E Ley Oral—Pakico A Pon’é Riba Papel?

PAKICO hopi hudiu dje promé siglo no a aceptá Jesus como e Mesías? Un testigo ocular ta informá: “Despues cu [Jesus] a drenta den e tempel, e sacerdotenan principal i e ancianonan dje pueblo a yega cerca dje miéntras e tabata siñando i nan a bisa: ‘Cu ki autoridad bo ta haci e cosnan aki? I ken a duna bo e autoridad aki?’” (Mateo 21:23) Segun nan, e Todopoderoso a duna e nacion hudiu e Tora (Ley), i esaki a duna cierto hombernan un autoridad cu a bini di Dios. Jesus tabatin e autoridad ei?

Jesus a mustra profundo respet p’e Tora i pa esnan na ken e Tora a concedé berdadero autoridad. (Mateo 5:17-20; Lucas 5:14; 17:14) Pero bes tras bes, el a denunciá esnan cu a violá e mandamentunan di Dios. (Mateo 15:3-9; 23:2-28) E personanan ei a sigui tradicionnan cu a bira conocí como e ley oral. Jesus a rechasá e autoridad dje ley oral. I hopi hende na nan turno, a rechasá Jesus como e Mesías. Nan a pensa cu solamente hende cu tabata sigui tradicion di esnan den posicion di autoridad lo por tabatin e apoyo di Dios.

Di unda e ley oral aki a bini? Con bin hudiunan a cuminsá pensa cu e tabatin mésun autoridad cu e Ley skirbí, registrá den e Scritura? I, si e intencion tabata p’e ta un tradicion oral, pakico a pon’é despues riba papel?

Di Unda e Tradicionnan A Bini?

E israelitanan a drenta den un relacion di pacto cu Jehova Dios n’e Ceru di Sínai na aña 1513 P.E.C. Nan a ricibí e statutonan dje pacto ei mediante Moises. (Exodo 24:3) Si nan a sigui e reglamentunan aki, esei lo a permití nan ‘resultá di ta santu mescos cu Jehova nan Dios ta santu.’ (Levítico 11:44) Bou dje pacto di Ley, adoracion na Jehova a encerá sacrificio cu e sacerdocio asigná a ofrecé. Mester a bini un lugá central pa adoracion. E tempel di Jerusalem lo tabata e sitio pa esei.—Deuteronomio 12:5-7; 2 Crónicanan 6:4-6.

E Ley di Moises a percurá un structura completo pa Israel adorá Jehova como nacion. Sin embargo, tabatin algun cos cu e Ley no a detayá explícitamente. Por ehempel, e Ley a prohibí trabou riba sabat, pero e no a hala un liña cla entre trabou i otro actividad.—Exodo 20:10.

Si Jehova tabata kier, lo e por a duna reglamentunan en detaye cu lo a contestá tur pregunta cu hende lo por a imaginá. Pero el a crea hende cu un concenshi, i el a permití nan tuma iniciativa pa sirbié cu un grado di flexibilidad den e cuadro di su statutonan. E Ley a stipulá con sacerdote, levita of huesnan mester a atendé casonan hudicial. (Deuteronomio 17:8-11) Segun cu e casonan a aumentá, eseinan a establecé cierto precedentenan. I sin duda, algun di nan a pasa di un generacion pa otro. Proceduranan relacioná cu debernan sacerdotal cu mester a cumpli cuné den e tempel di Jehova, tambe a pasa di tata pa yu. Tradicionnan a aumentá pareu cu e añanan di existencia dje nacion di Israel.

Sin embargo, e esencia di Israel su adoracion a keda e Ley skirbí cu Jehova a duna Moises. Exodo 24:3 i 4 ta bisa: “Moises a bini i a relatá n’e pueblo tur e palabranan di Jehova i tur e decisionnan hudicial, i henter e pueblo a contestá cu un solo bos i a bisa: ‘Tur e palabranan cu Jehova a papia nos ta dispuesto pa haci.’ Anto Moises a skirbi tur e palabranan di Jehova.” Tabata cu e condicion cu nan lo a cumpli cu e mandamentunan skirbí aki, cu Dios a cera su pacto cu e israelitanan. (Exodo 34:27) De echo, niun caminda e Scritura no ta mencioná existencia di un ley oral.

“Ken A Duna Bo e Autoridad Aki?”

Claramente, e Ley di Moises a duna sacerdotenan, desendiente di Aron, e papel principal di ehercé autoridad i duna instruccion religioso. (Levítico 10:8-11; Deuteronomio 24:8; 2 Crónicanan 26:16-20; Malakías 2:7) Sin embargo, atrabes di siglonan, algun sacerdote a bira infiel i corupto. (1 Samuel 2:12-17, 22-29; Jeremías 5:31; Malakías 2:8, 9) Durante e era di dominacion griego, hopi sacerdote a comprometé nan principionan religioso. Den siglo dos P.E.C., e fariseonan, un grupo nobo den hudaismo cu tabatin desconfiansa den e sacerdocio, a cuminsá instituí tradicionnan pa medio di cua e homber comun por a considerá su mes mésun santu cu un sacerdote. E tradicionnan aki a atraé hopi hende, pero a agregá nan den un manera inaceptabel p’e Ley.—Deuteronomio 4:2; 12:32 (13:1 den edicionnan hudiu).

E fariseonan a bira e eruditonan nobo di e Ley, i nan tabata haci e trabou cu segun nan, e sacerdotenan no tabata haci. Ya cu e Ley di Moises no a permití nan haña e autoridad ei, nan a desaroyá otro sistemanan pa interpretá e Scritura, mediante referencianan misterioso i otro métodonan cu a parce di apoyá nan punto di bista.a Como apoyadó i promotornan principal dje tradicionnan aki, nan a crea un base nobo pa autoridad den Israel. Pa e promé siglo E.C., e fariseonan a bira un forsa dominante den hudaismo.

Segun cu e fariseonan tabata compilá e tradicionnan oral existente i a busca apoyo bíblico pa asina establecé mas di nan interpretacionnan, nan a ripará cu nan tabatin mester di mas autoridad pa cumpli cu nan trabou. Asina un concepto nobo relacioná cu e orígen di e tradicionnan aki a nace. E rabinan a cuminsá siña: “Moises a ricibí Tora na Sínai i a entregu’é na Hosué, Hosué a entregu’é na ancianonan, i ancianonan na profetanan. I profetanan a entregu’é na e hombernan dje asamblea grandi.”—Avot 1:1, Mishna.

Ora e rabinan a bisa cu “Moises a ricibí Tora,” nan no tabata referí na e leynan skirbí so, sino tambe na tur nan tradicionnan oral. Nan a pretendé cu Moises a haña e tradicionnan aki, cu hende a inventá i desaroyá, cerca Dios n’e ceru di Sínai. I nan a siña hende cu Dios no a laga pa hende yena e buracunan, pero cu boca el a bisa loke e Ley skirbí a keda sin mencioná. Segun nan, Moises a pasa e ley oral aki p’e generacionnan, no mediante e sacerdotenan, sino mediante otro lidernan. E fariseonan mes a pretendé di ta e herederonan natural dje cadena “continuo” aki di autoridad.

E Ley A Cai den Crísis —Un Solucion Nobo

Jesus, kende su autoridad djariba e lidernan religioso hudiu a cuestioná, a predicí e destruccion dje tempel. (Mateo 23:37–24:2) Despues cu e romanonan a destruí e tempel na aña 70 E.C., hende no por a cumpli mas cu e rekisitonan den e Ley di Moises cu a enbolbé sacrificio i sirbishi sacerdotal. Dios a cera un pacto nobo a base dje sacrificio di rescate di Jesus. (Lucas 22:20) E pacto dje Ley di Moises a yega na su fin.—Hebreonan 8:7-13.

En bes di mira e sucesonan aki como prueba cu Jesus tabata e Mesías, e fariseonan a haña un otro solucion. Ya caba nan a usurpá un gran parti dje autoridad dje sacerdocio. Awor cu e tempel tabata destruí nan por a bai un stap mas leu. E academia rabínico na Jabne a bira e centro pa un Sanedrin, esta, e corte supremo hudiu, reorganisá. Bou di liderato di Yohanan ben Zakkai i Gamaliel II na Jabne, a restructurá hudaismo completamente. E sirbishinan den snoa dirigí pa rabi, a reemplasá adoracion den tempel cu sacerdotenan tabata supervisá. Oracion, foral riba Dia di Expiacion, a reemplasá sacrificio. E fariseonan a razoná cu e ley oral cu Moises a haña na Sínai, ya caba a premirá i a haci percuracion pa esaki.

Academianan rabínico a cuminsá haña mas prominencia. Nan curículo principal a consistí di consideracion profundo, memorisacion, i aplicacion dje ley oral. Promé ayá, e base pa e ley oral tabata mará na interpretacion dje Scritura: Midras. Awor, a cuminsá siña i organisá e tradicionnan cu tabata aumentá sin fin, separadamente. A simplificá cada un declaracion relacioná cu e ley oral den frasenan corticu i fácil pa corda, hopi bes compañá pa un melodia.

Pakico Pone un Ley Oral Riba Papel?

E abundancia di academianan i declaracionnan rabínico cu mas i mas tabata aumentá a crea un otro problema. Adin Steinsaltz, rabi i erudito, ta splica: “Cada maestro tabatin su mes método i tabata expresá su declaracionnan oral den su estilo único. . . . No tabata suficiente mas pa conocé solamente e siñansanan di bo mentor, e studiante tabata obligá pa pone su mes na altura di obra di otro eruditonan . . . Pues, e ‘explosion di conocimentu’ a forsa studiantenan siña un inmenso cantidad di materia for di cabes.” E memoria dje studiantenan no por a wanta mas e avalancha di informacion desorganisá.

Den siglo dos E.C., e rebelion hudiu contra Roma, encabesá pa Bar Kokhba, a resultá den un persecucion severo dje rabinan erudito. Akiba, e rabi principal, cu a apoyá Bar Kokhba, mescos cu hopi otro lider erudito, a perde su bida. E rabinan tabatin miedu cu si bolbe bini persecucion, e existencia mes dje ley oral lo tabata na peliger. Promé nan a kere cu lo tabata mihó p’e tradicionnan pasa di boca pa boca, di maestro pa alumno. Pero e echo cu circunstancianan a cambia, a pone cu nan a bai haci mas esfuerso pa crea un structura organisá pa conserbá e siñansanan dje sabínan, pa nan no bai perdí pa semper.

Durante e siguiente periodo di relativo pas cu Roma, Huda Ha-Nasi, e rabi principal na final di siglo dos i principio di siglo tres E.C., a reuní un gran cantidad di erudito i el a redactá un inmenso cantidad di tradicion oral den un sistema organisá cu a consistí di seis Ordu, di cua cada un tabata dividí atrobe den seccionnan mas chikitu cu, na tur, tabata 63. E obra aki a bira conocí como Mishna. Ephraim Urbach, un autoridad riba ley oral, ta comentá: “Mishna . . . a haña un aprobacion i autoridad cu nunca ningun otro buki, fuera di Tora mes, a yega di haña.” Hende a rechasá e Mesías, e tempel tabata destruí, pero cu e ley oral conserbá den e structura skirbí di Mishna, un era nobo a cuminsá den hudaismo.

[Nota]

[Plachi na página 26]

Pakico hopi hudiu a rechasá Jesus su autoridad?