E “Cas di David”—Echo of Ficcion?

DAVID—e hóben wardador di carné cu a bira músico, poëta, soldat, profeta i rey—ta sobresalí den Bijbel cu gran prominencia. Su nomber ta ser mencioná 1.138 biaha; e expresion “Cas di David”—refiriendo hopi bes n’e dinastia di David—ta ser usá 25 biaha. (1 Samuel 20:16) Rey David i su dinastia tabata solamente ficcion? Kico arkeologia ta revelá? Segun informe un descubrimentu remarcabel hací recientemente na un sitio di cobamentu arkeológico na Tel Dan den nort di Galilea ta apoyá e autenticidad histórico di David i su dinastia.

Den zomer di 1993, un tim arkeológico, dirigí pa Profesor Avraham Biran, a limpia un área pafó dje entrada exterior di Dan di antigwedad. Nan a descubrí un plenchi di plavei. Un piedra pretu di basalt saliendo for di suela a ser sacá fácilmente. Ora a bira e piedra den direccion dje solo di atardi, por a mira claramente e letranan inscribí riba dje. “Ai, mi Dios, nos tin un inscripcion!” Profesor Biran a sclama.

Profesor Biran i su colega, Profesor Joseph Naveh dje Universidad Hebreo na Jerusalem, mesora a skirbi un informe científico dje inscripcion. Basá riba e informe aki, un artículo den e revista Biblical Archaeology Review di mart/april 1994, ta bisa: “No ta sosodé hopi bes cu un descubrimentu arkeológico ta yega na promé página di New York Times (pa no papia mes dje revista Time). Pero esei ta loke a sosodé zomer pasá cu e descubrimentu na Tel Dan, un ceritu bunita den nort di Galilea, na pia di Ceru di Hermon banda di un dje fuentenan dje Riu Jordan.

“Ei Avraham Biran i su tim di arkeólogonan a haña un inscripcion remarcabel di siglo nuebe P.E.C. cu ta referí tantu n’e ‘Cas di David’ como n’e ‘Rey di Israel.’ Esaki ta e promé biaha cu e nomber di David ta ser hañá den un inscripcion antiguo fuera dje Bijbel. Cu e inscripcion ta referí no simplemente na un cierto ‘David’ sino n’e Cas di David, e dinastia dje gran rey israelita, ta asta mas remarcabel.

“‘Rey di Israel’ ta un término frecuentemente usá den Bijbel, specialmente den e Buki di Reynan. Sin embargo, e [descubrimentu] aki por ta e referencia di mas bieu, fuera dje Bijbel, cu ta referí na Israel cu letra semítico. Si e inscripcion aki ta proba algu, anto esei ta cu tantu Israel como Huda tabata reinonan importante n’e tempu ei, contrario na afirmacionnan di algun crítico erudito cu ta desacreditá echonan cu ta apoyá Bijbel.”

Determinacion dje fecha ta basá riba e forma dje letternan, riba análisis di obhetonan di klei cu a haña cerca dje fragmento di piedra, i riba e contenido dje inscripcion. Tur e tres métodonan ta indicá n’e mésun periodo di tempu, siglo nuebe P.E.C., un poco mas di shen aña despues di Rey David. Eruditonan ta kere cu e inscripcion tabata parti di un monumento di victoria construí na Dan dor di un enemigu arameo di tantu e “Rey di Israel” como dje “[Rey dje] Cas di David.” E arameonan, cu a adorá Hadad, un dios popular di tormenta, a biba na banda oost di Israel.

Durante zomer di 1994, dos fragmento mas dje piedra aki a ser hañá. Profesor Biran ta informá: “Den e dos fragmentonan aki tin e nomber dje dios arameo Hadad, i tambe un referencia na un bataya entre e israelitanan i e arameonan.”

E fragmento principal cu a ser hañá na 1993 ta contené 13 liña parcialmente visibel skirbí cu antiguo letra hebreo. N’e tempu ei, puntonan tabata ser usá como divididor di palabra pa separá palabra den un texto. Sin embargo, “Cas di David” ta ser skirbí como un solo palabra cu e letternan “bytdwd” (un transliteracion na letra romano) en bes di “byt” (cas), un punto, i despues “dwd” (David). Ta di comprendé cu preguntanan a lanta relacioná cu e interpretacion di “bytdwd.”

Experto lingwístico, Profesor Anson Rainey, ta splica: “Joseph Naveh i Avraham Biran no a splica e inscripcion en detaye, kisas pasobra nan a asumí cu lectornan lo sa cu un divididor di palabra entre dos componente den un construccion asina hopi bes ta ser lagá afó, specialmente si e combinacion ta un nomber propio ampliamente reconocé. ‘E Cas di David’ tabata siguramente un nomber propio asina, políticamente i geográficamente, meimei di siglo nuebe P.E.C.”

Un Otro Testimonio Arkeológico

Despues di e descubrimentu ei, Profesor André Lemaire, un experto dje piedra di Mesa (yamá tambe e Piedra Moabita), a informá cu e piedra di Mesa tambe ta referí n’e “Cas di David.”a E piedra di Mesa, descubrí na 1868, tin hopi cos en comun cu e piedra di Tel Dan. Nan tur dos ta data di siglo nuebe P.E.C., ta dje mésun material, ta igual den tamaño, i ta skirbí cu letra semítico casi idéntico.

En cuanto un reconstruccion nobo dje liña di texto dañá riba e piedra di Mesa, Profesor Lemaire a skirbi: “Casi dos aña promé cu e descubrimentu dje fragmento di Tel Dan, mi a concluí cu e piedra di Mesa ta contené un referencia na e ‘Cas di David.’ . . . E motibu cu e referencia aki n’e ‘Cas di David’ nunca a ser ripará promé por ta debí masha bon n’e echo cu e piedra di Mesa nunca tabatin un editio princeps [promé edicion]. E edicion ei ta loke mi ta preparando, 125 aña despues dje descubrimentu dje piedra di Mesa.”

Tal informacion arkeológico ta interesante pasobra un angel, Jesus mes, su disipelnan i hende en general a duna testimonio dje autenticidad histórico di David. (Mateo 1:1; 12:3; 21:9; Lucas 1:32; Echonan 2:29) Descubrimentunan arkeológico evidentemente ta di acuerdo cu David i su dinastia, e “Cas di David,” ta echo, no ficcion.

[Nota]

[Plachi na página 31]

E fragmento di Tel Dan,* descubrí na 1993 n’e stad di Dan, den nort di Galilea

* Pintura ta basá riba un potret cu ta aparecé den Israel Exploration Journal.