Nos Mayornan A Siña Nos Stima Dios

MANERA ELIZABETH TRACY A RELATA

Hombernan armá, cu mas promé riba e dia ei a encabesá un multitud desordená contra nos, a obligá Mama cu Papa sali for di den auto. Ami cu mi ruman muher a keda nos so riba e asiento di patras ta puntra nos mes si nos lo bolbe mira nos mayornan. Kico a hiba na e experencia spantoso aki banda di Selma, Alabama, Merca, na 1941? Anto kico e educacion cu nos a ricibí di nos mayornan tabatin di haber cu esaki?

MI TATA, Dewey Fountain, a lanta cerca famia na un hacienda na Texas, despues cu su mayornan a muri tempu e tabata baby ainda. Despues el a bai traha riba veld di petroli. Na 1922, cu 23 aña, el a casa cu Winnie, un nechi damita di Texas, i a cuminsá planea pa establecé su mes un caminda i forma un famia.

El a traha un cas den un mondi na oost Texas, cerca di un pueblito cu yama Garrison. Ei el a cultivá un variedad di cos, entre otro catuna i maishi. E tabatin tur sorto di bestia di crio tambe. Cu tempu, nos a nace: Dewey junior na mei 1924, Edwena na december 1925, anto na juni 1929 ami a yega.

Nan A Siña e Berdad di Bijbel

Mama cu Papa a kere cu nan tabata comprendé Bijbel, dor cu nan tabata di Church of Christ. Pero na 1932, G. W. Cook a laga e bukinan Liberacion i Gobiernu, publicá dor di Sociedad Watch Tower, cerca ruman di mi tata, Monroe Fountain. Ansioso pa compartí loke e tabata siñando cu mi mayornan, Monroe tabata bini regularmente na ora di desayuno. E tabata lesa un artículo for di E Toren di Vigilancia, anto laga e revista “pa casualidad” atras. Despues Mama cu Papa tabata les’é.

Riba un diadomingo mainta Tio Monroe a invitá Papa pa bin cas di un bisiña pa un studio di Bijbel. El a garantis’é cu sr. Cook por a contestá tur su preguntanan for di Bijbel. Ora cu Papa a bini bek for dje studio, excitá el a conta henter e famia: “El a contestá tur mi preguntanan i mas! M’a kere cu mi tabata sa tur cos, pero ora sr. Cook a cuminsá splica tocante fiernu, alma, Dios su propósito pa tera, i con e Reino di Dios ta bai cumpli cuné, m’a cuminsá sinti cu mi no tabata sa nada mes di Bijbel!”

Nos cas tabata manera un centro di encuentro social. Famia i amigunan tabata bin haci bishita, nan tabata traha caramel cu popcorn dushi, i canta mientras mi mama tabata toca piano. Gradualmente, e ocacionnan aki a traha lugá pa combersacionnan riba temanan bíblico. Maske nos cu tabata mucha, no por a comprendé tur loke nan tabata combersá ariba, e amor fuerte cu nos mayornan tabatin pa Dios i pa Bijbel tabata asina bisto cu cada un di nos a desaroyá un amor similar pa Dios i pa su Palabra.

Otro famianan tambe a pone nan cas disponibel pa studio di Bijbel semanal, cu generalmente tabata drei rond di un tema den e último Toren di Vigilancia. Ora cu e reunionnan tabata cerca famianan cu tabata biba na e pueblonan bisiña cu yama Appleby i Nacogdoches, nos tabata prop drenta nos Ford Model A, i biaha bai aya, sea cu bon of mal tempu.

Nan A Aplicá Loke Nan A Siña

No a tarda muchu pa nos mayornan mira e necesidad di actua. Amor pa Dios a rekerí pa nan compartí loke nan a siña cu otronan. (Echonan 20:35) Pero e paso aki di declará nan fe públicamente tabata un desafio, foral dor cu nos mayornan tabata hende tímido i di naturalesa humilde. Tog nan amor pa Dios a motivá nan, i esaki na su turno a yuda nan siña nos pone confiansa firme den Jehova. Papa a expres’é asina aki: “Jehova ta haci pikidó di bonchi bira predicadó!” Na 1933, Mama cu Papa a simbolisá nan dedicacion na Jehova cu bautismo bou di awa den un dam cerca di Henderson, Texas.

Na comienso di 1935, Papa a skirbi Sociedad Watch Tower pa haci vários pregunta tocante e speransa cristian di bida eterno. (Juan 14:2; 2 Timoteo 2:11, 12; Revelacion 14:1, 3; 20:6) El a ricibí un contesta direct for di Joseph F. Rutherford, presidente di Sociedad e tempu ei. En bes di contestá su preguntanan, ruman Rutherford a invitá Papa pa asistí na e congreso di Testigonan di Jehova na Washington, D. C., na mei 1935.

Papa a pensa: ‘Imposibel! Cunukero nos ta, cu 26 hectar plantá cu berdura. Mester cosechá tur i hiba nan mercado den e temporada ei.’ Pero, poco tempu despues, un inundacion a bini i laba su excuusnan bai cuné—cosecha, tranké i brugnan. Asina ta cu nos i otro testigonan a subi un bus di scol cu nos a huur, i el a hiba nos 1.600 kilometer nortoost, te na e congreso.

N’e congreso Papa cu Mama a keda encantá pa scucha e splicacion cla riba e identidad dje “multitud grandi” cu lo sobrebibí e “tribulacion grandi.” (Revelacion 7:9, 14, King James Version) Pa resto di nan bida, e speransa di bida eterno riba un tera paradísico a motivá Mama cu Papa, i nan a animá nos como yu, pa “haña un gara firme riba e berdadero bida,” cu pa nos a nificá e bida eterno riba tera cu Jehova ta ofrecé. (1 Timoteo 6:19; Salmo 37:29; Revelacion 21:3, 4) Aunke mi tabatin cincu aña so, mi a disfrutá mashá di por tabata cu mi famia na e evento gososo aki.

Ora nos a bolbe for dje congreso, nos a planta e cunucu di nobo, anto despues di esei nos tabatin e mihó cosecha di tur tempu. Sin duda esaki a yuda convencé Mama i Papa cu pone fe completo den Jehova ta algu cu nunca lo no keda sin su recompensa. Nan a cuminsá cu un forma special dje trabou di predicá, caminda tur dos a bai di acuerdo pa dedicá 52 ora pa luna den e ministerio. Anto, ora e siguiente temporada di planta a yega, nan a bende tur cos! Papa a laga traha un trailer di 6 meter pa 2,4 meter pa nos cincu biba aden, anto el a cumpra un Ford sedan nobo-nobo di dos porta pa trek e cuné. Tio Monroe tambe a bende tur cos anto bai biba den un trailer cu su famia.

Nan A Siña Nos e Berdad

Na october di 1936 Papa cu Mama a cuminsá traha pionero, manera ta yama e ministerio di tempu completo. Como famia, nos a cuminsá predicá den teritorionan di oost Texas cu rara bes a keda cubrí cu e mensahe di Reino. Pa casi un aña largu nos a muda di un lugá pa otro, pero en general nos a gosa mashá dje tipo di bida aki. Mama cu Papa a siña nos cu palabra i ehempel pa ta manera e cristiannan di promé cu a dedicá nan mes na transmití e berdad di Bijbel na otronan.

Nos cu tabata mucha, a admirá foral nos mama pa tur e sacrificionan cu el a haci dor di entregá su cas. Pero tabatin un cos cu e no a laga bai: su mashin di cose. Ta bon mes. Cu su abilidad como cosedó, semper e tabatin nos bon bistí. Pa cada congreso nos tabatin nechi paña nobo pa bisti.

Mi ta corda bon dia cu Herman G. Henschel a bini nos área cu su famia den un truck cu loudspeaker di Sociedad Watch Tower. Nan tabata parkeer e truck un caminda cu hopi hende ta biba, toca un discurso breve, anto despues nan a haci bishita personal cerca e hendenan pa duna nan mas informacion. Dewey junior tabata gusta ta huntu cu e yu di Herman, Milton, cu tabatin rond di 15 aña. Awor Milton ta presidente di Sociedad Watch Tower.

Durante e congreso di 1937 na Columbus, Ohio, Edwena a bautisá, i Mama cu Papa a ricibí e privilegio di sirbi como pionero special. N’e tempu ei, e trabou ei a enbolbé pasa por lo ménos 200 ora pa luna den e trabou di predicá. Mirando bek, mi ta realisá cuantu e excelente ehempel di mi mama a yuda mi apoyá mi casá den su diferente asignacionnan cristian.

Ora Papa a habri un studio di Bijbel cu un famia, el a hiba nos cu tabata mucha, huntu cuné, pa duna nan yunan un ehempel positivo. El a laga nos busca i lesa texto di Bijbel, i contestá algun dje preguntanan básico. Como resultado, hopi dje muchanan ei cu nos a studia cuné ta sirbi Jehova fielmente te n’e dia djawe. Pero nos mes tambe a haña un fundeshi firme pa nos sigui stima Dios.

Segun cu Dewey junior a crece, e tabatin dificultad pa biba asina riba otro cu dos ruman muher mas chikitu. Pues, na 1940 el a dicidí di bai i cuminsá traha pionero cu un otro Testigo. Despues el a casa cu Audrey Barron. Asina, nos mayornan a siña Audrey tambe hopi cos, i el a bin stima Mama cu Papa mashá. Despues cu Dewey junior a bai prizon na 1944 pa su neutralidad cristian, Audrey a bin biba cerca nos pa un temporada den nos trailer pertá.

Na e congreso enorme na St. Louis, Missouri, di 1941, ruman Rutherford a papia directamente cu e muchanan di 5 pa 18 aña, cu tabata sintá dilanti den un seccion special. Ami cu Edwena a scucha su stem calmu i cla; e tabata manera un tata amoroso instruyendo su propio yunan na cas. El a animá mayornan: “Awe Cristo Jesus a reuní su pueblo di pacto su dilanti, i cu hopi énfasis e ta bisa nan pa nan instruí nan yunan den e caminda di husticia.” El a agregá: “Tene nan na cas i siña nan e berdad!” Felismente, nos mayornan a haci net esei!

Na e congreso ei nos a ricibí e foyeto nobo titulá Sirbidónan di Jehova Defendé, cu a trata casonan den corte cu Testigonan di Jehova a gana, entre otro esnan den Corte Supremo di Merca. Papa a studi’é cu nos como famia. Nos no tabata sa cu esei tabata un preparacion pa loke a sosodé un par di siman despues na Selma, Alabama.

Multitud Desordená na Selma

E mainta dje experencia spantoso ei, Papa a entregá copianan di un carta na e shèrif, e alcalde i e hefe di polis di Selma, den cua el a describí nos derecho constitucional di efectuá nos ministerio bou di proteccion di ley. No obstante, nan a dicidí di core cu nos for dje pueblo.

Atardi, cincu homber armá a yega na nos trailer, i a coge ami, mi mama cu mi ruman muher como rehen. Despues nan a boltu tur cos paden, pa busca algu cu tabatin di haber cu lantamentu contra gobiernu. Papa tabata pafó, i nan a orden’é pa pega e trailer na e auto, cu nan pistolnan di mik riba dje henter ora. N’e momento ei mi no tabatin miedu. Tabata parce asina ridículo cu e hombernan aki a considerá nos peligroso, cu ami i mi ruman a cuminsá hari un tiki. Pero un mirada di Papa a haci nos serio bek unbes.

Ora nos tabata cla pa bai, e hombernan tabata kier pa ami cu Edwena core cu nan den nan auto. Papa a para firme. El a bisa nan: “Riba mi cadaver!” Despues di un tiki discusion nan a permití nos famia biaha huntu, cu e hombernan armá nos tras den nan auto. Un 25 kilometer pafó dje pueblo, nan a haci seña cu nos pa nos para cantu di caminda, i nan a bai cu Mama i Papa. Un pa un e hombernan a purba persuadí nan: “Bandoná e religion ei. Bai boso hacienda bek, i cria e mucha muhernan ei na drechi!” Papa a purba razoná cu nan, pero sin éxito.

Finalmente, un dje hombernan a bisa: “Bai, anto si boso mester bolbe condado di Dallas un dia, nos lo mata boso tur!”

Aliviá i huntu atrobe, nos a biaha vários ora largu promé cu nos a para pa pasa anochi. Nos a nota nan number di auto. Papa a informá Sociedad Watch Tower tur cos mesora, i un par di luna despues nan a identificá e hombernan i arestá nan.

Scol di Misionero di Galad

Na 1946 nan a invitá Edwena pa asistí na e di shete klas dje Scol Bíblico di Galad di Watchtower, na South Lansing, New York. Albert Schroeder, un dje instructornan, a mencioná Edwena su cualidadnan excelente na su ex-compañero pionero, Bill Elrod, cu tabata sirbi na Betel, e centro mundial di Testigonan di Jehova na Brooklyn, New York.a Nan a cera Bill i Edwena conocí cu otro, i rond di un aña despues cu el a gradua for di Galad, nan a casa. Nan a keda hopi aña den e sirbishi di tempu completo, incluso nan a sirbi huntu na Betel pa cincu aña. Anto un dia na 1959, Ruman Schroeder a anunciá n’e di 34 klas di Galad cu su amigu stimá a bira tata di un par di ohochi, un yu homber i un yu muher.

Durante cu mi tabata sirbi cu mi mayornan na Meridian, Mississippi, na fin di 1947, nos tres a ricibí un invitacion pa asistí na e di 11 klas di Galad. Nos a keda sorprendí, pasobra segun e rekisitonan ami tabata muchu hóben, i Mama cu Papa tabata muchu bieu. Pero nan a haci un excepcion, i nos a ricibí e privilegio inmerecí di instruccion bíblico avansá.

Sirbishi di Misionero Huntu cu Mi Mayornan

Nos asignacion di misionero tabata Colombia, Sur América. Pero ta te na december 1949, mas cu un aña despues cu nos a gradua, nos a yega Bogotá, na un cas di misionero caminda ya tabatin tres otro misionero ta biba. Na cuminsamentu, Papa a casi dicidí cu lo ta mas fácil pa siña e hendenan ingles, cu pa e siña spañó! Sí, nos tabatin prueba, pero e bendicionnan tabata masha grandi! Tabatin ménos cu shen Testigo na Colombia na 1949, pero awor tin mas cu 100.000!

Despues di sirbi na Bogotá pa cincu aña, nan a manda Mama cu Papa e ciudad di Cali. Miéntras tanto, na 1952, mi a casa cu Robert Tracy, un otro misionero na Colombia.b Nos a keda Colombia te 1982, ora nan a manda nos México, caminda nos a keda sirbi for dje dia ei. Despues, na 1968, mi mayornan mester a bolbe Merca pa atencion médico. Despues cu nan a recobrá nan salú, nan a sigui como pionero special cerca di Mobile, Alabama.

Cuido di Nos Mayornan

E añanan a montoná, Mama cu Papa a cuminsá perde forsa, i nan tabatin mester di mas apoyo i atencion. Riba nan peticion, Sociedad a asigná nan pa sirbi cerca di Edwena cu Bill, na Athens, Alabama. Despues, nos ruman Dewey junior a pensa cu lo ta sabí pa e famia biba mas cerca di otro na South Carolina. Asina ta cu Bill a muda cu su famia pa Greenwood, huntu cu Mama i Papa. E ahuste amoroso aki a permití ami cu Robert sigui den nos sirbishi di misionero na Colombia, sabiendo cu nos mayornan tabata bon cuidá.

Anto na 1985 Papa a sufri un atake celebral cu a lagu’é sin por papia, i sin por lanta for di cama. Nos a bini huntu pa un reunion di famia, pa nos wak con nos por a cuida nos mayornan dje mihó manera. Nos a dicidí cu Audrey lo ta esun encargá principalmente cu cuido di Papa, i cu e mihó manera pa ami cu Robert yuda ta dor di manda carta p’e tur siman cu experencia animante, i bishit’é mas frecuentemente posibel.

Mi último bishita cerca Papa ta bibu den mi mente ainda. Normalmente e no por a forma palabra, pero despues cu nos a bis’é cu nos tabata bai México bek, di un manera of otro el a expresá un solo palabra cu hopi esfuerso i emocion: “Adios!” Asina nos a sa cu, den su curason, e tabata apoyá nos decision di sigui den nos asignacion como misionero. El a muri na juli 1987, i Mama a muri nuebe luna despues.

Un carta cu mi a ricibí di mi ruman muher biuda ta expresá bon e aprecio cu nos tur ta sinti pa nos mayornan. “Mi patrimonio cristian ricu ta di masha balor pa mi, i pa ni un solo momento mi no a sinti cu lo mi tabata mas felis si nos mayornan a scoge pa lanta nos di un otro manera. Nan ehempel di fe fuerte, sacrificio propio i pleno confiansa den Jehova a yuda mi pasa dor di momentonan tristu den bida.” Edwena a terminá bisando: “Mi ta gradicí Jehova p’e mayornan aki kende, cu echo i palabra, a mustra nos e felicidad cu nos por tin si nos edificá nos bida rond di sirbishi na nos amoroso Dios, Jehova.”

[Nota]

[Plachinan na página 22, 23]

Famia Fountain: (di robes pa drechi) Dewey, Edwena, Winnie, Elizabeth, Dewey junior; man drechi: Elizabeth cu Dewey junior riba bumper di Henschel su truck (1937); man drechi abou: Elizabeth trahando cu pancarta tempu e tabatin 16 aña