Bo Ta Corda?

Bo a pensa cuidadosamente riba edicionnan recien di E Toren di Vigilancia? Si ta asina, lo bo hañ’é interesante pa recordá lo siguiente:

◻ Pakico e doctrina di predestinacion ta irazonabel?

Si Dios tabata sa delantá i a decretá e caida di Adam den picá, esei lo a hacié e autor di picá ora el a traha hende i lo e ta responsabel pa tur maldad i sufrimentu humano. No por armonisá esaki cu e echo cu Jehova ta un Dios di amor cu ta odia maldad. (Salmo 33:5; Proverbionan 15:9; 1 Juan 4:8)—15/4, página 7, 8.

◻ Na cumplimentu cu Isaías 2:2-4, kico hende for di hopi nacion ta haciendo?

Nan ta basha bai na Jehova su cas di adoracion. Tambe nan ta abstené di ‘siña di guera,’ pasobra na a pone nan confiansa den e proteccion dje ehércitonan celestial di Dios, kendenan ta cla prepará pa destruí tur enemigu di pas.—15/4, página 30.

◻ Ken ta e poderosonan di Dios cu Joël 3:10, 11 ta papia di dje?

Un 280 biaha asina Bijbel ta yama e Dios berdadero “Jehova di ehércitonan.” (2 Reynan 3:14) E ehércitonan aki ta trupanan angelical poderoso di shelu, cu ta cla pa haci loke Jehova manda nan haci.—1/5, página 23.

◻ Ki les nos por saca for dje echo cu Jehova a rekerí pa Job haci oracion na fabor di esnan cu a peca contra dje? (Job 42:8)

Promé cu Job a haña su salú bek, Jehova a rekerí p’e haci oracion na fabor di esnan cu a peca contra dje. Esaki ta mustra cu Jehova ta rekerí pa nos pordoná esnan cu ta peca contra nos promé cu nos mes picánan por ser pordoná. (Mateo 6:12; Efesionan 4:32)—1/5, página 31.

◻ Kico Santiago tabata kier men ora el a bisa: “Laga awante completá su obra”? (Santiago 1:4)

Awante tin un trabou, un “obra” di haci. Su asignacion ta pa haci nos completo den tur sentido. P’esei, dor di laga prueba sigui su curso sin usa medionan no-bíblico pa trece un fin rápido na dje, nos fe ta ser probá i refiná.—15/5, página 16.

◻ Pakico Dios a warda asina tantu pa resolvé e problemanan di humanidad?

Jehova su punto di bista di tempu ta diferente for di esun di nos. P’e Dios eterno, e periodo for dje creacion di Adam te cu awor no ta yega ni un siman. (2 Pedro 3:8) Pero sea cual sea nos punto di bista di tempu, cada dia cu pasa ta trece nos mas cerca di Jehova su dia di vindicacion.—1/6, página 5, 6.

◻ Kico ta motivá Testigonan di Jehova? Jehova su siñansa a producí un pueblo único, educá pa nan stima otro i stima nan próhimo mescos cu nan mes. (Isaías 54:13) Amor ta loke ta motivá Testigonan di Jehova pa sigui predicá apesar dje apatia di hende i e oposicion. (Mateo 22:36-40; 1 Corintionan 13:1-8)—15/6, página 20.

◻ Kico Jesus su palabranan, “haci esfuerso vigoroso pa drenta dor dje porta smal,” ta implicá? (Lucas 13:24)

Jesus su palabranan ta implicá lucha, i hopi esfuerso di nos mes parti. Su palabranan ta indicá tambe cu kisas algun hende lo por purba “drenta dor dje porta,” pero solamente manera ta cumbiní nan, cu pasonan trankil, manera nan ta preferá. P’esei cada un di nos por puntra: ‘Mi ta dedicá mi mes cu diligencia i ta traha duru?’—15/6, página 31.

◻ Con esnan resucitá lo ser “husgá di acuerdo cu loke ta pará skirbí den e rolnan segun nan obranan”? (Revelacion 20:12)

E rolnan aki no ta e registro di nan obranan di pasado; ora nan a muri, nan a ser absolvé dje picánan cu nan a cometé durante nan bida. (Romanonan 6:7, 23) Sin embargo, ainda hende resucitá lo ta bou dje picá adámico. Lo mester ta, anto, cu e rolnan aki lo describí instruccionnan divino cu tur hende mester sigui afin di beneficiá plenamente dje sacrificio di Jesucristo.—1/7, página 22.

◻ Ki les e parábola di Jesus, tocante e bon Samaritano, tin pa nos? (Lucas 10:30-37)

Jesus su parábola ta mustra cu un persona berdaderamente recto ta un persona cu no solamente ta obedecé Dios su leynan, sino ta imitá su cualidadnan tambe. (Efesionan 5:1) Ademas e ta mustra cu amor pa próhimo mester surpasá tur barera nacional, cultural i religioso. (Galationan 6:10)—1/7, página 31.

◻ Cua ta tres área den cua lo bo por siña conocé bo yunan i duna guia di mayor?

(1) Yuda bo yunan scoge un tipo di trabou seglar adecuá, (2) prepará nan pa trata cu tension emocional na scol i na trabou, (3) mustra nan con pa satisfacé nan necesidad spiritual.—15/7, página 4.

◻ Cu ki propósito Jehova a descansá riba “e di shete dia”? (Génesis 2:1-3)

Dios no a descansá dor cu e tabata cansá. Mas bien, el a para su trabou terenal afin di laga su obra desaroyá i yega na pleno gloria, na su onor i alabansa.—15/7, página 18.

◻ Cua ta tres manera den cua nos por ehercé husticia?

Na promé lugá, nos tin cu adaptá nos mes n’e normanan moral di Dios. (Isaías 1:17) Na di dos lugá, nos ta ehercé husticia ora nos ta trata otronan n’e manera cu nos kier pa Jehova trata nos. (Salmo 130:3, 4) Na di tres lugá, nos ta desplegá husticia divino ora nos ta participá diligentemente den e actividad di predicá. (Proverbionan 3:27)—1/8, página 14, 15.