Acrobat dje Barancanan Skerpi di Ceru

E STAD antiguo i e desierto alrededor di dje yamá En-gedi ta situá cantu dje costa west di Laman Morto. E camindanan meimei di ceru i precipicionan dje área ta un hogar ideal p’e cabritu di ceru cu bo por mira aki.

E criatura aki cu pia firme ta entre e maraviyanan di creacion di animal. Laga nos habri Bijbel i haña un bista mas djacerca dje animal fasinante aki.

“E Cerunan Haltu Ta pa Cabritu di Ceru”

Asina e salmista a canta. (Salmo 104:18) Cabritu di ceru ta bon ekipá pa biba den lugánan haltu! E ta sumamente ágil, moviendo riba tereno desigual cu gran confiansa i velocidad. Esaki ta parcialmente debí n’e construccion di su patanan. E habrí entre e tenchinan dje patanan por expandé bou dje peso dje cabritu, dunando e animal un gara firme ora e ta pará of moviendo riba randnan smal di baranca.

Cabritu di ceru tin tambe un balansa extraordinario. E por bula hopi leu i baha riba un rand di baranca apénas suficiente grandi pa acomodá tur cuater pata. E biólogo Douglas Chadwick a observá un biaha un otro tipo di cabritu di ceru usa su balansa pa evitá di keda atrapá riba un rand di baranca cu tabata muchu smal p’e bira rond. E ta bisa: “Despues cu el a tira un bista n’e siguiente rand di baranca un 120 meter mas abou, e cabritu a pone su patanan dilanti firmemente abou i a cana lentamente cu su atras mas ariba cu su cabes cantu dje baranca como si fuera e tabata haciendo kenshi. Segun cu mi tabata mira cu asombro, e cabritu a sigui te ora su patanan patras a bini abou di manera cu nan tabata cara pa e direccion for di cua el a bini.” (National Geographic) Nada straño cu cabritu di ceru a ser yamá “e acrobat di barancanan skerpi di ceru”!

‘Bo Sa Ki Ora Cabritu di Ceru Ta Wèrp?’

Cabritu di ceru ta un criatura masha tímido. E ta preferá di biba isolá for di hende. En berdad, ta difícil pa hende yega suficiente cerca pa observ’é den naturalesa. Pues, cu bon motibu e Doño di “e bestianan riba mil ceru” por a puntra e homber Job: “Bo a yega na conocé e tempu señalá p’e cabritunan di ceru dje baranca skerpi wèrp?”—Salmo 50:10; Job 39:1.

E instinto cu Dios a dun’é ta bisa e cabritu di ceru hembra ki ora ta tempu pa wèrp. E ta busca un lugá sigur i ta haña un of dos yu, generalmente na fin di mei of den juni. Yu recien nací ta siña cana cu stap firme den solamente un par di dia.

“Un Biná Hembra Amabel i un Cabritu di Ceru Encantador”

Sabí Rey Sálomon a insta esposonan: “Alegrá cu e esposa di bo hubentud, un biná hembra amabel i un cabritu di ceru encantador.” (Proverbionan 5:18, 19) Esaki no tabata intencioná pa rebahá hende muher. Aparentemente, Sálomon tabata refiriendo n’e bunitesa, elegancia i otro cualidadnan sobresaliente dje animalnan aki.

E cabritu di ceru ta entre e incontabel “almanan bibiente” cu ta duna testimonio abrumador dje sabiduria dje Creador. (Génesis 1:24, 25) Nos no ta contentu cu Dios a rondoná nos cu asina tantu criatura fasinante?

[Rekonosementu pa Potrèt na página 24]

Courtesy of Athens University