riba bestia mes; pues e palabra ei mester aplica primeramente na hende. Gobernacion di Mesías ta respalda un programa mundial di educacion, siñando hende tocante Jehova Dios i su camina, siñando tur hende pa trata nan próhimo cu amor, respet, i dignidad. Den e binidero Paradijs, Mesías lo hiza humanidad milagrosamente na perfeccion fisical i moral. Tendencia bestial i canibalista cu ta degrada naturaleza humano imperfecto lo desaparece. Den un sentido literal, també, hende lo yega di ser na paz cu bestia—por fin!—Compara cu Génesis 1:28.

¹⁹ No obstante, corda cu Mesías ta reina awor. Asta awor, ciudadano terrenal dje Reino ta siña biba den paz cu otro, cumpliendo cu Isaías 11:6-9 den un sentido. Además, pa casi 80 aña, Jesús ta cumpli cu Isaías 11:10: “Den e dia ei mester sosode cu lo tin e raíz di Jesé cu lo para recto como siñal pe pueblo. E nacionan lo acudi asta na dje pa informacion, i su lugar di descanso mester bira glorioso.” Hende di tur nacion ta acudi na Mesías. Pakico? Pasobra desde cu el a cuminza goberna, e tabata “para recto como siñal.” E ta duna di conoce su presencia mundialmente mediante e tremendo programa di educacion mencioná anteriormente. Realmente, Jesús a profetiza cu tal trabao di predicacion mundial lo ser un siñal sobresaliente di su presencia promé cu e fin dje sistema bieu aki.—Mateo 24:14.

²⁰ Pues, e presencia di Cristo cu poder real no ta un asunto remoto ni un teoría, simplemente un tópico pa debatimento intelectual di teólogo. Su gobernacion ta afecta i ta cambia e bida di hende aki riba tera, net conforme cu e profecía di Isaías. Jesús a saca for dje sistema corrupto di mundo miyones di ciudadano terrenal pa su Reino. Bo ta uno di nan? Anto sirbi cu tur e entusiasmo i gozo cu nos Gobernante ta merece! Ta cierto cu ta mashá fácil pa cansa i uníbo cu e mundo, haciendo su keho dudoso: “Unda ta e presencia primintí di dje?” (2 Pedro 3:4) Pero, manera Jesús mes a bisa, “ken cu ta persevera te na fin ta esun cu lo ser salbá.”—Mateo 24:13.

²¹ Cada dia cu ta pasa ta híbanos mas cerca e gran dia ora Jehova Dios lo manda su Yiu pa manifesta su presencia na tur e mundo. Nunca laga bo speranza den e dia ei floha. Medita riba e papel cu Jesús lo hunga como Mesías i riba calidad di dje como Rey reinante. Pensa profundamente, també, riba Jehova Dios, e autor i director dje gran speranza mesiánico skirbí den e Bijbel. Ora bo ta haci esei, sin duda lo bo sintíbo cada bez mas manera apóstol Pablo ora el a skirbi: “Ai, e profundidad dje riqueza i dje sabiduría i conocimento di Dios!”—Romano 11:33.

[Nota]

Con bo ta Contestá?

◻ Di ki manera Cristo ta bolbe?

◻ Con nos sa cu e pa·rou·siʹa di Cristo ta invisibel i ta dura pa basta tempo?

◻ Na ki tempo e presencia di Cristo ta cuminza, i con nos sa esei?

◻ Mesías ta ki clase di Gobernante ­celestial?

◻ Di ki manera e gobernacion di Cristo ta afecta e bida di ciudadano terrenal di dje?

[Preguntanan di Estudio]

 1, 2. (a) Con dos angel a consola apóstol di Jesús ora el a subi na cielo? (b) E prospecto dje bolbimento di Cristo ta haci cua pregunta surgi?

 3. Kico hopi hende ta kere tocante e bolbimento di Cristo?

 4, 5. (a) Con nos sa cu Revelacion 1:7 no tin un aplicacion literal? (b) Con e palabra di Jesús mes ta confirma tal comprendimento?

 6. (a) Pakico palabra tal como “buelta,” “yegada,” “advenimento,” i “binimento” no ta traduccion adecuado dje palabra griego pa·rou·siʹa? (b) Kico ta mustra cu e pa·rou·siʹa, of “presencia,” ta dura hopi mas cu simplemente un suceso instantáneo?

 7. (a) Kico ta duna prueba cu e pa·rou·siʹa no ta visibel pa wowo humano? (b) Di ki manera i na cua tempo lo tin cumplimento di texto bíblico cu ta duna detaye dje bolbimento di Cristo como visibel pa “tur wowo”?

 8. Cua suceso a marca e principio dje presencia di Cristo, i unda esei a tuma lugar?

 9, 10. Cua evidencia tin di cu Cristo ta reina actualmente den cielo, i na ki tempo el a cuminza su gobernacion?

11, 12. (a) Pakico ta difícil pa algun hende kere cu Cristo ta reina actualmente den cielo? (b) Con nos por ilustra loke a sosode despues cu Jesús tabata coroná como Rey?

13. Con e Scritura ta mustra cu e principio dje gobernacion di Cristo lo ser un tempo turbulento aki riba tera?

14. Kico Mesías por haci despues cu e ta destrui e mal sistema di cosnan di Satanás?

15. Kico e ‘spiritu di poder’ lo nifica den e gobernacion mesiánico?

16. E Rey Mesiánico lo ser ki clase di Huez, i con esei lo para na contraste cu loke huez humano a haci?

17, 18. (a) Cua cuadro briyante dje futuro di humanidad ta ser pintá den Isaías 11:6-9? (b) E profecía ta aplica primeramente na ken, i pakico? (c) Con e profecía lo haya un cumplimento literal?

19. Con e gobernacion di Mesías lo afecta e bida di hende den e último dianan aki?

20. Tur ciudadano terrenal dje gobernacion di Mesías mester evita cua actitud, i pakico?

21. Con nos tur por haci nos aprecio pe speranza mesiánico mas profundo?

[Plachi na página 15]

E speranza dje bolbimento di Jesús tabatin mashá nificacion pa fiel apóstol di dje

[Plachi na página 17]

Como gobernante celestial, Jesús lo haci milagro na escala mundial

[Rekonosementu]

E planeta tera: Basá riba foto di NASA