Bek na Stof Con?

“STOF bo ta i na stof lo bo bolbe.” Ora e promé homber, Adam, a tende e palabranan ei, e tabata sa kico pa spera. El a ser trahá for di stof dje suela i lo a bolbe na simpel stof. Lo el a muri pa motibu cu el a desobedecé su Creador, Jehova Dios.—Génesis 2:7, 15-17; 3:17-19.

Bijbel ta mustra cu hende ta trahá di stof. Tambe e ta bisa: “E alma cu ta peca—e mes lo muri.” (Ezekiel 18:4; Salmo 103:14) Morto a trece tristesa pa miyones di hende i bes tras bes a lanta preguntanan tocante con pa deshací di restonan humano.

Custumbernan di Pasado i Actual

Con e pueblo di Dios di tempunan antiguo a deshací di restonan humano? Den su promé páginanan, Bijbel ta mencioná vários manera di trata cu e mortonan, incluyendo deramentu den tera. (Génesis 35:8) E patriarca Abraham i su esposa, Sara, i tambe nan yu Isaac i nietu Jacob a ser derá den e cueba di Macpelá. (Génesis 23:2, 19; 25:9; 49:30, 31; 50:13) E huesnan israelita Gideon i Samson a ser derá ‘den e grafnan di nan tatanan.’ (Huesnan 8:32; 16:31) Esaki ta indicá cu hende dje pueblo antiguo di Dios a preferá di tabatin grafnan di famia. Ora Jesucristo a muri den e promé siglo E.C., su curpa a ser derá den un graf den un baranca recientemente cobá. (Mateo 27:57-60) Generalmente, anto, restonan humano a ser derá den tera of den graf. Ainda esaki ta e custumber den mayoria lugá rond e tera.

Sin embargo, den algun parti dje mundu awe, un scarcedad serio di espacio i e costo haltu di tera ta hacié cada bes mas difícil pa obtené sitionan pa dera hende. P’esei, algun hende ta evaluando otro maneranan pa deshací di restonan humano.

Ta birando mas comun pa plama e shinishinan despues di cremacion di restonan humano. Na Inglatera awor nan ta deshací di rond di 40 porciento dje mortonan den e manera aki. Na Suecia, unda mas cu 80 porciento di hende cu muri den áreanan di stad ta ser cremá, cierto mondinan ta ser designá pa plama e shinishinan. I na Shanghai i algun otro stad cant’i costa di China, gobiernunan di stad ta promové plamamentu masal den laman vários bes pa aña.

Unda e shinishinan por ser plamá? No djis cualkier caminda. Algun por teme cu plamamentu di shinishi ta dañino p’e medio ambiente. Sin embargo, realmente cualkier posibel rísico di epidemia ta ser nulificá dor di cremacion. Algun santana na Inglatera i parkenan cementerio na Merca ta apartá áreanan di yerba of hardinnan di flor como tereno pa plama shinishi. Naturalmente, cristiannan ta specialmente interesá den e punto di bista bíblico di cremacion i plamamentu di shinishi.

Kico Ta e Punto di Bista Bíblico?

Den un pronunciacion contra “e rey di Babilonia,” profeta Isaías a bisa: “Bo a ser tirá afó sin un lugá di entiero pa bo.” (Isaías 14:4, 19) E plamamentu di shinishi mester ser compará cu un caso asina di humiyacion? No, pasobra Isaías no ta referí aki na cremacion ni e preservacion of plamamentu di shinishi cu ta resultá for di esei.

Jesucristo a papia dje resureccion terenal dje mortonan cu lo tuma lugá durante su Reinado di Mil Aña ora el a bisa: “Tur esnan cu ta den e grafnan conmemorativo lo tende [mi] bos i lo sali.” (Juan 5:28, 29) Sin embargo, e echo cu un graf specífico no ta exactamente necesario pa resucitá un persona ta ser confirmá den un otro descripcion profético dje resureccion. Revelacion 20:13 ta declará: “Laman a entregá esnan morto den dje, i morto i Hádes a entregá esnan morto den nan.” Pues, loke ta conta no ta unda of di ki manera un persona ta ‘bolbe na stof.’ Mas bien, ta si e ta ser recordá dor di Dios i ta ser resucitá. (Job 14:13-15; compará cu Lucas 23:42, 43.) Jehova siguramente no tin mester di grafnan impresionante pa yud’é corda hende. Cremacion no ta prevení un persona su resureccion. I si e plamamentu di shinishi ta ser hací cu un motivacion corecto i sin ningun ceremonia religioso falsu, lo e no ta anti-bíblico.

Esnan cu ta dicidí na fabor di plamamentu di shinishi lo tin cu presta atencion n’e ley dje pais. Tambe lo ta apropiado pa nan tuma na consideracion e sintimentunan di esnan cu ta keda atras i otronan. Sirbidornan di Jehova lo haci bon di tene cuidou pa e manera cu nan ta ehercé nan libertad bíblico al respecto no trece reproche riba e bon nomber cu cristiannan ta carga. Esaki ta specialmente importante den paisnan unda cremacion i plamamentu di shinishi ta legalmente permisibel pero ainda no completamente aceptá den e comunidad. Naturalmente, un cristian lo evitá cualkier rito of custumber basá riba e creencia den inmortalidad dje alma humano.

Libertad Completo for di Graf!

Algun cu ta boga pa plamamentu di shinishi ta bisa cu esei ta nificá libertad for di deramentu den graf. Sin embargo, loke lo trece e alivio di mas grandi ta e cumplimentu dje promesa di Bijbel cu “como e último enemigu, morto tin cu ser reducí na nada.”—1 Corintionan 15:24-28.

Esaki ta nificá cu grafnan, asta cremacion i plamamentu di shinishi, lo bira cosnan di pasado. Sí, morto lo no existí mas. Bou di inspiracion divino apostel Juan a skirbi: “Mi a tende un bos duru for dje trono bisa: ‘Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i morto lo no t’ei mas, tampoco lo tin mas lamento ni sclamacion ni dolor. E cosnan anterior a pasa caba.’”—Revelacion 21:3, 4.

Tur esaki lo ser realisá ora morto humano cu ta bini dje picá di Adam ser eliminá completamente bou dje Reino di Dios. N’e tempu ei humanidad obediente lo no ser enfrentá cu e prospecto di bolbe bek na stof.

[Plachi na página 29]

Métodonan comun pa deshací di restonan humano

[Plachi na página 31]

Plamamentu di shinishi den Bahia Sagami, Hapon

[Rekonosementu]

Courtesy of Koueisha, Tokyo