“Boso Alaba Jah!”

“Tur loke ta hala rosea—lagu’e alabá Jah.”—SALMO 150:6.

 1, 2. (a) Te na ki grado cristianismo berdadero a florecé den e promé siglo? (b) Ki spiertamentu delantá e apostelnan a duna? (c) Con apostasia a desaroyá?

JESUS a organisá su disipelnan den e congregacion cristian, cu a florecé den e promé siglo. Apesar di oposicion religioso amargo, e “bon nobo . . . a ser predicá den tur creacion cu ta bou di shelu.” (Colosensenan 1:23) Pero despues di morto dje apostelnan di Jesucristo, Satanas a fomentá apostasia astutamente.

² E apostelnan a duna spiertamentu delantá di esaki. Por ehempel, Pablo a bisa e ancianonan di Efeso: “Presta atencion na boso mes i na tur e tou, entre cua e spiritu santu a nombra boso como superintendente, pa pastoreá e congregacion di Dios, cu el a cumpra cu e sanger di su mes Yu. Mi sa cu despues di mi baimentu lobonan opresivo lo drenta entre boso i lo no trata e tou cu ternura, i di entre boso mes lo lanta hombernan i papia cosnan trocí pa lastra disipel tras di nan mes.” (Echonan 20:28-30; mira tambe 2 Pedro 2:1-3; 1 Juan 2:18, 19.) Asina, den siglo cuater, cristianismo apóstata a cuminsá uni forsa cu e Imperio Romano. Algun siglo mas despues, e Imperio Romano Santu, cu lasonan cu papa di Roma, a bin reina riba un seccion grandi di humanidad. Cu tempu, e Reformacion Protestant a rebelá contra e excesonan malbado di Iglesia Católico, pero el a faya na restorá cristianismo berdadero.

 3. (a) Ki tempu i con e bon nobo a ser predicá na tur creacion? (b) Ki expectativanan basá riba Bijbel a ser realisá na 1914?

³ No obstante, segun cu e fin di siglo 19 tabata yegando cerca, un grupo sincero di studiante di Bijbel tabata ocupá atrobe predicando i extendiendo na ‘tur creacion bou di shelu e speransa dje bon nobo.’ A base di nan estudio di profecia di Bijbel, e grupo aki mas cu 30 aña padilanti a señalá na 1914 como e aña cu ta marca e fin di “e tempu señalá dje nacionnan,” un periodo di “shete tempu,” of 2.520 aña, cu a cuminsá cu e desolacion di Jerusalem na 607 P.E.C. (Lucas 21:24; Daniel 4:16) Cumpliendo cu e expectativanan, 1914 a resultá di ta un punto di cambio significativo den asuntunan di hende riba tera. Sucesonan histórico a tuma lugá den shelu tambe. Tabata n’e tempu ei cu e Rey di eternidad a instalá su Rey socio, Jesucristo, riba un trono celestial, como preparacion pa bari tur maldad for di cara dje tera aki i reestablecé Paradijs.—Salmo 2:6, 8, 9; 110:1, 2, 5.

Contemplá e Rey Mesiánico!

 4. Con Jesus a cumpli cu e nificacion di su nomber Miguel?

⁴ Na 1914 e Rey Mesiánico aki, Jesus, a cuminsá tuma accion. Den Bijbel e ta ser yamá tambe Miguel, nificando “Ken Ta Manera Dios?,” pasobra e ta determiná pa vindicá e soberania di Jehova. Manera Revelacion 12:7-12 ta bisa, apostel Juan a describí den vision loke lo sosodé: “Guera a cuminsá den shelu: Miguel i su angelnan a batayá cu e dragon, i e dragon i su angelnan a batayá pero e no a triunfá, ni un lugá no a ser hañá mas pa nan den shelu. Pues, e dragon grandi a ser tirá abou, e colebra original, esun yamá Diabel i Satanas, cu ta gañando henter e tera habitá; el a ser tirá abou n’e tera, i su angelnan a ser tirá abou huntu cuné.” Un caida poderoso en berdad!

 5, 6. (a) Despues di 1914, ki proclamacion emocionante a ser hací for di shelu? (b) Con Mateo 24:3-13 ta relacioná cu esaki?

⁵ Un bos duru den shelu a proclamá e ora ei: “Awor a sosodé e salbacion i e poder i e reino di nos Dios i e autoridad di su Cristo, pasobra e acusador di nos rumannan a ser tirá abou, cu ta acusá nan dia i anochi dilanti nos Dios! I nan [cristiannan fiel] a venc’é debí n’e sanger dje Lamchi [Cristo Jesus] i debí n’e palabra di nan testimonio, i nan no a stima nan alma ni sikiera den e peliger di morto.” Esaki ta nificá liberacion pa wardadornan di integridad, kendenan a ehercé fe den Jesus su precioso sacrificio di rescate.—Proverbionan 10:2; 2 Pedro 2:9.

⁶ E bos duru den shelu a pasa na declará: “P’e motibu aki alegrá, shelu i boso cu ta biba den dje! Ai di tera i di laman, pasobra e Diabel a baha cerca boso, masha rabiá, sabiendo cu e tin un periodo corticu di tempu.” E “ai” profetisá asina p’e tera aki a ser manifestá den e gueranan mundial, hamber, pest, temblor i maldad cu a plaga e tera den e siglo aki. Manera Mateo 24:3-13 ta relatá, Jesus a profetisá cu esakinan lo ta parti di ‘e señal dje conclusion dje sistema di cosnan.’ Cumpliendo cu profecia, desde 1914 humanidad a experenciá riba tera un ai sin igual den tur historia humano mas promé.

 7. Pakico Testigonan di Jehova ta predicá cu urgencia?

⁷ Den e era aki di ai satánico, humanidad por haña speransa pa futuro? Wel, sí, pasobra Mateo 12:21 ta bisa di Jesus: “En berdad, den su nomber nacionnan lo spera”! E condicionnan traumático entre e nacionnan ta marca no solamente ‘e señal dje conclusion dje sistema di cosnan’ sino tambe ‘e señal di Jesus su presencia’ como Rey celestial dje Reino Mesiánico. Relacioná cu e Reino ei, mas aleu Jesus ta bisa: “E bon nobo aki dje reino lo ser predicá den tur e tera habitá como un testimonio pa tur nacion; i e ora ei e fin lo yega.” (Mateo 24:14) Cua solo pueblo riba tera awe ta predicando e magnífico speransa di gobernacion dje Reino di Dios? Testigonan di Jehova! Cu urgencia, nan ta proclamá públicamente i di cas pa cas cu Dios su Reino di husticia i pas pronto lo tuma control di asuntunan dje tera. Abo ta participando den e ministerio aki? Bo no por tin un privilegio mas grandi!—2 Timoteo 4:2, 5.

Con “e Fin” Ta Yega?

 8, 9. (a) Con huicio a cuminsá “cu e cas di Dios”? (b) Con cristiandad a violá e Palabra di Dios?

⁸ Humanidad a drenta un periodo di huicio. Promé Pedro 4:17 ta informá nos cu huicio a cuminsá “cu e cas di Dios”—un huicio di organisacionnan cu ta profesá di ta cristian cu a bira evidente desde cu “e último dianan” a dal aden cu e matansa di Guera Mundial I durante 1914-1918. Con a bai cu cristiandad den e huicio aki? Wel, considerá e posicion dje iglesianan cuanan a apoyá e gueranan desde 1914. E cleronan no ta manchá cu “e marcanan di sanger dje almanan dje pobernan inocente” cu nan a animá pa bai para den liña di bataya?—Jeremías 2:34.

⁹ Segun Mateo 26:52, Jesus a declará: “Tur esnan cu saca spada lo perecé pa spada.” Ki cierto esaki tabata den e gueranan dje siglo aki! E cleronan a urgi hóbennan pa masacrá otro hóbennan, asta esnan di nan mes religion—católico matando católico i protestant matando protestant. Nacionalismo a ser exaltá riba Dios i Cristo. Recientemente, den algun nacion africano, lasonan étnico a ser poné dilanti principionan bíblico. Na Ruanda, unda mayoria dje poblacion ta católico, por lo ménos mei miyon hende a ser matá den violencia étnico. Papa a admití den e corant di Vaticano L’Osservatore Romano: “Esaki ta un exterminacion di rasa den e sentido mas completo dje palabra, pa cua desafortunadamente asta católiconan ta responsabel.”—Compará cu Isaías 59:2, 3; Mikéas 4:3, 5.

10. Ki huicio Jehova lo ehecutá riba religion falsu?

¹⁰ Con e Rey di eternidad ta mira religionnan cu ta animá hende pa mata otro of cu ta para mira man crusá miéntras cu miembronan di nan tou ta mata otro miembronan? Relacioná cu Babilonia e Grandi, e sistema mundial di religion falsu, Revelacion 18:21, 24 ta bisa nos: “Un angel fuerte a hisa un piedra manera un piedra grandi di mulina i a tir’é den laman, bisando: ‘Asina cu un tiru lihé Babilonia e stad grandi lo ser tirá abou, i lo e no ser hañá nunca mas. Sí, den dje a ser hañá e sanger dje profetanan i dje santunan i di tur esnan cu a ser matá riba tera.’ ”

11. Ki cosnan horibel a bin ta tuma lugá den cristiandad?

¹¹ Na cumplimentu cu profecia bíblico, cosnan horibel a bin ta sosodé den cristiandad. (Compará cu Jeremías 5:30, 31; 23:14.) Principalmente debí n’e actitud permisivo dje cleronan, nan tounan ta yen di inmoralidad. Na Merca, supuestamente un nacion cristian, rond di mitar di tur matrimonio ta caba na divorcio. Embaraso di tiener i homosexualidad ta excesivo entre miembronan di iglesia. Tin hopi caso di pastornan cu ta abusá sexualmente di mucha yong. Daño di perhuicio stipulá dor di corte enbolbiendo e casonan aki lo por costa Iglesia Católico na Merca mil miyon dollar den un década. Cristiandad no a haci caso dje spiertamentu di apostel Pablo na 1 Corintionan 6:9, 10: “Kico! Boso no sa cu personanan inhustu lo no heredá e Reino di Dios? No sea gañá. Ni fornicadornan, ni idólatranan, ni adúlteronan, ni homber cu ta ser warda pa propósito innatural, ni homber cu ta drumi cu homber, ni ladron, ni personanan golos, ni burachénan, ni zundradornan, ni esnan cu ta practicá extorsion lo heredá e reino di Dios.”

12. (a) Con e Rey di eternidad lo tuma accion contra Babilonia e Grandi? (b) Na contraste cu cristiandad, pa ki motibu e pueblo di Dios lo canta coronan di “Aleluya”?

¹² Dentro di poco, e Rey di eternidad, Jehova, actuando mediante su Mariscal di Campo, Cristo Jesus, lo laga e tribulacion grandi los. Promé, cristiandad i tur otro ramo di Babilonia e Grandi lo sufri e ehecucion di Jehova su huicio. (Revelacion 17:16, 17) Nan a duna prueba di ta indigno dje salbacion cu Jehova a percurá mediante e sacrificio di rescate di Jesus. Nan a despreciá e nomber santu di Dios. (Compará cu Ezekiel 39:7.) Ki un bofon cu nan ta canta “Aleluya” den coro den nan edificionan religioso dorná cu luho! Nan ta kita Jehova su nomber precioso for di nan traduccionnan di Bijbel pero ta parce inconciente dje echo cu “Aleluya” ta nificá “Alabá Jah”—siendo cu “Jah” ta un forma abreviá di “Jehova.” Apropiadamente, Revelacion 19:1-6 ta registrá e coronan di “Aleluya” cu pronto lo ser cantá den celebracion di Dios su ehecucion di huicio riba Babilonia e Grandi.

13, 14. (a) Ki sucesonan transcedental ta tuma lugá siguientemente? (b) Kico ta e resultado felis pa hende temeroso di Dios?

¹³ Siguiente cos pa tuma lugá ta Jesus su ‘binida’ pa pronunciá i ehecutá huicio riba nacionnan i pueblonan. E mes a profetisá: “Ora e Yu di hende [Cristo Jesus] yega den su gloria, i tur e angelnan huntu cuné, e ora ei lo e sinta riba su trono glorioso [di huicio]. I tur e nacionnan [riba tera] lo ser reuní dilanti dje, i lo e separá hende un for di otro, mescos cu un wardador ta separá carné for di cabritu. I lo e pone e carnénan na su man drechi, pero e cabritunan na su man robes. E ora ei e rey lo bisa esnan cu ta na su man drechi, ‘Bin, boso cu a ser bendicioná dor di mi Tata, heredá e reino prepará pa boso for dje fundamentu di mundu.’” (Mateo 25:31-34) Versículo 46 ta sigui relatá cu e clase di cabritu “lo bai pa cortamentu eterno, pero e hustunan pa bida eterno.”

¹⁴ E buki bíblico di Revelacion ta describí con e “Rey di reynan i Señor di señornan,” nos Señor celestial, Jesucristo, n’e tempu ei lo core drenta den bataya na Armagedon, destruyendo e elementonan político i comercial dje sistema di Satanas. Asina Cristo lo a basha “e furia dje rabia di Dios e Todopoderoso” riba henter Satanas su dominio terenal. Ora e ‘cosnan anterior aki pasa forbij,’ hende temeroso di Dios lo ser introducí den e glorioso mundu nobo unda Dios “lo seca tur lágrima for di nan wowo.”—Revelacion 19:11-16; 21:3-5.

Un Tempu pa Alabá Jah

15, 16. (a) Pakico ta vital pa nos haci caso di Jehova su palabra profético? (b) Kico e profetanan i apostelnan ta indicá cu nos mester haci pa salbacion, i kico esaki lo por nificá awe pa multitudnan?

¹⁵ E dia ei pa ehecucion di huicio ta cerca! P’esei, ta bon pa nos haci caso dje palabra profético dje Rey di eternidad. Pa esnan cu ainda ta enredá den e siñansa i custumbernan di religion falsu, un bos celestial ta declará: “Sali for di dje, mi pueblo, si boso no kier participá cuné den su picánan, i si boso no kier ricibí parti di su plaganan.” Pero unda esnan cu ta hui mester bai? Por tin solamente un berdad, pues solamente un religion berdadero. (Revelacion 18:4; Juan 8:31, 32; 14:6; 17:3) Ganamentu di bida eterno ta dependé riba hañamentu dje religion ei i obedeciendo su Dios. Bijbel ta dirigí nos na dje na Salmo 83:18, cu ta bisa: “Abo, kende bo nomber so ta JEHOVA, abo ta e haltísimo riba henter e tera.”—King James Version.

¹⁶ Sin embargo, nos tin cu haci mas cu simplemente conocé e nomber dje Rey di eternidad. Nos tin cu studia Bijbel i siña tocante su magnífico cualidadnan i propósitonan. Anto nos tin cu haci su boluntad p’e tempu actual aki, manera Romanonan 10:9-13 ta indicá. Apostel Pablo a cita e profetanan inspirá i a concluí: “Tur hende cu inbocá e nomber di Jehova lo ser salbá.” (Joël 2:32; Sofonías 3:9) Salbá? Sí, pasobra multitudnan awe cu ta ehercé fe den Jehova su provision di rescate mediante Cristo lo ser salbá for dje binidero tribulacion grandi, ora huicio riba Satanas su mundu corupto ta ser ehecutá.—Revelacion 7:9, 10, 14.

17. Ki speransa magnífico mester motivá nos pa uni awor den cantamentu dje cantica di Moises i di e Lamchi?

¹⁷ Kico ta e boluntad di Dios pa esnan cu ta spera di sobrebibí? Esei ta pa nos uni asta awor den cantamentu dje cantica di Moises i di e Lamchi, alabando e Rey di eternidad den anticipacion di su victoria. Nos ta haci esaki contando otronan di su glorioso propósitonan. Segun cu nos ta progresá den comprendimentu di Bijbel, nos ta dedicá nos bida n’e Rey di eternidad. Esei lo habri caminda pa nos biba pa tur eternidad bou dje areglo cu e Rey poderoso aki ta describí, manera nos ta haña na Isaías 65:17, 18: “Aki mi ta creando shelu nobo [Jesus su Reino Mesiánico] i un tera nobo [un hustu sociedad nobo di humanidad]; i e cosnan anterior lo no ser recordá, ni nan lo no subi na curason. Pero boso salta di alegria, i sea gososo pa semper den loke mi ta creando.”

18, 19. (a) Kico e palabranan di David na Salmo 145 mester motivá nos pa haci? (b) Kico nos por spera cu confiansa na man di Jehova?

¹⁸ E salmista David a describí e Rey di eternidad den e palabranan aki: “Jehova ta grandi i mester ser alabá den un gran manera, i su grandesa ta ininvestigabel.” (Salmo 145:3) Su grandesa ta mes ininvestigabel cu e límitenan di espacio i eternidad! (Romanonan 11:33) Miéntras cu nos ta sigui gana conocimentu di nos Creador i di su provision di rescate mediante su Yu, Cristo Jesus, nos lo kier alabá nos Rey eterno mas i mas. Nos lo kier haci manera Salmo 145:11-13 ta describí: “Dje gloria di bo gobernacion real nan lo papia, i di bo poder nan lo papia, pa duna di conocé n’e yunan di hende su obranan poderoso i e gloria dje splendor di su gobernacion real. Bo gobernacion real ta un gobernacion real pa tur tempu indefiní, i bo dominio ta dura pa tur generacion cu ta sigui.”

¹⁹ Nos por spera cu confiansa cu nos Dios lo cumpli cu su promesa: “Bo ta habri bo man i ta satisfacé e deseo di tur cos bibiente.” E Rey di eternidad lo guia nos tiernamente atrabes dje fin dje último dianan aki, pasobra Rey David a sigurá nos: “Jehova ta protehá tur esnan cu ta stim’é, pero tur e malbadonan lo e destruí.”—Salmo 145:16, 20.

20. Con bo ta respondé n’e invitacion dje Rey di eternidad, manera e ta ser declará den e último cincu salmonan?

²⁰ Cada un dje cincu salmonan di conclusion den Bijbel ta cuminsá i ta caba cu un invitacion di “Aleluya.” Pues, Salmo 146 ta invitá nos: “Boso alabá Jah! Alabá Jehova, O mi alma. Lo mi alabá Jehova durante henter mi bida. Lo mi producí melodia na mi Dios tanten cu mi tei.” Lo bo contestá e yamada ei? Siguramente lo bo mester kier alab’é! Nos ta spera cu bo ta entre esnan describí na Salmo 148:12, 13: “Boso, hóbennan i tambe boso, bírgennan, boso, bieunan huntu cu hobencitonan. Laga nan alabá e nomber di Jehova, pasobra su nomber so ta inalcansablemente haltu. Su dignidad ta riba tera i shelu.” Laga nos respondé di henter curason n’e invitacion: “Boso alabá Jah!” Den un solo bos, laga nos alabá e Rey di eternidad!

Kico Ta Bo Comentario?

◻ Di kico Jesus su apostelnan a duna spiertamentu delantá?

◻ Cuminsando na 1914, ki accionnan decisivo a tuma lugá?

◻ Ki huicionan Jehova ta cla pa ehecutá?

◻ Pakico esaki ta e tempu di mas importante pa alabá e Rey di eternidad?

[Kuadro na página 19]

E ERA CATASTROFICO AKI DI AGITACION

Hopi hende a reconocé e echo cu un época di agitacion a manecé trempan den siglo 20. Por ehempel, den e prólogo dje buki Pandaemonium, skirbí pa e Senador mericano Daniel Patrick Moynihan, publicá na 1993, un comentario riba “e catástrofe di 1914” ta bisa: “Guera a bini i e mundu a cambia—totalmente. Awe tin solamente ocho estado soberano riba tera cu a existí na 1914 i cu violencia no a cambia nan forma di gobiernu desde e tempu ei. . . . Dje sobrá mas o ménos 170 estado contemporáneo, algun a ser creá muchu recientemente pa a experenciá agitacion hopi mas recien.” Berdaderamente, e época desde 1914 tabata testigo di un catástrofe tras di otro!

Un otro buki cu tambe a ser publicá na 1993 ta Out of Control—Global Turmoil on the Eve of the Twenty-First Century. E autor ta Zbigniew Brzezinski, ex-hefe dje Conseho di Siguridad Nacional Mericano. E ta skirbi: “E comienso di siglo binti a ser aclamá den hopi comentario como e berdadero cuminsamentu dje Epoca di Rason. . . . Contrali na su promesa, siglo binti a bira humanidad su siglo di mas sangriente i yená cu odio, un siglo di política basá riba halucinacion i di matansanan monstruoso. Crueldad a ser organisá na un grado sin precedente, matamentu a ser organisá riba un base di produccion en masa. E contraste entre e potencial científico pa haci bon i e maldad político cu en realidad a desencadená ta escandaloso. Nunca promé den historia matamentu tabata asina mundialmente penetrante, nunca promé el a destruí asina tantu bida, nunca promé destruccion humano a ser ehercé cu tal concentracion di esfuerso consistente basá riba metanan asina arogantemente iracional.” Ki cierto esei ta!

[Plachi na página 17]

Miguel a tira Satanas i su demoñonan abou n’e tera despues di establecimentu dje Reino na 1914