Jehova Su Dia Inspirador Di Temor Ta Cerca
“Un buki di recuerdo a cuminsá ser skirbí dilanti dje pa esnan den temor di Jehova i pa esnan cu ta pensa riba su nomber.”—MALAKIAS 3:16.
1, 2. Di cua dia inspirador di temor Malakías a advertí?
INSPIRADOR di temor! Ora mainta a habri dia 6 di augustus, 1945, un stad grandi a ser destruí den un ratu di ora. Rond di 80.000 morto! Dies di miles di hende mortalmente heridá! Candela intenso! E bom nuclear a haci su trabou. Con a bai cu Testigonan di Jehova durante e catástrofe ei? Tabatin solamente un Testigo den Hiroshima—encarcelá tras dje murayanan protectivo di un prison debí na su integridad cristian. E prison a basha den otro, pero nos ruman no a haña daño. Manera el a bisa, el a ser sacá cu atom bom for di prison—tal bes e único cos bon cu e bom a logra.
2 Spantoso cu e explosion dje bom ei tabata, e ta disparcé den insignificancia ora compar’é cu “e dia grandi i inspirador di temor di Jehova” cu tin djis nos dilanti. (Malakías 4:5) O, sí, tabatin dianan inspirador di temor den pasado, pero e dia aki di Jehova lo surpasá nan tur.—Marco 13:19.
3. Ki contraste por ser notá entre “tur carni” i Noe su famia yegando mas cerca dje Diluvio?
3 Den tempu di Noe, “tur carni a ruiná nan caminda riba e tera,” i Dios a declará: “E tera ta yen di violencia como resultado di nan; i awor mi ta bai ruiná nan huntu cu e tera.” (Génesis 6:12, 13) Manera Mateo 24:39 ta bisa, Jesus a bisa cu e pueblo “no a haci caso sino te ora e diluvio a bini i a hiba nan tur.” Pero fiel Noe, “un predicador di husticia,” a sobrebibí e Diluvio ei, huntu cu su famia temeroso di Dios.—2 Pedro 2:5.
4. Ki ehempel spiertador Sódoma i Gomora ta percurá?
4 “Asina tambe,” Hudas 7 ta relatá, “Sódoma i Gomora i e stadnan rond di nan, despues cu nan . . . a cometé fornicacion excesivamente i a bai tras di carni pa uso innatural, ta poní dilanti nos como un ehempel spiertador ora nan a sufri e castigu hudicial di candela eterno.” E hendenan malbado ei a perecé debí na nan estilo di bida repugnantemente sushi. Laga esaki ser un spiertamentu p’e comunidadnan dje mundu moderno aki loco tras di sex! Sin embargo, ripará cu Lot temeroso di Dios i su yu muhernan a ser preservá cu bida durante e catástrofe ei, mescos cu Jehova su adoradornan lo ser protehá durante e tribulacion grandi cu ta acercando rápidamente.—2 Pedro 2:6-9.
5. Kico nos por siña for dje huicionan cu a ser ehecutá riba Jerusalem?
5 Anto considerá e ehempelnan spiertador cu a ser percurá ora Jehova a usa ehércitonan invasor pa exterminá Jerusalem, e stad glorioso cu un tempu tabata “e exaltacion di henter e tera.” (Salmo 48:2) E sucesonan trágico aki a tuma lugá, promé na 607 P.E.C. i atrobe na 70 E.C., pasobra e pueblo scogí di Dios a bandoná adoracion berdadero. Felismente, sirbidornan leal di Jehova a sobrebibí. E desaster di 70 E.C. (ilustrá abou) ta ser describí como “un tribulacion tal como no a sosodé desde principio di creacion cu Dios a crea te n’e tempu ei.” El a eliminá di una bes pa semper e sistema di cosnan hudiu apóstata, i siguramente den e sentido ei ‘lo e no sosodé atrobe.’ (Marco 13:19) Pero asta e ehecucion aki di huicio divino tabata simplemente un sombra di “e tribulacion grandi” cu awor ta menasá henter e sistema mundial di cosnan.—Revelacion 7:14.
6. Pakico Jehova ta permití calamidadnan?
6 Pakico Dios ta permití calamidadnan teribel, cu pérdida di asina tantu bida? Den e caso di Noe, di Sódoma i Gomora i di Jerusalem, Jehova tabata ehecutando huicio riba esnan cu a ruiná nan caminda riba e tera, cu a mancha e bunita planeta aki cu polucion literal i degradacion moral, i cu a bira apóstata i a bai for dje adoracion berdadero of a rechas’é. Awe nos ta pará riba e drempel di un ehecucion di huicio cu lo incluí henter e mundu.—2 Tesalonicensenan 1:6-9.
“Den e Ultimo Dianan”
7. (a) Di kico e huicionan divino di tempu antiguo tabata profético? (b) Ki prospecto glorioso tin den futuro?
7 E destruccionnan ei di tempu antiguo tabata profético p’e tribulacion grandi inspirador di temor describí na 2 Pedro 3:3-13. E apostel ta bisa: “Boso sa esaki promé, cu den e último dianan lo bini mofadornan cu nan mofa, andando segun nan mes deseonan.” Anto, enfocando riba e dia di Noe, Pedro ta skirbi: “E mundu dje tempu ei a sufri destruccion ora el a ser inundá cu awa. Pero pa e mésun palabra cielu i tera cu ta di awor ta ser wardá pa candela i ta ser reservá p’e dia di huicio i di destruccion di hende malbado.” Siguiendo despues dje tribulacion ei di mas grandi di tur, e mando di Reino di Mesías tan sperá lo un haña dimension nobo—“cielu nobo i un tera nobo . . . , i den eseinan husticia lo biba.” Ki un prospecto gososo!
8. Con sucesonan di mundu ta marchando pa un culminacion?
8 Durante nos siglo 20, sucesonan mundial a marcha progresivamente na un culminacion. Aunke e destruccion di Hiroshima no tabata Dios su dia di inspeccion, e por ser incluí den e “esenanan spantoso” cu Jesus a profetisá di dje p’e tempu di fin. (Lucas 21:11) El a lansa un menasa nuclear cu ainda ta cologá manera un nubia di tormento riba humanidad. Pues, un titular den The New York Times di 29 di november, 1993, ta bisa: “E Skopetnan Por Ta un Poco Frusá pero e Armanan Nuclear sí Ta di Pólish Ainda.” Miéntras tantu, gueranan internacional, interracial i entre tribu ta sigui haña un cosecha horibel. Den gueranan di pasado e gran mayoria di víctimanan tabata entre e soldatnan. Awe, segun informe, 80 porciento di víctimanan di guera ta civilnan, pa no mencioná mes e miyones di hendenan cu ta hui for di nan patria como refugiado.
9. Con lidernan religioso a manifestá amistad cu e mundu?
9 Lidernan religioso hopi biaha a mustra, i ta sigui mustra, “amistad cu e mundu” dor di enbolbé nan mes activamente den gueranan i revolucionnan sangriente. (Santiago 4:4) Algun a colaborá cu hombernan influente golos dje mundu comercial ya cu esakinan ta producí arma masalmente i ta edificá imperionan di droga. Por ehempel, informando dje asesinato di un magnate sur-americano den droga, The New York Times a declará: “Scondiendo su negoshi di droga tras di pretensionnan di prosperidad comercial legítimo i e imágen di un benefactor, e tabata patrociná su mes programa di radio i hopi biaha tabata compañá pa sacerdotenan católico romano.” The Wall Street Journal a informá cu ademas di ruiná bida di miyones di hende cu a bira drogadicto, e magnate di droga aki personalmente a dirigí e asesinato di miles di persona. The Times di Londen a remarcá: “E asesinonan hopi biaha ta paga pa haci un misa special di gradicimentu . . . n’e mésun tempu cu e misa di entiero dje víctima ta tumando lugá un otro caminda.” Ki un maldad!
10. Con nos mester mira e empeoramentu di condicionnan di mundu?
10 Ken sa ki ruina mas hombernan inspirá pa demoño lo causa riba e tera aki! Manera 1 Juan 5:19 ta declará, “henter e mundu ta drumi den e poder dje malbado,” Satanas e Diabel. Awe ta “ai dje tera i di laman, pasobra e Diabel a baha cerca boso, masha rabiá, sabiendo cu ta ked’é poco tempu mas.” (Revelacion 12:12) Sin embargo, felismente, Romanonan 10:13 ta garantisá nos cu “tur cu inbocá e nomber di Jehova lo ser salbá.”
Dios Ta Acercá den Huicio
11. Ki condicionnan den Israel a haci Malakías duna su profecia?
11 En cuanto e futuro inmediato di humanidad, e profecia di Malakías ta tira lus riba loke ta cerca di sosodé. Malakías tabata e último den e fila largu di profetanan hebreo antiguo. Israel a experenciá e desolacion di Jerusalem na 607 P.E.C. Pero 70 aña despues Jehova a manifestá su misericordioso bondad amoroso restorando e nacion ei na su tera. Sin embargo, den ménos cu cien aña, Israel atrobe tabata drif bai den apostasia i maldad. E pueblo tabata desonrando Jehova su nomber, ignorando su leynan hustu i contaminando su tempel dor di trece animalnan ciegu, coho i enfermo pa sacrificio. Nan tabata divorciá e esposanan di nan hubentud di manera cu nan por a casa cu muhernan stranhero.—Malakías 1:6-8; 2:13-16.
12, 13. (a) Ki purificacion tabata necesario p’e clase sacerdotal ungí? (b) Con e multitud grandi tambe ta beneficiá dje limpiamentu?
12 Un trabou di purificacion tabata necesario. E ta ser describí na Malakías 3:1-4. Mescos cu Israel di antigua, Jehova su Testigonan di tempu moderno mester a ser limpiá, pues e trabou di purificacion cu Malakías a describí por ser aplicá na nan. Segun cu e promé guera mundial a yega na su fin, algun dje Studiantenan di Bijbel, manera e Testigonan a ser yamá e tempu ei, no a mantené neutralidad estricto den asuntunan di mundu. Na 1918, Jehova a manda Su “mensahero dje pacto,” Cristo Jesus, n’e areglo di Su tempel spiritual pa limpia e grupo chikitu di Su adoradornan for di manchanan mundano. Proféticamente, Jehova a puntra: “Ken lo ta soportando e dia di [e mensahero] su binida, i ken lo ta esun riba pia ora e aparecé? Pasobra lo e ta manera e candela di un refinador i manera e ‘loog’ [habon alkalina] dje labanderonan. I e tin cu sinta como refinador i limpiador di plata i e tin cu limpia e yunan di Levi [grupo sacerdotal ungí]; i e tin cu clarificá nan manera oro i manera plata, i nan siguramente lo bira pa Jehova personanan cu ta presentá un ofrenda di regalo den husticia.” Como un pueblo purificá, nan a haci exactamente esei!
13 E cantidad dje grupo sacerdotal ungí ei ta solamente 144.000. (Revelacion 7:4-8; 14:1, 3) Pero, kico di otro cristiannan dedicá awe? Aumentando awor na miyones, esakinan ta forma “un multitud grandi” cu tambe mester ser limpiá di camindanan mundano, ‘labando nan bistí largu i haciendo nan blancu den e sanger dje Lamchi.’ (Revelacion 7:9, 14) Pues, eherciendo fe den e sacrificio di rescate dje Lamchi, Cristo Jesus, nan ta capas pa mantené un posicion limpi dilanti Jehova. Nan ta ser primintí sobrebibencia atrabes di henter e tribulacion grandi, Jehova su dia inspirador di temor.—Sofonías 2:2, 3.
14. Cua palabranan e pueblo di Dios mester haci caso di dje awe segun cu nan ta sigui cultivá e personalidad nobo?
14 Huntu cu e resto sacerdotal, e multitud grandi aki mester haci caso dje palabranan di Dios cu ta sigui: “Lo mi acercá boso p’e huicio, i lo mi bira un testigo velos contra e tovenarnan i contra e adúlteronan, i contra esnan cu ta hura falsamente, i contra esnan cu ta actua fraudulentamente cu e salario di un trahador cu ta ricibí salario, cu e biuda i cu e huérfano di tata, i esnan cu ta apartá e residente stranhero, miéntras cu nan no a tem’é mi . . . Pasobra ami ta Jehova; mi no a cambia.” (Malakías 3:5, 6) No, Jehova su normanan no ta cambia, pues den temor di Jehova, su pueblo awe mester rechasá tur clase di idolatria i ser onesto i generoso segun cu nan ta sigui cultivá e personalidad cristian.—Colosensenan 3:9-14.
15. (a) Ki invitacion misericordioso Jehova ta extendé? (b) Con nos por evitá di “horta” Jehova?
15 Jehova ta extendé un invitacion na tur persona cu por a desviá for di su camindanan hustu, bisando: “Bolbe na mi, i ami lo bolbe na boso.” Si esakinan puntra: “Den ki manera nos lo bolbe?” e ta contestá: “Boso ta hortando mi.” I contestando e siguiente pregunta: “Den ki manera nos a hortá bo?” Jehova ta declará cu nan a hort’é dor di no a trece lo mihó di nan como ofrenda pa su sirbishi di tempel. (Malakías 3:7, 8) Despues di a bira parti dje pueblo di Jehova, nos en berdad mester kier dedicá e mihó parti di nos energia, abilidad i propiedad material p’e sirbishi di Jehova. Asina, en bes di horta Dios, nos ‘ta sigui busca promé e reino i su husticia.’—Mateo 6:33.
16. Ki animacion nos ta haña na Malakías 3:10-12?
16 Tin un gran recompensa pa tur cu ta rechasá e mundu su manera materialista i di satisfaccion propio manera Malakías 3:10-12 ta indicá: “ ‘Probá mi, por fabor, en cuanto esaki,’ Jehova di ehércitonan a bisa, ‘si mi no ta habri pa boso e portanan di cielu i realmente basha riba boso un bendicion te cu no tin mas necesidad.’ ” Na tur esnan apreciativo, Jehova ta primintí prosperidad spiritual i productividad. E ta agregá: “Tur e nacionnan lo tin cu pronunciá boso felis, pasobra boso mes lo bira un tera di deleite.” Esei no a resultá di ta e caso entre e miyones di Dios su pueblo agradecidu rond e tera awe?
Wardadornan di Integridad den e Buki di Bida
17-19. (a) Con e disturbio na Ruanda a afectá nos rumannan ei? (b) Cu ki conviccion tur e fiel rumannan aki a sigui padilanti?
17 N’e punto aki, nos por comentá riba e integridad di nos rumannan di Ruanda. Semper nan a trece e ofrendanan spiritual di mas excelente na Jehova su cas di adoracion spiritual. Por ehempel, na nan Congreso di Districto “Siñansa Divino” na december 1993, nan 2.080 publicadornan di Reino a cosechá un asistencia total di 4.075 persona. Tabatin 230 Testigo nobo bautisá, i di esakinan, casi 150 a inscribí den e sirbishi di pionero auxiliar e siguiente luna.
18 Ora odio étnico a explotá na april 1994, por lo ménos 180 Testigo, incluyendo e superintendente di stad na Kigali, e capital, i henter su famia, a ser matá. E seis traductornan n’e oficina di Watch Tower Society na Kigali, di cua cuater di nan tabata hutu i dos tutsi, a sigui traha pa vários siman bou di menasanan serio, te ora e dos tutsinan tabatin cu hui, solamente pa ser matá na un punto di control. Finalmente, cargando loke a sobra di nan aparatonan di computer, e cuaternan cu a sobra a hui pa Goma, na Zaire, unda nan a sigui traducí lealmente E Toren di Vigilancia n’e idioma kinyarwanda.—Isaías 54:17.
19 E refugiadonan Testigo aki, aunke nan tabata den circunstancianan deplorabel, semper a pidi pa alimento spiritual promé cu provisionnan material. Cu hopi sacrificio, rumannan amoroso for di vários pais tabata capas pa manda suministro pa nan. Verbalmente i pa medio di nan bon conducta bou di tension, e refugiadonan aki a duna un testimonio maraviyoso. Nan en berdad a sigui trece lo mihó di nan na Jehova su adoracion. Nan a demostrá un conviccion manera esun di Pablo, expresá na Romanonan 14:8: “Si nos biba, nos ta biba pa Jehova, i si nos muri, nos ta muri pa Jehova. P’esei, tantu si nos biba como si nos muri, nos ta pertenecé na Jehova.”
20, 21. (a) Kendenan su nomber no ta skirbí den Jehova su buki di recuerdo? (b) Kendenan su nomber ta aparecé den e buki, i pakico?
20 Jehova ta tene un registro di tur persona cu ta sirbi’é den integridad. Malakías su profecia ta sigui: “N’e tempu ei esnan cu tabata den temor di Jehova a papia un cu otro, cada un cu su compañé, i Jehova a sigui presta atencion i scucha. I un buki di recuerdo a cuminsá ser skirbí dilanti dje pa esnan den temor di Jehova i pa esnan cu ta pensa riba su nomber.”—Malakías 3:16.
21 Ta ki importante awe pa nos demostrá temor piadoso den onra Jehova su nomber! Haciendo esei, nos lo no haña un huicio desfaborabel, mescos cu esnan cu di un manera sorprendente ta sostené e sistemanan dje mundu aki. Revelacion 17:8 ta relatá cu “nan nomber no a ser skirbí den e rol di bida.” Lógicamente, e nomber di mas eminente skirbí den Jehova su buki di bida ta esun dje Agente Principal di bida, Dios su propio Yu, Jesucristo. Mateo 12:21 ta declará: “En berdad, den su nomber nacionnan lo spera.” Jesus su sacrificio di rescate ta garantisá bida eterno pa tur cu ehercé fe den dje. Ta ki un privilegio pa haña nos nomber individual agregá na Jesus su nomber den e rol ei!
22. Ki distincion lo ta bisto ora Jehova ehecutá huicio?
22 Con lo para cu sirbidornan di Dios den e huicio? Jehova ta contestá na Malakías 3:17, 18: “Lo mi mustra compasion na nan, mescos cu un homber ta mustra compasion na su yu homber cu ta sirbi’é. I boso siguramente lo mira atrobe e distincion entre un hustu i un malbado, entre un cu ta sirbi Dios i un cu no a sirbi’é.” E division lo ta bisto pa tur hende: e malbadonan, separá pa cortamentu eterno i e hustunan, aprobá pa bida eterno den e dominio dje Reino. (Mateo 25:31-46) Pues un multitud grandi di personanan semehante di carné lo sobrebibí e dia grandi i inspirador di temor di Jehova.
Bo Ta Corda?
◻ Ki huicionan Jehova a ehecutá den tempunan bíblico?
◻ Con condicionnan awe ta paralelo cu esnan di tempunan antiguo?
◻ Ki purificacion a tuma lugá na cumplimentu cu e profecia di Malakías?
◻ Kendenan su nomber ta skirbí den e buki di recuerdo di Dios?