Enoc—Sin Miedu Apesar di Dificultadnan

PA UN bon homber, tabata e tempu di mas malu. Maldad a reina riba e tera. Tabatin un deterioro continuo den e condicion moral di humanidad. De facto, pronto lo a ser bisá: “Jehova a mira cu e maldad di hende tabata abundante riba tera i tur inclinacion dje pensamentunan di su curason tabata solamente malu tur ora.”—Génesis 6:5.

Enoc, e di shete homber den e genealogia desde Adam, tabatin e curashi pa ta diferente. El a para firme pa husticia sin importá e consecuencianan. Enoc su mensahe tabata asina iritante pa pecadornan malbado, cu nan a mark’é pa ser asesiná, i solamente Jehova por a yud’é.—Hudas 14, 15.

Enoc i e Cuestion Universal

Hopi tempu promé cu Enoc a nace, e cuestion di soberania universal a lanta. Dios tabatin e derecho di goberná? En efecto, Satanas e Diabel a bisa no. El a pretendé cu lo bai mihó cu criaturanan inteligente si nan tabata independiente dje guia di Dios. Satanas a purba establecé evidencia contra Jehova Dios dor di maniobrá hende na su banda den un manera astuto. Ta conocí cu Adam, su esposa Eva, i nan promé yu homber, Cain, a bai n’e banda di Satanas dor di scoge pa dirigí nan mes en bes di laga Dios dirigí nan. E promé pareha humano a haci esaki dor di come di fruta cu Dios a taha nan di dje, i Cain a haci esei dor di asesiná su ruman hustu, Abel, deliberadamente.—Génesis 3:4-6; 4:8.

Abel a para cu curashi n’e banda di Jehova. Siendo cu Abel su integridad a promové adoracion puru, sin duda Satanas tabata encantá pa mira Cain baha su rabia asesino riba dje. For dje tempu ei padilanti, Satanas a usa “miedu di morto” como un arma pa intimidá hende cuné. E kier sembra miedu den curason di cualkier persona cu ta incliná na adorá e Dios berdadero.—Hebreonan 2:14, 15; Juan 8:44; 1 Juan 3:12.

Pa tempu cu Enoc a nace, Satanas su punto di bista cu hende lo no sostené e soberania di Jehova probablemente a parce di tin apoyo amplio. Abel tabata morto, i hende no a sigui su ehempel fiel. Sin embargo, Enoc a duna prueba di ta un excepcion. E tabatin un base firme pa fe, pasobra e tabata bon na haltura dje sucesonan cu a tuma lugá den e hofi di Eden.a Cuantu e mester a carga e speransa di mira e cumplimentu di Jehova su profecia di cu un Simia primintí lo trece un fin na Satanas i su obranan mañoso!—Génesis 3:15.

Cu e speransa aki semper dilanti dje, Enoc no a ser intimidá dor dje asesinato histórico di Abel causá dor dje Diabel. Mas bien, el a sigui cana cu Jehova, siguiendo un curso di husticia henter su bida largu. Enoc a mantené su mes separá for dje mundu, rechasando su spiritu independiente.—Génesis 5:23, 24.

Ademas, Enoc cu curashi a papia fuerte i a mustra claramente cu e obranan malbado dje Diabel lo fracasá. Bou di influencia di Dios su spiritu santu, of forsa activo, Enoc a profetisá tocante e malbadonan: “Mira! Jehova a bini cu su miriadanan santu, pa ehecutá huicio contra tur, i pa declará e culpabilidad di tur e malbadonan pa nan obranan malbado cu nan a cometé den un manera malbado, i en cuanto tur e cosnan ofensivo cu pecadornan malbado a papia contra dje.”—Hudas 14, 15.

Pa motibu di Enoc su proclamacionnan sin miedu, ora apostel Pablo a skirbi e cristiannan hebreo, el a incluí Enoc entre e ‘nubia grandi di testigonan’ cu a pone un ehempel sobresaliente di fe den accion.b (Hebreonan 11:5; 12:1) Como un homber di fe, Enoc a perseverá den un curso di integridad pa mas cu 300 aña. (Génesis 5:22) Cuantu e fieldad di Enoc no a iritá e enemigunan di Dios den shelu i riba tera! Enoc su profecia picante a instigá e odio di Satanas, pero a trece Jehova su proteccion.

Dios A Tuma Enoc—Den ki Manera?

Jehova no a permití Satanas ni su sirbidornan terenal mata Enoc. Mas bien, e registro inspirá ta bisa: “Dios a tum’é.” (Génesis 5:24) Apostel Pablo ta describí e asuntu asina aki: “Pa medio di fe Enoc a ser transferí p’e no mira morto, i e no a ser hañá ningun caminda pasobra Dios a transfirié; pasobra promé cu su transferencia el a ricibí e testimonio di cu el a agradá Dios bon.”—Hebreonan 11:5.

Den ki manera Enoc “a ser transferí p’e no mira morto”? Of manera e ta ser traducí den e traduccion di R. A. Knox, con Enoc a ser “kitá sin experenciá morto”? Dios a terminá e bida di Enoc na un manera pacífico, librand’e dje dolornan di morto for di sea malesa of violencia na man di su enemigunan. Sí, Jehova a corta e bida di Enoc n’e edad di 365 aña—un persona relativamente yong na comparacion cu su contemporáneonan.

Con Enoc a ricibí un “testimonio di cu el a agradá Dios bon”? Ki evidencia el a haña? Probablemente, Dios a hinca Enoc den un trans, mescos cu apostel Pablo a ser “hibá,” of transferí, evidentemente ricibiendo un vision dje futuro paradijs spiritual dje congregacion cristian. (2 Corintionan 12:3, 4) E testimonio, of evidencia, cu Enoc tabata agradando Dios por a encerá un vision dje futuro Paradijs terenal den cua tur esnan na bida ei lo sostené e soberania di Dios. Tal bes miéntras cu Enoc tabata experenciando asina un vision abrumador Dios a tum’é den morto sin dolor p’e drumi te n’e dia di su resureccion. Ta parce cu, mescos cu den e caso di Moises, Jehova a deshací dje curpa di Enoc, pasobra “e no a ser hañá ningun caminda.”—Hebreonan 11:5; Deuteronomio 34:5, 6; Hudas 9.

E Profecia A Ser Cumplí

Awe, Testigonan di Jehova ta declará e esencia dje profecia di Enoc. For dje Scritura, nan ta mustra con lo e ser cumplí ora Dios destruí e malbadonan den futuro cercano. (2 Tesalonicensenan 1:6-10) Nan mensahe ta haci nan impopular, pasobra e ta diferenciá mashá for dje punto di bista i metanan dje mundu aki. E oposicion cu nan ta encontrá no ta sorprendé nan, pasobra Jesus a spierta su siguidornan: “Boso lo ta obheto di odio di parti di tur hende pa causa di mi nomber.”—Mateo 10:22; Juan 17:14.

Sin embargo, mescos cu Enoc, cristiannan dje tempu actual ta sigur cu al final nan lo ser librá for di nan enemigunan. Apostel Pedro a skirbi: “Jehova sa con pa libra hende di debocion piadoso for di prueba, pero pa reservá hende inhustu p’e dia di huicio pa ser cortá.” (2 Pedro 2:9) Dios por haña ta bon pa eliminá un problema of situacion difícil. Persecucion por yega na un fin. No obstante, si esei no sosodé, Jehova sa con pa ‘percurá p’e salida’ di manera cu su pueblo por wanta nan pruebanan cu éxito. Jehova asta ta suministrá “poder mas ayá di loke ta normal” ora ta necesario.—1 Corintionan 10:13; 2 Corintionan 4:7.

Como e “recompensador di esnan cu ta busk’é cu empeño,” Jehova lo bendicioná tambe su fiel sirbidornan cu bida eterno. (Hebreonan 11:6) P’e gran mayoria di nan, esaki lo ta bida eterno riba un tera paradísico. P’esei, mescos cu Enoc, laga nos proclamá e mensahe di Dios sin miedu. Cu fe, laga nos haci esaki apesar di dificultadnan.

[Nota]

[Kuadro na página 30]

E Nomber di Dios Ta Ser Profaná

Rond di cuater siglo promé cu Enoc, e nietu di Adam, Enos, a nace. “N’e tempu ei [hende] a cuminsá inbocá e nomber di Jehova,” segun Génesis 4:26. Algun erudito di idioma hebreo ta kere cu den e versículo aki mester ta pará “a cuminsá den un manera profano” na inbocá e nomber di Dios of, “e ora ei profanacion a cuminsá.” En cuanto e periodo ei den historia, e Targum di Jerusalem ta bisa: “Esei tabata e generacion den kende su tempu nan a cuminsá peca, i traha ídolo pa nan mes, i a yama nan ídolonan n’e nomber dje Palabra dje Señor.”

Den e tempu di Enos tabatin un maluso extenso di Jehova su nomber. Tin e posibilidad cu hende a aplicá e nomber divino na nan mes of na cierto hende mediante ken nan a pretendé di acercá Jehova Dios den adoracion. Of kisas nan a aplicá e nomber divino na ídolonan. Sea cual sea e caso, Satanas e Diabel tabatin e rasa humano firmemente gará den e trampa di idolatria. Pa e tempu cu Enoc a nace, casi no a existí adoracion berdadero. Cualkier hende mescos cu Enoc, cu a biba e berdad i a predik’é, tabata impopular i p’esei obheto di persecucion.—Compará cu Mateo 5:11, 12.

[Kuadro na página 31]

Enoc A Bai Shelu?

“Pa medio di fe Enoc a ser transferí p’e no mira morto.” Den nan traduccion dje parti aki di Hebreonan 11:5, algun traduccion di Bijbel ta indicá cu Enoc realmente no a muri. Por ehempel, A New Translation of the Bible, di James Moffatt, ta declará: “Tabata pa medio di fe cu Enoc a ser tumá na shelu di manera cu e no a muri nunca.”

Sin embargo, rond di 3.000 aña despues dje tempu di Enoc, Jesucristo a declará: “Ningun hende a subi na shelu sino esun cu a baha for di shelu, e Yu di hende.” (Juan 3:13) The New English Bible ta bisa: “Ningun hende hamas a subi na shelu excepto esun cu a baha for di shelu, e Yu di Hende.” Ora Jesus a haci e declaracion ei, ni e no a subi na shelu.—Compará cu Lucas 7:28.

Apostel Pablo ta declará cu Enoc i otronan cu ta forma e nubia grandi di testigonan pre-cristian ‘tur a muri’ i “no a obtené e cumplimentu dje promesa.” (Hebreonan 11:13, 39) Pakico? Pasobra tur hende, incluyendo Enoc, a heredá picá for di Adam. (Salmo 51:5; Romanonan 5:12) E único medio di salbacion ta mediante e sacrificio di rescate di Cristo Jesus. (Echonan 4:12; 1 Juan 2:1, 2) Den tempu di Enoc e rescate ei no a ser pagá ainda. P’esei, Enoc no a subi na shelu, sino e ta drumí den morto sperando un resureccion riba tera.—Juan 5:28, 29.

[Rekonosementu pa Potrèt na página 29]

Reproducí for di Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s