“Dios Ta Stima un Dunadó Alegre”

JEHOVA ta e personificacion di generosidad. Sí, Bijbel ta bisa cu e ta e Dunadó di “tur bon don i tur regalo perfecto.” (Santiago 1:17) Por ehempel, considerá e cosnan cu Dios a crea. El a traha alimento cu ta delicioso, no sin smak; flor cu ta colorido, no dòf; bahada di solo cu ta espectacular, no laf. Sí, tur faceta di Jehova su creacion ta duna evidencia di su amor i generosidad. (Salmo 19:1, 2; 139:14) Ademas, Jehova ta un Dunadó alegre. E tin deleite den haci bon na fabor di su sirbidónan.—Salmonan 84:11; 149:4.

E israelitanan a ricibí ordu pa reflehá Dios su generosidad den nan trato cu otro. Moises a bisa nan: “Bo no mag haci bo curason duru ni cera bo man pa bo ruman pober . . . Bo mester dun’é sin falta, i bo curason no mester ta miskiña.” (Deuteronomio 15:7, 10) Ya cu dunamentu mester a bini di curason, e israelitanan tabatin cu haña deleite den actonan di generosidad.

Cristiannan a haña un spiertamentu similar. Sí, Jesus di cu tin “felicidad den duna.” (Echonan 20:35) Jesus su disipelnan tabata ehemplar den duna cu alegria. Por ehempel, Bijbel ta relatá cu na Jerusalem, esnan cu a bira creyente “a cuminsá bende nan posesionnan i propiedadnan i parti e entrada cu tur, segun cu cualkier hende tabatin necesidad.”—Echonan 2:44, 45.

Pero mas despues e rumannan generoso aki di Hudea a cai den pobresa. Bijbel no ta detayá ta kico precis a ocasioná nan situacion. Algun erudito ta bisa cu ta e hamber cu Echonan 11:28, 29 ta referí na dje por tabata e causa. En todo caso, e cristiannan na Hudea tabata den un gran pertá, i Pablo kier a haci sigur cu lo a soru pa nan necesidadnan. Di ki manera?

Un Colect pa Esnan den Necesidad

Pablo a busca yudansa di congregacionnan leu, asta na Macedonia, anto el a haci areglo pa nan tene un colect na beneficio dje cristiannan na Hudea cu a cai den pobresa. N’e corintionan, Pablo a skirbi: “Manera mi a duna ordu n’e congregacionnan di Galacia, boso tambe haci mescos. Tur promé dia di siman laga cada un di boso na su mes cas pone algu un banda den reserva segun cu e ta prosperando.”a—1 Corintionan 16:1, 2.

Pablo su intencion tabata pa nan manda e fondonan ei lihé pa e rumannan na Jerusalem, pero e corintionan a tarda pa reaccioná riba Pablo su instruccionnan. Di con? Ta sin heful nan tabata pa e situacion grave di nan rumannan na Hudea? No, pasobra Pablo tabata sa cu e corintionan tabata “abundá den tur cos, den fe i palabra i conocimentu i tur sinceridad.” (2 Corintionan 8:7) Probablemente nan tabata basta ocupá ta atendé otro asuntunan vital cu Pablo a trata den su promé carta pa nan. Pero, awor e situacion na Jerusalem tabata urgente. Pues, Pablo a trata e asuntu den su segundo carta na e corintionan.

Ta Apelá na Nan Generosidad

Promé, Pablo a conta e corintionan tocante e macedonionan, cu a respondé na moda ehemplar na e operacion di auxilio. Pablo a skirbi cu “durante un prueba grandi bou di afliccion nan abundancia di goso i nan profundo pobresa a haci e rikesanan di nan generosidad abundá.” No tabatin nodi keda corda e macedonionan. Al contrario, Pablo di cu “nan di nan mes cuenta a sigui roga nos cu hopi súplica p’e privilegio di duna bondadosamente.” E generosidad alegre dje macedonionan ta asta mas remarcabel, considerando cu nan mes tabata den ‘pobresa profundo.’—2 Corintionan 8:2-4.

Ta un spiritu di competencia Pablo tabata purba lanta den e corintionan dor di encomendá e macedonionan? Absolutamente cu no. E tabata sa cu esei no ta un moda apropiado pa duna motivacion. (Galationan 6:4) Ademas, e tabata sa cu no tabatin nodi brongosá e corintionan pa nan haci loke ta corecto. Mas bien, e tabatin confiansa cu e amor dje corintionan pa nan rumannan na Hudea tabata genuino, i cu nan tabatin deseo di contribuí cu e operacion di auxilio. El a bisa nan: “Ta haci un aña caba cu boso a iniciá no solamente e hacimentu sino tambe e deseo di haci.” (2 Corintionan 8:10) Berdad, den algun aspecto di e operacion di auxilio, e corintionan mes tabata ehemplar. Pablo a bisa nan: “Mi conocé boso disponibilidad mental di cua mi ta broma na e macedonionan tocante boso.” Anto el a agregá: “Boso celo a stimulá e mayoria di nan.” (2 Corintionan 9:2) Pero awor e corintionan tabatin cu pone nan celo i nan disponibilidad mental na accion tambe.

P’esei, Pablo a bisa nan: “Laga cada un haci net manera el a determiná den su curason, no di mala gana ni bou di obligacion, pasobra Dios ta stima un dunadó alegre.” (2 Corintionan 9:7) Pues, Pablo su meta no tabata pa forsa e corintionan, pasobra bo no por ta un dunadó alegre ora bo ta ser obligá. Ta parce cu Pablo a asumí cu nan tabatin e motivacion apropiado caba, cu nan tur a dicidí di duna caba. Huntu cu esei, Pablo a bisa nan: “Si e disponibilidad t’ei promé, e ta specialmente aceptabel segun loke un persona tin, no segun loke un persona no tin.” (2 Corintionan 8:12) Sí, ora cu tin e disponibilidad—ora un persona su motivacion ta amor—loke cu e ofrecé lo ta aceptabel pa Dios, sin importá con chikitu e cantidad por parce.—Compará Lucas 21:1-4.

Dunadónan Alegre Djawe

E operacion di auxilio na beneficio dje cristiannan na Hudea ta un ehempel excelente pa nos djawe. Testigonan di Jehova a emprendé un campaña di predicacion mundial cu ta alimentá miyones di hende hambrá den sentido spiritual. (Isaías 65:13, 14) Nan ta haci esaki pa obedecé Jesus su ordu: “Bai, pues, i haci disipel di hende di tur nacion, bautisando nan . . . siñando nan pa warda tur loke mi a manda boso.”—Mateo 28:19, 20.

Cumpli cu e comision aki no ta fácil. Mester mantené casnan di misionero i mas cu shen compleho di sucursal rond mundu. Ademas e ta trece cuné cu mester traha Salon di Reino i Salon di Asamblea pa adoradónan di Jehova haña lugánan apropiado pa reuní i animá otro. (Hebreonan 10:24, 25) Tin bes cu Testigonan di Jehova ta percurá suministro di auxilio tambe na áreanan cu desaster natural a destruí.

Tambe, pensa riba e gastunan enorme di imprenta. Como promedio, tur siman ta imprimí riba 22.000.000 ehemplar di E Toren di Vigilancia of un 20.000.000 ehemplar di Spierta! Banda di e suministro regular aki di alimento spiritual tin e miyones di buki, foyeto, audiocaset i videocasetnan cu ta ser producí tur aña.

Con ta financiá tur e trabou aki? Cu contribucion boluntario. No ta pa publicidad of cu motibu egoista e rumannan ta contribuí, sino pa e progreso di adoracion berdadero. Pues, donacionnan asina ta haci e dunadó felis, i ta trece Dios su bendicion p’e. (Malakías 3:10; Mateo 6:1-4) Asta mucha entre Testigonan di Jehova ta mustra cu nan ta dunadónan generoso i alegre. Por ehempel, despues di a tende di e destruccion cu un horcan a causa na un parti di Merca, Allison, di cuater aña, a contribuí cu 2 dollar. El a skirbi: “Esaki ta tur cen den mi spaarpot. Mi sa cu e muchanan a perde tur nan co’i hunganan, cu nan bukinan, cu nan popchinan. Por ta boso por usa e cen aki pa cumpra un buki pa un mucha muher mes grandi cu mi.” Maclean, di ocho aña, a skirbi cu e ta contentu cu ningun ruman no a muri dor dje tormenta. El a agregá: “Mi a gana 17 dollar bendiendo tapa di wil cu mi tata. Mi tabata di cumpra algu cu mi placa, pero despues mi a corda riba e rumannan.”—Mira e cuadro ariba tambe.

Di berdad Jehova su curason ta alegrá ora e mira tantu hóben como bieu pone su interesnan di Reino promé dor di ‘onr’é cu nan cosnan balioso.’ (Proverbionan 3:9, 10) Ta claro cu ningun hende por enrikesé Jehova, pasobra t’e ta doño di tur cos. (1 Crónicanan 29:14-17) Pero e privilegio di sostené e obra ta duna e adoradó e oportunidad di manifestá su amor pa Jehova. Nos ta gradicí tur hende cu nan curason a conmové nan pa haci esei.

[Nota]

[Kuadro na página 26, 27]

Maneranan den cua Algun Hende Ta Scoge pa Contribui pa e Trabou Mundial

Hopi hende ta apartá, of presupuestá, un montante cu nan ta pone den e cahanan di contribucion marcá: “Contribucion pa e trabou mundial di Sociedad—Mateo 24:14.” Tur luna congregacionnan ta manda e montantenan aki sea p’e sede mundial na Brooklyn, New York, of n’e oficina di sucursal local.

Donacionnan boluntario di placa por ser mandá tambe directamente na e Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, of n’e oficina di sociedad cu ta sirbi bo pais. Tambe por haci donacion di hoya of otro cos di balor. Un carta breve cu ta declará cu esei ta un regalo incondicional mester compañá e contribucionnan aki.

Areglo di Donacion Condicional

Por duna Sociedad Watch Tower placa via un areglo special den cua, si e dunadó hañ’é den un necesidad personal, lo debolbé e donacion na dje. Pa mas informacion, por fabor tuma contacto cu e Treasurer’s Office na e adres mencioná ariba.

Dunamentu Planeá

Ademas di regalonan directo di placa i donacionnan condicional di placa, tin otro métodonan di duna na beneficio dje sirbishi di Reino mundial. Esakinan ta incluí:

Seguro: Por nombra Sociedad Watch Tower como beneficiario di un pólisa di seguro di bida of un plan di penshon.

Cuenta di Banco: Por duna Sociedad Watch Tower derecho di usa cuenta di banco, ‘time deposit’ of cuenta di penshon personal, of derecho di cobra nan despues di morto di nan doño, segun rekisitonan bancario local.

Accion i Bono: Por haci donacion di accion i bono na Sociedad Watch Tower sea como un regalo incondicional, of segun un areglo den cua e dunadó ta sigui ricibí nan dividendo of interes.

Propiedad: Por duna Sociedad Watch Tower propiedad cu por ser bendí, sea como regalo incondicional of bou dje condicion cu e dunadó por sigui biba den dje te na su morto. Mester tuma contacto cu Sociedad promé cu traha e acta pa traspasá cualkier propiedad pa Sociedad.

Testament i ‘Trust’: Por nombra Sociedad Watch Tower como heredero di propiedad of placa den un testament legal, of por nombra Sociedad como beneficiario di un areglo di ‘trust.’ Un ‘trust’ cu ta beneficiá un organisacion religioso por duna cierto bentahanan fiscal.

Manera e término “dunamentu planeá” ta implicá, típicamente e tipo di donacionnan aki ta rekerí pa e dunadó planea. Pa yuda individuonan cu ta deseá di beneficiá Sociedad pa medio di un forma di dunamentu planeá, Sociedad a prepará un foyeto na ingles, titulá Planned Giving to Benefit Kingdom Service Worldwide (Dunamentu Planeá p’e Adelanto di Sirbishi di Reino Mundialmente). E foyeto a ser skirbí como reaccion riba e hopi preguntanan cu Sociedad a ricibí relacioná cu regalo, testament i ‘trust.’ Tambe e ta contené informacion adicional útil riba asuntunan relacioná cu propiedad, finansa i belasting, i ta diseñá pa yuda personanan na Merca cu ta deseá di yuda interesnan di Reino rond mundu pa scoge e métodonan mas bentahoso i eficas pa haci esei, tumando nan circunstancianan familiar i personal na cuenta.

Despues di lesa e foyeto i consultá cu e Planned Giving Desk, hopi hende por a yuda Sociedad, i a la bes probechá mas tantu posibel dje bentahanan fiscal. E Planned Giving Desk mester ser informá, i nan mester ricibí un copia di tur documento relevante di cualkier un di e areglonan aki. Esnan interesá den un foyeto of den un di e areglonan aki di dunamentu planeá mester tuma contacto cu e Planned Giving Desk, via carta of telefon na e adres indicá aki bou, of cu e oficina di sucursal cu ta sirbi bo pais.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telefon: (914) 878-7000

[Kuadro na página 28]

Muchanan Tambe Ta Dunadónan Alegre!

Mi kier a duna boso esaki pa boso traha mas buki pa nos. Mi a spar e cen aki trahando pa mi tata. Masha danki pa tur boso trabou duru.—Pamela, di shete aña.

Mi ta manda 6,85 dollar pa yuda boso traha mas Salon di Reino. Mi a gan’é den zomer, bendiendo limonada na un tent cu mi tabatin.—Selena, di seis aña.

Mi tabata cria un galiña, anto el a haña un gai i un otro galiña. Mi a dedicá esun último aki na Jehova. El a bin haña tres galiña, anto mi a bende nan. Adhunto mi ta manda e cen pa Jehova su obra.—Thierry, di ocho aña.

Esaki ta tur mi cen! Por fabor, us’é bon. Mi a pasa trabou pa spar e. Ata 21 dollar aki.—Sarah, di dies aña.

Dor cu mi a gana e promé premio cu un tarea di scol, mi mester a pasa pa e competencia di condado. Einan tambe mi a gana e promé premio, anto den e finalnan di distrito mi a sali di dos. Tur biaha mi a gana cen cash. Mi kier a compartí algu dje cen cu Sociedad. Mi ta sinti cu ta dor dje entrenamentu cu mi a ricibí den e Scol di Ministerio Teocrático mi a logra gana e premionan aki. Mi tabatin confiansa ora di duna mi relato dilanti e hurado.—Amber, zesde klas.

Mi kier duna boso esaki pa Jehova. Puntr’é kico pa haci cuné. E sa tur cos.—Karen, di seis aña.

[Plachinan na página 25]

Donacionnan boluntario ta sostené e actividadnan di Testigonan di Jehova