E Graf di Pedro

​—⁠Den Vaticano?

“E GRAF dje Prins dje Apostelnan a ser hañá.” E anuncio triunfante di Papa Pio XII a ser transmití dor di radio vaticano. Tabata fin di aña 1950, i un seri compleho di cobamentu bou di Basílica di San Pedro a keda completá recientemente. Segun algun persona, e resultadonan dje investigacion arkeológico aki a proba cu Pedro en berdad a ser derá den Vaticano. Sin embargo, no tur hende tabata di acuerdo.

Pa católiconan, Iglesia di San Pedro den Vaticano tin un nificacion special. “E propósito esencial di peregrinacion na Roma ta pa topa e sucesor di Pedro i pa ricibí su bendicion,” un buki di guia católico ta declará, “pasobra Pedro a bini Roma i a ser derá einan.” Pero Pedro en berdad a ser derá den Roma? Su graf ta den Vaticano? Su wesunan a ser hañá?

Un Misterio Arkeológico

E cobamentunan, cu a cuminsá rond di 1940 i cu a dura aproximadamente dies aña, tabata tópico di masha controversia. Kico e arkeólogonan apuntá dor dje papa a haña? Na promé lugá, un santana pagano conteniendo yen di graf. Meimei di nan, bou dje altar cu e papa ta usando actualmente, nan a identificá un aedícula, esta, un monumento hincá den muraya diseñá pa wanta un estatua of un imágen, poní den un muraya cubrí cu pleister corá i encerá dor di dos muraya di banda. Finalmente, i masha misteriosamente, algun resto humano a ser descubrí, cua, segun nan a bisa, a bini for di un dje dos bandanan di muraya.

Aki ta caminda e interpretacionnan ta cuminsá. Segun un cantidad di escolástico católico, e hayasgonan ta confirmá e tradicion di Pedro su residencia i martirio den Roma durante e gobernacion di Nero, talbes durante e persecucion di 64 E.C. Nan a asta bisa cu e restonan ta relikia dje apostel i por ser identificá como tal dor di un inscripcion cu, segun un interpretacion, ta bisa, “Pedro ta aki.” Ta parce cu Papa Pablo VI tabata dunando crédito n’e hipótesis aki ora na 1968 el a anunciá e descubrimentu dje “restonan mortal di San Pedro, cua ta digno di tur nos debocion i veneracion.”

Sin embargo, huntu cu e interpretacionnan, tabatin tambe e contra-argumentonan. E arkeólogo católico Antonio Ferrua, un jesuita kende a tuma parti den e cobamentunan vaticano, a afirmá na mas cu un ocasion cu e ‘no tabata permití pa publicá’ tur loke e sa dje asuntu, material cu aparentemente lo a contradecí e pretension cu relikianan di Pedro a ser identificá. Ademas, un buki di guia di Roma, editá dor dje cardinal católico Poupard i publicá na 1991, a bisa cu e “examinacion científico ei dje wesunan humano hañá bou dje fundeshinan dje Muraya Corá no a parce di tin nada di haber cu apostel Pedro.” Pa straño cu por parce, den e siguiente edicion (mas despues na 1991), e frase a desparcé, i un capítulo nobo, titulá “Un Cos Sigur: Pedro na San Pedro,” a ser agregá.

Interpretacion dje Hayasgonan

Ta evidente cu e hayasgonan ta suheto na interpretacion i cu cada hende ta mira nan na nan manera. En berdad, e historiadornan católico mas autoritativo ta reconocé cu “e problemanan histórico di Pedro su martirio real den Roma, i di su lugá di entiero, ta dudoso.” Kico e hayasgonan ta revelá?

E monumento aedícula, segun esnan cu ta busca pa apoyá e tradicion católico, ta e “memorial” na cua un tal Gayo, un sacerdote kende a biba na cuminsamentu di siglo tres, a referí. Segun Eusebio di Cesarea, un historiador eclesiástico di siglo cuater, Gayo a bisa cu e por a ‘indicá e memorial di Pedro riba e Ceru di Vaticano.’ E apoyadornan di tradicion ta pretendé cu e apostel a ser derá ei, bou dje monumento cu a bira conocí como e “memorial di Gayo.” Otronan, sin embargo, ta interpretá e resultadonan dje cobamentunan basta diferente, mustrando cu e promé cristiannan a presta poco atencion n’e entiero di nan mortonan i cu asta si Pedro a ser matá ei, e recuperacion di su cadaver lo ta masha improbabel. (Mira cuadro, na página 29.)

Tin esnan cu no ta di acuerdo cu e “memorial di Gayo” (si esei ta loke a ser hañá) ta un graf. Nan ta kere cu e ta un monumento lantá na onor di Pedro cerca dje fin dje segundo siglo i cu mas despues el “a yega di ser considerá como un monumento di graf.” Sin embargo, segun e teólogo Oscar Cullmann, “e cobamentunan vaticano no ta identificá e graf di Pedro absolutamente.”

Kico dje wesunan? Mester bisa cu di unda e wesunan realmente a bini ainda ta un enigma. Desde e promé siglo tabatin un santana pagano grandi riba loke awor ta e Ceru di Vaticano, cantidad di restonan humano a ser derá den e área i hopi a ser recobrá caba. E inscripcion incompleto (probablemente di siglo cuater) cu algun ta bisa ta identificá e lugá den cua e relikianan a ser hañá como e graf dje apostel, kisas, a lo mehor, ta referí “n’e supuesto presencia dje wesunan di Pedro.” Ademas, hopi epigrafista (hende cu ta studia inscripcion) ta di opinion cu e inscripcion por a asta nificá cu “Pedro no ta aki.”

Un ‘Tradicion Inconfiabel’

“E fuentenan mas promé i mas confiabel no ta mencioná e lugá di [Pedro su] martirio, pero entre e fuentenan mas despues i ménos confiabel tin un acuerdo en berdad cu esei tabata e área vaticano,” historiador D. W. O’Connor ta bisa. P’esei e búskeda pa Pedro su graf den Vaticano tabata basá riba tradicionnan inconfiabel. “Ora relikianan a bira di gran importancia,” O’Connor ta afirmá, “cristiannan a cuminsá kere sinceramente cu e [memorial] di Pedro en realidad a indicá e lugá exacto di su graf.”

E tradicionnan aki a desaroyá huntu cu e veneracion no-bíblico di relikia. For di siglo tres i cuater bai ariba, vários centro eclesiástico a usa relikia, berdadero i falsu​—⁠i no sin bentaha económico​—⁠den e lucha pa alcansá supremacia “spiritual” i pa promové nan mes autoridad. Pues, convencí cu e restonan di Pedro tabatin podernan milagroso, peregrinonan tabata biaha pa su supuesto graf. Na fin di siglo seis, creyentenan tabatin e custumber di tira pidanan di material cuidadosamente pisá riba e “graf.” “Notablemente,” un relato contemporáneo a bisa, “si e fe dje solicitante ta firme, ora e paña ta ser recuperá for dje graf, lo e ta yen di birtud divino i lo pisa mas cu e tabata pisa anteriormente.” Esaki ta indicá e grado di credulidad cu hende tabatin e tempu ei.

Durante siglonan, leyendanan manera esaki i tradicionnan sin ningun base a contribuí considerablemente n’e crecementu dje prestigio di Basílica di Vaticano. Sin embargo, diferencianan di opinion a lanta. Den siglo 12 i 13, e waldensenan (secta den sur di Francia) a condená e exageracionnan aki i, mediante Bijbel, a splica cu Pedro nunca a bai Roma. Siglonan despues, exponentenan dje reformacion protestant tabatin un argumento similar. Den siglo 18, filósofonan famoso a considerá e tradicion sin base, tantu históricamente como bíblicamente. Escolásticonan capas, tantu católico como otronan, ta compartí e mésun punto di bista, te n’e dia djawe.

Pedro A Muri den Roma?

Pedro, un humilde piscadó galileo, siguramente no a carga ningun idea di prominencia riba e ancianonan den e congregacion cristian di promé siglo. Mas bien, el a describí su mes como “un co-anciano.” (1 Pedro 5:​1-6, Revised Standard Version) E figura humilde di Pedro ta para na contraste cu e ambiente di exhibicion grandioso di su supuesto graf, manera cualkier bishitante na Basílica di Vaticano por mira.

Afin di imponé su supremacia riba otro denominacionnan cristian, e Iglesia Católico a preferá di aprobá e tradicion ‘mas despues i ménos confiabel’ cu ta bisa cu Pedro a biba pa un tempu den Roma. Ma pa straño cu por parce, otro tradicionnan antiguo a considerá cu su sitio di entiero no tabata den Vaticano, sino otro caminda den Roma. Sin embargo, pakico no pega na e echonan registrá den Bijbel, e único fuente di informacion directo tocante Pedro? For dje Palabra di Dios ta claro cu, den obedencia n’e direccionnan cu el a ricibí for dje cuerpo gobernante dje congregacion cristian den Jerusalem, Pedro a efectuá su trabou den e parti oriental dje mundu antiguo, incluyendo Babilonia.​—⁠Galatio 2:​1-9; 1 Pedro 5:13; compará cu Echo 8:14.

Ora apostel Pablo a skirbi e cristiannan den Roma, rond di 56 E.C., el a saludá rond di 30 miembro dje congregacion ei sin sikiera mencioná Pedro. (Romano 1:​1, 7; 16:​3-23) Anto, entre 60 pa 65 E.C., Pablo a skirbi seis carta for di Roma, pero sin mencioná Pedro​—⁠evidencia circunstancial fuerte cu Pedro no tabata einan.a (Compará cu 2 Timoteo 1:​15-17; 4:11.) Pablo su actividad den Roma ta ser describí na fin dje buki di Echo, pero atrobe, ningun referencia ta ser hací na Pedro. (Echo 28:​16, 30, 31) Consecuentemente, un examinacion obhetivo dje evidencia bíblico, liber di tur prehuicio, por hiba solamente n’e conclusion cu Pedro no a predicá den Roma.b

E “prominencia” dje papa ta basá riba tradicionnan inconfiabel i aplicacion trocí di textonan. Jesus, no Pedro, ta e fundeshi di cristianismo. ‘Cristo ta e cabes dje congregacion,’ Pablo ta bisa. (Efesio 2:​20-22; 5:⁠23) Tabata Jesucristo kende Jehova a manda pa bendicioná i salba tur esnan cu tin fe.​—⁠Juan 3:16; Echo 4:12; Romano 15:29; mira tambe 1 Pedro 2:​4-8.

Tur esnan, anto, cu ta biaha pa loke nan sinceramente ta kere ta e graf di Pedro afin di ‘topa su sucesor’ ta enfrentá cu e problema di sea aceptá ‘tradicion inconfiabel’ of kere e Palabra di Dios digno di confiansa. Siendo cu cristiannan kier pa nan adoracion ta aceptabel pa Dios, nan ta ‘mira atentamente n’e Perfeccionador di nan fe, Jesus,’ i n’e ehempel perfecto cu el a laga pa nos sigui.​—⁠Hebreo 12:2; 1 Pedro 2:21.

[Footnotes]

[Box on page 29]

“E cobamentu no a revelá un rastro sigur di un graf bou dje Aedícula; ni tampoco por tin cualkier siguridad cu San Pedro su curpa hamas a ser recuperá for dje ehecutornan p’e comunidad cristian dun’é un entiero. Segun e proceder normal, e curpa di un hende straño (peregrino), i den bista dje sistema legal, un criminal comun i coriente, por a wel ser tirá den e Tiber. . . . Ademas lo no tabatin e mésun interes den e preservacion di relikianan corporal n’e fecha trempan aki manera tabatin despues, ora creencia den e fin inminente dje mundu a desvanecé i e culto di mártirnan a cuminsá haci su aparicion. P’esei, e posibilidad cu San Pedro su curpa, en berdad, no a ser recuperá pa entiero ta unu real.”​—⁠The Shrine of St. Peter and the Vatican Excavations, di Jocelyn Toynbee i John Ward Perkins.