Nan A Haci e Boluntad di Jehova

Un Ofrenda Boluntario pa Adelanto di Adoracion Berdadero

E ISRAELITANAN tabata testigo ocular di Jehova su poder di salba. Nan a mira con e awanan di laman Corá a habri milagrosamente, i asina permití nan crusa riba tera secu i scapa for dje ehército di Egipto. For di e otro banda, na un distancia sigur, nan a mira con e mésun awanan aki a bini abou i caba cu nan persiguidónan. Jehova a salba nan bida!—Exodo 14:21-31.

Pero lamentablemente, algun israelita a considerá loke nan Dios a haci como algu gewoon. Miéntras Moises tabata riba ceru di Sínai, nan a trece nan hoyanan di oro pa Aron i nan a exigí p’e traha un ídolo pa nan adorá. Ora cu Moises a regresá, el a haña e multitud aki di rebelde ta come, bebe, baila i ta buig dilanti un bisé di oro! Riba ordu di Jehova mas of ménos 3.000 persona, probablemente e instigadónan principal dje rebelion, a perde nan bida. E dia ei, Dios su pueblo a siña un les importante: mester rindi debocion exclusivo na Jehova.—Exodo 32:1-6, 19-29.

Djis despues dje incidente aki, Moises a prepará pa cumpli cu Jehova su mandato pa construí un tabernáculo, esta, un tent portátil di adoracion. E proyecto di construccion aki lo a rekerí materialnan costoso i trahadónan cualificá. Di unda esakinan lo a bini? I kico nos por siña for dje relato bíblico aki?

Contribucion di Material i Abilidad

Mediante Moises, Jehova a manda e israelitanan: “Tuma un contribucion pa Jehova. Laga tur persona di curason dispuesto trec’é como Jehova su contribucion.” Ki tipo di contribucion? Entre e cosnan cu Moises a mencioná tabatin oro, plata, koper, hilu, tela, cueru, palu i piedra precioso.—Exodo 35:5-9.

E israelitanan tabatin mas cu suficiente pa duna un contribucion generoso asina. Corda, ora nan a bandoná Egipto, nan a bai cu artículonan di oro i di plata, huntu cu hopi paña. Sí, “nan a pluma e egipcionan.”a (Exodo 12:35, 36) Anteriormente, e israelitanan tabata dispuesto pa duna nan hoyanan pa traha un ídolo pa adoracion falsu. Nan lo a mustra awor cu nan ta mésun ansioso pa duna un ofrenda pa adelanto di adoracion berdadero?

Tuma nota cu Moises no a stipulá un montante fiho cu cada persona mester a duna, ni e no a usa e sintimentu di culpa ni di bergwensa pa motivá tal dunamentu. Mas bien, el a djis haci un apelacion na “tur persona di curason dispuesto.” Evidentemente, Moises no a haña cu ta necesario pa obligá Dios su pueblo. E tabatin confiansa cu cada hende lo duna tur loke nan tabata por.—Compará cu 2 Corintionan 8:10-12.

Sin embargo, fuera di donacion di material, e proyecto di construccion a rekerí mas. Tambe Jehova a bisa e israelitanan: “Laga tur esnan di curason sabí entre boso bini i traha tur loke Jehova a manda.” Sí, e proyecto aki di construccion a rekerí trahadónan cualificá. En berdad, “tur sorto di artesania”—incluso trabou di carpinté, trabou cu metal i di hoyero—lo tabatin mester pa cumpli cu e proyecto aki. Naturalmente, Jehova lo a dirigí talento dje trahadónan aki i p’esei cu tur rason, crédito pa éxito dje proyecto mester a bai p’e.—Exodo 35:10, 30-35; 36:1, 2.

Cu celo e israelitanan a reaccioná n’e invitacion pa duna tantu nan recursonan como nan abilidadnan. E relato bíblico ta declará: “Nan a bini, tur hende kende su curason a impuls’é, i nan a trece, tur hende kende su spiritu a incit’é, e contribucion di Jehova pa e obra dje tent di reunion i pa tur su sirbishi i p’e pañanan santu. I nan a sigui bini, homber i muher, tur persona di curason dispuesto.”—Exodo 35:21, 22.

Les pa Nos

Awe e enorme tarea di predicá e bon nobo dje Reino di Dios ta ser lográ mediante donacion boluntario. Hopi bes esaki ta den forma di cen. Den otro casonan, rumannan cristian ta usa nan abundancia di experencia pa yuda construí Salonnan di Reino, Salonnan di Asamblea i facilidadnan di sucursal. Anto tin tambe e trabou cu ta ser efectuá den mas cu shen cas di Betel rond mundu, trabou cu ta rekerí diferente abilidad. Tur persona di curason dispuesto cu ta contribuí den e formanan ei por ta sigur cu Jehova lo no lubidá nan trabou duru!—Hebreonan 6:10.

Mescos ta conta tambe p’e participacion cu cada un di nos tin den e ministerio cristian. Nos tur ta ser urgí pa cumpra tempu pa nos por tin un participacion celoso den e predicacion. (Mateo 24:14; Efesionan 5:15-17) Tin ta haci esaki como evangelisadó di tempu completo, esta, como pionero. Debí na nan circunstancia, otronan no por dedicá mes tantu tempu den e ministerio cu un pionero. Tog, nan tambe ta agradá Jehova. Mescos cu den caso dje contribucionnan p’e tabernáculo, Jehova no ta specificá un montante exacto cu cada persona mester duna. Pero loke sí e ta rekerí ta pa cada un di nos sirbié cu henter nos curason, alma, mente i forsa. (Marco 12:30) Si nos ta haci esei, nos por ta sigur cu lo e recompensá nos pa nos ofrendanan boluntario cu nos ta haci pa adelanto di adoracion berdadero.—Hebreonan 11:6.

[Nota]