Bo A Animá un Hende Ultimamente?

ELENA tabatin solamente 17 aña di edad ora dokternan a constatá cu e tabatin cancer na ovario. Su mama, Mari, tabatin cu pasa den e angustia di mira Elena den un dolor insoportabel.

Cu tempu, Elena a ser transferí na un hospital na Madrid, Spaña, 1.900 kilometer for di su cas n’e Islanan Canario. Na Madrid un ekipo di dokternan tabata dispuesto pa operá sin sanger. (Echo 15:​28, 29) Pero djis despues cu e operacion a cuminsá, a bira bisto cu Elena su condicion finalmente lo a hiba na su morto. E cancer a plama rond su curpa caba, i e ciruhanonan no por a haci masha cos. Elena a muri ocho dia despues cu el a yega Madrid.

Mari no tabatin cu enfrentá e experencia teribel ei su so. Riba nan propio gastu, dos anciano cristian a compañá e i su yu homber mayor pa Madrid i a keda ei te na morto di Elena. “Nan a yudá mi yena e bashí teribel cu mi a sinti paden,” Mari ta splica. “Hamas lo mi lubidá e animacion cu nan a duná mi. Nan sosten spiritual i yudansa práctico tabata baliosísimo. Nan tabata un berdadero ‘lugá di sconde for di bientu.’ ”​—⁠Isaías 32:​1, 2.

Jehova ta contentu cu wardadornan amoroso manera esakinan ta percurá pa su carnénan asina tiernamente. (Proverbio 19:17; 1 Pedro 5:​2-4) Sin embargo, dunamentu di animacion, no ta un privilegio di solamente ancianonan. Tur cristian ta reuní huntu pa ricibí instruccion spiritual i pa ‘animá un e otro.’ (Hebreo 10:​24, 25) Animacion ta un parti esencial di asociacion cristian.

Kico Animacion Ta Enbolbé?

Mescos cu un flor bunita ta maria ora e no haña awa, asina individuonan​—⁠tantu den e famia como den e congregacion​—⁠por marchitá debí na falta di animacion. N’e otro banda, animacion oportuno por fortalecé esnan cu ta enfrentá tentacion, lanta e spiritu di esnan deprimí i yena esnan cu ta sirbi Dios fielmente cu vigor.

E palabra griego traducí como “animacion” ta incluí e idea di consolá, spierta i aliviá. P’esei, animacion no ta limitá na bisa un hende cu e ta haciendo bon. E por enbolbé tambe proveé asistencia práctico i yudansa spiritual.

En realidad, e palabra griego traducí como “animacion” ta nificá literalmente “invitacion pa ta den presencia di un persona.” Canando lado a lado cu nos rumannan spiritual ta permití nos duna apoyo inmediato si un di nan mester cansa of trompecá. (Eclesiastes 4:​9, 10) Interesantemente, Jehova su pueblo “ta sirbi’é scouder cu scouder.” (Sofonías 3:⁠9) I apostel Pablo a yama un cierto cristian un “berdadero compañero di yugo.” (Filipense 4:⁠3) Trahando huntu bou dje mésun yugo dor di sirbi scouder cu scouder ta haci e carga mas leve, specialmente pa esnan cu no ta spiritualmente fuerte.​—⁠Compará cu Mateo 11:⁠29.

Nan A Duna Animacion

Siendo cu animacion ta asina importante, laga nos considerá algun ehempel bíblico di dje. Ora Moises e profeta di Dios tabata yegando n’e fin di su bida, Jehova a asigná Hosué pa ta e lider dje israelitanan. Esaki no tabata un asignacion fácil, manera Moises mes tabata sa hopi bon. (Número 11:​14, 15) P’esei, Jehova a bisa Moises pa “comisioná Hosué i anim’é i fortales’é.”​—⁠Deuteronomio 3:⁠28.

Durante e tempu dje huesnan di Israel, e yu muher di Jefte boluntariamente a cumpli cu e voto di su tata dor di renunciá e posibilidad di tin un famia afin di sirbi n’e santuario di Jehova. Su sacrificio a ser pasá por haltu? No, pasobra Hues 11:40 ta bisa: “Di aña pa aña e yu muhernan di Israel tabata bai pa duna encomendacion n’e yu muher di Jefte e galaadita, cuater dia den e aña.” E bishitanan ei mester tabata masha animador p’e yu muher di Jefte kende a haci sacrificio propio.

Dunamentu di animacion tin biaha ta rekerí curashi. Durante apostel Pablo su promé biahe misional, el a topa cu oposicion feros den diferente stad di Asia Menor. El a ser expulsá for di Antiokia, por poco a ser ehecutá na Iconio, i a ser piedrá i lagá pa morto na Listra. Sin embargo, djis despues Pablo i su compañénan a regresá n’e stadnan aki, “fortaleciendo e almanan dje disipelnan, animando nan pa permanecé den e fe i bisando: ‘Nos mester drenta den e reino di Dios atrabes di hopi tribulacion.’ ” (Echo 14:​21, 22) Pablo tabata dispuesto pa risca su bida pa animá e disipelnan nobo aki.

Sin embargo, disipelnan nobo no ta e único cristiannan cu mester di animacion. Añanan despues Pablo a experenciá un biahe trabahoso pa Roma, unda lo el a ser someté na huicio. Segun cu el a acercá su destinacion, e por tabata un tiki desanimá. Pero ora el a yega na un punto, 74 kilometer zuidoost di Roma, su ánimo a lanta. Pakico? Pasobra rumannan for di Roma a bini pa top’é n’e Plasa di Mercado di Apio i Tres Taberna. “Ora el a haña bista di nan, Pablo a gradicí Dios i a cobra ánimo.” (Echo 28:15) Na ocasionnan similar, nos presencia so caba por ta masha animador pa compañénan creyente.

Probechá di Oportunidadnan pa Duna Animacion

En berdad hopi ta e oportunidadnan pa duna animacion. Bo curason a ser conmoví dor di un bon parti di studiante cu un ruman homber of muher a duna den e Scol di Ministerio Teocrático? Bo ta contentu cu tin tienernan spiritualmente fuerte den e congregacion? E awante di esnan di edad a impresioná bo? Bo a admirá e manera cu un dje pioneronan a usa e Bijbel den e ministerio di cas-pa-cas? Anto duna encomendacion, i bisa algu animador.

Animacion ta hunga un papel vital den e famia i tambe den e congregacion. E por yuda mayornan cria nan yunan “den e disiplina i reglamentu mental di Jehova.” (Efesio 6:⁠4) Bisando un yu cu el a haci bon, i splicando pakico, por ta masha animador! Durante e añanan di adolesencia, ora hóbennan ta enfrentá hopi tentacion i presion, animacion constante ta vital.

Falta di animacion durante hubentud por ta bastante perhudicial. Michael, un anciano cristian actualmente, ta amigabel, pero e ta bisa: “Mi tata nunca a yega di bisá mi cu mi a haci algu bon. Pues mi a crece cu un falta di balor propio. . . . Aunke mi tin 50 aña di edad awor, ainda mi ta apreciá ora mi amigunan sigurá mi cu mi ta haciendo un bon trabou como anciano. . . . Mi mes experencia a siñá mi con importante ta pa duna animacion na otronan, i mi ta haci tur esfuerso pa dun’é.”

Ken Mester di Animacion?

Ancianonan cristian cu ta traha duru merecé animacion. Pablo a skirbi: “Nos ta pidi boso, rumannan, pa boso respetá esnan cu ta traha duru entre boso i cu ta presidí riba boso den Señor i ta spierta boso; i pa duna nan consideracion mas cu extraordinario den amor debí na nan trabou.” (1 Tesalonicense 5:​12, 13) Ta fácil pa mira e trabou duru dje ancianonan como algu comun. Pero palabranan di aprecio sincero i animacion por haci nan carga parce mas leve.

Esnan entre nos cu ta wantando circunstancianan difícil tambe mester di animacion. “Consolá e almanan deprimí, apoyá e débilnan,” Bijbel ta consehá. (1 Tesalonicense 5:​14) Mayornan soltero, biudanan, tienernan, hende di edad, i hende enfermo ta entre esnan cu por sinti nan deprimí of spiritualmente débil de bes en cuando.

María ta un señora cristian kende su casá a bandon’é di ripiente. El a bisa: “Mescos cu Job, tabatin bes cu mi kier a muri. [Job 14:13] Pero mi no a entregá, gracias n’e animacion cu mi a ricibí. Dos anciano, cu mi conocé hopi bon, a dedicá hopi ora pa yudá mi mira e balor di sigui den sirbishi di tempu completo. I dos ruman muher comprensivo tambe a consolá mi, scuchando cu pacenshi segun cu mi a deshogá mi curason. Usando e Bijbel, nan a yudá mi mira cosnan for dje punto di bista di Jehova. Mi no sa cuantu biaha nos a lesa Salmo 55:​22, pero mi sa sí cu aplicando e texto aki, poco poco mi a recuperá mi balansa spiritual i emocional. Tur esaki a sosodé 12 aña pasá, i mi ta contentu pa bisa cu mi a sigui den sirbishi di tempu completo te awor. Mi bida ta recompensador i felis apesar di dolor emocional de bes en cuando. Mi ta convencí cu animacion durante un tempu manera esei por haci un diferencia grandi den bida di un persona.”

Algun ruman mester di animacion pasobra nan a cometé erornan i awor ta luchando pa rectificá nan. Talbes nan a ricibí reprendimentu amoroso. (Proverbio 27:⁠6) E ancianonan cu a duna e reprendimentu por ta alerto pa duna encomendacion ora nan mira cu e conseho bíblico ta ser aplicá. Nan palabranan di animacion lo tin un beneficio dobel​—⁠nan ta confirmá nan amor pa esun cu a faya, di manera cu e no ta bira “demasiado tristu” i nan ta record’é dje beneficionan di aplicá e conseho.​—⁠2 Corintio 2:​7, 8.

Un cierto anciano a cometé un eror serio i a perde su privilegio di superintendencia den e congregacion. “Ora e anuncio a ser hací tocante mi removementu como anciano, mi a pensa cu e rumannan lo a sinti nan incómodo den mi compania,” e ta bisa. “No obstante, e ancianonan a tene e motibu estrictamente confidencial i a haci tur nan esfuerso pa duná mi animacion. E resto dje congregacion di igual manera a extendé amor i compañerismo, locual definitivamente e promové mi recuperacion spiritual.”

Sea Animador

Den nos bida ocupá, ta fácil pa pasa por haltu di animacion. Pero ki beneficioso e por ta! Pa duna animacion eficas, bo mester tene dos cos na mente. Promé, pensa riba kico pa bisa, di manera cu bo animacion ta specífico. Di dos, busca e oportunidad pa acercá un persona cu ta merecé encomendacion of cu mester ser edificá.

Mas bo haci esaki, mas felis lo bo ta. Al fin i al cabo, Jesus ta sigurá nos: “Tin mas felicidad den duna cu tin den ricibí.” (Echo 20:35) Dor di animá otronan, lo bo animá bo mes. Pakico no haci’é bo meta pa duna animacion na un persona tur dia?