Ehecucion di Huicio den e Yanura Abou di Decision

“Laga e nacionnan . . . subi n’e yanura abou di Jehósafat; pasobra ei ami lo sinta pa husga tur e nacionnan.”—JOEL 3:12.

 1. Pakico Joël ta mira multitudnan reuní den “e yanura abou di decision”?

“MULTITUDNAN, multitudnan ta den e yanura abou di decision”! Nos ta lesa e palabranan emocionante ei na Joël 3:14. Pakico e multitudnan aki a reuní? Joël ta contestá: “E dia di Jehova ta cerca.” Ta e dia grandi di Jehova su vindicacion—e dia pa ehecutá huicio riba e multitudnan cu a rechasá Dios su Reino establecí bou di Cristo Jesus. Por fin, e ‘cuater angelnan’ di Revelacion capítulo 7 tin cu los nan gara duru riba “e cuater bientunan dje tera,” resultando den “tribulacion grandi tal como no a sosodé desde principio di mundu te awor, no, ni lo no sosodé atrobe.”—Revelacion 7:1; Mateo 24:21.

 2. (a) Pakico ta apropiado cu e lugá pa ehecutá huicio di Jehova ta ser yamá “e yanura abou di Jehósafat”? (b) Kico Jehósafat a haci como un reaccion corecto ora el a ser atacá?

² Joël 3:12 ta yama e sitio p’e ehecucion di huicio aki “e yanura abou di Jehósafat.” Apropiadamente, durante un periodo tempestuoso di Huda su historia, Jehova a ehecutá huicio einan na fabor dje bon Rey Jehósafat, kende su nomber ta nificá “Jehova Ta Hues.” Un consideracion di loke a sosodé n’e tempu ei lo yuda nos comprendé mihó loke lo bai sosodé pronto den nos tempu. E registro ta ser haña na 2 Crónicanan capítulo 20. Na versículo 1 dje capítulo ei, nos ta lesa cu “e yunan di Moab i e yunan di Amon i cu nan algun dje amonim a bini contra Jehósafat den guera.” Con Jehósafat a reaccioná? El a haci loke fiel sirbidónan di Jehova semper ta haci den un crísis. El a acudí na Jehova pa guia, pidiendo fervientemente den oracion: “O nos Dios, lo bo no ehecutá huicio contra nan? Pasobra den nos no tin poder dilanti dje multitud grandi aki cu ta bini contra nos; i nos mes no sa kico nos mester haci, pero nos wowonan ta den bo direccion.”—2 Crónicanan 20:12.

Jehova Ta Contestá un Oracion

 3. Ki instruccionnan Jehova a duna Huda ora nan a enfrentá e atake di nacionnan bisiña?

³ Miéntras cu “tur esnan di Huda tabata pará dilanti Jehova, asta nan yunan chikitu, nan esposa i nan yu hombernan,” Jehova a duna su contesta. (2 Crónicanan 20:13) Mescos cu e ta usa su “esclabo fiel i discreto” awe, asina e gran Tendedor di oracion a duna poder na e profeta levita Jahaziel pa duna Su contesta na esnan reuní. (Mateo 24:45) Nos ta lesa: “Ata aki loke Jehova a bisa na boso: ‘Boso no tene miedu ni no ser terorisá pa motibu dje multitud grandi aki; pasobra e bataya no ta di boso, sino di Dios. . . . Boso lo no tin cu bringa n’e ocasion aki. Tuma boso posicion, para ketu i mira e salbacion di Jehova na fabor di boso. . . . No tene miedu ni no spanta. Mañan sali contra nan, i Jehova lo ta cu boso.’”—2 Crónicanan 20:15-17.

 4. Den ki manera Jehova a rekerí pa su pueblo ta activo, i no pasivo, ora nan a enfrentá e desafio dje enemigu?

⁴ Jehova a rekerí mas di Rey Jehósafat i su pueblo cu djis sinta pornada, wardando un liberacion milagroso. Nan mester a tuma e iniciativa pa enfrentá e desafio dje enemigu. E rey i ‘tur esnan di Huda, asta nan yunan chikitu, nan esposa i nan yu hombernan,’ a expresá fe fuerte dor di obedientemente lanta mainta trempan i sali marcha pa bai topa e multitudnan invasor. Na caminda, e rey a sigui duna instruccion teocrático i animacion, instando nan: “Pone fe den Jehova boso Dios pa boso por resultá di dura largu. Pone fe den su profetanan i asina resultá exitoso.” (2 Crónicanan 20:20) Fe den Jehova! Fe den su profetanan! Esei tabata e clave pa éxito. Awe tambe, segun cu nos ta sigui activo den e sirbishi di Jehova, laga nos nunca duda cu lo e haci nos fe victorioso!

 5. Con Testigonan di Jehova awe ta activo segun cu nan ta alabá Jehova?

⁵ Mescos cu e hendenan di Huda den tempu di Jehósafat, nos tin cu “duna alabansa na Jehova, pasobra su bondad amoroso ta te na tempu indefiní.” I con nos ta duna e alabansa aki? Mediante nos predicacion celoso di Reino! Mescos cu e hendenan ei di Huda “a cuminsá cu e sclamacion gososo i alabansa,” asina nos ta agregá obranan na nos fe. (2 Crónicanan 20:21, 22) Sí, laga nos demostrá e mésun fe genuino segun cu Jehova ta prepará pa bai den accion contra su enemigunan! Aunke e caminda por parce largu, laga nos ta dicididu pa wanta, activo den fe, mescos cu su pueblo victorioso ta haciendo den áreanan dje tera awe afectá pa condicionnan turbulento. Den algun pais severamente afectá dor di persecucion, violencia, hamber i condicionnan económico hopi pertá, fiel sirbidónan di Dios ta experenciando resultadonan remarcabel, manera e Anuario di Testigonan di Jehova pa 1998 ta informá.

Jehova Ta Salba Su Pueblo

 6. Con fe fuerte ta yuda nos keda leal awe?

⁶ E nacionnan malbado rond di Huda a purba hundi e pueblo di Dios, pero cu fe ehemplar Jehova su sirbidónan a respondé dor di canta su alabansanan. Nos por expresá e mésun fe awe. Dor di yena nos bida cu obranan di alabansa na Jehova, nos ta fortalecé nos armadura spiritual, sin laga ningun lugá pa Satanas su trampanan mañoso penetrá. (Efesionan 6:11) Fe fuerte lo sofocá e tentacion pa ser distraí dor dje entretenimentu degradá, materialismo i apatia cu ta caracterisá e mundu muribundo rond di nos. E fe invencibel aki lo laga nos sigui sirbi lealmente huntu cu “e esclabo fiel i discreto” segun cu nos ta ser nutrí continuamente dor dje dieta di alimento spiritual percurá “n’e debido tempu.”—Mateo 24:45.

 7. Con Testigonan di Jehova a respondé na vários atake contra nan?

⁷ Nos fe basá riba Bijbel lo fortalecé nos pa para firme contra campañanan odioso instigá dor di esnan cu ta manifestá e spiritu dje “esclabo malbado” di Mateo 24:48-51. Cumpliendo cu e profecia aki den un manera remarcabel, apóstatanan ta sembrando activamente mentira i propaganda perhudicial den hopi pais awe. Asta nan ta conspirá huntu cu algun cu ta den posicionnan di autoridad den e nacionnan. Caminda ta apropiado, Testigonan di Jehova a reaccioná, manera ta describí na Filipensenan 1:7, ‘defendiendo i estableciendo e bon nobo legalmente.’ Por ehempel, dia 26 di september, 1996, den un caso for di Grecia, e nuebe huesnan dje Corte Europeo pa Derechonan Humano, na Strasbourg, a reafirmá unánimamente cu “Testigonan di Jehova ta cai bou dje definicion di ‘religion conocí,’” cu derecho pa disfrutá di libertad di pensamentu, concenshi i creencia, i e derecho pa haci nan fe conocí. Pa loke ta apóstatanan, e huicio di Dios ta declará: “A sosodé cu nan e dicho dje proverbio berdadero: ‘E cachó a bolbe na su mes sacá, i e porco cu tabata bañá na lora den lodo.’”—2 Pedro 2:22.

 8. Den tempu di Jehósafat, con Jehova a ehecutá huicio contra e enemigunan di Su pueblo?

⁸ Aya den tempu di Jehósafat, Jehova a ehecutá huicio contra esnan cu kier a haci daño na Su pueblo. Nos ta lesa: “Jehova a pone hombernan den emboscada contra e yunan di Amon, Moab i e region montañoso di Seir cu tabata bin pa drenta Huda, i nan a cuminsá heridá otro. I e yunan di Amon i Moab a cuminsá lanta contra e habitantenan dje region montañoso di Seir pa destruí nan por completo i pa exterminá nan; i mesora cu nan a caba cu e habitantenan di Seir, nan a yuda ruiná cada un su propio compañero.” (2 Crónicanan 20:22, 23) E hendenan di Huda a yama e lugá ei e Yanura Abou di Beracá. Beracá ta nificá “Bendicion.” Den nos tempu tambe, Jehova su ehecucion di huicio riba su enemigunan lo resultá den bendicion pa su propio pueblo.

 9, 10. Ken a mustra cu nan merecé Jehova su huicio adverso?

⁹ Nos por puntra: Ken den nos tempu tin cu ricibí un huicio adverso for di Jehova? Pa haña contesta riba e pregunta ei, nos tin cu bai bek n’e profecia di Joël. Joël 3:3 ta papia dje enemigunan di su pueblo cu “tabata cambia e mucha homber pa un prostituta, i e mucha muher nan a bende pa biña.” Sí, nan a considerá e sirbidónan di Dios como hopi inferior na nan, e balor di nan yunan no mas cu esun di un prostituta of e prijs di un tinashi di biña. Nan lo tin cu duna cuenta pa esei.

¹⁰ Esnan cu ta cometé prostitucion spiritual tambe ta merecé huicio. (Revelacion 17:3-6) I specialmente reprensibel ta esnan cu ta pusha e podernan político pa persiguí Testigonan di Jehova i obstaculisá nan actividad, manera algun lider religioso demagógico ta haciendo recientemente na Oost Europa. Jehova ta expresá su determinacion pa actua contra hende asina cu ta obra maldad.—Joël 3:4-8.

“Santificá Guera!”

11. Con Jehova ta yama su enemigunan afó pa guera?

¹¹ Siguientemente, Jehova ta haci un yamada na su pueblo pa proclamá un desafio entre e nacionnan: “Santificá guera! Lanta e hombernan poderoso! Laga nan hala cerca! Laga nan subi, tur e hombernan di guera!” (Joël 3:9) Esaki ta un declaracion di un guera único—un guera hustu. Jehova su Testigonan leal ta dependé di armanan spiritual segun cu nan ta reaccioná contra rumor falsu, contrarestando falsedad cu berdad. (2 Corintionan 10:4; Efesionan 6:17) Pronto, Dios lo santificá “e guera dje gran dia di Dios e Todopoderoso.” E guera ei lo eliminá tur opositor di Dios su soberania for di riba tera. Su pueblo riba tera lo no tin ningun parti físico den esei. Literalmente i figurativamente, nan a ‘bati spada na ploeg i lansa na skèr di corta mata.’ (Isaías 2:4) Na contraste, Jehova ta desafiá e nacionnan opositor pa haci lo contrario: “Bati boso ploeg na spada i boso skèr di corta mata na lansa.” (Joël 3:10) E ta invitá nan pa haci uso di henter nan arsenal di arma. Pero nan no por tin éxito, pasobra e bataya i e victoria ta pertenecé na Jehova!

12, 13. (a) Apesar cu e Guera Friu a terminá, con hopi nacion a mustra cu ainda nan ta incliná na haci guera? (b) Kico e nacionnan no ta prepará p’e?

¹² Na principio di añanan ’90, e nacionnan a declará cu e Guera Friu a caba. En bista di esei, Nacionnan Uní a logra su meta principal di pas i siguridad? Apénas! Kico sucesonan recien na Burundi, República Democrático di Congo, Irak, Liberia, Ruanda, Somalia i ex-Yugoslavia ta bisa nos? Den e palabranan di Jeremías 6:14, nan ta bisando: “‘Tin pas! Tin pas!’ ora cu no tin pas.”

¹³ Maske guera abierto a terminá den algun lugá, nacionnan miembro di Nacionnan Uní ainda ta competí cu otro den producí armanan sofisticá di guera. Algun ta sigui mantené stocknan grandi di arma nuclear. Otronan ta desaroyá armanan kímico of bacteriológico pa destruccion masal. Segun cu e nacionnan ei ta reuní pa e sitio simbólico yamá Armagedon, Jehova ta desafiá nan: “Pa loke ta esun débil, lagu’e bisa: ‘Mi ta un homber poderoso.’ Duna boso yudansa i bini, boso tur, nacionnan tur rond, i reuní boso huntu.” E ora ei Joël ta interumpí cu su mes apelacion: “Na e lugá ei, O Jehova, laga bo poderosonan baha.”—Joël 3:10, 11.

Jehova Ta Protehá Esnan di Su Mes

14. Ken ta e poderosonan di Jehova?

¹⁴ Ken ta e poderosonan di Jehova? Un 280 biaha asina Bijbel ta yama e Dios berdadero “Jehova di ehércitonan.” (2 Reynan 3:14) E ehércitonan aki ta trupanan angelical di shelu cu ta para cla pa haci loke Jehova manda nan haci. Ora e sirionan a busca Eliseo pa gara, Jehova finalmente a habri e bista dje sirbidó di Eliseo p’e por a mira con bin nan lo no a logra: “Mira! e region montañoso tabata yen di cabai i garoshi di guera di candela tur rond di Eliseo.” (2 Reynan 6:17) Jesus a bisa cu lo e por a haci un apelacion na su Tata pa “mas cu diesdos legion di angel.” (Mateo 26:53) Describiendo Jesus cabalgando pa ehecutá huicio na Armagedon, Revelacion ta declará: “E ehércitonan cu tabata den shelu tabata siguié riba cabai blancu, i nan tabata bistí cu linen fini, blancu i limpi. I for di su boca ta sali un spada largu i skerpi, p’e por dal e nacionnan cuné, i lo e pastoreá nan cu un bara di heru. E ta trapa tambe e baki di pers biña dje rabia dje furia di Dios e Todopoderoso.” (Revelacion 19:14, 15) E baki di pers biña simbólico ei ta ser describí di un manera bibu como “e baki grandi di pers biña dje rabia di Dios.”—Revelacion 14:17-20.

15. Con Joël ta describí e guera di Jehova contra e nacionnan?

¹⁵ Con, anto, Jehova ta contestá e peticion di Joël pa laga Dios su mes poderosonan baha? Esei ta den e palabranan gráfico aki: “Laga e nacionnan lanta i subi n’e yanura abou di Jehósafat; pasobra ei ami lo sinta pa husga tur e nacionnan tur rond. Hinca un sikkel, pasobra e cosecha a hecha. Bini, baha, pasobra e baki di pers biña a yena. E bakinan di pers realmente ta pasa over; pasobra nan maldad a bira abundante. Multitudnan, multitudnan ta den e yanura abou di decision, pasobra e dia di Jehova ta cerca den e yanura abou di decision. Solo i luna mes siguramente lo bira scur, i e streanan mes realmente lo kita nan claridad. I Jehova mes lo grita manera leon for di Síon, i lo e saca su bos for di Jerusalem. I shelu i tera siguramente lo sagudí.”—Joël 3:12-16.

16. Ken lo ta entre esnan cu Jehova ta ehecutá huicio contra dje?

¹⁶ Mes sigur cu e nomber di Jehósafat ta nificá “Jehova Ta Hues,” mes sigur Dios, Jehova, lo vindicá su soberania plenamente ora e ehecutá huicio. E profecia ta describí esnan cu ta ricibí un huicio adverso como ‘multitudnan, multitudnan den e yanura abou di decision.’ Cualkier persona cu resta cu ta na banda di religion falsu lo ta entre e multitudnan ei. Tambe lo tin esnan describí den e segundo Salmo—e nacionnan, gruponan nacional, reynan di tera i oficialnan haltu—cu a preferá e sistema corupto dje mundu aki riba ‘sirbi Jehova cu temor.’ Esakinan ta nenga di “sunchi e yu.” (Salmo 2:1, 2, 11, 12) Nan no ta reconocé Jesus como e Rey socio di Jehova. Ademas, entre e multitudnan marcá pa destruccion lo tin tambe tur e hendenan cu e Rey glorioso ei lo husga como “cabritu.” (Mateo 25:33, 41) Na Jehova su debido tempu pa grita manera leon for di Jerusalem celestial, su Rey di reynan nombrá lo cabalgá pa ehecutá e huicio ei. Shelu i tera lo sagudí sigur! Sin embargo, nos ta haña e siguransa: “Jehova lo ta un refugio pa su pueblo, i un fortalesa p’e yunan di Israel.”—Joël 3:16.

17, 18. Ken ta ser identificá como sobrebibientenan dje tribulacion grandi, i ki condicionnan nan lo disfrutá di dje?

¹⁷ Revelacion 7:9-17 ta identificá esnan cu ta sobrebibí e tribulacion grandi como “un multitud grandi” cu ta consistí di esnan cu ta ehercé fe den e poder rescatador dje sanger di Jesus. Esakinan ta haña proteccion den e dia di Jehova, miéntras cu e multitudnan tur pertá riba otro dje profecia di Joël ta haña huicio adverso. Joël ta bisa e sobrebibientenan: “Boso lo tin cu sa cu ami ta Jehova boso Dios, cu ta biba riba Síon mi ceru santu,” Jehova su habitacion celestial.—Joël 3:17a.

¹⁸ E ora ei e profecia ta informá nos cu e teritorio dje Reino celestial di Dios “tin cu bira un lugá santu; i pa loke ta stranheronan, nan lo no pasa mas dor di dje.” (Joël 3:17b) Den shelu i den e dominio terenal dje Reino celestial ei, lo no tin stranhero, pasobra tur lo ta uní den adoracion puru.

19. Con Joël ta describí e felicidad paradísico dje pueblo di Dios awe?

¹⁹ Asta awor aki, un abundancia di pas ta prevalecé entre e pueblo di Jehova aki riba tera. Unidamente, nan ta proclamando su huicionan den mas cu 230 pais i den rond di 300 diferente idioma. Joël ta profetisá nan prosperidad di un manera masha bunita: “Tin cu sosodé den e dia ei cu e cerunan lo lek biña dushi, i e ceritunan mes lo core lechi, i e roinan mes di Huda tur lo core awa.” (Joël 3:18) Sí, Jehova lo sigui drama riba su alabadónan riba tera un abundancia di bendicionnan gososo i prosperidad i un creciente fluho di berdad precioso. E soberania di Jehova lo a ser vindicá plenamente den e yanura abou di decision, i goso lo abundá segun cu e ta biba pa semper entre su pueblo rescatá.—Revelacion 21:3, 4.

Bo Por Corda?

◻ Con Jehova a rescatá su pueblo den e dianan di Jehósafat?

◻ Ken Jehova ta husga digno di destruccion den “e yanura abou di decision”?

◻ Ken ta e poderosonan di Dios i ki participacion nan lo tin den e conflicto final?

◻ Ki felicidad adoradónan fiel ta disfrutá di dje?

[Plachi na página 21]

Jehova a bisa Huda: ‘No tene miedu pasobra e bataya no ta di boso sino di Dios’

[Plachi na página 23]

Jehova ta desafiá su enemigunan pa ‘bati nan ploeg na spada’

[Plachi na página 24]

Bijbel ta identificá un multitud grandi di sobrebibiente dje tribulacion grandi