Nan A Reuni Huntu Como Alabadornan Gososo

JEHOVA DIOS su pueblo antiguo a ser mandá pa “bira nada sino gososo,” ora nan a reuní huntu pa adoracion. (Deuteronomio 16:15) E Congresonan di Districto “Alabadornan Gososo” di 1995/96 siguramente a duna Testigonan di Jehova bon motibu pa goso.

For di ora e seri di congresonan aki a cuminsá, nan a edificá fe. Tambe nan a mustra con pa haña goso den un mundu sin goso. Laga nos considerá e congreso dia pa dia.

‘Boso Alabá Jehova . . . Sea Gososo!’

E tema mencioná ariba dje promé dia di congreso tabata basá riba Salmo 149:1, 2. E discurso “Nos Tin Motibu pa Sclama di Goso” a examiná e aplicacion dje profecia den Isaías capitulo 35. E tabatin un cumplimentu den Israel di antigwedad i specialmente den nos tempu cu e restoracion di adoradornan di Jehova na prosperidad i salú den un paradijs spiritual. Pues, esnan cu a asistí n’e congreso tabatin motibu pa sclama di goso riba loke Dios a proponé pa su pueblo den un paradijs spiritual i den e binidero Paradijs terenal asina cerca.

E discurso clave, “Apartá Como Alabadornan Gososo Mundialmente,” a contestá e pregunta: Kico ta apartá nos for dje mundu aki? Esei ta nos adoracion uní di Jehova. Sin importá unda Testigonan di Jehova ta biba riba e tera aki, nan ta papia i ta siña di comun acuerdo. Tambe, nan ta alegrá den Jehova su magnífico propósito pa santificá su nomber santu i pa vindicá su soberania pa medio di su Reino. Sin embargo, con Jehova ta yuda nos haña un lugá den su propósito? El a confia nos cu e berdad di su Palabra santu. Dios a duna nos su spiritu santu. El a bendicioná nos cu un hermandad mundial i un areglo pa adoracion puru. Nos famia internacional ta yuda nos sirbi Jehova cu gran goso di curason.

E tema “Kedando Separá i Sin Mancha dje Mundu” a enfatisá e necesidad pa evitá e manchanan di parcialidad i distincion di clase. (Santiago 2:5-9) Algun persona kisas ta socialisá solamente cu esnan di un antecedente of posicion financiero similar cu di nan, neglishando compañeronan cristian cu ta pober of cu ta den circunstancianan desbentahoso. Otronan kisas tin tendencia di faborecé esnan cu tin posicionnan di responsabilidad den e congregacion. Nan ta lubidá cu e mayor privilegio cu cualkier hende por tin ta esun di ser un Testigo di Jehova. P’esei, nos no mester permití tendencianan mundano mancha nos i desbaratá e pas dje congregacion.—2 Pedro 3:14.

E discurso “Mi Ta Prepará pa Casa?” a señalá cu hopi hende ta casa muchu lihé. Algun ta casa pa scapa di un situacion difícil na cas of pa motibu cu nan pareunan ta casando. Sin embargo, motibunan válido pa matrimonio ta incluí un deseo mutuo pa sigui tras di metanan teocrático, berdadero amor, un necesidad pa compañerismo i siguridad, i e deseo pa lanta yunan. Entrenamentu spiritual ta esencial den preparacion pa matrimonio. Entre otro cosnan, tin un necesidad pa cultivá cualidadnan deseabel dor di bisti e personalidad nobo. Tambe ta sabí pa haci sigur si un partner prospectivo ta duna evidencia di tin un berdadero relacion cu Jehova i cu e ta trata otronan cu respet. Buscando conseho for di cristiannan maduro tambe ta sabí.—Proverbionan 11:14.

Despues dje consideracion informativo aki a sigui unu titulá “Mayornan Cu Ta Haña Goso den Nan Yunan.” Nacementu di un yu generalmente ta un tempu di gran alegria. Sin embargo, hañamentu di yu ta trece tambe gran responsabilidad. (Salmo 127:3) Pues, ta importante pa yunan ser siñá pa stima Jehova. Mayornan por haci esaki dor di papia regularmente tocante Jehova cu nan yunan i dor di aplicá e principionan di su Palabra den e famia.

E promé dia dje congreso a terminá cu un sorpresa—presentacion dje foyeto nobo Testigonan di Jehova i Educacion. E ta splica claramente cu Testigonan “ta animá nan hóbennan pa haci nan best i pa tuma na serio e tareanan cu nan ta ser asigná na scol.” Tambe e publicacion aki ta splica e resultadonan remarcabel dje programanan di alfabetisacion cu Testigonan di Jehova a conducí pa hopi aña na Nigeria, México i otro paisnan. E foyeto mester yuda educadornan mira cu nos ta duna gran importancia na educacion.

“Semper Ofrecé na Dios un Sacrificio di Alabansa”

E tema anterior dje di dos dia tabata basá riba Hebreonan 13:15. E programa di mainta a presentá un simposio riba “Respondiendo na e Yamada pa Alabá Jehova.” Edad no ta un barera pa respondé n’e yamada aki. Salmo 148:12, 13 ta urgi hóbennan, bírgennan, hombernan di edad i mucha hombernan pa alabá Jehova. Hopi di Jehova su sirbidornan gososo tabata capas pa aumentá nan alabansa. Rond mundu, mas cu 600.000 ruman ta participá den e actividad di predicacion di tempu completo, of sirbishi di pionero. Mas cu 15.000 ta enbolbí den e trabou di pionero special, i riba 15.000 ta den sirbishi di Betel.

“Sirbiendo Lealmente cu Jehova Su Organisacion” tabata un discurso cu a mustra cu lealtad ta vital pa Dios su sirbidornan. Ser leal na Jehova ta nificá pega na dje cu debocion asina fuerte cu e ta actua manera un lijm poderoso. Lealtad ta rekerí pa nos evitá di violá e mandamentunan di Bijbel deliberadamente, sea cu otronan ta mira nos of no. Tambe e ta rekerí pa nos apoyá lealmente e siñansanan di Bijbel hañá den e revistanan Toren di Vigilancia i Spierta! i tambe tur otro cuminda spiritual cu e Sociedad Watch Tower ta percurá. Despues dje discurso aki a sigui e discurso di bautismo. Tabata ki un goso ora candidatonan di bautismo a duna evidencia di nan dedicacion na Jehova!

E palabranan di Oséas 4:1-3 a establecé e patronchi p’e discurso di atardi “Birtud of Bicio—Tras di Cua Bo Ta Sigui?” Aunke e mundu su punto di bista di birtud a deteriorá, cristiannan mester haci “esfuerso diligente” pa sigui tras di excelencia moral. (2 Pedro 1:5) Esaki ta cuminsá cu con un persona ta pensa. Si su pensamentunan ta birtuoso, lo e papia palabranan limpi, sano i edificante i lo e haci esfuerso pa ser onesto den su trato cu otronan. Siguiendo tras di birtud ta enbolbé tambe haci esfuerso pa ser comprensivo i compasivo pa cu un compañero cristian cu ta sufriendo di angustia of depresion.—1 Tesalonicensenan 5:14.

Un otro discurso, “Evitá e Trampanan dje Diabel,” a spierta cristiannan contra exponé nan mes na influencianan di demoño. Den e ramo di tratamentu contra malesa, cristiannan tin cu tene cuidou cu técnicanan, manera hipnotismo, cu tin rastro di cosnan oculto. Di otro banda, loke individuonan ta haci pa cuida nan salú fisico ta un asuntu personal.

E di dos dia a terminá cu un sorpresa gososo—presentacion di un publicacion nobo tamaño di sacu diseñá pa yuda personanan di curason onrado progresá lihé na dedicacion i bautismo. E buki nobo aki di 192 página ta titulá Conocimentu cu Ta Hiba na Bida Eterno. E buki Conocimentu ta presentá e berdad den un manera edificante. E no ta concentrá mashá riba refutá doctrina falsu. Un idioma cla i desaroyo lógico mester hacié fácil pa usa e buki aki pa conducí studionan di Bijbel i yuda hende haña un gara dje conocimentu emocionante di Dios.

“Boso Alegrá i Sea Gososo pa Semper”

E palabranan aki di Isaías 65:18 tabata e tema dje di tres dia di congreso. E cumplimentu di profecia bíblico ta señalá na 1914 como e aña cu e mal sistema aki a drenta su último dianan. P’esei, e simposio di discursonan titulá “Alabadornan Gososo Durante e Conclusion dje Sistema Aki” a capta e sumo atencion dje auditorio. E oradornan a mustra con miles di miyones di hende ta ser influenciá di un manera poderoso p’e spiritu golos i violento dje mundu. Cu tempu, nan lo ser husgá como parti dje mundu di cua Satanas ta e gobernante. Pues, awor ta e tempu pa scoge. Na cua banda nos kier ta? Nos kier adorá Jehova i apoyá su soberania, of nos ta bai permití Satanas ser nos gobernante dor di haci e cosnan cu ta agrad’é? Nos tur mester tuma nos posicion inekibocablemente n’e banda di Jehova.

E discurso público dje congreso, “Alabá e Rey di Eternidad!” a duna tur persona den auditorio puntonan serio pa pensa riba. Aunke e idea di eternidad ta parce fuera di comprendimentu di hende débil, Jehova si ta comprendé esei plenamente. “Jehova ta Rey pa tempu indefiní, asta pa semper,” e salmista a canta. (Salmo 10:16) E Rey di eternidad aki a habri e caminda pa humanidad disfrutá di bida eterno mediante su Yu, Jesucristo. (Juan 17:3) “Si, como hende pecador nos por alcansá bida eterno mediante educacion divino i fe den Jesus su sacrificio di rescate,” e orador a bisa.

Segun cu e congreso tabata yegando su fin, e personanan den auditorio a ser animá dor dje discurso final, titulá “Alabá Jehova Gososamente Dia Tras Dia.” Tabata alentador pa ricibí informenan dje progreso dje trabou di haci disipel na tur parti dje tera. I esnan cu a asistí n’e congreso a ser conmoví pa ‘bendicioná Jehova henter dia i alabá su nomber pa semper.’—Salmo 145:2.

Actonan horibel i inhumano ta horta e mundu di goso. No obstante, individuonan cu pleno fe den Jehova por poseé goso piadoso. P’esei, como un hermandad mundial, Testigonan di Jehova por ripití e siguiente palabranan di Salmo 35:27, 28: “Laga esnan cu tin deleite den mi husticia sclama gososamente i alegrá, i laga nan bisa constantemente: ‘Laga Jehova ser engrandecé, kende tin deleite den e pas di su sirbidor.’ I laga mi mes lenga expresá na bos abou bo husticia, bo alabansa henter dia.”

[Plachi na página 7]

Famianan lo saca beneficio for dje foyeto “Testigonan di Jehova i Educacion”

[Plachi na página 8, 9]

E buki nobo, “Conocimentu cu Ta Hiba na Bida Eterno,” ta presentá berdadnan bíblico den un manera edificante

[Plachi na página 9]

Hopi persona a ser bautisá como símbolo di nan dedicacion na Jehova

[Plachi na página 9]

Esnan cu a asistí na e congreso a ser conmoví profundamente dor dje drama “Onrando Esnan Digno den Nan Añanan di Behes”