E Organisacion di Jehova Ta Apoya Bo Ministerio
“Mi a mira un otro angel bulando meimei di shelu, i e tabatin bon nobo eterno pa declará como noticia alegre.”—REVELACION 14:6.
1. Ki pruebanan Testigonan di Jehova a pasa aden, i con bin nan a sobrebibí?
PAKICO ta asina importante pa reconocé e papel cu e organisacion celestial di Jehova ta hunga den apoyá e ministerio cristian? Wel, Testigonan di Jehova lo por a cumpli cu e predicacion dje bon nobo dje Reino di Dios na tur parti di un mundu hostil sin e apoyo dje ehércitonan celestial di Jehova? Testigonan a predicá e bon nobo durante un siglo di nacionalismo extremo, sistemanan político totalitario, gueranan mundial i vários adversidad. E Testigonan lo por a sobrebibí e awaceru internacional di prehuicio, i hopi biaha persecucion violento cu a ser dirigí contra nan sin yudansa di Jehova?—Salmo 34:7.
Sobrebibencia Apesar di Oposicion Mundial
2. Ki paralelo tin entre cristiannan berdadero dje promé siglo i esnan djawe?
2 Den e siglo 20 aki, tantu enemigunan religioso como político, a bini cu tur posibel obstáculo legal i di otro tipo, pa purba stroba of para e trabou di Jehova. Rumannan cristian a ser persiguí, malrepresentá, difamá i calumniá—hopi a ser asta matá—hopi biaha instigá pa clero di Babilonia e Grandi. Por bisa, mescos cu tabata e caso dje cristiannan di promé, cu “berdaderamente, pa loke ta e secta aki, ta conocí pa nos cu tur caminda hende ta papia contra dje.” Mescos cu clero hudiu dje tempu di Cristo a bringa ferosmente pa para su ministerio, asina e clero i apóstatanan, den asociacion cu nan freinan político, a purba sofocá e gran trabou educacional di duna testimonio cu e pueblo di Jehova ta hiba a cabo.—Echonan 28:22; Mateo 26:59, 65-67.
3. Kico nos por siña for dje integridad di Henryka Żur?
3 Tuma por ehempel loke a sosodé na Polonia dia 1 di mart 1946. Henryka Żur, un mucha muher Testigo di 15 aña di edad cerca di Chełm, tabata compañá un otro Testigo, un ruman homber, bishitando hende interesá den un pueblito cercano. Miembronan di un escuadron militar católico cu yama Narodowe Siły Zbrojne (Forsanan Nacional Armá) a gara nan. Nan a maltratá e ruman homber severamente, pero el a sobrebibí. Esei no tabata e caso cu Henryka. Nan a tortur’é teriblemente pa hopi ora pa nan purba obligu’é haci e señal dje crus católico. Un di esnan cu a torment’é a bisa: “Pensa di paden kico cu bo kier, djis haci e crus católico. Di otro manera un bala ta wardá bo!” El a debilitá den su integridad? No. E cobardenan religioso a lastr’é hiba na un mondi ei cerca i a tir’é. Tog, el a sali victorioso! Nan no a logra kibra su integridad.a—Romanonan 8:35-39.
4. Con elementonan político i religioso a purba sofocá e trabou di predicá e Reino?
4 Pa mas cu shen aña caba, sirbidónan di Dios di tempu actual a ser tratá cruelmente i sin respet. Pa motibu cu Testigonan di Jehova no ta, i no kier ta, parti di Satanas su religionnan principal, nan ta ser mirá como víctima fácil di contrincantenan fanático i esnan cu ta criticá nan impulsá pa prehuicio. E elementonan político a atacá nan ferosmente. Hopi Testigo a muri como mártir debí na nan fe. Asta asina yamá democracianan a trata na impedí e predicacion dje bon nobo. Leu ayá na 1917 na Cánada i Merca, clero a instigá acusacionnan di subversion contra e Studiantenan di Bijbel, manera e Testigonan tabata yama e tempu ei. Funcionarionan di Sociedad Watch Tower a ser encarcelá inhustamente i ta te despues nan a ser exonerá.—Revelacion 11:7-9; 12:17.
5. Ki palabranan a sirbi di animacion pa Jehova su sirbidónan?
5 Satanas a usa tur medio na su disposicion pa purba para e trabou di duna testimonio cu Cristo su rumannan i nan compañeronan leal ta haci. Tog, manera asina tantu experencia ta mustra, ni menasa, intimidacion, violencia físico, prizon, camponan di concentracion, ni sikiera morto a silenciá Testigonan di Jehova. I esaki tabata e caso den henter historia. Bes tras bes, Eliseo su palabranan a sirbi como un animacion: “No tene miedu, pasobra tin mas cu ta cu nos cu esnan cu ta cu nan.” Un motibu ta cu tin hopi mas tantu angel fiel cu e trupanan dje Diabel!—2 Reynan 6:16; Echonan 5:27-32, 41, 42.
Jehova Ta Bendicioná Predicacion Celoso
6, 7. (a) Ki esfuersonan a haci na cuminsamentu pa predicá e bon nobo? (b) Ki cambionan beneficioso a tuma lugá cuminsando na 1943?
6 Den transcurso di siglo 20, Testigonan di Jehova a usa hopi progreso den tecnologia afin di amplificá i acelerá e trabou grandi di duna testimonio promé cu e fin yega. Aya na 1914, Pastor Russell, e promé presidente di Watch Tower Bible and Tract Society, a promové e uso trempan di ‘slide’ i película, sincronisá cu comentarionan basá riba Bijbel riba disco grabá, den un produccion di ocho ora yamá “E Foto-Drama di Creacion.” E presentacion a asombrá auditorionan den hopi pais e tempu ei. Mas despues, den añanan ’30 i ’40, e Testigonan a bira conocí pa nan trabou di predicá di cas-pa-cas cu tocadisco portátil, usando grabacionnan di discursonan bíblico presentá pa J. F. Rutherford, e di dos presidente di Sociedad.
7 Na 1943, Sociedad a dal un paso balente bou di direccion di Nathan H. Knorr, e di tres presidente di Sociedad, ora a dicidí pa cuminsá cu un scol pa ministernan den tur congregacion. E Testigonan lo a ser entrená pa predicá i siña di cas pa cas sin usa grabacion riba disco. For dje tempu ei padilanti, a organisá otro scolnan pa entrená misioneronan, ministernan pionero di tempu completo, ancianonan di congregacion i superintendentenan responsabel den e oficinanan di Sociedad Watch Tower. Kico tabata e resultado?
8. Con Testigonan a demostrá un fe grandi na 1943?
8 Aya na 1943, meimei di Guera Mundial II, tabatin solamente 129.000 Testigo activo den 54 pais. Sin embargo, nan tabatin e fe i determinacion cu Mateo 24:14 lo a cumpli promé cu e fin yega. Nan tabata convencí cu Jehova lo a soru p’e mensahe spiertador i importante ser proclamá promé cu e sucesonan, cu lo a trece fin n’e sistema di cosnan corupto aki, tuma lugá un tras di otro. (Mateo 24:21; Revelacion 16:16; 19:11-16, 19-21; 20:1-3) Nan esfuersonan a ser recompensá?
9. Ki echonan ta mustra cu e trabou di duna testimonio a prosperá?
9 Awor tin por lo ménos 13 pais unda tin mas cu 100.000 Testigo activo. Vários di esakinan ta paisnan dominá pa Iglesia Católico. Sin embargo, wak e situacion. Brazil tin rond di 450.000 publicadó dje bon nobo, i mas cu 1.200.000 hende a asistí n’e Memorial dje morto di Cristo na 1997. México ta un otro ehempel, cu casi 500.000 Testigo i mas cu 1.600.000 hende n’e celebracion di Memorial. Otro paisnan católico ta Italia (rond di 225.000 Testigo), Francia (rond di 125.000), Spaña (mas cu 105.000), i Argentina (mas cu 115.000). Na Merca, caminda religionnan protestant, católico i hudiu ta predominá, tin rond di 975.000 Testigo i mas cu 2.000.000 persona a asistí n’e Memorial. Siguramente, multitudnan grandi ta saliendo na cantidad for di Babilonia e Grandi, e imperio mundial di religion falsu, cu su siñansanan místico i ta acudiendo na Dios su promesanan simpel i sigur di “shelu nobo i un tera nobo.”—2 Pedro 3:13; Isaías 2:3, 4; 65:17; Revelacion 18:4, 5; 21:1-4.
Adaptando n’e Necesidadnan di Hende
10. Con circunstancianan a cambia den algun área?
10 Hopi di esnan cu a acudí na Jehova mediante Cristo Jesus a ser hañá di cas pa cas. (Juan 3:16; Echonan 20:20) Pero a usa otro métodonan tambe. Tempu a cambia, i condicionnan económico ta di tal manera cu awor hopi hende muher ta traha pafó di cas. Hopi biaha, durante siman, por haña masha poco hende na cas. Di manera cu Testigonan di Jehova a adaptá nan n’e situacion. Mescos cu Jesus i e disipelnan di promé, nan ta bai caminda i ora nan por haña e hendenan.—Mateo 5:1, 2; 9:35; Marco 6:34; 10:1; Echonan 2:14; 17:16, 17.
11. Unda Testigonan di Jehova ta predicá awe, i cu ki resultado?
11 Testigonan ta tumando e iniciativa i ta predicando discretamente na hende den parkeerplaats grandi, centro comercial, fábrica, oficina i negoshinan, scolnan, warda di polis, pomp di gasolin, hotel i restaurant i riba caya. De facto, nan ta predicá tur caminda cu nan por haña hende. I si e hendenan ta na cas, e ora ei e Testigonan ta sigui bishitá nan ei. E método adaptabel i práctico aki ta resultando den mas distribucion di literatura bíblico. Ta haña personanan semehante na carné. Ta cuminsá studionan nobo di Bijbel. Mas cu cincu miyon i mei minister boluntario ta efectuando celosamente e trabou educacional di mas grandi den historia humano! Abo tin e privilegio di ta un di nan?—2 Corintionan 2:14-17; 3:5, 6.
Kico Ta Motivá Testigonan di Jehova?
12. (a) Con Jehova ta siñando su pueblo? (b) Ki efecto e siñansa aki tin?
12 Ki papel e organisacion celestial di Dios ta hunga den tur esaki? Isaías a profetisá: “Tur bo yunan lo ta personanan siñá pa Jehova, i e pas di bo yunan lo ta abundante.” (Isaías 54:13) Jehova ta siñando e hermandad mundial uní aki mediante su organisacion visibel riba tera—na Salon di Reino, na congreso i na asambleanan. Esei ta resultá den pas i unidad. Jehova su siñansa a producí un pueblo único, educá pa nan stima otro i stima nan próhimo mescos cu nan mes, pa no odia nan próhimo, unda cu nan por ta biba den e mundu dividí aki.—Mateo 22:36-40.
13. Con nos por ta sigur cu angelnan ta yuda dirigí e trabou di predicá?
13 Amor ta loke ta motivá Testigonan di Jehova pa sigui predicá apesar di apatia of persecucion. (1 Corintionan 13:1-8) Nan sa cu nan trabou salbador di bida ta ser dirigí for di shelu, manera Revelacion 14:6 ta declará. Kico ta e mensahe cu ta ser proclamá bou di direccion angelical? “Teme Dios i dun’é gloria, pasobra e ora di huicio di dje a yega, i p’esei, adorá Esun cu a traha e shelu i tera i laman i fontein di awa.” E predicacion dje bon nobo di Reino ta halsa e nomber di Jehova. Hende ta ser invitá pa duna gloria n’e Creador, Dios, no na criaturanan i evolucion ciegu. I pakico e trabou di predicá ta asina urgente? Pasobra e ora di huicio a yega—huicio contra Babilonia e Grandi i tur otro aspecto di Satanas su sistema di cosnan visibel.—Revelacion 14:7; 18:8-10.
14. Ken ta enbolbí den e gran campaña di siñamentu aki?
14 Ningun cristian dedicá ta dispensá for dje trabou aki di predicá. Ancianonan spiritual ta hiba delantera den predicá cu e congregacion. Pioneronan entrená ta completamente ocupá den e trabou. Publicadónan celoso dje mensahe di Reino, sea cu nan por predicá solamente un par di ora pa luna of hopi, ta plamando e mensahe den tur skina dje tera.—Mateo 28:19, 20; Hebreonan 13:7, 17.
15. Kico ta un indicacion dje impacto cu e trabou di predicá di Testigonan di Jehova tin?
15 Tur e esfuerso aki tabatin un impacto riba e mundu? Un simpel prueba cu e tabatin un impacto ta e cantidad di biaha cu a presentá Testigonan di Jehova den programanan di television i den columnanan di korant. Hopi bes esakinan ta resaltá nos persistencia i determinacion pa alcansá tur hende. Sí, nos celo i presencia constante ta haci un impresion profundo, asta si mayoria hende ta rechasá e mensahe i e mensaheronan!
Nos Celo pa Completá e Testimonio
16. Ki actitud nos mester manifestá awor den e tempu limitá cu ta resta?
16 Nos no sa cuantu tempu mas a resta p’e sistema di cosnan aki, ni nos no tin nodi di sa, tanten cu nos motibu pa sirbi Jehova ta puru. (Mateo 24:36; 1 Corintionan 13:1-3) Pero nos sa sí cu p’e amor, poder i husticia di Jehova keda manifestá, e bon nobo mester ser predicá “promé.” (Marco 13:10) P’esei, sin importá cuantu aña nos por ta sperando ansiosamente riba e fin dje mundu malbado, inhustu i violento aki, nos tin cu cumpli celosamente cu nos dedicacion di acuerdo cu nos circunstancianan. Kisas nos ta di edad avansá of enfermo, pero ainda nos por sirbi Jehova cu e celo cu nos tabatin tempu cu nos tabata mas yong of mas salú. Tal bes nos no por logra dedicá mes tantu tempu mas den e ministerio manera nos tabata haci ántes, pero sigur nos por mantené e calidad di nos sacrificio di alabansa na Jehova.—Hebreonan 13:15.
17. Relatá un experencia animador cu lo por yuda nos tur.
17 P’esei, sea hóben of bieu, laga nos desplegá celo i compartí nos mensahe positivo di un mundu nobo cu tur hende cu nos topa. Laga nos ta manera e mucha muher tímido di shete aña na Australia cu a bai tienda cu su mama. El a tende na Salon di Reino con importante ta pa tur cristian predicá, di manera cu el a hinca dos foyeto bíblico den su tas. Miéntras cu e cahera tabata atendiendo su mama, e mucha a disparcé. Ora su mama a busk’é, at’é tabata ofreciendo un foyeto na un señora! E mama a bai cerca e señora pa pidié despensa si su yu a molesti’é. Pero e señora a aceptá e foyeto cortesmente. Ora e mama tabata su so cu su yu atrobe, el a puntr’é di unda el a saca e curashi pa acercá un hende straño. “Mi a djis bisa den mi mes: Un, dos, tres! I mi a bai!”
18. Di ki manera nos por demostrá un spiritu digno di admiracion?
18 Nos tur mester di un spiritu manera esun dje mucha muher australiano, specialmente pa por acercá hende straño of asta funcionarionan cu e bon nobo. Kisas nos tin miedu di ser rechasá. Laga nos no lubidá loke Jesus a bisa: “No bira anshá tocante con of kico boso lo papia na defensa of kico boso lo bisa; pasobra e spiritu santu lo siña boso e ora ei mes loke boso mester bisa.”—Lucas 12:11, 12.
19. Con bo ta mira bo ministerio?
19 P’esei confia den e yudansa dje spiritu di Dios ora bo ta acercá hende den un manera bondadoso cu e bon nobo. Miyones di hende ta pone nan confiansa den homber i muhernan hopi bes indigno cu ta aki awe i mañan no t’ei mas. Nos ta confia den Jehova i den su organisacion celestial—Cristo Jesus, e angelnan santu, i e cristiannan ungí resucitá—cu ta biba pa semper! P’esei, corda: “Tin mas cu ta cu nos cu esnan cu ta cu nan”!—2 Reynan 6:16.
[Nota]
a Pa mas ehempel, mira e Anuario de los testigos de Jehová para 1994, página 217-20.
Con Bo Ta Contestá?
◻ Ki papel e organisacion celestial di Dios a hunga den e sobrebibencia dje pueblo di Jehova?
◻ Ki elementonan político i religioso a atacá Testigonan di Jehova den siglo 20?
◻ Con Testigonan di Jehova a adaptá nan ministerio n’e necesidadnan dje tempu?
◻ Kico ta motivá bo pa predicá?
[Plachi na página 17]
Henryka Żur
[Plachinan na página 18]
Hapon
Martinique
Merca
Kenya
Merca
Testigonan di Jehova ta predicá tur ora i tur caminda cu nan por haña hende
[Plachi na página 20]
Mas promé den e siglo aki, tabata usa tocadisco pa plama e mensahe di Reino