Capítulo 41

E Dia di Huicio di Dios—su gozoso resultado!

Vision 15—Revelacion 20:11–21:8

Tema: E resureccion general, e Dia di Huicio, i bendicion dje cielo nobo i tera nobo

Tempo di cumplimento: Durante e Reino di mil aña

 1. (a) Kico humanidad a perde ora Adam i Eva a peca? (b) Cua propósito di Dios no a cambia, i con nos sa?

COMO hende, nos tabata creá pa biba pa semper. Si Adam i Eva a obedece e mandamento di Dios, nan lo no a muri nunca. (Génesis 1:28; 2:8, 16, 17; Eclesiastés 3:10, 11) Pero, ora nan a peca, nan a perde perfeccion i bida, tanto pa nan mes como pa nan yiunan, i morto a yega di reina riba humanidad como un enemigo constante. (Romano 5:12, 14; 1 Corintio 15:26) No obstante, e propósito di Dios di laga hende perfecto biba pa semper den paradijs riba tera no a cambia. Den su gran amor pa humanidad, el a manda na mundo su Yiu unigénito, Jesucristo, cu a duna su bida humano perfecto como rescate pa “hopi” desendiente di Adam. (Mateo 20:28; Juan 3:16) Awor Jesús por usa e mérito legal di su sacrificio pa restora hende creyente na bida den perfeccion den paradijs riba tera. (1 Pedro 3:18; 1 Juan 2:2) Ki un gran motibo pa humanidad “keda gozoso i alegra”!—Isaías 25:8, 9.

 2. Juan a informa di kico den Revelacion 20:11, i kico ta e “trono grandi blancu”?

² Cu Satanás cerá den abismo caba, e glorioso Reino di mil aña di Jesús ta cuminza. Esei awor ta e “dia” den cua Dios ta “propone di huzga e tera habitá den husticia usando un homber cu el a nombra.” (Echo 17:31; 2 Pedro 3:8) Juan a declara: “I mi a mira un gran trono blancu i esun sintá riba dje. Tera i cielo a hui di dilanti dje, i ningun lugar a wordu hayá pa nan.” (Revelacion 20:11) Kico ta e “gran trono blancu”? Esei tin cu ser e tribunal di “Dios e Huez di tur.” (Hebreo 12:23) Awor e ta huzga humanidad en cuanto ken lo beneficiá dje sacrificio di rescate di Jesús.—Marco 10:45.

 3. (a) E echo cu e trono di Dios ta “grandi” i “blancu” ta indica kico? (b) Ken lo haci e huzgamento den e Dia di Huicio, i riba cua base?

³ E trono di Dios ta “grandi,” enfatizando e grandeza di Jehova como Señor Soberano, i e ta “blancu,” halando atencion na su husticia sin mancha. Dios ta e Huez final di humanidad. (Salmo 19:7-11; Isaías 33:22; 51:5, 8) Sin embargo, el a asigna na Jesucristo e trabao di huzga: “E Tata no ta huzga ningun hende, sino a encarga e Yiu cu tur e huzgamento.” (Juan 5:22) Hunto cu Jesús ta su 144.000 asociado, na ken e poder di “huzga tabata duná . . . pa mil aña.” (Revelacion 20:4) Sin embargo, ley di Jehova Dios ta loke ta decidi loke lo sosode cada persona durante di Dia di Huicio.

 4. Kico kier men cu “e tera i cielo ta hui”?

⁴ Di ki manera “tera i cielo a hui”? Esei ta e mesun cielo cu a bai manera un rol, tempo di habrimento di seyo di seis, es decir, tur gobierno humano cu ta ser “wardá pe candela i ta ser reserbá te ne dia di huicio i di destruccion di hende malbado.” (Revelacion 6:14; 2 Pedro 3:7) E tera ta e sistema di cosnan organizá cu ta existi bao di tal gobernacion. (Revelacion 8:7) E destruccion dje bestia salbahe i di rey dje tera i nan ehército, hunto cu esnan cu ta recibi e marca dje bestia salbahe i esnan cu ta rindi adoracion na su imagen, ta simboliza e huimento di cielo i tera. (Revelacion 19:19-21) Despues di ehecucion dje huicio dje tera i cielo di Satanás, e Gran Huez ta decreta un otro Dia di Huicio.

E Dia di Huicio di mil aña

 5. Despues cu e cielo bieu i e tera bieu a hui, ken ta keda pa ser huzgá?

⁵ Ken ta keda pa ser huzgá despues di huimento dje tera i cielo bieu? Esei no ta e resto ungí dje 144.000, pasobra nan a ser huzgá i seyá caba. Si tin ungínan na bida riba tera ainda despues di Armagedón, nan tin cu muri pronto despues i recibi nan recompensa celestial mediante un resureccion. (1 Pedro 4:17; Revelacion 7:2-4) Sin embargo, e miyones di hende dje multitud grandi cu ta sali awor for dje tribulacion grandi ta para destacá “dilanti dje trono.” Nan a ser contá husto caba pa nan sobrebibencia debí na nan fe den e sanger dramá di Jesús, pero nan huzgamento tin cu sigi durante e mil aña mientras cu Jesús ta sigi guíanan ne “fontein di awa di bida.” Anto, ya cu nan a ser restorá na perfeccion humano i probá despues, nan lo ser declará husto den e sentido di mas completo. (Revelacion 7:9, 10, 14, 17) Yiu cu ta sobrebiba e tribulacion grandi i cualkier yiu cu ta nace dje multitud grandi durante e mil aña di igual manera tin cu ser huzgá durante e mil aña.—Compara cu Génesis 1:28; 9:7; 1 Corintio 7:14.

 6. (a) Juan a mira cua multitud, i kico kier men e palabra “chikito i grandi”? (b) E resureccion di miyones di hende incontable den e memoria di Dios lo sosode di ki manera sin duda?

⁶ Sin embargo, Juan a mira un multitud hopi mas grandi cu e multitud grandi di sobrebibiente. Esei ta na cantidad di miles di miyones! “I mi a mira e mortonan, chikito i grandi, pará dilanti dje trono, i rol tabata habrí.” (Revelacion 20:12a) Esnan “chikito i grandi” ta inclui hende prominente i també menos prominente di humanidad cu a biba i a muri riba tera durante e último 6.000 aña. Den su Evangelio cu apóstol Juan a skirbi poco despues di Revelacion, Jesús a bisa dje Tata: “El a duna [Jesús] autoridad di haci huzgamento, pasobra e ta Yiu di hende. No straña riba esei, pasobra e ora ta bini den cua tur esnan den graf memorial lo tende su boz i sali.” (Juan 5:27-29) Ki un magnífico proyecto—contrarestando e morto i entierro di hende durante tur e pasado! Sin duda e miyones di hende incontable den e memoria di Dios lo ser resusitá gradualmente di manera cu e multitud grandi—tanto chikito na comparacion—por atende na problema cu por presenta pasobra hende resusitá por tin e tendencia na principio di sigi nan moda di biba di antes, cu e debilidad i actitud carnal di dje.

Ken ta ser resusitá i huzgá?

7, 8. (a) Cua rol ta ser habrí, i kico ta sosode despues? (b) Lo no tin resureccion pa ken?

⁷ Juan a agrega: “Pero un otro rol tabata habrí; esei ta e rol di bida. I e mortonan tabata huzgá di acuerdo cu loke ta pará skirbí den e rol segun nan obra. I lamá a entrega esnan morto den dje, i morto i Hades a entrega esnan morto den nan, i nan tabata huzgá individualmente segun nan obra.” (Revelacion 20:12b, 13) Realmente un bista asombroso! Tanto ‘lamá, como morto, i Hades’ ta hunga un papel, pero ripara cu un no ta e lugar di otro.a Jonás, ora e tabata den e barica dje piscá i p’sei tabata hundo den lamá, a bisa cu e tabata den Sheol, of Hades. (Jonás 2:2) Si e morto heredá for di Adam ta tene hende den su gara, anto probablemente nan també ta den Hades. Tal palabra profético ta duna siguranza fuerte di cu ningun hende lo ser pasá por halto.

⁸ Naturalmente, tin un cantidad desconocí cu lo no ser resusitá. Den eseinan tin scriba i fariseo cu no a arrepenti, cu a rechaza Jesús i su apóstolnan, també e religioso “hende di maldad” i cristian ungí “cu a kita cai.” (2 Tesalonicense 2:3; Hebreo 6:4-6; Mateo 23:29-33) Jesús també a menciona hende semehante di cabrito ne tempo di fin di mundo cu ta bai den “candela eterno prepará pe Diabel i su angelnan,” esta, “cortamento eterno.” (Mateo 25:41, 46) No tin resureccion pa nan!

 9. Con apóstol Pablo a indica cu algun lo recibi fabor special den e resureccion, i esei ta inclui ken?

⁹ En cambio, algun lo recibi fabor special den e resureccion. Apóstol Pablo a indica esei ora el a bisa: “Mi tin speranza en cuanto Dios . . . cu lo tin un resureccion tanto dje hustonan como dje inhustonan.” (Echo 24:15) En cuanto e resureccion terrenal, e “hustonan” lo ser fiel homber i muher di antigua—Abraham, Rahab, i hopi otronan—cu tabata declará husto via nan amistad cu Dios. (Santiago 2:21, 23, 25) Den e mesun grupo lo tin otro carnénan husto cu a muri fiel na Jehova Dios den e dia djawe. Probablemente, tur wardador di integridad asina lo ser resusitá na principio dje Reino di mil aña di Jesús. (Job 14:13-15; 27:5; Daniel 12:13; Hebreo 11:35, 39, 40) Sin duda, hopi hustonan resusitá lo ser asigná privilegio special di ser superintendente dje trabao tremendo di restoracion di Paradijs.—Salmo 45:16; compara cu Isaías 32:1, 16-18; 61:5; 65:21-23.

10. Di esnan resusitá, ken ta e “inhustonan”?

¹⁰ Pero, ken ta e “inhustonan” mencioná den Echo 24:15? Nan ta inclui e gran cantidad di humanidad cu a muri durante e pasado, specialmente esnan cu a biba den ‘tempo di ignorancia.’ (Echo 17:30) Eseinan, debí ne lugar unda nan a nace of na ki tempo nan a biba, no tabatin oportunidad di siña obedencia ne boluntad di Jehova. Además, por tin algun cu a tende e mensahe di salbacion pero cu no a responde plenamente ne tempo ei of cu a muri promé cu nan a progresa te na dedicacion i bautismo. Den e resureccion, hende asina tin cu haci mas cambio den nan pensamento i moda di anda pa nan beneficiá dje oportunidad di gana bida eterna.

E rol di bida

11. (a) Kico ta e “rol di bida,” i e nomber di ken ta skirbí den e rol? (b) Pakico e rol di bida lo ser habrí durante e Reino di mil aña?

¹¹ Juan a menciona e “rol di bida.” Esei ta e registro di hende aprobá pa recibi bida eterna foi Jehova. Nomber dje rumanan ungí di Jesús, dje multitud grandi, i di fiel hende di antigua, tal como Moisés, ta pará skirbí den e rol. (Exodo 32:32, 33; Daniel 12:1; Revelacion 3:5) Te awor, ningun hende “inhusto” resusitá tin nan nomber skirbí den e rol di bida. Pues, e rol di bida lo ser habrí durante e Reino di mil aña pa permiti skirbimento di nomber di otronan cu ta yega di califica. Hende cu no ta haya nan nomber skirbí den e rol, of buki, di bida ta ser “tirá den e tanki di candela.”—Revelacion 20:15; compara cu Hebreo 3:19.

12. Kico lo determina si un persona ta haya su nomber skirbí den e rol di bida cu ta habrí, i con e Huez nombrá di Jehova a pone ehempel?

¹² Pues, anto, kico ta determiná si hende ta haya nan nomber skirbí den e rol di bida habrí ne tempo ei? E factor clave ta mescos cu e tabata den e dia di Adam i Eva: obedencia na Jehova Dios. Manera apóstol Juan a skirbi na otro cristian stimá: “Mundo ta pasando forbij i també su deseo, pero ken cu ta haci e boluntad di Dios ta permanece pa semper.” (1 Juan 2:4-7, 17) Den e asunto di obedencia, e Huez nombrá di Jehova a pone ehempel: “Aunque [Jesús] tabata Yiu, el a siña obedencia for di loke el a sufri; i despues di a ser hací perfecto, el a bira responsabel pe salbacion eterno di tur esnan cu ta obedecele.”—Hebreo 5:8, 9.

Habrimento di otro rol

13. Con hende resusitá tin cu demonstra nan obedencia, i nan tin cu sigi cua principio?

¹³ Con hende resusitá tin cu demonstra nan obedencia? Jesús mes a siñala ne dos mandamento grandi, bisando: “E promé tá, ‘Tende, O Israel, Jehova nos Dios ta un solo Jehova, i bo tin cu stima Jehova bo Dios cu tur bo curazón i cu tur bo alma i cu tur bo mente i cu tur bo forza.’ E segundo ta esaki, ‘Bo tin cu stima bo próhimo mescos cu bo mes.’” (Marco 12:29-31) Tin també principio bon establecí di Jehova cu nan tin cu sigi, tal como no horta, no gaña, no mata, i no comete inmoralidad.—1 Timoteo 1:8-11; Revelacion 21:8.

14. Cua otro rol ta habrí, i kico nan ta contene?

¹⁴ Sin embargo, Juan a caba di menciona otro rol cu lo ser habrí durante e Reino di mil aña. (Revelacion 20:12) Cua rol? Tin bez cu Jehova ta duna instruccion específico pa cierto situacion. Por ehempel, den e dia di Moisés Dios a duna un serie di ley en detaye cu a nifica bida pa israelita si nan a obedece. (Deuteronomio 4:40; 32:45-47) Durante e promé siglo, instruccion nobo tabata duná pa yuda hende fiel sigi principio di Jehova bao dje sistema di cosnan cristian. (Mateo 28:19, 20; Juan 13:34; 15:9, 10) Awor Juan a informa cu hende morto lo ser “huzgá di acuerdo cu loke ta pará skirbí den rol segun nan obra.” Ta parce, anto, cu habrimento di tal rol lo publica requisito di Jehova en detaye pa humanidad durante e mil aña. Ora nan ta aplica den nan bida regla i mandamento di tal rol, hende obediente por haci nan dianan mas largu, logrando finalmente bida eterna.

15. Cua clase di campaña di educacion lo ta necesario durante e resureccion, i probablemente e resureccion lo sigi cua ordu?

¹⁵ Ki un campaña extensivo di educacion teocrático lo ta necesario! Na 2005, Testigo di Jehova mundialmente a conduci un promedio di 6.061.534 estudio bíblico den diferente lugar. Pero, durante e resureccion, sin duda nan lo conduci miyones di estudio incontable, basá riba e Bijbel i rol nobo! Tur e pueblo di Dios tin cu bira maestro i haci trabao. Sin duda hende resusitá, segun cu nan ta haci progreso, lo participa den e programa educativo enorme. Probablemente, e resureccion lo progresa di tal manera cu hende cu ta na bida por tin e gozo di recibi i siña hende cu tabata miembro di nan famía i conocirnan, cu, en buelta, por recibi i instrui otronan. (Compara cu 1 Corintio 15:19-28, 58.) E mas cu seis miyón Testigo di Jehova cu ta activo den plamamento dje berdad awe ta pone un bon fundeshi pe privilegio cu nan ta spera di haya durante e resureccion.—Isaías 50:4; 54:13.

16. (a) E nomber di ken lo no ta skirbí den e rol, of buki, di bida? (b) Kende lo tin un resureccion cu lo resulta di ser un resureccion “di bida”?

¹⁶ En cuanto e resureccion terrenal, Jesús a bisa cu ‘esnan cu a haci bon cosnan lo sali pa un resureccion di bida, i esnan cu a practica cosnan baho pa un resureccion di huicio.’ Asina, “bida” i “huicio” ta para na contraste cu otro, mustrando cu hende resusitá cu ta “practica cosnan baho” despues di a ser instruí den e Scritura inspirá i den loke e rolnan ta bisa, lo ser huzgá indigno di bida. Nan nomber lo no ser skirbí den e rol, of buki, di bida. (Juan 5:29) Esei ta cierto també di hende cu na antes a anda fielmente pero cu, pa un motibo, ta dwal durante e Reino di mil aña. Nomber por ta gescrap. (Exodo 32:32, 33) En cambio, hende cu obedientemente ta sigi loke ta pará skirbí den e rolnan ta mantene nan nomber den e registro skirbí, e rol di bida, i ta sigi biba. Pa nan, e resureccion lo resulta di ser un resureccion “di bida.”

E fin di morto i Hades

17. (a) Cua acto maraviyoso Juan a menciona? (b) Na ki tempo Hades ta keda bashí? (c) Na ki tempo morto adámico ta ser “tirá den e tanki di candela”?

¹⁷ Sigientemente, Juan a duna detaye di algo berdaderamente maraviyoso! “I morto i Hades tabata tirá den e tanki di candela. Esei kier men e segundo morto, e tanki di candela. Además, ken cu no tabata hayá skirbí den e buki di bida tabata tirá den e tanki di candela.” (Revelacion 20:14, 15) Ora e fin dje Dia di Huicio di mil aña ta yega, “morto i Hades” lo no existi mas. Pakico esei tin mester di mil aña? Hades, e graf común di tur humanidad, ta bira bashí ora e último hende den e memoria di Dios ta ser resusitá. Pero, tan tempo cu tin hende manchá cu picá heredá, e morto adámico ta den nan. Tur hende resusitá riba tera, i també e multitud grandi cu ta sobrebiba Armagedón, tin cu obedece loke ta pará skirbí den e rolnan te cu e mérito dje rescate di Jesús ta ser aplicá pa elimina completamente maleza, behez, i otro enfermedad heredá. Anto e morto adámico, hunto cu Hades, ta ser “tirá den e tanki di candela.” Nan lo desparce pa semper!

18. (a) Ki detaye Juan a duna dje bon éxito dje gobernacion di Jesús como Rey? (b) Kico Jesús ta haci cu e famía humano perfeccioná? (c) Kico mas ta sosode na fin dje mil aña?

¹⁸ Asina, e programa cu apóstol Pablo a detayá den su carta pa corintio lo ser completá: “Pasobra [Jesús] tin cu reina como rey te cu Dios pone tur enemigo bao di su pia. Como e último enemigo, morto [adámico] tin cu ser reducí na nada.” Kico ta sosode despues? “Ora tur cos ta ser sometí na dje, anto e Yiu mes també lo sometele na Esun cu a somete tur cos na dje.” Es decir, Jesús “ta entrega e reino na su Dios i Tata.” (1 Corintio 15:24-28) Sí, despues cu Jesús ta vence e morto adámico usando e mérito di su sacrificio di rescate, lo e entrega un famía humano perfeccioná na su Tata, Jehova Dios. Evidentemente ne tempo ei, na fin dje mil aña, Satanás ta ser gelós i e prueba final ta tuma lugar pa determina ken su nomber lo keda skirbí permanentemente den e rol di bida. “Haci esfuerzo vigoroso” pa bo nomber ser hunto cu nan!—Lucas 13:24; Revelacion 20:5.

[Nota]

[Plachi na página 298]

E “inhustonan” resusitá cu ta obedece loke ta pará skirbí den e rolnan habrí durante e Reino di mil aña por haya nan nomber skirbí també den e rol di bida