Un Punto di Bista Divino di Limpiesa Moral

“Ami, Jehova, ta bo Dios, Esun cu ta siña bo beneficiá bo mes, Esun cu ta haci bo stap den e caminda den cua bo mester cana.”—ISAÍAS 48:17.

 1, 2. (a) Ki punto di bista hende en general tin tocante moralidad sexual? (b) Cua punto di bista cristiannan tin di moralidad sexual?

NA HOPI parti di mundu awendia, a bira cu hende ta considerá conducta moral como un asuntu personal. Nan ta mira relacion sexual como un expresion natural di cariño cu nan por permití nan mes ki ora cu nan kier, no como algu cu mester keda limitá na matrimonio. Nan ta sinti cu si e no ta perhudicá niun hende, no tin nada malu aden si bo dicidí pa bo mes con bo ta comportá bo. Den nan bista, no mester husga hende pa loke ta moralidad, i specialmente pa loke ta toca sex.

² Esnan cu a yega na conocé Jehova tin otro punto di bista. Nan ta contentu di sigui guia bíblico dor cu nan stima Jehova i kier agrad’é. Nan ta reconocé cu Jehova ta stima nan, i ta duna nan guia cu ta pa nan mes bon, guia cu di berdad lo beneficiá nan i haci nan felis. (Isaías 48:17) Ya cu Dios ta e Fuente di bida, ta razonabel cu nan ta acudí na dje pa guia tocante con pa usa nan curpa, specialmente den e asuntu aki cu ta asina estrechamente ligá cu transmision di bida.

Un Regalo di un Creador Amoroso

 3. Kico hopi hende den cristiandad a ser siñá tocante relacion sexual, i di otro banda, kico Bijbel ta siña tocante e tema aki?

³ Na contraste cu e mundu seglar djawe, algun hende di cristiandad a siña cu relacion sexual ta cos di bergwensa, pecaminoso, i cu e “picá original” den hofi di Eden tabata cu Eva a seducí Adam sexualmente. E punto di bista ei ta bai contra loke Scritura ta bisa. E registro bíblico ta papia di e promé pareha humano como “e homber i su esposa.” (Génesis 2:25) Dios a manda nan haña yu, bisando: “Sea fructífero i bira hopi i yena e tera.” (Génesis 1:28) Lo no ta lógico cu Dios a manda Adam cu Eva producí yu, pa despues e castigá nan dor cu nan a hiba su instruccionnan a cabo.—Salmo 19:8.

 4. Pakico Dios a duna hende facultad sexual?

⁴ Den e ordu ei duná na nos promé mayornan, i cu a ser ripití na Noe cu su yunan, nos ta mira kico ta e propósito principal di relacion sexual, esta, producí yu. (Génesis 9:1) Sin embargo, e Palabra di Dios ta mustra cu su sirbidónan casá no ta obligá na tene relacion sexual solamente pa producí yu. E relacionnan ei por satisfacé necesidadnan emocional i físico apropiadamente, i nan por ta un fuente di placer pa un pareha casá. Ta un manera pa nan expresá nan cariño profundo pa otro.—Génesis 26:8, 9; Proverbionan 5:18, 19; 1 Corintionan 7:3-5.

Límite Cu Dios A Establecé

 5. Ki prohibicionnan Dios a pone riba actividad sexual di ser humano?

⁵ Aunke sexualidad ta un regalo di Dios, no mester eherc’é sin límite. E principio aki ta aplicá asta den e areglo matrimonial. (Efesionan 5:28-30; 1 Pedro 3:1, 7) Pafó di matrimonio, relacion sexual ta prohibí. Bijbel ta mustra e asuntu aki di manera masha specífico. Den e Ley cu Dios a duna e nacion di Israel, a ser declará: “Bo no mag cometé adulterio.” (Éxodo 20:14) Despues, Jesus a incluí “fornicacion” i “adulterio” huntu cu “razonamentu perhudicial” cu ta originá den curason i ta contaminá hende. (Marco 7:21, 22) Apostel Pablo a ser inspirá pa urgi e cristiannan na Corinto: “Hui di fornicacion.” (1 Corintionan 6:18) I den su carta n’e hebreonan, Pablo a skirbi: “Laga matrimonio sea onorabel entre tur, i e cama di matrimonio sea sin contaminacion, pasobra Dios lo husga fornicadónan i adúlteronan.”—Hebreonan 13:4.

 6. Den Bijbel, kico e palabra “fornicacion” ta encerá?

⁶ Kico e palabra “fornicacion” kier men? E ta bini dje palabra griego por·néi·a, cu tin bes ta ser aplicá na relacion sexual entre hende cu no ta casá. (1 Corintionan 6:9) Na otro lugánan, manera na Mateo 5:32 i Mateo 19:9, e término ta ser usá den un sentido mas amplio, i ta referí tambe na adulterio, incesto i relacion sexual cu bestia. Otro prácticanan sexual entre hende cu no ta casá cu otro, manera sex oral i anal, i manipulacion sexual di miembronan sexual di un otro persona, tambe por ser yamá por·néi·a. Tur e tipo di prácticanan ei ta ser condená den e Palabra di Dios, sea di manera specífico of indirecto.—Levítico 20:10, 13, 15, 16; Romanonan 1:24, 26, 27, 32.a

Beneficiá di Dios Su Leynan Moral

 7. Con nos ta beneficiá dor di keda moralmente limpi?

⁷ Obedecé Jehova su guia tocante conducta sexual por ta un reto pa hende imperfecto. E famoso filósofo hudiu di siglo 12 Maimonides, a skirbi: “Ningun prohibicion den henter Torá [Ley di Moises] ta asina difícil pa warda manera e unionnan prohibí [manera incesto] i relacionnan sexual ilícito.” Sin embargo, si nos obedecé Dios su guia, nos lo saca hopi beneficio. (Isaías 48:18) Por ehempel, nos obedencia den e asuntu aki ta yuda protehá nos di malesa transmití sexualmente, algun di nan incurabel i mortal.b Nos ta ser protehá di embarasonan pafó di matrimonio. Aplicacion di sabiduria divino ta contribuí na un concenshi limpi tambe. E ta promové respet propio i ta haci nos gana respet di otro hende, incluso nos famia, nos partner, nos yunan i nos rumannan cristian. Ademas e ta promové un actitud saludabel i positivo den nos en cuanto sex, cu lo contribuí na felicidad den matrimonio. Un ruman muher cristian a skirbi: “E berdad dje Palabra di Dios ta e mihó proteccion cu ta existí. Mi ta sperando pa casa, i ora mi casa lo mi ta orguyoso pa bisa e homber cristian cu mi a casa cuné, cu mi a keda decente.”

 8. Den ki maneranan nos conducta decente ta promové adoracion puru?

⁸ Dor di mantené nos conducta decente, nos por yuda hopi tambe pa combatí ideanan robes tocante adoracion berdadero, i atraé hende na e Dios cu nos ta adorá. Apostel Pedro a skirbi: “Mantené boso conducta excelente entre e nacionnan, pa den loke nan ta papia contra boso como malechor, nan, como testigo ocular di boso obranan excelente, por glorificá Dios den e dia di su inspeccion.” (1 Pedro 2:12) Asta si hende cu no ta sirbi Jehova keda sin reconocé of aprobá nos conducta decente, nos por ta sigur cu nos Tata celestial ta mira, ta aprobá, i asta ta alegrá di mira nos esfuerso pa sigui su guia.—Proverbionan 27:11; Hebreonan 4:13.

 9. Pakico nos mester tin confiansa den Dios su guia, maske nos no comprendé su motibunan completamente? Ilustrá.

⁹ Fe den Dios ta enbolbé confia cu e sa kico ta mihó pa nos, asta si nos no ta comprendé completamente tur e motibunan pakico e ta guia nos n’e manera cu e ta hacié. Considerá un ehempel for dje Ley di Moises. Un reglamentu tocante campamentu militar a rekerí pa dera sushi humano pafó dje campamentu. (Deuteronomio 23:13, 14) Kisas e israelitanan a puntra nan mes pakico e regla ei tabata; kisas algun di nan no a haña cu e ta necesario. Pero entre tantu, ciencia médico a bin reconocé cu e ley aki a yuda tene nan suministro di awa liber di contaminacion, i a percurá proteccion contra hopi enfermedad transmití dor di insecto. Di igual manera, tin motibu spiritual, social, emocional, físico i sicológico pakico Dios a limitá relacion sexual na e cama matrimonial. Awor, laga nos considerá un par di ehempel bíblico di personanan cu a mantené limpiesa moral.

Josef—Bendicioná pa Su Conducta Moral

10. Ken a purba seducí Josef, i con el a contestá?

¹⁰ Casi sigur bo conocé e ehempel bíblico di Josef, yu di Jacob. Cu 17 aña di edad el a bira esclabo di Pótifar, hefe di wardaespalda di fárao di Egipto. Jehova a bendicioná Josef, i cu tempu el a ser nombrá riba henter e cas di Pótifar. Pa tempu cu el a haci 20 aña, Josef a bira “bunita di figura i bunita di aparencia.” El a hala atencion di e casá di Pótifar, kende a purba seducié. Josef a mustra su posicion bon cla, i a splica cu si e consentí, esei lo no ta un traicion contra su doño so, sino tambe un ‘picá contra Dios.’ Di con Josef a razoná asina?—Génesis 39:1-9.

11, 12. Apesar cu no tabatin ningun ley skirbí percurá dor di Dios cu a prohibí fornicacion i adulterio, kico ta loke lo a motivá Josef su razonamentu?

¹¹ Evidentemente Josef su decision no tabata a base di miedu cu hende lo descubrié. Josef su famia tabata biba leu, i su tata a kere cu e tabata morto. Si Josef a participá den inmoralidad sexual, nunca su famia lo a haña sa. Probablemente tal picá lo a keda scondí di Pótifar i su criánan homber tambe, ya cu tin bes nan no tabata na cas. (Génesis 39:11) Pero Josef tabata sa cu e no por a sconde un conducta asina for di Dios.

¹² Josef lo mester a razoná riba loke e tabata sa tocante Jehova. Sin duda e tabata sa cu den hofi di Eden, Jehova a proclamá: “P’esei un homber lo bandoná su tata i su mama i tin cu pega na su esposa i nan tin cu bira un solo carni.” (Génesis 2:24) Ademas, casi sigur Josef tabata na altura di loke Jehova a yega di bisa un rey filisteo cu tabata determiná pa seducí Josef su bisa-wela Sara. Jehova a bisa e rey ei: “Considerá bo mes morto pa motibu dje muher cu bo a tuma, pasobra un otro doño ta pose’é como su esposa. . . . I mi tabata evitando bo tambe di peca contra mi. Ta p’esei mi no a permití bo mishi cuné.” (Génesis 20:3, 6) Pues, aunke Jehova no a percurá un ley skirbí ainda n’e tempu ei, tabata bisto kico el a pensa tocante matrimonio. Josef su sentido moral, huntu cu su deseo di agradá Jehova, a pon’é rechasá inmoralidad.

13. Posiblemente, con bini Josef no por a evitá Pótifar su casá?

¹³ Pero e casá di Pótifar tabata persistente. E tabata suplik’é “dia aden dia afó” p’e drumi cuné. Di con Josef no a djis purba evit’é? Wel, como catibu, e tabatin trabou pa haci, i e no por a haci masha cos pa cambia su situacion. Evidencia arkeológico ta pone nos pensa cu dor dje manera cu casnan egipcio tabata diseñá, bo mester a pasa dor dje parti principal dje cas pa bo yega n’e depósitonan. Pues, kisas tabata imposibel pa Josef evitá Pótifar su casá.—Génesis 39:10.

14. (a) Kico a pasa cu Josef despues cu el a hui for dje casá di Pótifar? (b) Con Jehova a bendicioná Josef pa su fieldad?

¹⁴ Riba un dia nan tabata nan so na cas. E casá di Pótifar a gara Josef i sclama: “Drumi cu mi!” El a hui. Heridá pa su rechaso, e casá di Pótifar a acusá Josef di a purba viol’é. Cu ki consecuencia? Jehova a recompensá Josef mesora pa su proceder íntegro? No. Nan a tira Josef den prizon i mar’é na cadena. (Génesis 39:12-20; Salmo 105:18) Jehova a mira e inhusticia, i cu tempu el a halsa Josef for di prizon pa palacio. El a bira e di dos persona mas poderoso na Egipto, i a ser bendicioná cu un casá i cu yu. (Génesis 41:14, 15, 39-45, 50-52) Tambe, e relato di Josef su integridad a keda registrá un 3,500 aña pasá pa Dios su sirbidónan dje tempu ei padilanti pensa ariba. Eseinan sí ta bendicionnan maraviyoso! I ta dor cu Josef a pega na Dios su leynan hustu, el a ricibí nan. Awe, di igual manera, kisas no ta semper nos ta mira e beneficio inmediato di mantené integridad moral, pero nos por ta sigur cu Jehova ta mira, i cu lo e bendicioná nos na su debido tempu.—2 Crónicanan 16:9.

Job Su ‘Pacto cu Su Wowo’

15. Kico Job su ‘pacto cu su wowo’ tabata?

¹⁵ Un otro wardadó di integridad tabata Job. Durante e pruebanan cu Diabel a caus’é, Job a repasá su bida i a declará cu e tabata dispuesto di ricibí castigu severo si el a violá, entre otro, Jehova su principio tocante moralidad sexual. Job a bisa: “Mi a cera un pacto cu mi wowo. Pues, con mi por mustra mi mes atento na un bírgen?” (Job 31:1) Cu esaki, Job tabata kier men cu den su determinacion pa warda su integridad na Dios, el a keda determiná di evitá asta di keda wak un hende muher cu pasion. Claro cu e tabata mira hende muher den su bida diario, i si nan tabatin mester di yudansa, posiblemente el a yuda nan. Pero ser atento den e sentido di busca metanan romántico, esei e no a permití su mes. Promé cu su pruebanan a cuminsá, e tabata un homber masha próspero, “esun di mas grandi di tur e orientalnan.” (Job 1:3) Tog, e no a usa e poder di rikesa pa atraé yen di muher. Claramente, nunca el a hunga cu e idea di entregá na relacion sexual ilícito cu muhernan mas hóben.

16. (a) Di con Job ta un excelente ehempel pa cristiannan casá? (b) Den ki manera e hende hombernan den tempu di Malakías a comportá nan mes hopi diferente for di Job, i kico djawe?

¹⁶ Asina Job a desplegá integridad moral den tempu bon i malu. Jehova a observá esaki i a bendicion’é abundantemente. (Job 1:10; 42:12) Esta un excelente ehempel Job ta pa cristiannan casá, tantu hende homber como hende muher! Nada straño cu Jehova a stim’é asina tantu! Na contraste, comportacion di hopi hende awe ta mas parecido na loke a sosodé den tempu di Malakías. E profeta ei a denunciá e manera cu hopi esposo tabata bai laga nan pareha, hopi bes pa casa cu muher mas hóben. Jehova su altar tabata tapá cu lágrima di esposanan bandoná, i Dios a condená esnan cu a actua “di un manera traicionero” asina cu nan pareha.—Malakías 2:13-16.

Un Muher Hóben Decente

17. Den ki sentido e sulamita tabata manera “un hofi cerá”?

¹⁷ Un di tres wardadó di integridad tabata un bírgen sulamita. Siendo hóben i bunita, el a haña no solamente afecto di un hóben wardadó di carné, pero tambe di Sálomon, e rey ricu di Israel. Atrabes di henter e bunita historia cu Cantica di Sálomon ta relatá, e sulamita a keda decente, ganando asina e respet di esnan cu a rondon’é. Apesar cu e sulamita a rechas’é, Sálomon a ser inspirá pa registrá e relato. E wardadó cu el a stima tambe a respetá su conducta decente. Na un dado momento el a refleccioná cu e sulamita tabata manera “un hofi cerá.” (Cantica di Sálomon 4:12) Na Israel di antigwedad, hofinan bunita tabata consistí di un variedad deleitabel di mata, flor cu holó dushi, i palu grandi. Generalmente un hofi asina tabata cerá cu un tranké of muraya, i por a drent’é solamente dor di un entrada na lok. (Isaías 5:5) P’e wardadó, e sulamita su puresa moral i bunitesa tabata manera un hofi asina, cu un beyesa singular. E tabata completamente decente. Su tierno cariño tabata disponibel pa su futuro casá so.

18. Kico e relatonan di Josef, Job i e sulamita ta yuda nos tene na mente?

¹⁸ E sulamita a pone un excelente ehempel den integridad moral pa hende muher cristian djawe. Jehova a mira i apreciá e birtud dje mucha muher sulamita, i a bendicion’é mescos cu el a bendicioná Josef i Job. Nan echonan di integridad ta registrá den e Palabra di Dios, como guia pa nos. Maske nos esfuerso pa mantené integridad awe no ta keda registrá den Bijbel, Jehova tin un “buki di recuerdo” pa esnan cu ta busca pa haci su boluntad. Laga nos no lubidá nunca cu Jehova ta “presta atencion” i ta alegrá segun cu nos ta haci esfuerso lealmente pa keda moralmente limpi.—Malakías 3:16.

19. (a) Con nos mester considerá limpiesa moral? (b) Kico e siguiente artículo lo trata?

¹⁹ Maske hende sin fe por tene mofa, nos ta alegrá den nos obedencia na nos Creador amoroso. Nos tin un moralidad superior, un moralidad divino. Ta algu cu nos mester ta orguyoso di dje, algu pa atesorá. Dor di mantené un posicion moral limpi, nos por tin deleite den e bendicion di Dios, i keda cu un speransa briyante di bendicionnan sin fin den futuro. Pero den un sentido práctico, kico nos por haci pa keda moralmente limpi? E siguiente artículo lo trata e pregunta importante aki.

[Nota]

Bo Por Splica?

• Kico Bijbel ta siña tocante relacion sexual?

• Kico e palabra “fornicacion” ta encerá den Bijbel?

• Con nos ta beneficiá dor di keda moralmente limpi?

• Di con Josef, Job i e bírgen sulamita ta ehempelnan excelente pa cristiannan djawe?

[Plachi na página 9]

Josef a hui di inmoralidad

[Plachi na página 10]

E mucha muher sulamita tabata manera “un hofi cerá”

[Plachi na página 11]

Job a cera ‘un pacto cu su wowo’