Historia di Bida

Un Hibado di Lus pa Hopi Nacion

E HISTORIA DI GEORGE YOUNG SEGUN E RELATO DI RUTH YOUNG NICHOLSON

“Con bin anto tin e silencio aki for di nos preekstoel? . . . Ki clase di hende nos lo ta si nos a keda ketu despues cu nos a ricibí prueba cu e cosnan aki di cua mi ta skirbi ta berdad? Laga nos no tene e pueblo den ignorancia, mas bien laga nos proclamá e berdad i no di un manera scondí of cu actitud di disculpá nos mes.”

E PALABRANAN aki tabata parti di Tata su carta di 33 página pa pidi nan kita su nomber como miembro di iglesia. Tabata aña 1913. Desde e tempu ei padilanti, el a start un bida yen di acontecimentu cu a lagu’é sirbi como hibadó di lus pa hopi nacion. (Filipensenan 2:15) For di tempu mi tabata mucha, mi a coleccioná relato tocante Tata su experencianan for di famia i di material histórico, i amigunan a yuda mi pone e sucesonan huntu pa haña un cuadro completo di su bida. Den hopi cos, Tata su bida ta corda mi dje bida di apostel Pablo. Mescos cu e “apostel dje nacionnan,” Tata semper tabata cla pa biaha pa hiba e mensahe di Jehova na hende di tur pais i isla. (Romanonan 11:13; Salmo 107:1-3) Laga mi conta bo tocante mi tata, George Young.

E Promé Añanan

Tata tabata e yu homber mas chikitu di John cu Margaret Young, un pareha escoses dje religion presbiteriano. El a nace dia 8 di september 1886, djis despues cu e famia a muda for di Edinburgh, Escocia, pa British Columbia den west di Cánada. Su tres ruman hombernan mas grandi—Alexander, John i Malcolm—a nace na Escocia un par di aña promé. Marion, nan ruman muher mas chikitu, cu tabatin e nomber di cariño Nellie, tabata dos aña mas yong cu Tata.

E muchanan a pasa bon, lantando riba un hacienda na Saanich, no masha leu for di Victoria, British Columbia. Na mésun tempu, nan a siña carga responsabilidad. Pues ora nan mayornan tabata regresá for di nan biahenan pa Victoria, nan tabata haña trabou pafó di cas hací i e cas na ordu.

Cu tempu, Tata cu su rumannan a bira interesá den mina i tambe den e negoshi di palu. E ruman hombernan Young a traha un bon reputacion como patruyero di palu (hende cu tabata inspeccioná tereno pa wak si por kap e palunan) i como cumpradó i bendedó di palu. Tata tabata encargá cu e transaccionnan financiero.

Cu tempu, Tata su inclinacion pa asuntunan spiritual a pon’é dicidí di bira pastor presbiteriano. Sin embargo, rond dje tempu ei sermonnan den korant di Charles Taze Russell (promé presidente di Zion’s Watch Tower Tract Society) a influenciá su bida profundamente. Loke Tata a siña a impuls’é pa skirbi i manda e carta di resignacion mencioná den e introduccion.

Den un manera bondadoso pero bon cla, Tata a usa versículonan di Bijbel pa refutá e siñansanan di iglesia cu alma humano ta inmortal i cu Dios lo tormentá alma humano pa semper den fiernu di candela. Tambe el a exponé e doctrina di Trinidad, dunando prueba cu e tabata di orígen no-cristian i sin ningun base bíblico. Dje tempu ei padilanti el a participá den e ministerio cristian imitando Jesucristo, i a usa humildemente tur su abilidadnan i fortalesa pa e gloria di Jehova.

Na 1917, bou di direccion di Sociedad Watch Tower, Tata a cuminsá sirbi como peregrino, manera tabata yama representantenan biahero di Testigonan di Jehova e tempu ei. Den stad i pueblonan den henter Cánada, el a duna discurso i a presentá e película i programa di slais conocí como e “Foto-Drama di Creacion.” Teaternan tabata yen-yen pa e bishitanan di Tata. Te cu aña 1921 tabata publicá e skema di su bishitanan di peregrino den E Toren di Vigilancia.

Un korant di Winnipeg a informá cu e Evangelista Young a papia dilanti 2.500 hende i cu hopi no por a drenta debí cu e sala tabata asina yen. Na Ottawa, el a papia riba e tema “Bai Fiernu Bin Bek.” Ei un homber di edad a informá: “Ora e discurso a caba, George Young a invitá un rij di miembronan di clero pa subi plataforma pa discutí e tema cuné, pero ningun di nan no a move. E ora ei mi tabata sa cu mi a haña e berdad.”

Tata a purba hinca mas tantu actividad spiritual posibel den su bishitanan di peregrino. Despues, e tabata pura pa coge trein p’e bai e siguiente parada programá. Ora e tabata biaha cu auto, hopi bes e tabata riba caminda pa su siguiente asignacion basta ratu promé cu desayuno. Fuera di ser celoso, Tata tabatin e reputacion di ta un homber cu consideracion i tabata conocí pa su obranan cristian i su generosidad.

Entre hopi dje promé congresonan na cua el a asistí, nan a tene unu specialmente memorabel na Edmonton, Alberta, na 1918. Henter su famia tabata presente pa e bautismo di Nellie. Tabata tambe e último biaha cu nan tur ruman homber tabata huntu. Dos aña despues, Malcolm a muri di pulmonia. Mescos cu su tres ruman hombernan i su tata, Malcolm tabatin e speransa di bida celestial, i nan tur a keda fiel na Dios te na nan morto.—Filipensenan 3:14.

Rumbo pa Teritorio den Estranheria

Despues cu Tata a completá un gira di predicacion di Cánada na september 1921, Joseph F. Rutherford, e tempu ei presidente di Sociedad Watch Tower, a mand’é n’e islanan di Caribe. E “Foto-Drama di Creacion” a cai den bon tera tur caminda cu Tata a present’é. For di Trinidad, el a skirbi: “E lugá tabata yen-yen, i gran cantidad di hende mester a bira bai cas bek. E di dos anochi e edificio tabata di pak cu hende.”

Anto na 1923, a asigná Tata p’e bai Brazil. Ei el a papia dilanti auditorionan grandi, tin biaha tabata paga hende pa traducí p’e. E Toren di Vigilancia di 15 di december 1923, a informá: “Di promé di juni pa 30 di september, ruman Young a tene 21 reunion público, cu un asistencia total di 3.600; 48 reunion di congregacion, cu un asistencia di 1.100; el a distribuí literatura grátis na portugues na un total di 5.000 ehemplar.” Hopi hende a reaccioná cu interes ora Tata a presentá e discurso “Miyones na Bida Awor Lo No Muri Nunca.”

Na dedicacion di facilidadnan nobo na Brazil dia 8 di mart 1997, e foyeto di dedicacion a informá: “1923: George Young ta yega Brazil. E ta organisá un oficina di sucursal den centro di Rio de Janeiro.” Aunke literatura bíblico tabata disponibel na spañó, tabatin necesidad di dje na portugues tambe, e idioma principal di Brazil. P’esei, dia 1 di october 1923, a cuminsá publicá E Toren di Vigilancia na portugues.

Tata a bin den contacto cu hopi hende inolvidabel na Brazil. Un di nan tabata un homber portugues bon pará cu yama Jacintho Pimentel Cabral, kende a ofrecé su cas pa tene reunion. Poco tempu despues Jacintho a aceptá e berdad bíblico i despues a bira un miembro dje personal di sucursal. Un otro tabata Manuel da Silva Jordão, un hardinero portugues hóben. El a tende un discurso público di Tata cu a motiv’é pa bai Portugal bek pa sirbi como colporteur (repartidó), manera e tempu ei tabata yama Testigonan di Jehova di tempu completo.

Tata a biaha extensivamente cu trein rond Brazil, i el a logra localisá hende interesá. Durante un di su biahenan, el a topa cu Bony i Catarina Green, i el a keda mas o ménos dos siman cerca nan, splicando nan e Scritura. Rond di shete hende dje famia e ora ei a simbolisá nan dedicacion na Jehova mediante bautismo bou di awa.

Un otro contacto cu el a haci tabata cu Sarah Bellona Ferguson na 1923. Na 1867 Sarah como hobencita, huntu cu su ruman homber Erasmus Fulton Smith i e resto dje famia, a muda di Merca pa Brazil. Desde 1899 e tabata haña e revista Toren di Vigilancia regularmente via post. Tata su bishita tabata e oportunidad tan sperá pa Sarah, su cuater yunan i un persona cu Tata a yama tanchi Sallie, bautisá. Esei tabata dia 11 di mart 1924.

No a tarda hopi cu Tata tabata predicá den otro paisnan di Sur América. Dia 8 di november 1924, el a skirbi for di Perú: “Mi a caba di parti 17.000 tratado na Lima i Callao.” Despues el a bai Bolivia pa distribuí tratado einan. Relacioná cu e bishita ei, el a skirbi: “Nos Tata ta bendicionando e esfuerso. Un indjan a yuda mi. Su cas ta na cabes dje riu Amazona. El a tuma 1.000 tratado i algun buki pa bai bek cuné.”

Mediante Tata su trabou, simia di berdad bíblico a plama den hopi pais di Centro i Sur América. E Toren di Vigilancia di 1 di december 1924, a informá: “George Young tin mas cu dos aña na Sur América. . . . E ruman stimá aki tabatin e privilegio di hiba e mensahe dje berdad na Punta Arenas, den e Estrecho di Magellan.” Tambe Tata a hiba delantera den e trabou di predicá den paisnan manera Costa Rica, Panamá i Venezuela. El a sigui padilanti maske el a haña malaria i su salú a ser afectá.

Awor pa Europa

Na mart 1925, Tata a sali rumbo pa Europa, caminda el a spera di distribuí 300.000 tratado bíblico na Spaña i Portugal i haci areglo pa ruman Rutherford presentá discursonan público. Pero despues cu el a yega Spaña, Tata a expresá su dudanan pa laga ruman Rutherford duna e discursonan ei en bista dje ambiente religioso intolerante cu tabatin.

Como contesta, ruman Rutherford a skirbi, citando Isaías 51:16: “Mi a pone mi palabranan den bo boca, i mi a tapa bo den e sombra di mi man, pa mi por planta shelu, i pone e fundeshi dje tera, i bisa Sion: Bo ta mi pueblo.” (King James Version) Tata a concluí for di esei: “Ta sigur cu e boluntad di Señor ta pa mi sigui padilanti i laga e resultadonan na dje.”

Dia 10 di mei 1925, ruman Rutherford a presentá su discurso mediante un traductor na e Teatro Novedades na Barcelona. Tabatin mas cu 2.000 hende presente, entre nan un funcionario di gobiernu i un bewaker special riba plataforma. Nan a sigui un procedura similar na Madrid, cu un asistencia di 1.200 persona. E interes cu e discursonan aki a generá, a pone cu nan a habri un oficina di sucursal na Spaña. I manera e Anuario 1978 di Testigonan di Jehova ta bisa, nan a pon’é “bou di supervision di George Young.”

Dia 13 di mei 1925, ruman Rutherford a papia na Lisboa, Portugal. Ei tambe su bishita tabata un éxito rotundo, apesar di intentonan di clero pa stroba e reunion dor di grita i kibra stul. Despues di ruman Rutherford su discursonan na Spaña i Portugal, Tata a sigui mustra e “Foto-Drama,” i tambe el a haci areglo pa imprimí i distribuí literatura bíblico den e lugánan ei. Na 1927 el a informá cu e bon nobo “a ser publicá den tur stad i pueblo na Spaña.”

Predicando na Union Soviético

Tata su siguiente asignacion di misionero tabata Union Soviético, caminda el a yega dia 28 di augustus 1928. Un carta cu el a skirbi, fechá 10 di october 1928, ta bisa en parti:

“For di dia cu m’a yega Rusia, mi por resa di berdad cu henter mi curason: ‘Laga bo reino bini.’ Mi ta siñando e idioma, pero e ta bai poco-poco. Mi traductor ta un homber masha excepcional, un hudiu, pero e ta kere den Cristo i ta stima Bijbel. Mi tabatin algun experencia interesante pero mi no sa pa cuantu tempu nan lo laga mi keda. Siman pasá mi a ser notificá pa sali den 24 ora pero mi a resolvé esei di manera cu mi por keda mas largu.”

El a haci contacto cu algun Studiante di Bijbel na Kharkov, awor un stad grandi na Ucrania, i e intercambio caluroso cu tabatin a pone nan wowonan yena cu awa di alegria. Nan tabata tene un congreso chikitu tur anochi te meianochi. Despues ora Tata a skirbi tocante e reunion aki cu e tabatin cu e rumannan, el a comentá: “Pober rumannan, e poco bukinan cu nan tin a ser confiscá i e autoridadnan no ta amabel, i tog e rumannan ta felis.”

Tata su ministerio den Union Soviético a keda resaltá den un foyeto special cu nan a parti pa esnan cu a asistí n’e dedicacion dje sucursal nobo na St. Petersburg, Rusia, dia 21 di juni 1997. E foyeto ta bisa cu nan a manda Tata Moscú, i cu el a haña permit “pa producí 15.000 ehemplar dje foyeto chikitu Libertad pa e Pueblonan i Unda e Mortonan Ta? pa distribuí na Rusia.”

Despues cu el a bin for di Rusia, a asigná Tata pa haci e trabou di peregrino na Merca. Na Sur Dakota el a bishitá e cas di Nellena i Verda Pool, rumannan muher carnal cu añanan despues a bira misionero na Perú. Nan a expresá un caluroso aprecio pa Tata su ministerio incansabel i a comentá: “Rumannan den e tempu ei di antaño definitivamente tabatin e spiritu di pionero ora cu nan tabata sali bai e lugánan den estranheria cu masha tiki posesion material pero cu un curason yen di amor pa Jehova. Esei ta loke a motivá nan na logra loke nan a haci.”

Matrimonio i di Dos Gira

Atrabes di añanan Tata tabata skirbi Clara Hubbert di Isla Manitoulin, Ontario. Nan tur dos tabata presente na e congreso na Columbus, Ohio, dia 26 di juli 1931, ora cu e Studiantenan di Bijbel a tuma e nomber Testigonan di Jehova. (Isaías 43:10-12) Un siman despues nan a casa. Djis despues, Tata a sali di biahe atrobe, riba su di dos gira di misionero atrabes dje islanan di Caribe. Ei, el a yuda organisá reunion i entrená otro rumannan den e ministerio di cas pa cas.

Mama a haña potret, postcard i carta for di Surnam, St. Kitts, i hopi otro lugá. E cartanan tabata conta dje progreso dje trabou di predicá i tin biaha tabata conta cos tocante para, bestia i mata dje pais caminda e tabata. Na juni 1932, Tata a completá su asignacion den Caribe i, biahando manera custumber p’e prijs di mas barata riba barcu, el a regresá Cánada. Despues di esei, e cu Mama a traha den e trabou di tempu completo huntu, pasando e winter di 1932/33 den e área di Ottawa cu un grupo grandi di otro ministernan di tempu completo.

Un Bida di Famia Corticu

Na 1934 mi ruman homber David, a nace. Ora e tabata chikitu ainda, e tabata para riba Mama su caha di sombré i train duna su “discursonan.” Henter su bida el a demostrá celo pa Jehova mescos cu su tata. Nan tres a biaha cu auto, cu ekipo di zonido mará riba e dak, miéntras nan a bishitá congregacionnan di punta pariba te punta pabou di Cánada. Ami a nace na 1938, ora cu Tata tabata sirbiendo na British Columbia. David ta corda con Tata a pone mi riba cama, anto Tata, Mama i David a hinca rudia rond dje cama miéntras Tata a haci un oracion di gradicimentu pa mi.

Den winter di 1939, nos tabata biba na Vancouver miéntras Tata a bishitá e congregacionnan den e área ei. Entre e hopi cartanan cu nos a coleccioná atrabes di añanan tabatin unu fechá 14 di januari 1939, cu el a skirbi ora e tabata na Vernon, British Columbia. Tata a dirigí e carta na Clara, David i Ruth, bisando: “Djis un sunchi i un brasa.” Den dje tabatin un mensahe pa nos cada un. El a skirbi cu e cosecha ta grandi einan pero e trahadónan ta poco.—Mateo 9:37, 38.

Un siman despues cu el a regresá Vancouver for di su asignacion, Tata a sak den otro na un reunion. Dokternan a diagnosticá despues cu e tabatin un tumor maligno na su celebro. Dia 1 di mei 1939, el a terminá su curso terenal. Mi tabatin nuebe luna i David tabata bai haci cincu aña. Nos mama stimá, cu tambe tabatin e speransa celestial, a keda fiel na Dios te na su morto dia 19 di juni 1963.

Un di Tata su cartanan na Mama ta resumí mashá bunita con Tata a sinti tocante su privilegio di hiba e bon nobo na hopi pais. El a bisa en parti: “Jehova den su gracia a permití mi bai n’e paisnan aki como un lus pa hiba mensahe di Reino. Laga su nomber santu sea alabá. Atrabes di imperfeccion, incompetencia i debilidad, su gloria ta briya.”

Awor yunan, nietu i bisanietunan di George i Clara Young tambe ta sirbiendo nos Dios amoroso, Jehova. Hende a yega di bisa mi cu hopi biaha Tata tabata cita Hebreonan 6:10, cu ta bisa: “Dios no ta inhustu p’e lubidá boso trabou i e amor cu boso a mustra pa su nomber.” Nos tampoco no a lubidá Tata su trabou.

[Plachi na página 23]

Mi tata, na man drechi, huntu cu su tres ruman hombernan

[Plachinan na página 25]

Tata (pará) cu rumannan Woodworth, Rutherford i Macmillan

Abou: Tata (te na punta robes) den un grupo cu ruman Russell

[Plachinan na página 26]

Tata cu Mama

Abou: Dia nan a casa

[Plachi na página 27]

Ami cu David i Mama algun aña despues cu Tata a muri