“Bisa Nos, Na Ki Tempu E Cosnan Aki Lo Ta?” [Translator: The Following Article Is Based On Talk No. 28 From The 1993 “Divine Teaching” District Convention.]

“Cosnan nobo mi ta anunciá. Promé cu nan cuminsá brota, mi ta haci pa boso tende nan.”​—⁠ISAÍAS 42:⁠9.

SIÑANSA divino ta brota for di Jehova Dios, “Esun cu ta bisando for di principio e final.” (Isaías 46:10) Manera e artículo anterior a mustra, e apostelnan a busca tal siñansa for di Jesus, puntrand’e: “Bisa nos, Na ki tempu e cosnan aki lo ta i kico lo ta e señal ora tur e cosnan aki ta destiná pa yega na un conclusion?”​—⁠Marco 13:⁠4.

² Como contesta, Jesus a describí un “señal” componí consistiendo di evidencia cu lo a proba cu e sistema hudiu mester a caba pronto. Esaki a ser cumplí cu destruccion di Jerusalem na aña 70 E.C. Pero e profecia di Jesus lo tabatin un mayor cumplimentu hopi aña den futuro. Una bes “e tempu señalá dje nacionnan,” a terminá na 1914, un señal na un escala inmenso lo a ser manifestá, demostrando cu pronto e mal sistema actual lo a terminá den un “tribulacion grandi.”a (Lucas 21:24) Miyones di hende na bida awe por testificá cu e señal aki a ser cumplí den e gueranan mundial i otro sucesonan catastrófico dje siglo 20 aki. Esakinan tambe ta marca e cumplimentu mayor dje profecia di Jesus, ya cu loke a sosodé desde 33 te 70 E.C. a tipificá e cumplimentu moderno aki.

³ Despues cu Lucas a mencioná e tempu señalá dje nacionnan, e relatonan paralelo den Mateo, Marco i Lucas ta describí un seri di desaroyonan mas aleu cu ta incluí un señal adicional n’e ‘señal componí dje conclusion dje sistema di cosnan.’ (Mateo 24:⁠3) (Na página 15, e punto aki den e relato ta ser separá pa un liña dobel.) Mateo ta bisa: “Inmediatamente despues dje tribulacion dje dianan ei solo lo bira scur, i luna lo no duna su lus, i e streanan lo cai for di cielu, i e podernan di cielu lo ser sagudí. Anto e señal dje Yu di hende lo aparecé den cielu, anto tur e tribunan dje tera lo bati nan mes den lamentacion, i nan lo mira e Yu di hende biniendo riba nubia di cielu cu poder i gran gloria. I lo e manda su angelnan cu un gran zonidu di trompet, i nan lo reuní su scogínan huntu for dje cuater bientunan, for di un extremo dje cielu te na nan otro extremo.”​—⁠Mateo 24:​29-31.

Tribulacion i Fenómenonan Celestial

⁴ Na ki tempu esei lo a ser cumplí? Tur e tres relatonan di Evangelio ta mencioná loke nos por yama fenómenonan celestial​—⁠solo i luna birando scur i streanan cayendo. Jesus a bisa cu esakinan lo a sigui despues di “e tribulacion.” Jesus tabatin na mente e tribulacion cu a culminá na 70 E.C., of e tabata papiando dje tribulacion grandi cu ta den futuro ainda di nos tempu moderno?​—⁠Mateo 24:29; Marco 13:⁠24.

⁵ Desde cu e tempu señalá dje nacionnan a terminá na 1914, e pueblo di Dios tabata profundamente interesá den “e tribulacion grandi.” (Revelacion 7:14) Pa añanan nan a pensa cu e tribulacion grandi di tempu moderno tabatin un parti inicial cu a corespondé cu e tempu di Guera Mundial I, despues un espacio di tempu intervalo di interupcion, i finalmente un parti di conclusion, “e guera dje gran dia di Dios e Todopoderoso.” Si esei tabata asina, kico lo a sosodé durante e décadanan entremedio dje “conclusion dje sistema”?​—⁠Revelacion 16:14; Mateo 13:39; 24:3; 28:⁠20.

⁶ Wel, nan a pensa cu durante e espacio di tempu aki e señal componí lo a ser mirá, incluyendo e trabou di predicacion efectuá dor dje pueblo recogé di Dios. A parce tambe cu por a spera e fenómenonan celestial profetisá durante e espacio di tempu despues dje fase inicial di 1914-18. (Mateo 24:29; Marco 13:​24, 25; Lucas 21:25) Nan a fiha atencion riba cosnan literal den cielu​—⁠explorador di espacio, raket, radiacion cósmico of gamma, i aterisahe of basenan riba luna.

⁷ Sin embargo, E Toren di Vigilancia [na ingles] di 15 di januari, 1970, a reexaminá e profecia di Jesus, specialmente e binidero tribulacion grandi. El a mustra cu den bista di loke a sosodé den e promé siglo, e tribulacion moderno lo no por tabatin un parti inicial na 1914-18, un espacio di tempu pa decádanan largu i despues un continuacion. E revista ei a concluí: “E ‘tribulacion grandi’ tal como lo no sosodé atrobe ta den futuro ainda, pasobra e ta nificá e destruccion dje imperio mundial di religion falsu (incluyendo cristiandad) siguí p’e ‘guera dje gran dia di Dios e Todopoderoso’ na Armagedon.”

⁸ Pero Mateo 24:29 ta bisa cu e fenómenonan celestial ta tuma lugá “inmediatamente despues dje tribulacion.” Con esei por ta? E Toren di Vigilancia [na ingles] di 1 di mei, 1975, a sugerí cu aki “e tribulacion” a nificá esun cu a culminá ayá na 70 E.C. Pero den ki sentido nos por bisa cu fenómenonan celestial di nos tempu tabata tumando lugá “inmediatamente” despues di un suceso na 70 E.C.? E razonamentu tabata cu den bista di Dios, e siglonan entremedio lo ta breve. (Romano 16:20; 2 Pedro 3:⁠8) Sin embargo, un examinacion mas profundo dje profecia aki, particularmente di Mateo 24:​29-31, ta señalá na un splicacion basta diferente. Esaki ta ilustrá con e lus ta briya “mas i mas te n’e dia perfecto.” (Proverbio 4:​18, American Standard Version)b Laga nos considerá pakico un splicacion nobo of diferente ta apropiado.

⁹ Na cuater di su apostelnan, Jesus a duna e profecia di ‘solo birando scur, i luna no dunando lus i streanan cayendo.’ Como hudiu, nan lo a reconocé tal lenguahe for dje Scritura Hebreo, caminda, por ehempel na Sofonías 1:​15, Dios su tempu di huicio a ser yamá “un dia di tempestad i di desolacion, un dia di scuridad, un dia di nubianan i di scuridad diki.” Varios profeta hebreo tambe a describí solo birando scur, luna sin briyo i e streanan sin ta dunando lus. Lo bo haña tal lenguahe den mensahenan divino contra Babilonia, Edom, Egipto i e reino di nort di Israel.​—⁠Isaías 13:​9, 10; 34:​4, 5; Jeremías 4:28; Ezekiel 32:​2, 6-8; Amos 5:20; 8:​2, 9.

¹⁰ Ora nan a tende loke Jesus a bisa, Pedro i e tres otronan probablemente a corda Joël su profecia na Joël capítulo 2:​28-31 i 3:15: “Lo mi drama mi spiritu riba tur sorto di carni i bo yunan homber i bo yunan muher siguramente lo profetisá. . . . I lo mi duna señalnan den cielu i riba tera, sanger i candela i pilarnan di huma. Solo mes lo cambia den scuridad, i luna den sanger, promé cu binimentu dje dia di Jehova, grandi i inspirador di temor.” “Solo i luna mes siguramente lo bira scur, i e streanan mes realmente lo kita nan claridad.”

¹¹ Manera Echo 2:​1-4 i 14-21 ta relatá, na Pentecoste 33 E.C., Dios a drama spiritu santu riba 120 disipel, tantu homber como muher. Apostel Pedro a haci conocí cu esaki tabata loke Joël a profetisá. Sin embargo, kico di Joël su palabranan tocante ‘solo cambiando den scuridad i luna den sanger i e streanan kitando nan claridad’? Nada ta indicá cu esaki a ser cumplí na 33 E.C. of durante e periodo di mas cu 30 aña largu dje conclusion dje sistema di cosnan hudiu.

¹² Evidentemente e último parti ei dje pronóstico di Joël tabata mas estrechamente ligá cu “e binimentu dje dia di Jehova, grandi i inspirador di temor”​—⁠e destruccion di Jerusalem. E Toren di Vigilancia [na ingles] di 15 di november, 1966, a bisa tocante e tribulacion cu a bini riba Jerusalem na 70 E.C.: “Esei siguramente tabata un ‘dia di Jehova,’ refiriendo na Jerusalem i su yunan. I en coneccion cu e dia ei tabatin bastante ‘sanger i candela i neblina di huma,’ di dia solo no a clara e scuridad dje stad, i anochi luna a trece sanger dramá na mente, no lus di luna pacífico i platiá.”c

¹³ Sí, mescos cu e otro profecianan cu nos a mencioná, e fenómenonan celestial cu Joël a profetisá a ser cumplí ora Jehova a exigí huicio. En bes di extendé riba henter e periodo dje conclusion dje sistema hudiu, e biramentu scur di solo, luna i streanan a sosodé ora e forsanan di ehecucion a bini contra Jerusalem. Lógicamente, nos por spera un mayor cumplimentu dje parti ei di Joël su profecia ora Dios su ehecucion dje sistema actual di cosnan cuminsá tuma lugá.

Cua Tribulacion Promé cu Fenómenonan Celestial?

¹⁴ E cumplimentu dje profecia di Joël (na armonia cu otro profecianan usando lenguahe similar) ta yuda nos comprendé e palabranan na Mateo 24:29. Claramente, loke Jesus a bisa tocante ‘solo birando scur, luna no dunando lus i streanan cayendo, no ta referí na cosnan cu a sosodé durante e hopi décadanan dje conclusion dje sistema actual, tal como raketnan espacial, bahamentu riba luna i cosnan por estilo. No, el a señalá na cosnan conectá cu “e dia di Jehova, grandi i inspirador di temor,” e destruccion cu mester a bini ainda.

¹⁵ Esaki ta yuda nos comprendé mihó con e fenómenonan celestial lo a bini “inmediatamente despues dje tribulacion.” Jesus no tabata referí n’e tribulacion cu a culminá na 70 E.C. Mas bien, e tabata señalando n’e comienso dje tribulacion grandi cu lo a bini rib’e sistema mundial leu ayá den futuro, culminando su “presencia” primintí. (Mateo 24:⁠3) E tribulacion ei ainda ta nos dilanti.

¹⁶ Ki tal dje palabranan na Marco 13:24: “Den e dianan ei, despues di e tribulacion ei, solo lo bira scur, i luna lo no duna su lus”? Aki e palabra “e . . . ei” ta un forma dje palabra griego e·keiʹnos, un pronomber demostrativo indicando algu distante den tempu. E·keiʹnos por ser usá pa indicá algu hopi tempu den pasado (of mencioná anteriormente) of algu leu den futuro. (Mateo 3:1; 7:22; 10:19; 24:38; Marco 13:​11, 17, 32; 14:25; Lucas 10:12; 2 Tesalonicense 1:10) Pues, Marco 13:24 ta señalá na “e tribulacion ei,” no e tribulacion instigá dor dje romanonan, sino na Jehova su obra poderoso n’e fin dje sistema actual.

¹⁷ Capítulo 17 te 19 di Revelacion ta cuadra cu i ta verificá e comprendementu actualisá aki di Mateo 24:​29-31, Marco 13:​24-27 i Lucas 21:​25-28. Den ki manera? E Evangelionan ta mustra cu e tribulacion grandi lo no cuminsá i terminá den un solo tiru. Despues cu e cuminsá, algun hende desobediente ainda lo ta na bida pa mira “e señal dje Yu di hende” i pa reaccioná​—⁠pa lamentá i manera Lucas 21:​26 ta declará, pa “desmayá di miedu i di anticipacion di loke ta bini rib’e tera habitá.” E miedu aplastante ei lo ta debí n’e echo cu nan ta mira “e señal” cu ta indicá nan destruccion inminente.

¹⁸ E relato di Revelacion ta mustra cu e futuro tribulacion grandi lo cuminsá ora e “cachunan” militar dje “bestia salbahe” internacional bira contra “e gran muher di mal bida,” Babilonia e Grandi.d (Revelacion 17:​1, 10-16) Pero hopi hende lo keda, pasobra reynan, comerciantenan, capitannan di barcu i otronan ta lamentá e fin di religion falsu. Sin duda hopi lo realisá cu nan huicio lo t’e siguiente.​—⁠Revelacion 18:​9-19.

Kico Tin pa Bini?

¹⁹ E pasashinan di Evangelio den Mateo, Marco i Lucas ta combiná cu Revelacion capítulo 17-19 pa drama bastante lus riba loke lo sosodé pronto. Na Dios su tempu fihá, e tribulacion grandi lo cuminsá cu un atake contra e imperio mundial di religion falsu (Babilonia e Grandi). Esaki lo ta particularmente intenso contra cristiandad, cua ta corespondé cu Jerusalem infiel. “Inmediatamente despues” dje fase aki dje tribulacion, “lo tin señal den solo i luna i streanan, i riba tera ansha [sin precedente] dje nacionnan.”​—⁠Mateo 24:29; Lucas 21:⁠25.

²⁰ Den ki sentido ‘solo lo bira scur, luna lo no duna su lus, e streanan lo cai for di cielu i e podernan di cielu lo ser sagudí’? Sin duda, na principio dje tribulacion grandi, hopi luminario​—⁠clero prominente dje mundu religioso​—⁠lo a ser desenmascará i eliminá dor di “e dies cachunan” mencioná na Revelacion 17:16. Sin duda e podernan político tambe lo ser sagudí. Lo por tin tambe sucesonan spantoso den e cielu físico? Muy probablemente cu sí, i hopi mas inspirador di temor cu esnan cu, segun Josefo, a sosodé cerca e fin dje sistema hudiu. Nos sa cu den pasado di antigua, Dios a desplegá su poder pa ocasioná tal efectonan cataclísmico i e por haci esei atrobe.​—⁠Éxodo 10:​21-23; Hosué 10:​12-14; Hues 5:20; Lucas 23:​44, 45.

²¹ N’e punto aki tur tres escritor di Evangelio ta usa toʹte (anto) pa introducí e siguiente desaroyo. “Anto e señal dje Yu di hende lo aparecé den cielu.” (Mateo 24:30; Marco 13:26; Lucas 21:27) Desde Promé Guera Mundial, e berdadero disipelnan di Jesus a dicerní e señal componí di su presencia invisibel, miéntras cu mayoria hende no a reconoc’é. Pero Mateo 24:30 ta señalá padilanti na aparicion di un “señal” mas aleu den futuro, esun dje “Yu di hende,” i tur nacion lo ser forsá pa tuma nota di dje. Ora Jesus ta bini cu nubia di invisibilidad, hende opositor mundialmente lo tin cu reconocé e “binimentu” (griego, er·khoʹme·non) ei debí na un demostracion sobrenatural di su poder real.​—⁠Revelacion 1:⁠7.

²² Mateo 24:30 ta usa toʹte un biaha mas pa introducí loke ta bini siguientemente. Anto e nacionnan, sintiendo e consecuencia di nan situacion, lo bati nan mes i lamentá, kisas reconociendo cu nan destruccion ta inminente. Ki diferencia cu Dios su sirbidornan, pasobra nos lo por hisa nos cabes na laira, sabiendo cu liberacion ta cerca! (Lucas 21:28) Revelacion 19:​1-6 ta mustra tambe adoradornan berdadero den cielu i riba tera alegrando rib’e fin dje gran muher di mal bida.

²³ Jesus su profecia ta sigui bisa na Marco 13:27: “Anto [toʹte] lo e manda e angelnan i lo reuní su scogínan huntu for dje cuater bientunan, for dje extremo di tera te n’e extremo di cielu.” Aki Jesus ta enfocá riba e resto dje 144.000 “scogínan” ainda na bida riba tera. Na principio dje conclusion dje sistema di cosnan, e disipelnan ungí aki di Jesus a ser trecé den unidad teocrático. Sin embargo, segun e secuencia usá, Marco 13:27 i Mateo 24:31 ta describí algu mas. “Cu un gran zonidu di trompet,” e sobrá “scogínan” lo ser recogé for dje finnan di tera. Con nan lo ser recogé? Sin duda, nan lo ser “seyá” i claramente identificá dor di Jehova como parti di “esnan yamá i scogí i fiel.” I na Dios su debido tempu, nan lo ser recogé na cielu pa ta rey i sacerdotenan.e Esaki lo trece goso pa nan i pa nan fiel compañénan, e “multitud grandi,” kendenan mes tambe lo ser marcá pa ‘sali for dje tribulacion grandi’ pa disfrutá di bendicionnan riba un tera paradísico.​—⁠Mateo 24:22; Revelacion 7:​3, 4, 9-17; 17:​14; 20:6; Ezekiel 9:​4, 6.

²⁴ Ora e apostelnan a bisa, “Bisa nos . . . ,” Jesus su contesta a abarcá mas di loke nan por a capta. Sin embargo, dentro di nan periodo di bida, nan a alegrá pa mira e cumplimentu típico di su profecia. Nos studiamentu di Jesus su contesta a enfocá rib’e parti di su profecia cu lo ser cumplí den e futuro cercano. (Mateo 24:​29-31; Marco 13:​24-27; Lucas 21:​25-28) Ya caba nos por mira cu nos liberacion ta yegando mas cerca. Nos por mira padilanti n’e comienso dje tribulacion grandi, anto e señal dje Yu di hende i despues Dios su recogementu dje scogínan. Finalmente, nos Rey-Guerero, Jesus entronisá, como Ehecutor di Huicio di Jehova na Armagedon, lo “completá su conkista.” (Revelacion 6:⁠2) E dia ei di Jehova, ora e ta ehecutá vengansa, lo bini como un gran final n’e conclusion dje sistema di cosnan cu a marca e dia di Señor Jesus desde aña 1914 padilanti.

²⁵ Sigui beneficiá boso mes dor di siñansa divino, afin di respondé n’e futuro cumplimentu di Jesus su palabranan: “Ora e cosnan aki cuminsá sosodé, stret boso curpa i hisa boso cabes na laira, pasobra boso liberacion ta yegando cerca.” (Lucas 21:28) Ki un gran futuro tin dilanti e scogínan i e multitud grandi segun cu Jehova ta bai na santificá su nomber santu!

[Footnotes]

[Study Questions]

1, 2. (a) Kico Jesus su apostelnan a puntra tocante futuro? (b) Con Jesus su contesta tocante un señal componí a haña cumplimentu?

3. Papiando di un otro señal, ki desaroyonan adicional Jesus a pronosticá?

4. Cua preguntanan ta lanta tocante e fenómenonan celestial cu Jesus a mencioná?

5. Kico e pueblo di Dios a kere na un tempu tocante e tribulacion den tempu moderno?

6. Kico nan a pensa lo cumpli cu e profecia di Jesus tocante fenómenonan celestial?

7. Ki ahuste den comprendimentu tocante e tribulacion grandi a ser percurá?

8. Cu e comprendimentu ahustá dje tribulacion moderno, con Mateo 24:29 a ser splicá?

9. Con e Scritura Hebreo ta yuda nos comprendé Jesus su palabranan tocante desaroyonan den cielu?

10, 11. (a) Kico Joël a profetisá en cuanto cosnan den cielu? (b) Cua aspectonan dje profecia di Joël a ser cumplí na 33 E.C., i cua no tabata?

12, 13. Con e fenómenonan celestial cu Joël a profetisá a ser cumplí?

14, 15. Con e profecia di Joël ta yuda nos comprendé Mateo 24:⁠29?

16. Na cua tribulacion Marco 13:24 tabata señalando, i pakico asina?

17, 18. Ki lus Revelacion ta tira rib’e manera cu e tribulacion grandi lo desaroyá?

19. Kico nos por spera ora e tribulacion grandi cuminsá?

20. Cua fenómenonan celestial nos por spera ainda?

21. Con un futuro “señal” lo tuma lugá?

22. Kico lo ta e efecto di mira “e señal” di Mateo 24:⁠30?

23. (a) Ki accion Jesus lo tuma relacioná cu e scogínan? (b) Kico nos por bisa dje hibamentu na cielu dje resto?

24. Mateo 24:​29-31 ta revelá ki secuencia en cuanto binidero desaroyonan?

25. Con nos por participá den e cumplimentu pa futuro ainda di Lucas 21:⁠28?

[Caption on page 17]

▼ Area di tempel

[Caption on page 17]

Pictorial Archive (Near Eastern History) Est.

[Caption on page 21]

Bo Ta Corda?

◻ Con e aspectonan di Joël 2:​28-31 i 3:15 a ser cumplí den e promé siglo?

◻ Na cua tribulacion Mateo 24:29 ta refiriendo, i pakico nos ta concluí esei?

◻ Na cua fenómenonan celestial Mateo 24:29 ta señalá, i con esaki por ta inmediatamente despues dje tribulacion?

◻ Con Lucas 21:​26, 28 lo ser cumplí den futuro?