E Toren di Vigilancia i DESPERTAD!—REVISTA Oportuno di e Berdad

“Bo a salbámi, O Jehova, e Dios dje berdad.”—SALMO 31:5.

 1, 2. (a) Con un ruman a sintié tocante algo cu el a leza den E Toren di Vigilancia? (b) Cua pregunta ta ser hací tocante nos revista?

UN RUMAN muher cristian a skirbi: “Mashá, mashá danki pe maraviyoso informacion den e artículo di e Toren di Vigilancia ‘Bo por haya consuelo den e tempo di angustia.’a Tanto punto cu boso a presenta tabata exactamente e sintimento cu locual mi tabatin cu trata; ta como si e artículo tabata skirbí directamente pa mi. E promé bez cu mi a lezé, mi tabatin lágrima den mi wowo. Ta asina maraviyoso pa realiza cu otro hende sa con mi ta sintími! Mi ta keda mashá agradicido di ser un Testigo di Jehova. Na cua otro lugar nos por haya e promesa di bida eterna den Paradijs den e futuro cercano i, awor, consuelo pa nos alma! Danki. Un miyón di danki.”

² Bo a yega di sintíbo asina? A yega di parce cu algo den E Toren di Vigilancia of su revista compañé, Despertad!, tabata skirbí specialmente pa bo? Kico tin den nos revista cu ta atrae curazón di hende? Con nos por yuda otro hende probecha dje mensahe salbador di bida cu nan ta contene?—1 Timoteo 4:16.

Revista cu ta defende e berdad

 3. Pa cua bon motibo e revista e Toren di Vigilancia i Despertad! a toca e curazón di hopi lector?

³ Jehova ta e “Dios dje berdad.” (Salmo 31:5) Su Palabra, e Bijbel, ta un buki dje berdad. (Juan 17:17) Hende di curazón onrado ta responde ne berdad. (Compara cu Juan 4:23, 24.) Un motibo cu E Toren di Vigilancia i Despertad! a toca e curazón di miyones di lector ta cu nan ta revista di integridad i berdad. Realmente, tabata riba e cuestion dje lealtad na berdad bíblico cu E Toren di Vigilancia a cuminza publicacion.

 4, 5. (a) Cua circunstancia a resulta den C. T. Russell publicando e Watch Tower? (b) Con e “esclabo fiel i prudente” ta usa e revista Watchtower?

⁴ Na aña 1876, Charles T. Russell a cuminza afiliá cu Nelson H. Barbour di Rochester, New York. Russell a contribui e placa pa rebiba publicacion dje periódico religioso di Barbour Herald of the Morning, cu Barbour como e redactor principal i Russell redactor asistente. Pero, rond di un aña i mei despues, den e número di Augustus di 1878 dje Herald, Barbour a skirbi un artículo cu a nenga e balor rescatador dje morto di Cristo. Russell, cu tabata casi 30 aña mas hoven cu Barbour, a reaccioná cu un artículo den net e sigiente número cu a apoya e rescate, cu el a yama “un siñanza di mas importante dje Palabra di Dios.” (Mateo 20:28) Despues di esfuerzo bez tras bez pa razona bíblicamente cu Barbour, Russell finalmente a decidi di termina tur conexion cu e Herald. Cuminzando cu e número di Juni di 1879 dje revista, e no a contene e nomber di Russell mas como redactor asistente. Un luna despues, Russell, di 27 aña di edad, a cuminza publica Zion’s Watch Tower and Herald of Christ’s Presence (yamá awor na papiamento E Toren di Vigilancia anunciando e Reino di Jehova Dios), locual desde e principio a defende e berdad bíblico, tal como e rescate.

⁵ Pe último 114 aña, E Toren di Vigilancia (na ingles), manera un abogado apto, a establece su mes como un defensor dje berdad i doctrina bíblico. Den e proceso, el a gana e confianza di miyones di lector apreciativo. Ainda e ta apoya fuertemente e rescate. (Mira, por ehempel, e número di 1 di Mart di 1992.) I e ta sigi ser e instrumento principal dje “esclabo fiel i prudente” i su Cuerpo Gobernante pa anuncia e Reino establecí di Jehova Dios i pa percura alimento spiritual “ne tempo apropiado.”—Mateo 24:14, 45.

 6, 7. Cua doel tabata declará pa The Golden Age, i kico ta mustra cu hende pensativo a responde na su mensahe?

⁶ Kico dje revista Despertad!? Desde su principio, Despertad! també a defende e berdad. Originalmente e tabata yamá na inglés The Golden Age, i e revista tabata producí pa distribucion público. En cuanto su meta, e promé número, cu e fecha di 1 di October di 1919, a declara: “Su propósito ta di splica den e luz di sabiduría divino e berdadero nificacion dje gran fenomeno dje tempo actual i duna prueba na mente pensativo mediante evidencia innengable i convenciente cu e tempo ta cerca awor pa un bendicion mas grandi pa humanidad.” Hende pensativo a responde ne mensahe di The Golden Age. Pa varios aña, e cantidad publicá tabata asta mas cu The Watchtower.b

⁷ Sin embargo, e atraccion dje dos revista E Toren di Vigilancia i Despertad! ta bai mas ayá dje echo cu nan ta publica berdad doctrinal i ta splica e nificacion profético di estado di mundo. Specialmente durante e último diez of binti aña, nos revista a capta curazón di hende pa un otro motibo també.

Artículo oportuno cu ta toca bida di hende

 8. Hudas a haci cua cambio den su skirbimento pa urgi lector pa resisti contra cua influencia den e congregacion?

⁸ Rond di 30 aña despues dje morto i resureccion di Jesucristo, Hudas, un skirbidor bíblico a enfrenta un situacion desafiador. Homber inmoral i bestial a drenta secretamente den e congregacion cristian. Hudas tabatin e intencion di skirbi otro hende cristian tocante un tema doctrinal—e salbacion cu cristian ungí tin en común. Pero, bao di direccion dje spiritu santo, el a haya cu tabata necesario pa urgi lector pa resisti contra influencia corruptivo dentro dje congregacion. (Hudas 3, 4, 19-23) Hudas a ahusta ne situacion i a duna conseho oportuno cu a satisface e necesidad dje rumanan cristian.

 9. E produccion di artículo oportuno pa nos revista ta enbolbe kico?

⁹ Di igual manera, e preparacion di artículo oportuno pa nos revistanan ta un responsabilidad desafiador. Tempo ta cambia, i hende també—nan necesidad i nan interés no ta loke nan tabata ni diez ni binti aña pasá. Un superintendente biahero a bisa recientemente: “Ora mi a bira un Testigo di Jehova ayá rond di 1955, nos manera di studia e Bijbel cu hende tabata básicamente doctrinal—siñando hende e berdad tocante e trinidad, candela di fiernu, alma, etc. Pero ta parce awor cu tin tanto problema i dificultad den e bida di hende cu nos tin cu síñanan con pa biba.” Pakico ta asina?

10. Pakico no mester ta un sorpresa pa nos di cu tabatin un degeneracion continuo di asunto humano desde 1914?

¹⁰ E Bijbel ta profetiza tocante e “último dianan”: “Mal hende i gañador lo bai di malu pa pior, engañando i siendo gañá.” (2 Timoteo 3:1, 13) P’sei, no mester sorprendénos cu tabatin un degeneracion continuo den asunto humano desde cu e tempo di fin a cuminza na 1914. Satanás, siendo cu e tempo cu ta kedé ta mas cortico cu nunca, ta saca su rabia riba humanidad como nunca na antes. (Revelacion 12:9, 12) Como resultado, moralidad i aprecio di famía ta mashá diferente cu loke tabatin solamente 30 of 40 aña pasá. Hende en general no tin tanto inclinacion religioso como den añanan di antes. Crimen ta asina desenfrená cu hende ta tuma precaucion cu no tabata conocí solamente 20 of 30 aña pasá.—Mateo 24:12.

11. (a) Hende ta pensa riba ki sorto di cuestion, i con e grupo di esclabo fiel i prudente ta satisface tal necesidad? (b) Menciona un ehempel di artículo di E Toren di Vigilancia i Despertad! cu a toca bo bida.

¹¹ No ta un sorpresa, anto, cu cuestion emocional, social, i familiar, ta domina e pensamento di hopi hende. E grupo di esclabo fiel i prudente a reacciona cu curashi den E Toren di Vigilancia i Despertad!, publicando artículo oportuno cu ta trata cu e berdadero necesidad di hende i berdaderamente a toca nan bida. Considera algun ehempel.

12. (a) Pakico artículo tocante famía cu un mayor so tabata prepará pa The Watchtower na 1980? (b) Con un ruman a expresa su aprecio pa artículo tocante famía cu un mayor so?

¹² Cuestion di famía. Ora informe di tur e mundo a mustra un aumento rápido dje cantidad di famía cu un mayor so, artículo pe campo nobo tabata prepará, tal como “Famía cu un mayor so—tratando cu problema” di The Watchtower di 15 di September di 1980. Artículo asina tabatin un propósito dobel: (1) pa yuda mayornan soltero of soltera trata cu problema singular cu a enfrentánan i (2) pa yuda otro hende ser mihor informá pa nan por manifesta “simpatía” i berdaderamente yuda famía cu un mayor so. (1 Pedro 3:8; Santiago 1:27) Hopi lector a skirbi carta pa expresa nan aprecio pa tal artículo. Un mama soltera a skirbi: “Ora mi a mira e capa, lágrima a yena mi wowo i ora mi a habri e revista i a leza e informacion, mi curazón a pasa over cu gratitud pa Jehova Dios pa su percuracion di tal informacion ne tempo necesario.”

13. Cua consideracion a fondo di depresion tabata publicá den Despertad! na 1982, i kico un lector a bisa?

¹³ Cuestion emocional. E asunto di depresion tabata considerá den E Toren di Vigilancia i Despertad! desde 1960. (1 Tesalonicense 5:14) Pero, un consideracion nobo i positivo a cuminza den e serie principal di Despertad! di 22 di Januari di 1982 titulá “Bo por combati depresion!” Pronto un gran cantidad di carta expresando aprecio a yega ne Sociedad Watch Tower di rond di mundo. Un ruman a skirbi: “Con mi por expresa den un carta e sintimento den mi curazón? Mi tin 24 aña di edad, i durante e último diez aña, mi tabatin hopi periodo di depresion. Pero awor mi ta sintími mas cerca Jehova i agradicido cu el a responde ne necesidad di hende desconsolá via tal artículo amoroso, i mi tabata kier bisa boso esei.”

14, 15. (a) Con nos revista a trata cu e cuestion di abuso di muchanan? (b) Cua artículo dje revista a impresioná un ginete den Australia?

¹⁴ Cuestion social. E Bijbel ta profetiza cu den e “último dianan” hende “lo ta stimador di nan mes, . . . sin cariño natural, . . . sin dominio propio, feroz, sin amor di loke ta bon.” (2 Timoteo 3:1-3) P’sei, no mester soprendénos cu abuso di muchanan ta ser practicá na un escala grandi awe. E asunto tabata duná un consideracion francu den e artículo “Yudanza pa víctima di incesto” den The Watchtower di 1 di October di 1983. Ocho aña despues e serie di artículo principal di Despertad! di 8 di October di 1991 titulá “Curando herida di abuso di muchanan” tabata prepará cuidadosamente pa duna comprendimento i speranza pa víctima i també ilumina otro hende afin cu nan por ofrece yudanza útil. E serie di artículo a resulta den mas carta for di lector den e historia di nos revista. Un lector a skirbi: “E mayor impacto riba mi recobramento tabata expresion di consuelo i texto bíblico den e artículo. Tabata un alivio sublime pa mi sa cu Jehova Dios no ta despreciámi. Tabata igualmente consolador pa sa cu no ta ami so cu tabata abusá.”

¹⁵ Un ginete di Melbourne, Australia a yama di largu distancia na telefón e oficina dje Sociedad Watch Tower den Sydney, expresando disgusto cu e ambiente di carreda di cabai. El a bisa cu el a caba di leza e Despertad! di 8 di mart tocante “Violación sexual—pesadilla de la mujer” i casi no por kere cu ta existi un revista asina balioso. El a haci pregunta pa mas cu 30 minut i a keda mashá contentu cu contesta cu el a haya.

16. Di ki manera bo por demonstra bo aprecio pa nos revista?

¹⁶ Kico di bo? Un cierto artículo publicá den E Toren di Vigilancia of Despertad! a toca bo bida? Si ta asina, sin duda bo tin un sintimento profundo di gratitud pa nos revista. Con bo por demonstra bo aprecio? Siguramente door di leza cada número personalmente. També, bo por participa den dunamento di tal revista precioso e mayor distribucion posibel. Con bo por haci esei?

Compartínan cu otro hende!

17. Kico tur congregacion por haci pa aumenta distribucion di revista?

¹⁷ Promé, tin algo cu cada congregacion por haci. E número di Nos Ministerio di Reino di October di 1952 a bisa: “E manera mas efectivo pa distribui revista ta di cas pa cas i di tienda pa tienda. P’sei e Sociedad ta recomenda cu tal moda di distribucion di revista ser un parti regular dje actividad dje Dia di Revista.” Tal conseho ta válido ne dia djawe. Congregacion por programa un Dia di Revista regularmente, un dia dedicá primeramente pa duna testimonio cu revista. Pa casi tur congregacion, cierto diasabra sin duda lo ser un bon tempo. Sí, laga cada congregacion dedica un dia of atardi special pa duna testimonio cu revista—di cas pa cas, di tienda pa tienda, pa ofrecénan riba caya, i na ruta di revista. Además, kico abo, un publicador di Reino, por haci pa aumenta distribucion di revista?

18, 19. (a) Con tenimento di Toren di Vigilancia i Despertad! presente por yudábo parti revista? (b) Presentacion breve i directo ta di ki probecho ora nos ta ofrece revista? (c) Kico ta demonstra e balor di laga revista den cas di pueblo?

¹⁸ Teniendo “E Toren di Vigilancia” i “Despertad!” presente ta un paso den e direccion ei. Leza e revistanan di antemano. Mientras cu bo ta leza cada artículo, puntra bo mes, ‘E artículo aki lo ta interesante pa ken?’ Pensa di algun palabra cu bo por bisa pa estimulá interés den e artículo. Además di duna apoyo ne Dia di Revista regular, pakico no hiba revista cu bo di manera cu bo por probecha di tur oportunidad di compartínan cu otro hende—ora bo ta haci biahe of ta haci compras, i ora bo ta papia cu colega di trabao, beciña, compañé di scol, of maestro?

¹⁹ E segundo sugerencia ta di mantene senciyo bo presentacion. The Watchtower di 1 di December di 1956 a bisa: “Un presentacion breve i pertinente ta mihor ora bo ta ofrece revista. E meta ta di parti hopi revista. Revista ta ‘papia’ pa nan mes.” Algun publicador a haya cu ta efectivo pa scoge un idea di un artículo, expresé cu poco palabra, i ofrece e revista. Despues cu e revistanan ta den e cas di hende, nan por “papia” cu otro hende además dje persona cu a aceptánan foi bo. Den Irlanda un alumno hoven di universidad a leza e número di The Watchtower di 1 di September di 1991, cu su tata a acepta for di un Testigo di Jehova. Artículo tocante comunicacion i otro tema a lanta su interés. Asina cu el a leza e revista, el a yama Testigo di Jehova na telefón, yamando e númber mencioná den e buki di telefón. Pronto un estudio bíblico a cuminza, i e jufrow a bautiza ne Asamblea di Districto “Siñanza Divino” den Juli di 1993. Di tur manera, láganos introduci revista den cas di hende, unda nan por “papia” cu hende! Un superintendente biahero a ofrece un otro sugerencia senciyo: “Saca e revistanan for di bo tas.” Realmente, si loke bo ta bisa no ta interesá e persona, anto posiblemente e plachi yamativo riba e capa por coloca e revista pa bo.

20, 21. (a) Con bo por keda flexible ora bo ta participa den e trabao cu revista? (b) Kico bo por haci pa parti mas revista tur luna?

²⁰ Un tercer sugerencia ta di ser flexible. (Compara cu 1 Corintio 9:19-23.) Prepara varios presentacion breve. Tene presente un artículo cu ta atrae homber, un otro pa hende muher. Pa hovenan, bo por enfatizá un artículo di “Loke hovenan sa puntra . . .” També, sea flexible en cuanto e tempo cu bo ta participa den e trabao cu revista. Además dje Dia di Revista, bo por haya cu e sirbishi den atardi ta ocasioná oportunidad excelente pa ofrece revista di cas pa cas.

²¹ Sugerencia di cuater ta di pone meta personal. E cuadro titulá “Revista ta siñalá e camina di bida,” cu a presenta den Nos Ministerio di Reino di Mart di 1984, a bisa: “Como un sugerencia, publicador por pone meta di, por ehempel, 10 revista pa luna, dependiendo di nan circunstancia; pionero por haci esfuerzo di parti 90. Naturalmente, algun publicador por parti mas revista pa luna i p’sei por pone un meta personal mas halto. Sin embargo, debí na salud delicado, e clase di territorio, of otro bon motibo, e meta di otronan por ta mas abao. Pero, nan sirbishi tin mes tanto balor den e bista di Jehova Dios. (Mat. 13:23; Luc. 21:3, 4) E cos importante ta di pone un meta personal.”

22. Di ki manera nos por mustra cu nos ta agradicido na Jehova pa nos revista oportuno cu ta contene e berdad?

²² Ki agradicido nos ta keda di cu Jehova Dios, “e Dios dje berdad,” ta usa e grupo di esclabo fiel i prudente i su Cuerpo Gobernante pa percura pa nos e dos revista oportuno! (Salmo 31:5) Tan tempo cu ta e boluntad di Jehova, e dos revista lo sigi atende ne berdadero necesidad di hende. Nan lo sigi apoya norma halto di moralidad di Jehova. Nan lo no kita for di promocion di doctrina recto. I nan lo persisti den halamento di atencion na cumplimento di profecía cu ta marca nos dianan como e tempo ora e Reino di Dios ta reina i e boluntad di Dios ta ser hací riba tera como nunca na antes den un cantidad aumentante di berdadero adorador di Jehova Dios. (Mateo 6:10; Revelacion 11:15) Ki un tesoro preciocísimo nos tin den E Toren di Vigilancia i Despertad! Láganos probecha di tur oportunidad pa comparti cu hende manso e dos revista importante cu ta toca e bida di hende i ta defende e berdad dje Reino.

[Nota]

Cua contesta bo tin?

◻ Kico ta mustra cu E Toren di Vigilancia i Despertad! ta revista cu ta contene e berdad?

◻ Di ki manera E Toren di Vigilancia i Despertad! a toca e bida di hende?

◻ Kico tur congregacion por haci pa aumenta distribucion di revista?

◻ Cua sugerencia por yudábo parti mas revista?

[Kuadro na página 22]

Algun Artículo Cu A Toca e Bida di Hende

Através dje añanan hopi lector a skirbi pa expresa aprecio pa cierto artículo publicá den The Watchtower i Despertad! Aki abao tin un lista di algun so dje cantidad di tema cu a afecta lector. Con esakinan i otro artículo a cambia bo bida?

The Watchtower (Mesun fecha na edicion spañol)

“Acepta yudanza di Dios pa vence falta secreto” (15 di April di 1985)

“Practicando debocion divino pa cu mayornan di edad” (1 di Juni di 1987)

“Educacion cu un propósito” (1 di November di 1992)

Despertad!

“Bo por combati depresion!” (22 di Januari di 1982)

“Ora un stimá ta muri . . .” (22 di April di 1985)

“Proteha bo yiunan!” (8 di October di 1993)

[Picture on page 23]

Ofreciendo revista di cas pa cas na Canadá

[Picture on page 24]

Ofreciendo revista cu ta mustra e camina di bida den Myanmar