Evolucion Someti̇́ Na Huicio

Defensor di evolucion awor ta exigi un reexaminacion completo dje origen di bida

IMAGINÁBO cu bo ta un miembro dje hurado den un huicio criminal. E acusado ta declara su inocencia, i testigo ta presenta pa duna testimonio pa su defensa. Sin embargo, ora bo ta scucha nan testimonio, bo ta ripara cu cada testigo ta contradici tur e otronan. Anto, ora testigo defendiendo e acusado ta subi e podio pa duna testimonio, nan testimonio ta cambia. Como un miembro dje hurado, bo ta tuma nan testimonio na serio? Bo ta keda incliná di declara e acusado inocente? Probablemente cu no, pasobra cualkier cos inconsistente den e testimonio duná pa defende e acusado ta debilita e credibilidad dje acusado.

Esei ta e caso dje teoría di evolucion. Un ehército di testigo ta presenta pa conta un variedad di cuenta tocante e origen di bida, defendiendo e teoría di evolucion. Pero, nan testimonio ta resulta di ser digno di confianza bao di examinacion intenso dilanti raad? Esnan cu ta defende e teoría ta papia di acuerdo cu otro?

Testimonio contradictorio

Con bida a cuminza? Kizás ningun otro cuestion a lanta mas speculacion ni no a provoca mas debatimento. Sin embargo, e controversia no ta simplemente tocante evolucion contra creacion; hopi dje conflicto ta sosode entre evolucionista mes. Casi tur detaye di evolucion​—⁠con el a sosode, unda el a cuminza, ken of kico a duna comienzo na dje, i cuanto tempo e proceso a sigi​—⁠ta ser pleitá intensamente.

Pa hopi aña evolucionista a bisa cu bida a cuminza den un “sopi” orgánico cayente. Awor algun ta kere cu scuma di lamá por a produci bida. Algun homber científico ta sugeri cu geiser bao di lamá por ta e lugar dje origen di bida. Algun ta declara cu organismo bibiente a yega riba meteor cu a baha riba tera. Of por tá, segun otronan, asteroide a choca cu e tera i a cambia e atmósfera, estimulando e desaroyo di bida den e proceso. Segun un investigador, “Cos interesante por sosode si un asteroide di heru ta choca cu e tera.”

E naturaleza dje principio di bida també ta ser reconsiderá. E revista Time a sugeri: “Bida no a cuminza den un situacion calmo i agradable, manera hende a sopone, sino bao di cielo manera un fiernu di candela tormentá cu erupcion di volcán i amenazá cu cometa i asteroide.” Pa bida evoluciona den caos asina, algun homber científico ta bisa awor cu tur e proceso mester a sosode durante un periodo di tempo mas corto cu hende a pensa na antes.

Homber científico també tin diferente opinion tocante cua papel Dios​—⁠“si e ta existi”​—⁠a hunga den e origen di bida. Algun ta bisa cu bida a evoluciona sin cu un Creador a metele den e asunto, mientras cu otronan ta sugeri cu Dios a principiá e proceso i a laga evolucion sigi cu e desaroyo di bida.

Despues cu bida a cuminza, con evolucion a sosode? Asta den esei, tin conflicto entre opinion. Na 1958, un siglo despues di publicacion dje buki na inglés E origen di raza, evolucionista Sir Julian Huxley a bisa: “E gran descubrimento di Darwin, e principio universal di seleccion natural, ta ser establecí firmemente i finalmente como e único instrumentalidad di cambio evolucionario principal.” Pero, binticuater aña despues, evolucionista Michael Ruse a skirbi: “Un cantidad aumentante di biólogo . . . ta argumenta cu cualkier teoría evolucionario fundá riba principio di Darwin​—⁠specialmente cualkier teoría cu ta mira seleccion natural como clave pa cambio evolucionario​—⁠ta engañosamente incompleto.”

Aunque e revista Time a bisa cu tin “hopi echo firme” pa apoya e teoría di evolucion, no obstante el a admiti cu evolucion ta un cuenta complicá cu “hopi defecto i hopi teoría humano na conflicto cu otro riba e manera pa percura pida di evidencia cu no tin.” En bez di sugeri cu e caso hudicial ta concluí, algun evolucionista di mas dedicá awor ta borota na fabor di un reexaminacion completo dje origen di bida.

Asina, e defensa di evolucion​—⁠specialmente en cuanto e principio di bida segun evolucion​—⁠no ta fundá riba testimonio consistente. Científico T. H. Janabi a bisa cu hende cu ta boga pa evolucion “a desaroya i a bandona hopi teoría erróneo através dje añanan i homber científico te awor no por keda di acuerdo riba sikiera un solo teoría.”

Interesantemente, Charles Darwin a anticipa tal conflicto. Den e introduccion dje buki Origen di raza, el a skirbi: “Mi wel sa cu no tin echo pa apoya casi ningun punto considerá den e buki aki, aparentemente resultando den conclusion net contrario cu esnan na locual mi a yega caba.”

Realmente, tal testimonio na conflicto cu otro ta haci pregunta presenta tocante e credibilidad dje teoría di evolucion.

Evolucion ta loke hende intelectual ta scoge?

Segun e buki Milestones of History, desde su principio e teoría di evolucion “a atrae hopi hende pa motibo cu el a parce mas berdaderamente científico cu e teoría di un creacion special.”

Además, declaracion dogmático di algun hende por intimidábo. Por ehempel, científico H. S. Shelton a haci e declaracion di cu e concepto di un creacion special ta “mucho bobo pa consideracion serio.” Biólogo Richard Dawkins a bisa sin consideracion: “Si bo ta contra cu hende cu ta bisa cu e no ta kere den evolucion, tal hende ta ignorante, estúpido of loco.” Di igual manera, profesor René Dubos a bisa: “E mayoría di hende iluminá ta acepta awor como un echo cu tur cos den e cosmos​—⁠desde strea den cielo te na ser humano​—⁠a desaroya i ta sigi desaroya pa medio dje proceso di evolucion.”

Segun tal declaracion ta parce cu hende cu dos dede di frenta ta acepta evolucion mesora. Pasobra, aceptacion di dje kier men cu tal hende ta “iluminá” mas bien cu “estúpido.” Sin embargo, tin homber i muher cu bon scol cu no ta defende e teoría di evolucion. Francis Hitching a skirbi den su buki na inglés E garganta di giraf, “Mi a contra cu hopi hende científico cu tin duda personal i algun hende cu asta a bisa cu e teoría di Darwin tocante evolucion no a resulta di ser un teoría científico di ningun manera.”

Chandra Wickramasinghe, un científico británico mashá famoso, tin e mesun opinion. El a bisa: “No tin evidencia pa ningun doctrina básico dje evolucion di Darwin. [Evolucion tabata] un forza social cu a domina e mundo na 1860, i mi ta kere cu esei tabata desastroso pa ciencia desde esei.”

T. H. Janabi a investiga argumento cu evolucionista a presenta. El a bisa, “Mi a haya cu e situacion ta completamente diferente di loke nan a guíanos pa kere. Evidencia ta mucho poco i mucho fragmentá pa apoya un teoría tanto complicá como e teoría dje origen di bida.”

Pues, hende cu ta contra e teoría di evolucion no mester ta simplemente halá un banda como “ignorante, estúpido of loco.” En cuanto opinion cu ta desafiá evolucion, asta evolucionista fuerte George Gaylord Simpson tabatin cu admiti: “Ta siguramente un equibocacion pa simplemente considera tal punto di bista como si nan no ta merece consideracion serio of pa menospreciánan. Hende cu ta contra e teoría di evolucion tabata (i tá) studiante profundo i inteligente.”

Un asunto di fe

Algun hende ta pensa cu kerimento den evolucion ta fundá riba echo, pero cu kerimento den e creacion ta fundá riba fe. Ta cierto cu ningun hende a mira Dios. (Juan 1:18; compara cu 2 Corintio 5:⁠7.) Pero, e teoría di evolucion no tin ningun bentaha den e asunto aki, siendo cu e ta fundá riba suceso cu hende no a mira nunca ni a duplica.

Por ehempel, hende científico nunca a mira cambio den bestia​—⁠ni cambio beneficioso​—⁠cu ta produci forma nobo di bida; no obstante, hende científico ta keda sigur cu esei tabata precisamente e manera cu raza nobo a yega di existi. Nan no a presenciá generacion espontáneo di bida; pero nan ta insisti cu ta asina bida a cuminza.

Tal falta di evidencia ta haci T. H. Janabi yama e teoría di evolucion “simplemente ‘fe.’ ” E físico Fred Hoyle ta yamé “Evangelio segun Darwin.” Dr. Evan Shute a haci un declaracion asta mas fuerte. El a bisa: “Mi ta sospecha cu hende creacionista tin menos misterio pa aclara cu splicacion como evolucionista sincero.”

Otro experto ta di acuerdo. E astrónomo Robert Jastrow a admiti: “Ora mi ta considera e naturaleza di hende, e salimento dje ser [humano] extraordinario for di químico bruhá den un tanki di awa cayente ta parce tanto un milagro como e relato bíblico dje origen di hende.”

Pues, anto, pakico tanto hende ta rechaza ainda e idea di cu bida tabata creá?

[Caption on page 3]

Declaracion dogmático di algun hende por ta convenciente