“Un Tempu pa Keda Ketu i un Tempu pa Papia”

CUANTU biaha bo a lamentá, “Mihó mi no a bisa esei”? Sin embargo, bo por corda otro ocasionnan ora bo a keda sin papia algu. Mirando bek, kisas bo a pensa, ‘Mihó mi a bisa algu.’

Bijbel ta bisa cu tin “un tempu pa keda ketu i un tempu pa papia.” (Eclesiástes 3:7) Aki, anto, e problema ta sinta—pa dicidí ki ora pa papia i ki ora pa keda ketu. Nos naturalesa humano imperfecto bes tras bes ta impulsá nos pa haci i bisa cosnan n’e mal momento. (Romanonan 7:19) Con nos por controlá nos lenga ingobernabel?—Santiago 3:2.

Maneranan pa Dominá e Lenga

Pa yuda nos dicidí ki ora pa papia i ki ora pa keda ketu, nos no tin mester di un lista largu di regla diseñá pa incluí tur posibel situacion. Mas bien, nos tin cu laga cualidadnan cu ta un parti esencial dje personalidad cristian guia nos. Kico e cualidadnan aki ta?

Jesucristo a splica cu amor ta e cualidad principal cu ta motivá su disipelnan. “Den esaki tur lo sa cu boso ta mi disipelnan, si boso tin amor entre boso,” el a bisa. (Juan 13:35) Mas nos desplegá tal amor fraternal, mihó nos lo controlá nos lenga.

Dos cualidad relacioná cu otro tambe lo yuda nos enormemente. Un di nan ta humildad. E ta permití nos ‘considerá otronan superior na nos mes.’ (Filipensenan 2:3) E otro ta suavedad, cu ta mantené nos “restringí bou di maldad.” (2 Timoteo 2:24, 25) Den Jesucristo nos tin un ehempel perfecto di con e cualidadnan aki mester ser ehercé.

Siendo cu ta mas difícil pa controlá nos lenga ora nos ta bou di presion, laga nos considerá e anochi promé cu Jesus su morto—un tempu ora e tabata “profundamente afligí.” (Mateo 26:37, 38) No ta un sorpresa cu Jesus a sinti su mes asina, ya cu e futuro eterno di tur humanidad a dependé riba su kedamentu fiel na Dios.—Romanonan 5:19-21.

Esaki siguramente tabata un tempu pa Jesus papia cu su Tata celestial. P’esei el a retirá su mes p’e haci oracion, pidiendo tres di su disipelnan pa keda vigilá. Despues di un ratu el a bini i a haña nan drumí. Riba esei el a bisa Pedro: “Boso ni sikiera por a vigilá un ora cu mi?” E reprendementu amoroso aki tabata compañá pa palabranan cu a demostrá comprension pa nan debilidad. El a bisa: “E spiritu, naturalmente ta anheloso, pero e carni ta swak.” Mas despues, Jesus atrobe a bini i haña e disipelnan na soño. El a papia cu nan di un manera bondadoso i “el a retirá i a haci oracion pa di tres bes.”—Mateo 26:36-44.

Ora Jesus a haña e disipelnan drumí pa di tres bes, e no tabata severo pero el a bisa: “Na un ocasion manera esaki boso ta drumi i ta sosegá! Mira! E ora a yega cerca p’e Yu di hende ser traicioná den man di pecadornan.” (Mateo 26:45) Solamente un persona cu un curason yen di amor, cu un disposicion berdaderamente suave i humilde, por a usa e lenga den e manera ei na un tempu asina difícil.—Mateo 11:29; Juan 13:1.

Djis despues di esei, Jesus a ser arestá i husgá. Aki nos ta siña cu tin biaha ta mihó pa keda ketu, asta ora nos ta participando den nos ministerio cristian. Determiná pa incriminá Jesus, e sacerdotenan principal no tabatin ningun interes pa siña e berdad. Pues den e atmósfera explosivo aki, Jesus a warda silencio.—Compará cu Mateo 7:6.

Sin embargo, Jesus no a warda silencio ora e sumo sacerdote a exigí: “P’e Dios bibu mi ta poné bo bou di huramentu pa bisa nos si bo ta e Cristo e Yu di Dios!” (Mateo 26:63) Siendo cu Jesus a ser poné bou di huramentu, tabata tempu p’e papia. P’esei el a contestá: “Bo mes a bisa esei. Sin embargo, mi ta bisa boso, Djawor padilanti boso lo mira e Yu di hende sintá na e man drechi di poder i biniendo riba nubia di shelu.”—Mateo 26:64.

Durante e dia trasedental ei, Jesus a ehercé dominio perfecto riba su lenga. Den su caso, amor, suavedad i humildad tabata partinan inherente di su personalidad. Con nos por usa e cualidadnan aki pa controlá nos lenga ora nos ta bou di presion?

Controlando e Lenga Ora Nos Ta Rabiá

Ora nos rabia, hopi biaha nos ta perde control riba nos lenga. Por ehempel, un biaha Pablo i Barnabas tabatin un diferencia di opinion. “Barnabas tabata determiná pa hiba Juan tambe cu nan, esun cu tabata yamá Marco. Pero Pablo no a haña cu tabata apropiado pa hib’é cu nan, siendo cu el a bai for di nan na Pamfilia i no a bai cu nan na e trabou. Cu esaki a sosodé un atake intenso di rabia, di manera cu nan a separá for di otro.”—Echonan 15:37-39.

Michael,a kende pa algun aña ta traha riba proyectonan di construccion, ta conta: “Tabatin un persona n’e sitio di construccion cu mi tabata conocé bon i tabata respetá. Pero a parce cu constantemente e tabata criticá mi trabou. Mi a sintí mi ofendí i iritá pero mi a tene mi sintimentunan pa mi mes. Un dia cosnan a sali for di man ora el a criticá un trabou cu mi a caba di haci.

“Mi a deshogá tur mi sintimentunan cerá paden. Den mi rabia, mi no tabata conciente dje mal impresion cu esaki mester a causa riba tur esnan rond di nos. P’e resto dje dia, mi no kier a papia cuné ni sikiera mir’é. Awor mi ta realisá cu mi no a trata e problema corectamente. Lo tabata muchu mas mihó pa a keda ketu i papia ora mi cabes a fria.”

Afortunadamente, amor cristian a impulsá e dos individuonan aki pa resolvé nan diferencianan. Michael ta splica: “Despues di algun combersacion franco, nos a comprendé otro mihó, i awor nos tin un amistad fuerte.”

Manera Michael a siña, si nos ta rabiá, tin biaha ta sabí pa keda ketu. “Un homber di dicernimentu ta sereno di spiritu,” Proverbionan 17:27 ta bisa. Dicernimentu i amor fraternal lo yuda nos controlá nos impulso pa papia sin consideracion loke ta causa ofensa. Si nos a ser ofendí, laga nos papia cu e otro persona privadamente den un spiritu suave i humilde, cu e meta pa restorá pas. Kico si un explosion di rabia a tuma lugá caba? E ora ei amor lo move nos pa hala nos orguyo un banda i humildemente busca moda di compensá e daño. Esaki ta un tempu pa papia, pa expresá duele i cura sintimentunan ofendí mediante comunicacion sincero.—Mateo 5:23, 24.

Ora Silencio No Ta un Solucion

Rabia of iritacion por causa cu nos ta stop di papia cu e persona cu ta molestiá nos. Esaki por causa hopi daño. “Durante e promé aña di nos matrimonio, tabatin ocasionnan ora mi no tabata papia cu mi esposo pa vários dia largu,” Mariab ta confesá. “Generalmente, esei no tabata debí na problemanan grandi sino, mas bien, debí na un acumulacion di iritacionnan chikitu. Mi tabata sigui pensa riba tur e iritacionnan aki te ora nan a bira manera un obstáculo mes grandi cu un ceru. Despues a yega e momento cu mi no por a wanta mas, i mi a djis stop di papia cu mi esposo te ora mi frustracion pasa.”

Maria ta agregá: “Un texto particular di Bijbel—‘no laga solo baha cu boso den un estado provocá’—a yudá mi reahustá mi pensamentu. Ami i mi esposo a traha duru pa mehorá nos comunicacion di manera cu problemanan no a acumulá. Esei no tabata fácil, pero despues di dies aña di bida casá, mi ta contentu pa bisa cu e periodonan aki di silencio insensibel ta muchu ménos. Sin embargo, mi mester admití cu ainda mi ta trahando pa controlá e tendencia aki.”—Efesionan 4:26.

Manera Maria a descubrí, ora ta existí tensionnan entre dos hende, kibrando e comunicacion no ta un solucion. Bou dje circunstancianan ei, rencor tin chens di crece, i e relacion por daña. Jesus a bisa cu nos mester ta “lihé pa regla cuenta.” (Mateo 5:25) “Un palabra papiá n’e tempu apropiado” por yuda nos ‘sigui tras di pas.’—Proverbionan 25:11; 1 Pedro 3:11.

Tambe nos tin cu expresá nos mes ora nos mester di yudansa. Si nos ta sufriendo pa motibu di algun problema spiritual, kisas nos no tin gana di ser un carga pa otronan. Pero si nos keda ketu, e problema tin chens di bira pió. Ancianonan cristian nombrá ta interesá den nos i, si nos laga nan, sin duda nan ta ansioso pa yuda. Esaki ta un tempu ora nos tin cu papia.—Santiago 5:13-16.

Riba tur cos, nos tin cu papia cu Jehova regularmente den oracion sincero, manera Jesus a haci. En berdad, laga nos ‘drama nos curason’ dilanti nos Tata celestial.—Salmo 62:8; compará cu Hebreonan 5:7.

“Un Tempu pa Papia” Tocante e Reino di Dios

E ministerio cristian ta un comision divino cu mester ser cumplí promé cu e fin yega. P’esei, manera nunca promé, ta vital pa Jehova su sirbidornan declará e bon nobo dje Reino. (Marco 13:10) Mescos cu e apostelnan, cristiannan berdadero simplemente ‘no por stop di papia dje cosnan cu nan a mira i a tende.’—Echonan 4:20.

Naturalmente, no ta tur hende kier tende e bon nobo. En realidad, ora Jesus a manda su disipelnan bai predicá, el a consehá nan pa ‘busca esnan cu ta merecedor.’ Siendo cu Jehova nunca ta forsa ningun hende pa ador’é, nos no kier sigui papia caprichosamente cu un persona cu ta rechasá firmemente e mensahe di Reino. (Mateo 10:11-14) Pero nos tin deleite pa papia tocante Jehova su reinado cu esnan cu ta “corectamente dispuesto pa bida eterno.”—Echonan 13:48; Salmo 145:10-13.

Amor, suavedad i humildad ta cualidadnan cu por yuda nos controlá nos inclinacion imperfecto pa papia muchu lihé of pa cai den un tempu di silencio. Segun cu nos ta crece den e cualidadnan aki, nos lo ta mihó ekipá pa distinguí entre e bon momento i e mal momento pa papia.

[Nota]

[Plachi na página 23]

Problemanan por ser resolvé mediante bon comunicacion