Pioneronan Ta Duna i Ta Ricibí Bendicion

“TRABOU di pionero ta bal hopi mas cu un carera seglar exitoso. No tin nada mas satisfaciente cu yuda hende yega na conocé Jehova i su berdad.” Asina un muher cristian, kende a scoge trabou di pionero​—⁠predicacion di Reino di tempu completo​—⁠como su carera, a bisa. Cuantu otro carera por duna tal felicidad?

Trabou di pionero ta un meta sublime nobel i tambe un privilegio precioso. Con un persona por scoge un bida asina? Kico ta necesario pa pega n’e trabou di pionero suficientemente largu pa cosechá e bendicionnan cu e ta ofrecé?

Dos cos ta vital. Promé, e circunstancianan corecto. Hopi hende ta biba den circunstancianan cu ta haci trabou di pionero claramente imposibel. I di dos, e cualificacionnan spiritual i actitud corecto. Naturalmente, sea circunstancianan actual ta permití un persona traha pionero of no, tur hende por traha pa desaroyá cualidadnan cristian maduro.

Pakico Algun Ta Traha Pionero

Kico ta e cualificacionnan pa trabou di pionero exitoso? Wel, abilidad di predicá ta vital. Pioneronan mester sa con pa presentá e bon nobo na hende straño, pa rebishitá esnan interesá i pa conducí studio di Bijbel na cas. Falta dje abilidadnan aki por desanimá un pionero. Sin embargo, otro cosnan tambe ta importante.

Por ehempel, tur loke tin di haber cu nos adoracion ta ligá cu nos relacion cu Jehova i su organisacion. Esaki ta incluí trabou di pionero. Un pionero hóben yamá Rado a splica: “Pa un persona hóben, no tin nada mas bunita cu corda Jehova i cana den e caminda dje berdad.” Sí, trabou di pionero ta un manera excelente pa hóbennan demostrá nan amor pa Jehova i intimidad cuné.​—⁠Eclesiastés 12:⁠1.

Conocimentu i comprendimentu tambe ta indispensabel. (Filipense 1:​9-11) En efecto, esakinan ta e gasolin cu ta tene nos motor spiritual cendí. Studio personal regular ta esencial pa evitá di bira spiritualmente agotá, perdiendo nos entusiasmo i conviccion. Naturalmente, e conocimentu cu nos ta gana mester afectá no solamente e intelecto sino tambe e curason. (Proverbio 2:⁠2) P’esei, ademas di studio personal, nos mester di tempu pa oracion i meditacion pa asina e conocimentu cu nos ta gana toca e curason. Anto, si nos circunstancianan ta permití, nos lo deseá di traha pionero.​—⁠Compará cu Esdras 7:10.

Pa cuminsá e sirbishi di pionero ta exigí tambe e spiritu di sacrificio propio. Un yonkuman yamá Ron a traha tur su plan p’e traha pionero. Solamente e tabata spera e circunstancianan corecto p’e por a dal bai. Specíficamente, el a deseá un trabou cu lo a permiti’é traha pionero i na mesun tempu disfrutá di algun dje mihó cosnan di bida. Ora el a mencioná esaki na un ruman muher maduro, su contesta a sagudi’é. El a bisa: “Jehova ta bendicioná obra, no promesa.” E yonkuman a haña un trabou cu un salario mas abou cu a permiti’é tempu pa traha pionero. Aplicando Mateo 6:​25-34 lo yuda un persona biba riba un entrada mas chikitu.

Un boluntad humilde pa sigui bon sugerencia por wel contribuí na nos drentamentu dje sirbishi di pionero. Na principio di su bida como un cristian, Hanna a cultivá un deseo pa traha pionero. Pero e no a traha pionero miéntras e tabata lantando un famia i despues el a bira enbolbí den un carera di negoshi. Prestando atencion na bon conseho di ancianonan alerto, el a bira lomba pa su carera seglar interesante i a cuminsá cu e sirbishi di pionero. Awor Hanna ta experenciá gran goso den hiba otronan na dedicacion i yuda esnan inactivo.

Gratitud pa loke e berdad a haci den bo bida tambe por ta un estímulo pa traha pionero. Considerá e caso di un muher profundamente deprimí kende su matrimonio tabata kibrando. E situacion aki a cambia dramáticamente ora el a siña e berdad dje Palabra di Dios i a pon’é na práctica. Conmoví pa loke e berdad a haci p’e, el a dicidí cu e mihó manera p’e mustra aprecio lo ta pa traha pionero i yuda otronan. Esaki ta loke el a haci, i awor e ta experenciá e bendicionnan di hopi studio di Bijbel i un bida di famia felis.

Otronan Por Yuda

Pioneronan hopi biaha ta producí otro pioneronan. Rado, mencioná anteriormente, tabatin seis aña di edad ora dos pionero a studia Bijbel cu su mayornan. Ora e tabata masha yong ainda, el a compañá e dos predicadornan di tempu completo aki regularmente den e ministerio di veld. Rado mes a bira un pionero regular na edad di 17. Arno, un otro yonkuman, a ser criá den un cas cristian pero a bira spiritualmente swak débil. Despues, el a determiná pa restorá su fortalesa spiritual, i awor e ta bisa: “Mi a ricibí basta animacion for dje pioneronan. Mi a asociá cu nan specialmente durante vacansi di scol i tin biaha mi a raportá un cantidad di 60 ora pa luna den sirbishi di veld. Despues di esei, e paso p’e sirbishi di pionero regular [rekiriendo 90 ora pa luna] no tabata asina grandi.” Meditando rib’e conseho di 1 Corintio 7:​29-31 pa no usa e mundu plenamente realmente a yuda hóbennan asina.

E spiritu di pionero por saca rais mas fácilmente den un cas caminda interes spiritual ta na promé lugá i caminda mayornan ta animá nan yunan pa drenta e ministerio di tempu completo. Philo, kende a crece den un cas asina, ta comentá: “Hopi hende a consehá mi pa sigui mi educacion, pa traha pa un futuro seglar. Pero mi mayornan a yudá mi tuma un decision mas sabí. Nan a bisá mi cu si mi realmente kier a edificá pa futuro, mi promé prioridad mester ta pa desaroyá un relacion cu Jehova.”

Un muher hóben yamá Thamar tambe ta atribuí su sirbishi di pionero n’e ehempel i esfuerso di su mayornan. E ta bisa: “Mi no por bisa realmente na ki tempu mi a desaroyá un punto di bista spiritual di bida, pero mi sa cu mi no a nace cu unu. E custumber di mi mayornan di participá regularmente den sirbishi di veld i asistí na reunion, i tambe nan amor profundo p’e berdad, a yudá mi mashá pa desaroyá mi punto di bista spiritual.”

Pegando na Bo Decision

Despues cu un persona drenta e sirbishi di pionero, perseverando den dje ta permiti’é cosechá e pleno beneficio di tal decision sabí. Nos por duna hopi conseho práctico cu mira riba esei. Por ehempel, pioneronan ta haci bon di siña con pa programá nan tempu pa haci’é mas productivo posibel. Sin embargo, e factor mas importante ta keda un persona su relacion cu Jehova i Su organisacion.

Relacioná cu esaki ta un actitud di oracion. “Ora mi a drenta den e berdad, mi tabatin masha gana di traha pionero,” Cor ta bisa. Sin embargo, su tata a exigí p’e caba un curso promé n’e Universidad di Agricultura. Despues, Cor a cuminsá traha pionero. Cu tempu el a casa, i su casa a uni cuné den e trabou di pionero. Ora su casá a sali na estado, Cor a ser enfrentá cu e posibilidad di bandoná e trabou di pionero. “Mi a resa hopi biaha na Jehova i a pone dilanti dje mi deseo di curason pa sigui traha pionero,” Cor ta bisa. Cu tempu Cor a haña e clase di empleo cu a permiti’é traha pionero miéntras e tabata lantando un famia.

Kedando contentu cu necesidadnan material ta un otro factor cu hopi biaha ta yuda un persona permanecé den e ministerio di pionero. Apostel Pablo a skirbi: “Laga bo moda di biba sea liber di amor pa placa, kedando contentu cu e cosnan actual. Pasobra el a bisa: ‘Di ningun manera lo mi bandoná bo ni di cualkier manera desampará bo.’ ” (Hebreo 13:⁠5) Kedando contentu cu e cosnan actual a yuda Harry i Irene sigui traha pionero. Irene, kende ta ciegu, ta trahando pionero pa ocho aña. “Nos nunca a mira nos situacion financiero como un problema,” e ta bisa. “Nos a djis percurá pa nunca tuma carga financiero innecesario. Semper nos a calculá e gastu. Semper nos bida tabata simpel, aunke masha placentero, i e tabata masha ricu na bendicion.”

Hopi Goso i Bendicion

Mirando bek riba nuebe aña di trabou di pionero, Thamar ta bisa: “Bo ta yega di ta masha íntimo cu Jehova, como si e realmente a gara bo man.” (Salmo 73:23) Algun prueba tambe ta bini na mente. “Mi mes imperfeccionnan combiná cu esnan di otronan a molestiá mi regularmente,” Thamar ta agregá. “Ademas, mi tabata wak rumannan homber i muher cu a scoge un manera di biba materialmente mas recompensador, i nan scogementu a parce basta atractivo compará cu mi canamentu di cas pa cas pafó den awaceru i frialdad. Pero den profundidad di mi curason, nunca lo mi kier a troca lugá. Kico otro cu excepcion di traha pionero por trece goso, satisfaccion spiritual i bendicionnan asina?” Lo bo duna balor haltu na goso i bendicionnan similar?

Debí cu pioneronan ta dedicá hopi tempu den e ministerio cristian, nan ta den un posicion pa yuda un cantidad di persona gana un conocimentu di berdad di Bijbel. Harry i Irene, mencioná anteriormente, ta bisa: “Tin hopi privilegio pa haña den e organisacion di Jehova, pero yudando un persona recientemente interesá pa progresá te n’e punto di bira un sirbidor di Jehova ta esun mayor di tur.”

Un otro pionero a expresá un bon cos ora el a bisa: “E palabranan di Proverbio 10:22 a resultá cierto den mi caso: ‘E bendicion di Jehova​—⁠esei ta loke ta enrikesé, i e no ta agregá dolor cuné.’ Bes tras bes, e scritura aki a ser cumplí pa mi durante e añanan cu mi a sirbi Jehova.”

Mayornan, boso ta inculcando den boso yunan e deseo pa traha pionero? Pioneronan, boso ta haciendo esfuerso pa lanta e deseo aki den otronan? Ancianonan, boso ta apoyá e pioneronan den boso congregacion i ta yuda edificá un spiritu di pionero den otronan? Laga mas i mas dje pueblo di Jehova extendé nan mes pa tal bendicionnan ricu segun cu nan ta participá den e sirbishi di pionero.