Tene e Punto di Bista Correcto dje Misericordia di Dios

E DOCTER tabata bondadoso i mashá preocupá. Segun su mihor huzgamento, su paciente desesperadamente tabatin mester di un operacion pa salba su bida. Ora el a vacila i a lanta e cuestion di transfusion di sanger, esei a sorprende e docter. Ora e paciente a splica cu pa motibo religioso e no por acepta un operacion cu a enbolbe transfusion di sanger, el a keda turdí. El a forza pa pensa di un manera pa yudé. Por fin, el a kere cu el a haya un solucion. E docter a bisa e paciente: “Bo sa, si bo no ta acepta un transfusion di sanger, lo bo muri. Bo no kier muri, berdad?”

E paciente a bisa: “Di ningun manera.”

“Pero, aparentemente, si bo ta acepté, bo ta viola bo kerimento religioso, locual també ta importante pa bo. Wel, lo sigiente ta mi sugerencia. Pakico bo no ta acepta un transfusion di sanger i asina salba bo bida. Anto confesa na Dios cu bo a peca, i arrepenti. Dje manera ei bo ta hayábo restorá na bo religion també.”

E docter cu bon intencion a kere cu el a haya un solucion perfecto. E tabata sa cu e paciente a kere den un Dios di misericordia. Siguramente, esei tabata un ocasion apropiado pa probecha dje misericordia di Dios! Pero, su sugerencia tabata tanto razonabel cu el a parce?

Tin bez cu nos ta razona asina?

Aveces nos por haya cu nos ta razona mescos cu e docter. Kizás un atake inesperá di oposicion na scol of na trabao ta spántanos. Of nos por háyanos den un situacion bochornoso ora nos ta bao di presion pa haci algo cu ta ofende nos concenshi. Den nos sorpresa, nos por keda incliná di scoge e camina di mas fácil pa sigi i haci loke nos sa ta incorrecto, cu e intencion di pidi pordón despues.

Of hende por ta tentá pa nan mes mal inclinacion. Por ehempel, un hoven por hayé den un situacion ora e ta ser tentá fuertemente pa comete inmoralidad. En bez di combati e mal deseo, e por entrega cu e intencion di drecha e asunto cu Dios despues. Algun hende a bai asina leu cu nan a comete un picá serio aunque nan tabata sa cu nan probablemente lo ser expulsá for dje congregacion cristian. Ta parce cu nan a razoná segun lo sigiente: ‘Lo mi laga un poco tempo pasa, anto lo mi arrepenti i wordu reestablecí.’

Tur situacion ei tin dos cos en común. Di promé, hende ta entrega en bez di lucha pa haci loke ta recto. Di dos, nan ta kere cu despues di a haci malu, Dios automáticamente lo pordonánan, si nan solamente pidi.

Cua punto di bista ta correcto?

Esei ta mustra e aprecio correcto pe misericordia di Dios? Wel, pensa riba tal misericordia pa un momento. Jesús a bisa: “Dios a stima mundo asina tanto cu el a duna su Yiu unigénito, pa tur hende cu eherce fe den dje no sea destruí sino tene bida eterna.” (Juan 3:16) Apóstol Juan a mustra con su misericordia ta obra ora el a bisa: “Mi ta skirbi boso e cosnan aki pa boso no comete picá. I toch, si algun ta comete picá, nos tin un yudante cerca e Tata, Jesucristo, un husto.” (1 Juan 2:1) P’sei, si pa motibo di imperfeccion nos ta cai den picá, nos por acudi na Dios den oracion i pidi pordón riba base dje sacrificio di Jesús.

Sin embargo, esei kier men cu no ta importa si nos ta peca of no, con tal cu nos ta pidi pordón despues? Apenas. Corda e promé palabra dje texto: “Mi ta skirbi boso e cosnan aki pa boso no comete picá.” E sigiente palabra di Juan den e texto ta presenta e arreglo amoroso di Jehova Dios pa trata cu nos imperfeccion. No obstante, nos tin cu purba tanto duro posibel pa evita di peca. Di otro manera nos ta manifesta un falta di respet lamentabel pe amor di Dios, hopi parecido di hende cu Hudas a menciona, cuanan a usa e bondad inmerecida di Dios como un excuus pa conducta inmoral.—Hudas 4.

Mirando e misericordia di Dios como un sorto di salba lo todo cu semper ta sálbanos maske kico nos ta haci ta menospreciá e misericordia di Dios i ta haci parce cu picá no ta tanto malu toch. Esei ta leu for dje berdad. Apóstol Pablo a bisa Tito: “E bondad inmerecida di Dios cu ta trece salbacion na tur sorto di hende a ser manifestá, instruyendo nos pa rechaza maldad i deseo mundano i biba cu sano huicio i husticia i debocion piadosa den e sistema actual di cosnan.”—Tito 2:11, 12.

Pablo a demonstra su aprecio pe misericordia di Dios cu su manera di lucha contra su mes imperfeccion. El a bisa: “Mi ta domina mi curpa i ta hibé como esclabo, pa, despues cu mi predica na otronan, mi mes no bira desaprobá di algun manera.” (1 Corintio 9:27) Pablo no a pensa na moda indiferente cu e mester peca de bez en cuando. Nos mester pensa asina?

E punto di bista di Jesús

Na un ocasion, Jesús a mustra con el a considera e idea di haci compromiso en cuanto loke ta husto i scoge e camina mas fácil pa evita sufrimento. Ora el a cuminza bisa su disípelnan tocante su binidero morto sacrificial, Pedro a purba di kité, bisando: “Sea bondadoso cu bo mes, Señor; abo absolutamente lo no tin tal destino.” Con Jesús a reacciona? El a bisa: “Bai djaki, Satanás! Bo ta un tropiezo pa mi, pasobra bo no ta pensa pensamento di Dios sino pensamento di hende.”—Mateo 16:22, 23.

No. E reprendimento fuerte cu Jesús a duna Pedro a mustra dramáticamente cu Jesús a nenga di scoge e camina fácil cu a inclui andamento contrario cu e boluntad di Dios. E Bijbel ta mustra cu el a sigi e camina recto sin vacila, soportando persecucion constante den man di Satanás. Cerca su morto, nan a tene mofa di dje, a zuté dolorosamente, i a maté den agonía. No obstante, Jesús no a haci compromiso, i pe motibo ei e por a ofrece su bida como un rescate pa nos. Siguramente e no a wanta tur esei pa nos ser ‘bondadoso cu nos mes’ ora dificultad of tentacion ta presenta!

E Scritura ta bisa tocante Jesús: “Bo a stima husticia, i a odia maldad.” (Hebreo 1:9) Scogimento dje camina fácil generalmente ta inclui hacimento di maldad. Pues, si nos berdaderamente ta odia maldad—mescos cu Jesús—nos semper lo nenga di haci compromiso. Den e buki di Proverbio, Jehova Dios ta bisa: “Sea sabí mi yiu, i haci mi curazón alegrá, pa mi por contestá esun cu ta desafiámi cu mofa.” (Proverbio 27:11) E husticia di Jesús cu tabata balanzá pero sin compromiso, a alegrá e curazón di Jehova mashá. Nos por agrada Jehova Dios di igual manera si nos ta sigi e camina di integridad di Jesús.—1 Pedro 2:23.

Entrená pa wanta

Apóstol Pedro a skirbi: “Boso ta alegrá mashá den tal echo, aunque pa poco tempo actualmente, si mester tá, boso a ser afligí bao di varios prueba, pe calidad probá di boso fe, di hopi mas balor cu oro cu ta perece apesar di ser probá pa candela, sea hayá un causa pa alabanza i gloria i onor ne revelacion di Jesucristo.” (1 Pedro 1:6, 7) Pa motibo cu nos ta imperfecto i ta biba den e mundo di Satanás, prueba i tentacion semper lo enfrentános constantemente. Manera Pedro a mustra, nan ta cumpli cu un bon propósito. Nan ta pone nos fe na prueba, ta mustra si e ta swak of fuerte.

Nan també ta obra pa entrenános. Jesús “a siña obedencia mediante loke el a sufri.” (Hebreo 5:8) Nos també por siña obedencia, i també dependencia riba Jehova, si nos ta wanta bao di prueba. I tal proceso di siñamento lo sigi te cu e ta completo, manera Pedro a bisa: “Dios . . . mes lo termina boso entrenamento, lo e haci boso firme, lo e haci boso fuerte.”—1 Pedro 5:10.

Sin embargo, si nos ta haci compromiso ora nos ta bao di prueba, nos ta mustra cu nos ta cobarde of swak, faltando un amor fuerte pa Jehova Dios i pa husticia of ta falta dominio propio. Algun debilidad asina ta peligrá gravemente nos relacion cu Dios. Realmente, e spiertamento di Pablo por ser cierto den nos caso: “Si nos ta practica picá boluntariamente despues di a recibi conocimento exacto dje berdad, no ta keda ningun sacrificio mas pa picá.” (Hebreo 10:26) Ta cuanto mas mihor pa no peca na principio en bez di entrega na debilidad i corre e rísico di perde tur prospecto di bida!

Integridad incondicional

Den e tempo di profeta Daniel, tres hebreo tabata den peliger di muri den candela si nan no a adora un imagen. Con nan a contestá? “Si e tin cu ser asina, nos Dios cu nos ta sirbi por sálbanos. Lo e sálbanos for dje fornu ardiente di candela i for di bo man, O rey. Pero, si e no ta hacié, O rey sa esaki, cu bo diosnan no ta esnan cu nos ta sirbi, i e imagen di oro cu bo a traha, nos lo no adora.”—Daniel 3:17, 18.

Nan a tuma tal posicion pasobra nan tabata kier haci loke ta recto. Si esei a resulta den nan morto, nan tabata dispuesto pa muri. Nan tabatin confianza den e resureccion. Pero, si Dios a sálbanan, esei tabata tanto mas mihor. Pero, nan posicion firme tabata incondicional. Mester tá semper asina cu sirbidor di Dios.

Den nos tempo algun hende cu a nenga di haci compromiso a ser encarcelá, torturá, i asta matá. Otronan a haci sacrificio material, i a prefera di keda pober en bez di bira ricu traicionando principio husto. Kico a pasa e hermana cristian mencioná na principio dje artículo aki? El a aprecia e intencion bondadoso aunque incorrecto dje docter, pero e no a compromete su fe. Mas bien, su respet pe ley di Jehova Dios a guié pa nenga di operá. Felizmente, el a recobra toch i a sigi sirbi Jehova Dios activamente. Pero, ora el a declara firmemente su posicion, e no tabata sa loke lo ta e resultado, pero e tabata prepará pa laga tur e asunto den e man di Jehova Dios.

Kico a yudé para tanto firme bao di presion? E no a purba di depende di su mes forza, ni ningun otro sirbidor di Dios mester haci esei. Corda: “Pa nos, Dios ta un refugio i fortaleza, un yudanza cu por ta hayá pronto durante angustia.” (Salmo 46:1) Ta cuanto mas mihor pa acudi na Dios pa yudanza ora bo ta bao di prueba en bez di peca anto acudi na dje pa pidi misericordia!

Sí, láganos nunca trata e gran misericordia di Dios cu indiferencia. Mas bien, láganos desaroya un berdadero deseo pa haci loke ta correcto, asta enfrentá cu dificultad. Esei por haci nos relacion cu Jehova Dios mas profundo, dúnanos entrenamento cu nos mester pa gana bida eterna, i demonstra un respet apropiado pe misericordia di Dios. Tal conducta sabí por causa alegría pe curazón di nos Tata celestial.

[Picture on page 24]

Confianza absoluto den e resureccion a yuda tres hebreo warda integridad