“Bini Serka Mi, . . . i Lo Mi Refreská Boso”

Oumento Fenomenal Ta Rekerí Ekspanshon Rápido

“BINI serka mi, . . . i lo mi refreská boso,” Hesukristu a bisa. (Mateo 11:28, NW) Ki un invitashon konmovedor e Kabes di e kongregashon kristian ta ekstendé! (Efesionan 5:23) Ora nos reflekshoná riba e palabranan ei, nos no por keda sin apresiá un fuente importante di refreskamentu: asosiashon ku nos rumannan spiritual na reunionnan kristian. Siguramente nos ta di akuerdo ku e salmista ku a kanta: “Mira, ki bon i ki dushi ta pa rumannan biba huntu den armonia!”—Salmo 133:1.

Sí, e personanan ku nos ta topa na e reunionnan pa adorashon ta e mihó asosiashon ku nos por tin, i e ambiente spiritual ta agradabel i sin riesgo. Ku bon motibu anto un hóben kristian a bisa: “Mi ta bai skol henter dia, i esei ta kaba ku mi. Pero e reunionnan ta manera un oásis den desierto, kaminda mi ta ser refreská pa por logra pasa e siguiente dia na skol.” Un hóben di Nigeria a bisa: “Mi a ripará ku asosiashon será ku otronan ku ta stima Yehova ta yuda mi keda serka di Yehova.”

E Salon di Reino lokal di Testigunan di Yehova ta sirbi efikasmente komo e sentro pa adorashon berdadero den komunidat. Na mayoria parti ta tene e reunionnan na Salon di Reino por lo ménos dos bes pa siman, i e personanan ku ta studia Beibel ku e Testigunan ta ser animá pa kuminsá asistí mas pronto posibel ya asina nan por benefisiá di e asosiashon refreskante ku tin einan.—Hebreonan 10:24, 25.

Un Nesesidat Urgente

Sin embargo nos mester menshoná ku no ta tur Testigu di Yehova ta disfrutá di un Salon di Reino apropiado. Oumento fenomenal den e kantidat di proklamadó di Reino rònt mundu a krea un nesesidat urgente. Ainda tin mester di míles di Salon di Reino, foral den paisnan den desaroyo.—Isaías 54:2; 60:22.

Un ehèmpel: Tabatin solamente dies Salon di Reino pa 290 kongregashon den e kapital di e Repúblika Demokrátiko di Kongo. E pais ei tin mester di hopi Salon di Reino urgentemente. Na Angola mayoria kongregashon ta reuní gewon den aire liber pasobra nan tin un kantidat limitá di Salon di Reino. I den hopi pais mas tin mesun nesesidat.

P’esei for di 1999 e rumannan a hasi un esfuerso organisá pa yuda ku konstrukshon di Salon di Reino den paisnan kaminda tin poko rekurso. Pa yuda ku e proyektonan di konstrukshon den e paisnan ei, Testigunan eksperensiá a ofresé nan servisionan boluntariamente. Ora kombiná e esfuerso aki ku e aktitut dispuesto di e boluntarionan lokal ku ta hasi nan mes disponibel, e resultadonan ta hopi animante. E Testigunan lokal na nan turno ta benefisiá di e entrenamentu ku nan ta haña. Tur esaki ta yuda kumpli ku e nesesidat di konstrukshon di Salon di Reino den nan respektivo paisnan.

Di e manera ei e estilo fleksibel di konstruí Salon di Reino, ku ta hasi uso di métodonan i materialnan lokal, ta risibí yudansa práktiko. E meta no ta pa solamente kumpli ku e tremendo nesesidat ku tin pa Salon di Reino, sino tambe pa desaroyá un programa di mantenshon ku ta pas ku sirkunstansianan lokal.—2 Korintionan 8:14, 15.

Desaroyonan Animante

Kiko ta e resultado di e esfuersonan aki pa perkurá lugánan di adorashon? Na prinsipio di aña 2001, un rapòrt for di Malawi a deklará: “Loke a ser lográ den e pais aki ta realmente impreshonante. Den e siguiente dos lunanan, nos lo kompletá mas Salon di Reino.” (Potrèt 1 ku 2) Na Togo boluntarionan a logra konstruí vários Salon di Reino simpel den último lunanan. (Potrèt 3) E ekselente trabou di boluntarionan dispuesto tambe ta yuda perkurá Salonnan di Reino apropiado na Mèksiko, Brazil i otro pais.

Kongregashonnan ta ripará ku ora konstruí un Salon di Reino, e hendenan lokal ta realisá ku Testigunan di Yehova t’ei pa keda. Hopi hende aparentemente no kier a asosiá ku e Testigunan, sino te ora ku nan a haña un lugá apropiado pa adorashon. Kongregashon Nafisi na Malawi ta informá: “Awor ku nos tin un Salon di Reino apropiado, e ta resultando den un bon testimonio. P’esei ta fásil pa kuminsá studionan di Beibel.”

Rumannan di Kongregashon Krake na Benin a soportá hopi chèrchi den pasado pasobra e Salon di Reino ku nan tabatin promé tabata hopi primitivo kompará ku algun iglesia. (Potrèt 4) Awor e kongregashon tin un bunita Salon di Reino nobo ku ta representá adorashon berdadero na un manera simpel pero digno. (Potrèt 5) E kongregashon aki tabatin 34 publikadó di Reino ku un promedio di 73 persona presente na reunion riba djadumingu. Pero 651 persona a asistí na e dedikashon di e Salon di Reino. Mayoria di nan tabata hende di e stat ku a haña un bon impreshon ora nan a mira ku e Testigunan por a traha un salon den un tempu asina kòrtiku. Reflekshonando riba desaroyonan den pasado relashoná ku esaki, e sukursal di Zimbabwe a skirbi: “Denter di un luna ku traha un Salon di Reino nobo, asistensia por lo general ta bira dòbel.”—Potrèt 6 i 7.

Sin duda, e hopi Salonnan di Reino nobo ta yuda perkurá lugá kaminda tantu kristiannan dediká komo hende interesá por haña refreskamentu spiritual. Un Testigu na Ukrania a bisa despues ku nan kongregashon a kuminsá usa e Salon di Reino nobo: “Nos ta sinti un gran goso. Nos a mira ku nos propio wowo kon Yehova ta yuda su pueblo.”

[Kuadro/Plachinan na página 10, 11]

Sosten Generoso Ta Ser Apresiá

Testigunan di Yehova ta masha emoshoná pa mira e progreso rápido ku a ser hasí pa kumpli ku e nesesidat urgente ku tin rònt mundu pa Salonnan di Reino. E oumento konstante ku tin di e kantidat di adoradó di Yehova den vários pais ta pone ku mester bai traha hopi Salon di Reino mas den futuro. Figurá bo ku komo promedio durante e aña di sirbishi 2001, tabata forma 32 kongregashon nobo tur siman! E kongregashonnan ei mester di lugá pa reuní i adorá.

Pero por surgi e pregunta: ‘Kon nos ta finansiá proyektonan manera konstrukshon di Salonnan di Reino nobo, foral den paisnan kaminda e rumannan tin poko rekurso finansiero?’ E kontesta ta: mediante sosten di Dios i tambe generosidat humano.

Yehova, di akuerdo ku su promesa, ta drama su spiritu santu riba su sirbidónan, loke ta kapasitá nan ‘pa hasi bon, pa ta riku den bon obra, pa ta generoso i dispuesto pa kompartí.’ (1 Timoteo 6:18) Dios su spiritu ta motivá Testigunan di Yehova pa sostené e trabou di prediká e Reino den tur manera: dedikando nan tempu, energia, labor personal i otro rekursonan na aktividatnan kristian.

Un aktitut di duna libremente ta loke ta motivá e Testigunan i otro hende ku ta yuda ku e ekspanshon i ku ta kontribuí finansieramente ku e trabou di konstrukshon. Fuera di yuda kubri e gastunan regular di e kongregashon lokal, nan ta duna kontribushon pa e trabou di konstrukshon den otro partinan di mundu.

Den kada kongregashon tin kahanan ku etikèt ku ta indiká bon kla: “Kontribushon pa e Obra Mundial—Mateo 24:14.” Eiden hende por depositá donashonnan boluntario si nan ta deseá. (2 Reinan 12:9) Ta apresiá tur donashon, grandi i chikí. (Marko 12:42-44) Ta usa e fondonan aki den vários manera segun e nesesidat, entre otro, pa konstrukshon di Salonnan di Reino. No ta usa e plakanan ei pa paga salario di atministradónan, pasobra Testigunan di Yehova no tin esei.

E kontribushonnan finansiero na e obra mundial ta kumpli ku nan propósito? Sigur ku sí. E sukursal na Liberia—un pais destrosá pa guera sivil—ta informá ku mayoria Testigu lokal ta konfrontá desempleo i problemanan finansiero serio. Kon e pueblo di Yehova den e pais aki lo por haña lugánan apropiado pa adorashon? E sukursal ta bisa: “Lo usa e kontribushon generoso di e rumannan di otro pais pa finansiá e trabou. Ki un areglo sabí i amoroso!”

E rumannan lokal tambe ta kontribuí, apesar di nan rekursonan limitá. E pais afrikano Sierra Leone ta informá: “E rumannan lokal ta sostené e esfuerso i gustosamente ta kontribuí ku nan labor i ku loke nan por finansieramente pa sostené e konstrukshon di Salonnan di Reino.”

Na final di kuenta, e trabou di konstrukshon aki ta trese alabansa na Yehova. E rumannan na Liberia ta bisa yen di entusiasmo: “Konstrukshon di lugánan apropiado pa adorashon rònt e pais lo mustra e hendenan ku adorashon berdadero t’ei pa keda i lo dòrna i duna dignidat na e gran nòmber di nos Dios.”